¹ Nomba mu mandanye yayo, chizile chawa ivya kuti Kayisale Agasitasi wizile atuma ipingulo ukuti kuwe ukupenda kwa wuvule wa wanthu wano wikala munsi yansi iya pansi. ² Koo kwalinji akupenda kwa wanthu kwa kutallichila pano Kwiriniyasi walinji we bwanamukubwa wa Siriya. ³ Achaleka aliwensi ayile ku musumba wakwe ukuti aye apendwe. ⁴ Yosefe nawenye ayile ukufuma mu Galileya, ukufuma mu musumba wa Nazareti, ukuya mu Yudeya, ku musumba wakwe Davidi, wuno wuwitwa Betelehemu, umulandu alinji mu ng'anda ya luko lwakwe Davidi. ⁵ Ayile kulyanye ukuwalisya ponga nu Mariya, wino alinji nukuti awe amuchi swinya alinji ⁶ Nomba kwiza kwawa pano walinji kulyanye, imphindi iyifika ukuti akwate umwana wakwe. ⁷ Akwasile umwana umulumendo, e katote wakwe, swinya wavwinsile weliwe mu tumyenda ututali utulepuke nga amulambalika mwi pondo, umulandu kutalinji ikasi mu ng'anda ya walendo. ⁸ Mwalinji wakachema mu chiputulwa chilyanye wano wikalanga mu mphanga, ukulolela ivichemo vyawo uwusiku. ⁹ U mungelo wa Mfumu alolesile kwe woliwo, nga uwuchindame wakwe Mfumu awuwala ukuliwilizya woliwo, nga awizuzwa ni nthete iyikulu. ¹⁰ Ngapano umungelo atili kwe woliwo, ''Mutati mwatina, umulandu nawaletela ilandwe zima lino lilileta ichimwemwe ichikulu ku wanthu wonsi. ¹¹ Ilelo e katula akwasilwe muno mwemwe mu musumba wakwe Davidi! A Kristu Imfumu! ¹² Choo achimanyikwilo chino chilipewa kwe mwemwe: Mulizana umwana umuvwintchile mu tumyenda utulepuke swinya alazile mwi pondo.'' ¹³ Paponye apaliponga nu mungelo palinji iwumba ikulu ukufuma mwiyulu, alitumvya leza nga aliti, ¹⁴ ''Uwuchindame kwe Leza mupela ukulusya, swinya leka kuwe umutende munsi ya pansi pakasi pa wanthu mwakwe wano Leza akusechela.'' ¹⁵ Kwiza kwawa ivya kuti pano awangelo wapita ukufuma kwe woliwo ukuya mwiyulu, wakachema awati kwe wenga nu muwuye, ''Lekani tuye nomba ku Betelehemu nga tuye tulole ichinthu choo chino chichitisile, chino Imfumu yatumanyisya sweswe.'' ¹⁶ Awapitisya ukuya kulyanye nga wazana Mariya, Yosefe, nu mwana, wino walazile mwi pondo. ¹⁷ Lyo wamulola weliwe, wizile wamanyisya chino chavwanzilwe kwe woliwo ivya mwana. ¹⁸ Wonsi wano wivwile choo wazungusile pe chino chavwanzilwe kwe woliwo na wachemi. ¹⁹ Ukuwa Mariya atwalilizile ukwelengania ivya vinthu vyonsi vino ayivwile, ukuchindika vyolivyo mu mwenzo wakwe. ²⁰ Awachemi awanyoka, wachindamika nu kutumvya Leza pa vinthu vyonsi vino wivwile swinya waweni, ndivino chavwanzilwe kwe woliwo. ²¹ Pano uwanda wa kananimonsi(8) wasila, pano umwana alemvilwe, wisilwe Yesu, izina lino wapilwe nu mungelo lyo achili ukuwa mu wula. ²² Pano imphendo ya mamanda yakulondekwa ukuyiswefya yasila, ukuyana ni sundo lyakwe Mose, awamuleta Yesu kwi tempeli mu Yerusalemu ukuti wape weliwe ku Mfumu. ²³ Ndivino chawalikwa mwi sundo lya mfumu, ''Aliwensi umonsi wino wiyula uwula alipewa ku Mfumu.'' ²⁴ Achaleka watwazile inzuwi ukuyana kwe chino chavwanzilwe mwi sundo lya mfumu, ''Inkhunda ziwili nawana wanthozi wawili.'' ²⁵ Lolani, kwalinji umonsi mu Yerusalemu wino izina lyakwe lyalinji Simiyoni, swinya umonsi wee alinji amulungamane swinya uwakuyipa. Weni alindililanga ukupozwa kwe Izirayeli, swinya u Muzimu Mutele alinji pakwe