¹ Awavule wasenzile umulimo ukuti wawalike ivinthu vino vyafiswa pakasi pitu, ² ndivino vwapewa kwe sweswe na wawo wano ukufuma ku kunthaliko walinji a wakamboni swinya awawomvi wizwi. ³ Achaleka chawa achizima na kwe nenenye, umulandu nakonkhelezya ichete sana vyonsi ukufuma ku nthaliko, ukuti imbalike ichetechete ilyasi muno wewe, we muchindikwe nkhaninye Tiyofilasi, ⁴ alyakuti ungamanya ukusimichila kwa vinthu vino wasambilizwa. ⁵ Mu manda ya mfumu Herodi ya ku Yudeya kwalinji wumwi e simapepo witwanga Zakariya ukufuma mwakwe Abija; umuchi u Elizabeti nawenye walinji wa chifumo chakwe Aroni. ⁶ Wonsinye walinji awalungamane pa minso yakwe Leza, wapitanga mu masundo yonsi na mu myiko yakwe Mfumu. ⁷ Ukuwa watalinji nu mwana umulandu Elizabeti walinji amwiyale, swinya wonsinye walinji awakote pakufika imphindi yoo. ⁸ Nomba kwizile kwawa ukuti Zakariya alinji paminso yakwe Leza, ukuwomba imilimo ya wu simapepo ukuyana ni ng'anda yino wafuma mwenemo. ⁹ Ukuyana ni myikalile yawo yakusola we simapepochi anga teweta, asolizye pakuwomvya amayele ukuti ayinjile mwi tempeli lyakwe Mfumu ukuti oche ivinunkhile. ¹⁰ Iwumba lya wanthu lyonsi lyapepenga kunzi pi ola lino ivinunkhile vikochwa. ¹¹ Nomba umungelo wakwe Mfumu alolesile kwe weliwe swinya wimilizile kundilo ya masyo iya vinunkhile. ¹² Pano Zakariya waweni weliwe, izile ayimba, swinya inthete yapona pe weliwe. ¹³ Ukuwa umungelo atili kwe weliwe, ''Utakatine, Zakariya, umulandu ipepo lyako lyivwika. Umuchi wako Elizabeti alikwatila wewe umwana umulumendo. Ulimwita izina lyakwe Yohani. ¹⁴ Uliwa ni chimwemwe ni nseko, swinya awavule walizewela nu kukwatwa kwakwe. ¹⁵ Amuno aliwa a mukulu mu kalolele ka Mfumu. Atize atele ang'we ipala pamwi ichakung'wa ichilule, swinya aliyizuzwa nu Muzimu Mutele ukufuma munda yakwe mama wakwe. ¹⁶ Awavule mwi kwata lyakwe Izirayeli walipiluchila kwe Mfumu e Leza wawo. ¹⁷ Aliya paminso yakwe Mfumu mu muzimu na maka yakwe Eliya, ukupiliwula imyenzo ya wa tata ukuya ku wana swinya wanthivwila ku mana ya wulungamane -- ukusenganizizya i Mfumu awanthu wano wapekanyizyilwa weliwe.'' ¹⁸ Zakariya atili ku mungelo, ''Wuzye ningamanya wuli choo? Amuno ne mukote nu muchi wanenye amukote nkhaninye.'' ¹⁹ U mungelo atolelela nga atili kwe weliwe, ''Nene ne Gabiriyele, wino akakwimilila paminso yakwe Leza. Natumilwe ukuti imvwange kwe wewe, ukuti ndete ilandwe zima lyoo. ²⁰ Lola! wandi umyalale, nanthi akuvwanga, ukufika uwanda wuno ivinthu vyoo vilichitika. Chandi chiwe wonye umulandu utasuwizile amazwi yane, yano yalifiswa mu mphindi yakwe.'' ²¹ Nomba awanthu walindililanga Zakariya. Awazunguka kuno wikazile imphindi iyitali mwi tempeli. ²² Ukuwa lyo afumila kunzi, alinji amumyalale nanthi kuvwanga kwe woliwo. Awiluka ukuti aweni ichilola pano alinji mwi tempeli. Atwalilile ukuwomvya ivimanyikwilo na makasa kwe woliwo nga awa amumyalale. ²³ Kwiza kwawa pano amanda ya kutewetela kwakwe yasila, ayile ku ng'anda yakwe. ²⁴ Lyo amanda yaa yapita, umuchi wakwe Elizabeti awa