¹ Ala pano vyapita ivinthu vyoo, i Mfumu yasozile amakumi munenulambali na wawili awanji, nu kuwatuma wawili wawili pankholelo pakwe weliwe ukuya mu musumba yonsi na masyo kuno walinji mupipi ukuya. ² Watili kwe woliwo, ''Amasika ayvule, kweni wakawomba awatichi. Fwandi lambilizyani umweni masika ukuti atume wakawomba mu masika yakwe. ³ Yani panzila yinu. Lolani, nkhuwatuma ngati mwe wana wa ng'onzi pakasi pa mphumphi. ⁴ Mutakasende nanthi a chola icha ndalama, pamwi ichola icha pawulendo, pamwi indyato, swinya mutakalamuke nanthi wumwi mu nzila. ⁵ Ing'anda yiliyonsi yino mwinjila, pakutalichila muti, 'Umutende wuwe mu ng'anda yoo!' ⁶ Ndi umunthu wa mutende alimo, umutende winu wuliyikala pakwe weliwe, kweni ndi awe, wulinyochela kwe mwemwe. ⁷ Yikalani mu ng'andanye yoyo, amulya nu kung'wa vino waleta, amuno e kawomba akayana na malambulo yakwe. Mutakati muwapita pita ing'anda ni ng'anda. ⁸ U musumba wuliwonsi muliwayinjila, nu kuwapochelela, amulya vino waleta pa minso yinu ⁹ swinya amupozya awalwale wano wali kulyanye. Muwati kwe woliwi, 'Uwufumu wakwe Leza wiza papipi namwemwe. ¹⁰ Pano mwinjila mu musumba nga watakuwapochelela, yani kunzi mu tunzila nu kuti, ¹¹ 'Nitukumbunye ukufuma mu musumba winu lino likakakatila ku matamba yitu twawakunkhumulila! kweni mumanye choo: Uwufumu wakwe Leza wiza papipi.' ¹² Nkhuwanena ukuti pa wanda wakupanzya vino vyachisilwe mu Sodom viliwa ichete ukulusya u musumba wowo. ¹³ Akalanda kasikolo kwe wewe, Chorazini! Akalanda kasikolo kwe wewe Betisayida! Ndi imilimo iyikulu yachisilwe mwakwe wewe yachisilwe mu Taya nu Sidoni, ngali watontholosile kalinye, awikala pansi awazwala amasankho awayikuntchila ni toyi. ¹⁴ Kweni alifwila inkhumbu u Taya nu Sidoni pakupanzya, mwenji pole. ¹⁵ Wewe, Kapenamu, wuzye ukwelengania uliyitumphulila mwiyulu? Awe, uliletwa pansi ku Hade. ¹⁶ Winsi wino akwivwa kwe mwemwe akunjivwa, na wensi wino akuwakana akunkhana, swinya wino akunkhana akukana wino wanthuma.'' ¹⁷ Wawo amakumi munenulambali awanyoka ni chimwemwe, awati, ''Mfumu, ni mizimu miwipenye yatutonthelanga mwizina lyako.'' ¹⁸ Yesu atili kwe woliwo, '''Namulolanga satana wapona ukufuma mwiyulu ngati ankhuwa. ¹⁹ Lola, nawapa insambu izya kulyatanjila inzoka na makalayila, swinya pa maka yonsi iya mulwani, swinya pasi nanthi chimwi mu nzila yiliyonsi chiliwachisa. ²⁰ Ukuwa kweni mutakasechelele pa choo chenga, kuno imizimu yikutonthela mwemwe, kweni muwe ni chimwemwe kuno amazina yinu yawalikwe mwiyulu.'' ²¹ Pa mphindinye yoyo awa ni chimwemwe ichikulu mwakwe Muzimu Mutele, nga wati, '' nkhukutumvya, Tata, we Mfumu ya mwiyulu na munsi, umulandu wavifisile ivinthunye vyoo kuwamano na wakwiluka nu kuyiwumbula kwa kwe wano watasambilila, ngati awana watichi. Nakawuzyenye, Tata, pakuti choo chasechelesizye pa minso