¹ Mu myaka ikumi na yasano iya wufumu wakwe Tiberiyasi Siza -- pano Ponshasi Pilato walinji amulasi uwa Yudeya, Herodi walinji amfumu ya mu Galileya, nu munyina wakwe Filipu walinji a mfumu mu chiputulwa cha Itureya na Trakonitis, swinya Lisaniyasi walinji a mfumu ya Abilene, ² mu mphindi ya simapepo mukulu u Anasi nu Kayafasi -- izwi lyakwe Leza alyiza kwe Yohani umwana kwe Zakariya mu lupalang'ang'a. ³ Ayile mu chiputulwa ich kuliwilizya Yorodani, akulumbilila uwubatizyo wa kutontholokwa ukutetelwa ku mawembuko. ⁴ Ndivino chawalikwa mwe kalata wakwe Iyizaya umutumwa, ''Izwi lya wenga akupunda mu lupalang'ang'a, 'Mupekanie inzila yakwe Mfumu, muziwike inzila zyakwe ziyololoke. ⁵ Imikonkho yonsi yiliyizuzwa, swinya imyamba ni vyulu viliwulumukwa, ni nzila nyongane zili yololoswa, swinya mu masyo amawipe mulizengwa imisewo, ⁶ swinya awanthu wonsi walilola ukutulwa kwakwe Leza.''' ⁷ Nga Yohani atili ku mawumba yano yizanga ukuti yabatizwe na weliwe, ''Mwe wana wa vipili! Wuzye weweni wino wasoka mwemwe ukuti musamale ukufuma ku wukali wuno wukwiza? ⁸ Achaleka, mukome ivikomwa vino viyanine nu kutontholokwa, swinya mutakatalike ukuvwanga mukasi mwinu, 'Tuli nu Abrahamu e tata witu,' amuno nkhuwanena ukuti Leza angakatusya awana wakwe Abrahamu ukufuma ku mawe yaa. ⁹ Na nombanye imphasa yazunzulwa mwisika lya miti. Achaleka wuliwonsi umuti wumo wusikoma ivikomwa ivizima wukaputulwa nu kusumbwa mu mulilo.'' ¹⁰ Ngapano amawumba yatwalilila ukukolowozya weliwe, yatinji, ''Achani nomba chino tungachita?'' ¹¹ Atolelela nu kuti kwe woliwo, ''Ndi wumwi ali na malaya yawili, ape lyonga kwe wino asi nanthi limwi, swinya weyo wenga ali ni chakulya achite wowonye.'' ¹² Awa kasonkhesya misonkho nawonye wizile ukuti wabatizwe, nga awati kwe weliwe, ''Musambilizya, tufwile tuchite chani?'' ¹³ Atili kwe woliwo, ''Mutize mwasenda indalama izivule ukulusya zino mwalamulwa ukusenda.'' ¹⁴ Awa vita nawonye wamuwuzichisya, ukuti, ''Nga sweswe? Tufwile tuchite chani?'' Atili kwe woliwo, ''Mutakapoke imphiya ku maka ukufuma kwe aliwensi, swinya mutakanenele nanthi wumwi ivya wufi. Muwayikuta na malipilo yinu,'' ¹⁵ Nomba lyo awanthu walinji wakulindilichisya e Kristu ukuti ayize, aliwensi alinji amuzunguke mu myenzo yawo ivya kwe Yohani, ndi pamwi angawa we Kristu. ¹⁶ Yohani atolelela pa kuvwanga kwe woliwo wonsi, ''Nene, nkhuwabatizya na minzi, kweni wumwi akwiza wino ali na maka ukusya nene, swinya nenji nthenelela nu kusapula indyatu zyakwenye. Aliwabatizya nu Muzimu Mwimichile swinya nu mulilo. ¹⁷ Ichakweyela chakwe chili mwi kasa lyakwe ukuti ayele ichetechete ukufumya ipa kweyela nu kuwunganika imphumba mu nkhoma yakwe. Ukuwa aliyocha ilyelelo nu mulilo wuno wutalitela wuzime.'' ¹⁸ Ni mikwezye yinji iyivule swinya, Yohani wawizizye ilandwe zima ku wanthu. ¹⁹ Pano Herodi imfumu yakalipizilwe muno watwazile e Herodiya emuka munyina, na pe vyonsi vinji iviwipe ivinthu vino Herodi wawomvile, ²⁰ wonjelezizye choo ku vyonsi vyoo, acho wiyalizile Yohani mu ng'anda ya vingololo. ²¹ Nomba chiza chawa, pano awanthu wonsi wabatizwa, Yesu nawenye abatizwa, nga pano achilinji akupepa, kwiyulu akwiyuka, ²² nga u Muzimu Mutele mu miwele ya muwili awika ngati ankhunda, nga izwi ukufuma mwiyulu, ''Wewe we Mwanana wane, wino nakunda. Nkhusechela na wewe.'' ²³ Pano Yesu atalika umulimo wakwe, alinji ni myaka amakumi yatatu mu nkhulo. Alinji a mwana (ndivino chalinji) wakwe Yosefe umwana kwe Heli, ²⁴ umwana kwe Mathati, umwana kwe Levi, umwana kwe Meleki, umwana kwe Yanayi, umwana kwe Yosefe. ²⁵ Yosefe alinji a mwana kwe Matiyasi, umwana kwe Amosi, umwana kwe Nahumu, umwana kwe Esili, umwana kwe Nagayi, ²⁶ umwana kwe Maati, umwana kwe Matiyasi, umwana kwe Semeyini, umwana kwe Yosechi, umwana kwe Yoda. ²⁷ Yoda alinji a mwana kwe Yoanani, umwana kwe Resa, umwana kwe Zerubabelo, umwana kwe Salatiyele, umwana kwe Neri, ²⁸ umwana kwe Melechi, umwana kwe Adi, umwana kwe Kosamu, umwana kwe Elimadamu, umwana kwe Eri, ²⁹ umwana kwe Yoswa, umwana kwe Eliyeza, umwana kwe Yorimu, umwana kwe Mathati, umwana kwe Levi. ³⁰ Levi alinji a mwana kwe Simiyoni, umwana kwe Yuda, umwana kwe Yosefe, umwana kwe Yonamu, umwana kwe Eliyakimu, ³¹ umwana kwe Meleya, umwana kwe Mena, umwana kwe Matatha, umwana kwe Natan, umwana kwe Davide, ³² umwana kwe Yese, umwana kwe Obedi, umwana kwe Bowazi, umwana kwe Salimoni, umwana kwe Nashoni. ³³ Nashoni alinji a mwana kwe Aminadabu, umwana kwe Adimini, umwana kwe Arini, umwana kwe Hezironi, umwana kwe Perezi, umwana kwe Yuda, ³⁴ umwana kwe Yakobi, umwana kwe Isaki, umwana kwe Abrahamu, umwana kwe Tera, umwana kwe Nahori, ³⁵ umwana kwe Serugi, umwana kwe Rewu, umwana kwe Pelegi, umwana kwe Eberi, umwana kwe Shela. ³⁶ Shela alinji amwana kwe Kayinani, umwana kwe Arifakadi, umwana kwe Shemu, umwana kwe Nowa, umwana kwe Lameki, ³⁷ umwana kwe Methusela, umwana kwe Enochi, umwana kwe Yaredi, umwana kwe Mahalaleli, umwana kwe Kayinani, ³⁸ umwana kwe Enosi, umwana kwe Seti, umwana kwe Adamu, umwana kwe Leza.