nu wula swinya imyezi yisano ayifisile. Weni atili, ²⁵ ''Choo achino Leza wantchitila nene pano andola nu kukundila alyakuti afumye insoni zyane paminso ya wanthu.'' ²⁶ Mu mwezi wa mutanda(6), umungelo Gabiriyele atumwa ukufuma kwe Leza ukuya ku musumba mu Galileya wuno witwanga Nazareti, ²⁷ kwe mukazyana wino alinji nukuti atwalwe kwe wino witwanga Yosefe, wino alinji wa luko lwakwe Davidi, swinya umukazyania weyo izina lyakwe Mariya. ²⁸ Umungelo ayiza kwe weliwe nga ati, ''Tulamuke, wewe wino wakundilwa nkhaninye! Imfumu yili na wewe.'' ²⁹ Ukuwa weni avulungine nkhaninye na mazwi yaa swinya azunguka ukuti amusangochi ya milamuchile yoo. ³⁰ Umungelo atili kwe mukazyana, ''Utati uwatina, Mariya, amuno wazana ukukundila nu Leza. ³¹ Lola, wandi uwe nu wula swinya wandi uwe nu mwana umulumendo. Uli mwita izina lyakwe 'Yesu.' ³² Aliwa amukulu sana swinya aliyitwa Mwana wakwe Wapapela Nkhaninye. Imfumu Leza yilimupa weliwe ichipuna chakwe tatakulu wakwe Davidi. ³³ Aliwa amfumu mu ng'anda yakwe Yakobi muyayaya, swinya uwufumu wakwe wutaliwa ni nsilo.'' ³⁴ Mariya atili ku mungelo, ''Wuzye chilichitika wuli choo, amuno nthatela imbe nu monsi?'' ³⁵ Umungelo atolelela nga atili kwe Mariya, ''U Muzimu Mutele aliyiza pa kwe wewe, swinya amaka yakwe Wapapela Nkhaninye yaliyiza pakwe wewe. Amuno u mutele wino alikwatwa aliyitwa umwana wakwe Leza. ³⁶ Lola, umukamu wako u Elizabeti ali nu wula wa mwana umonsi mu wukote wakwe. Woo a mwezi wa mutanda kwe weliwe, weyo wino witwanga nthalikwata. ³⁷ Amuno nanthi chimwi chilipotwa nu Leza.'' ³⁸ Mariya atili, ''Lola, ne muwomvi umwanachi wakwe Mfumu. Lekani chiwe kwe nene ukuyana ni lyasi lyako.'' Ngapano umungelo afuma kwe weliwe. ³⁹ Ngapano Mariya akatusile mu mandanye yayo nga aya paponapapo ku kaya ka malupili, ukuya ku musumba mu Yudeya. ⁴⁰ Ayile ku ng'anda yakwe Zakariya nu kulamuka Elizabeti. ⁴¹ Nomba chachitisile ukuti pano Elizabeti wivwa ukulamuka kwakwe Mariya, umwana munda yakwe izile aluka, nga Elizabeti wizwile nu Muzimu Mutele. ⁴² Elizabeti izie apunda nizwi ikulu ati, ''We mulotwe pa wanachi wonsi, swinya achilotwe ichikomwa cha mu wula mwako. ⁴³ Wuzye chachitika wuli fandi ukuti e mama wakwe Mfumu ayize kwe nene? ⁴⁴ Amuno lola, pano izwi lya kulamuka kwako kwiza mu makutwi yane, umwana mu wula mwane alusile ni chimwemwe. ⁴⁵ Amulotwe weni wino akusuwila ukuti kuliwa ukufiswa kwa vinthu vya vwanzilwe kwe weliwe ukufuma ku Mfumu.'' ⁴⁶ Mariya atili, ''U moyo wane wukutumvya Imfumu, ⁴⁷ swinya umuzimu wane wazewela mwakwe Leza e katula wane. ⁴⁸ Amuno aweni ukuchefwa kwa muwomvi wakwe umwanachi. Amuno lola, ukufuma nomba ukuya pankholelo inkhulo zyonsi zilinjita nene mulotwe. ⁴⁹ Amuno weni wino ali namaka awomvile ichinthu ichikulu kwe nene, swinya izina lyakwe alitele. ⁵⁰ Uwila wakwe wukutwalilila ukufuma ku nkhulo ukuya kunkhulo kwe wawo wano wakatina weliwe. ⁵¹ Alolesya amaka ni nyowe yakwe; asaphanizye wawo wano wakuyikwezya ivya melenganio ya mu myenzo yawo. ⁵² Aponezizye pansi awana