yakwe wewe. ²² ''Ivinthu vyonsi vyasungwa kwe nene ukufuma kwe Tata, swinya pasi nanthi wenga wamanya umwana we weni kandi e Tata, swinya pasi nanthi wumwi wama ukuti e Tata we weni kandi u Mwana na kwe wawo wano u Mwana wasola ukuwumbula weliwe. ²³ Ngapano apiluchila kuwa sambilizi kumbali ni wumba nu kuti, ''awalongo wano wakulola ivinthu vino mukulola. ²⁴ Nkhuwanena, awatumwa awavule nizya mfumu wakumbwanga ukulola ivinthu vino mukulola, nga wataviweni, swinya ukwivwa ivinthu vino mukwivwa, kweni wativwile.'' ²⁵ Lolani, kamanya wa masundo wimilizile ukuti angamwelezya weliwe, ati, ''Musambilizya, wuzye ntchite chani ukuti nkhapyane uwumi wamuyayaya?'' ²⁶ Yesu atili kwe weliwe, ''Wuzye mwawalikwa chani mu masundo?'' Mukuwelenga wuli?'' ²⁷ Weni atolelela nu kuti, '''Uwakunda Imfumu e Leza wako nu mwenzo wako wonsi, nu moyo wako wonsi, na maka yako yonsi, na mano yako yonsi nu mupalamani wako ndi vino awewe.'' ²⁸ Yesu atili kwe weliwe, ''Watolelela molimonye. Chita choo, apano uliyikala.'' ²⁹ Kweni weni, ukukumbwa ukuti ayilungamisye, atili kwe Yesu, ''Nga umupalamani wane weni?'' ³⁰ Yesu amutolelela nu kuti, ''U munthu wumwi wafumile ku Yerusalemu wayanga ku Yeriko. Wakapoka awamuvundumuchila, awamuzula nu kupoka vyonsi vino walinji navyo, awamuma, awamusya papipi nukufwa. ³¹ Kulongo e simapepo wumwi wapitanga munzila yilyanye nga pano wamulola, apita inzila yinji. ³² Nu mu Levi nawenye, pano wafika pa masyo yalyanye nu kumulola, apitilila ku mbali yinji. ³³ Kweni u mu Samali wumwi, pa wulendo wakwe, wizile pano walinji. Pano wamulola, amalanda yamulema. ³⁴ Apalamila kwe weliwe nu kunyepa ivilonda vyakwe, amwitila amafuta ni pala mwenemo. Amukwezya napa nyama yakwe, nu kumuleta ku ng'anda yawa pitanzila nu kumusunga. ³⁵ Uwacha asenda indalama a denari wawili nu kumupa umweni ng'anda, nukuti, 'Musungange swinya chilichonsi ichakonjelezya chino ungalipa, pano nanyochela, ndiza nkhulipe.' ³⁶ Nga weweni pa watata waa alinji amupalamani wakwe wino wasunkhine nawa kapoka?'' ³⁷ Atili, ''Weni wino wamulanjizizye uwila.'' Yesu atili kwe weliwe, ''Pitanga ukawombange ichili chonga.'' ³⁸ Nomba pano wapitanga pawulendo wawo, weni winjizile mu kaya kamwi, nga umwanachi izina lyakwe Marita wamupochezile mu ng'anda yakwe. ³⁹ Walinji ninkhazi yakwe izina lyakwe Mariya, wino wikazile pa matamba ya Mfumu nu kwivwa izwi lyakwe. ^{40 41 42} Kweni Marita watangwanisile nukupekania ichakulya. Weni wizile kwe Yesu nukuti, ''Mfumu, wuzye utakusakamala kuno inkhazi yane yinsizile nenga ukuteweta? Wowonye muwuzyani ukuti ayize anjavwa.'' Kweni Imfumu yatolelela nukuti kwe weliwe, ''Marita, Marita, ukuvwulika nu kuchulika ni vinthu ivivule, kweni chonga ichinthu achakulondeka. Mariya wasola ichinthu chino achizima, chino chitalitela chipokwe ukufuma kwe weliwe.''