weliwe. ²⁶ Chavumbusilwe kwe weliwe nu Muzimu Mutele kuno atalilola imfwa lyo ataweni e Kristu wakwe Mfumu. ²⁷ Ukutungululwa nu Muzimu, Simiyoni ayiza mwi tempeli. Pano awakwasi wiza nu mwana Yesu, ukuti wachitile weliwe ukuyana nu musango wi sundo, ²⁸ asenda weliwe mu nyobe zyakwe nga atumvya Leza, nga ati, ²⁹ ''Nomba muleke umuwomvi wako afwe mu mutende, Mfumu, ukuyana nizwi lyako. ³⁰ Amuno aminso yane yalola ipususyo lyako, ³¹ luno usenganizizye mukulola kwa wanthu wonsi: ³² uwuswepe kwi wumbulo ku Makandi swinya uwuchindame ku wanthu wako Izirayeli.'' ³³ E yise nu nyina awazunguka pakwe chino chavwanzilwe ivya weliwe. ³⁴ Simiyoni alota woliwo nga atili kwe Mariya e nyina, ''Lola, umwana wee asozilwe ku kupona nu kukatuka kwa wanthu awavule mu Izirayeli swinya pa chimanyikwilo chino chikukanwa -- ³⁵ swinya e panga alilasa u moyo wako wemwenecho -- alyakuti amelenganio ya myenzo iyivule yingawumbulwa.'' ³⁶ E kasema umwanachi izina lyakwe Anna alinji palyanye. Alinji a mwana umwanachi e Fanuwelo ukufuma ku luko lwakwe Asha. Alinji amukote nkhaninye. Ikazile nu mulume imyaka munenulambali(7) ukufuma pano wakuzile uwanachi, ³⁷ nga umulume afwa nga ayikala wenga imyaka amakumi kananimonsi na yini sita umonsi. Atatela afume mwi tempeli ukuwa atewetanga nu kufunga na mapepo, umusanya nu wusiku. ³⁸ Pi ola lilyanye ayiza papipi na woliwo nga atalika ukusalifya Leza, swinya avwanzile ivya mwana kwe aliwensi wino alindililanga ukupusukwa kwakwe Yerusalemu. ³⁹ Lyo wamala vyonsi vino walondekanga ukuti wawombe ukuyana ni sundo lya Mfumu, awanyochela ku Galileya, kukaya kawo ka Nazareti. ⁴⁰ U mwana akula swinya awa na maka, ayonjerewa amano, swinya inkhumbu yakwe Leza yalinji pakwe weliwe. ⁴¹ Awakwasi wakwe wapitanga mu Yerusalemu umwaka wuli wonsi mukuzewela pa chakupitililwa. ⁴² Pano Yesu awa ni myaka ikumi na yiwili, awaya swinya pa mphindi ya misango ya kuzewela. ⁴³ Lyo wikala amanda yakufikapo mu mphendo ya chakulya, awatalika ukunyochela kukaya. Ukuwa Yesu asyala kwisinda swinya awakwasi wakwe nanthi kumanya. ⁴⁴ Welenganianga kuno Yesu ali mwi wumba lino lyalinji nawo pawulendo, achaleka wapisile uwulendo wa wanda wonga. Ngapano awatalika ukumuvwamba mu wakamu wawo ni viwuza vyawo. ⁴⁵ Pano watamuzanile Yesu, awanyochela ku Yerusalemu nga watalika ukumuvwamba kulyanye. ⁴⁶ Kwiza kwawa pano amanda yatatu wizile wamuzana mwi tempeli, ayikazile pakasi pa wasambilizya, akwivwichisya kwe woliwo swinya akuwakolowozya woliwo na mawuzyo. ⁴⁷ Wonsi wano wamwivwanga awazunguka nu kwivwichisya kwakwe swinya nu kutolelela kwakwe. ⁴⁸ Pano wamuweni, awazunguka nkhaninye. E nyina atili kwe weliwe, ''Mulumendo, wuzye achani fwani chino ukutuyimvya? Lola, e baba wako na nene twasakamine ukukuvwamba.'' ⁴⁹ Yesu atili kwe Mariya, ''Wuzye achani fwandi chino mukumvwamba? Wuzye mutamanya kuno mfwile imbe pa mulimo wakwe Tata wane? ⁵⁰ Ukuwa wativwichisizye chino wasulanga na mazwinye yayo. ⁵¹ Ngapano Yesu anyochela na woliwo ukuya ku Nazareti swinya atonthezile kwe woliwo. E nyina asunjilile ichete ivinthunye vyovyo mu mwenzo wakwe. ⁵² Lelo Yesu atwalilizile ukukula mu mano swinya mu wutali wa muwili, swinya onjelezwa mu kukundila nu Leza na wanthu.