wa zya mfumu ukufuma muvipuna vyawo swinya akatusizye wawo wano wakuyichefya. ⁵³ Ayizuzya wano wali ni nzala ni vinthu ivizima, ukuwa awakankhale awasamazya amakasavye. ⁵⁴ Apa uwutuli kwe Izirayeli umuwomvi wakwe, alyakuti ayizuke ukuti alanjizye uwila ⁵⁵ (ndivino avwanzile ku wakwasi witu) kwe Abrahamu na maluko yakwe myayaya.'' ⁵⁶ Mariya ayikala nu Elizabeti imyezi ngati yitatu ngapano anyoka ukuya ku ng'anda yakwe. ⁵⁷ Nomba imphindi yalinji mupipi ukuti atule u mwana wakwe nga akwata umwana umonsi. ⁵⁸ Awapalamani wakwe swinya awakamu wakwe wivwa ukuti Imfumu yalanjizya uwila wakwe uwukulu kwe Elizabeti, swinya awazewela na weliwe. ⁵⁹ Nomba chachitisile pa wanda wa kananimonsi(8) kuno wiza ukuputula umwana. Walinji nukumwita ''Zakariya,'' izina lyakwe baba wakwe. ⁶⁰ Ukuwa unyina atolelela nga atili, ''Awe. Andi ayitwe Yohani.'' ⁶¹ Awatili kwe Elizabeti, ''Pasi nanthi wumwi mu wakamu wani wuno akakwitwa ni zina lyo.'' ⁶² Awamulanjizya ni vimanyikwilo vya makasa kwe baba wakwe muno walondelanga umwana wakwe ayitwe. ⁶³ E baba wakwe alenga ichakuti awalikile penepo nga awalika, ''Izina lyakwe we Yohani.'' Wonsinye awazunguka pakwe choo. ⁶⁴ Paponapapo umulomo wakwe awiyuka swinya ululimi lwakwe alusapukwa. Weni avwanzile nu kutumvya Leza. ⁶⁵ Inthete ayiza pakwe wonsi wano wikalanga ukuwaliwilizya woliwo. Ivinthunye vyoo vyonsi avisata mu kaya konsi ka myamba ka Yudeya. ⁶⁶ Wonsi wano wivwile vyenevyo awavisunga mu myenzo yawo, awati, ''Achani chino umwananye wee aliwa?'' Amuno ikasa lyakwe Mfumu lyalinji na weliwe. ⁶⁷ E baba wakwe Zakariya ayizula ni Muzimu Mutele nga anenera, ati, ⁶⁸ ''Ukutumvya kuye ku Mfumu, e Leza wa Izirayeli, amuno ayizile ukutula swinya amalizizye ukupokwa kwa wanthu wakwe. ⁶⁹ Akatusizye imphembe ya kupusukwa kwitu mu ng'anda yakwe Davidi umuwomvi wakwe ⁷⁰ (ndivino Leza wavwanzile ukuwomvya imilomo ya wakasema awatele ukufuma kali), ⁷¹ ukupusukwa ukufuma ku walwani witu swinya ukufuma mwi kasa lya wonsi wano wapata sweswe. ⁷² Aliwomba choo ukulanjizya uwila kwe Tata witu swinya ukwizusya ilayano lyakwe ilitele, ⁷³ ifingo lino avwanzile kwe Abrahamu e baba witu. ⁷⁴ Afinjizile ukuti ape kwe sweswe ukuti sweswe, pano twapusuka kwi kasa lya walwani witu, tunga tewetela weliwe nanthi akutina ⁷⁵ mu wutele swinya uwulungamane paminso yakwe amanda yitu yonsi. ⁷⁶ Molimo, swinya wewe, mwana, uliwayitwa e kasema wakwe wa Mupela Nkhaninye, amuno uliya pankholelo pakwe Mfumu ukusengania inzila yakwe, ukusengania awanthu ku kwiza kwakwe, ⁷⁷ ukuti ape ukumanya kwe kupusukwa kwa wanthu wakwe ukupitila mu kutetelwa ku mawembu yawo. ⁷⁸ Choo chilichitika umulandu uwila wakwe Leza witu, umulandu wakwe choo ilanzi lya kupela liliyiza ukututula sweswe, ⁷⁹ ukuwalila kwe wano wikala mu mfizi swinya mu chiyanwa cha wafwe. Aliwomba choo ukuti alanjizye amatamba yitu mu nzila ya mutende.'' ⁸⁰ Nomba umwananye wee akula swinya awa na maka mu muzimu, swinya alinji mu lupalang'ang'a ukufika uwanda wuno wiza alolekera pa wanthu mu Izirayeli.