¹ Chachitisile uwanda wonga pano Yesu wapepanga mu masyo yamwi. Pano wamalizizye, wenga uwa wasambilizi wakwe atili kwe weliwe, ''Mfumu, tusambizye ukupepa ndivino Yohani wasambilizizye awa sambilizi wakwe.'' ² Yesu atili kwe woliwo, ''Pano mukupepa muwati, 'Tata, izina lyako lichindikwe ngati litele. Uwufuma wako wize. ³ Utupe sweswe u mukate uwanda nu wanda. ⁴ Ututetele amawembuko yitu, ndivino tukutetela aliwensi wino ali ninkhongole kwe sweswe. Utakatukolele sweswe mukwelezwa.''' ⁵ Yesu atili kwe woliwo, ''Weweni mwakwe mwemwe aliwa ni chiwuza, nga aliya kwe weliwe pakasi pa wusiku nu kuti kwe weliwe, ''Chiwuza njazimyako imikate yitatu, ⁶ pakuti ichiwuza wane wiza nomba nomba ukufuma pa wulendo, swinya nenji nsi nanthi chimwi ichakuti ningamupa.' ⁷ Ngapano uwa mukasi atolelela weliwe angati, 'Utize wanthamya. Ichisakati achiyale kali, swinya awana wane, apaliponga na nene, tulazile. Nthanga inkhatuke nu kupa umukate kwe wewe.' ⁸ Nenji nkhuti kwe mwewe, naponye nanthi atanga akatuke nu kupa umukate kwe mwemwe umulandu we chiwuza wakwe, ukuwa pa mulandu wakupatichizya ukwasita kosozwa insoni kwako, alikatuka nu kukupa imukate iyivule muno ukulondela. ⁹ Nenji swinya nkhuti kwe mwemwe, Lenganji, swinya chilipwa kwakwe mwemwe; vwambanji, swinya mulizana; Kong'osyani, swinya chiliyiyulilwa kwakwe mwemwe. ¹⁰ Amuno wensi umunthu wakulenga akapochelela; swinya umunthu wakuvwamba akuzana; swinya kwakwe weyo umunthu wino akukong'osya, kuliyiyulilwa. ¹¹ Wewenu u tata pakasi pakwe mwemwe, ndi umwana wako akulenga inswi, alimupa inzoka mumalo yanswi? ¹² Pamwi ndi akulenga ilyenza, ungapa ikala kwe weliwe? ¹³ Ngafwandi, ndi mwemwe mwe wawipe mwamanya ukupa ivya wila ivizima ku wana winu, ngawuli e Tata winu uwa mwiyulu ukupa u Muzimu Mutele kwe wawo wano wakumulenga?'' ¹⁴ Nomba Yesu wafumyanga kunzi e dimoni wino walinji chinunu. Pano e dimoni wafuma kunzi, u munthu wino walinji we chinunu avwanga, ni wumba alizunguka. ¹⁵ Ukuwa awanthu wamwi watili, ''Ukupitila mwakwe Belezebu, e songo wa madimoni, weni wafumyanga kunzi amadimoni.'' ¹⁶ Wanji welezizye weliwe swinya awavwamba ukufuma kwakwe weliwe ichimanyilo ukufuma Mwiyulu. ¹⁷ Ukuwa Yesu amanyile amelenganio yawo swinya atili kwe woliwo, ''U wufumu wonsi wuno wukupawunkhana wonga wukusyala wenga, swinya ing'anda iyipawunkhane mwe yonga yikupona. ¹⁸ Ndi satana wayipawunkhania wenga, u wufumu wakwe wungimilila wuliwuli? Amuno mukuti nkhawinjila amadimoni ukupitila mwakwe Belezebu. ¹⁹ Ndi nkhuwinjila kunzi amadimoni ukupitila mwe Belezebu, nga mwemwe mukawinjila yoliyo ukupitila mwakwe weni? Umulandu we choo, waliwa awakapanzya winu. ²⁰ Kweni ndi mukuwinjila kunzi amadimoni ukupitila mwikasa lyakwe Leza, lyo uwufumu wakwe Leza wiza kwe mwemwe. ²¹ Ndi umunthu umukazawane wino ali vilwilo akulindilila ing'anda yakwe wenga, e katundu wakwe akasungika, ²² kweni pano munthu umukazawane ukuchila wamuchimvya, u munthu umukazawane sana wapoka ivilwilo mwakwe vino wasuwizile nu kupoka u katundu wensi uwa munthunye weyo. ²³ Weyo wino asi na nene akususyania na nene, swinya winga wino asi wungania na nene akusamphania. ²⁴ Pano umuzimu muwipe wapita ukufuma mu munthu, wukapitila mu masyo yano yasi na minzi nu kulonda ukupuza. Ukuzana nanthi yamwi, wukati, 'Nandi nyochele ku ng'anda yane kuno nafuma.' ²⁵ Pano wanyochela, wukuzana ing'andanye yoyo ayipyele swinya ayiyanie. ²⁶ Ngapano wukuya nu kusenda apaliponga nayo imizimu yinji munenulambali imiwipe ukulusya swinya yonsinye ayinjila mwenemo. Ngapano imiwele yawumalilo iya muntunye weyo yikulusya na pakutalichila.'' ²⁷ Chachitisile kuno, pano wavwanga ivinthu vyoo, wumwi umwanachi apunda izwi lyakwe ukulusya iwumba nu kuti kwe weliwe, ''Awupepwe uwula wuno wakunyamuzile na mawele yano yakonsizye wewe.'' ²⁸ Ukuwa atili, ''Nkhuti, awapepwe a wawo wano wakwivwa izwi lyakwe Leza nu kulisunga.'' ²⁹ Pano amawumba yavulanga, Yesu watalisile ukuti, ''Inkhwatwa yoo a nkhwatwa imbipe. Yikuvwamba ichimanyilo, ukuwa pasi nanthi achimanyilo chino chilipwa kwakwe woliwo suka ichimanyilo chakwe Yona. ³⁰ Amuno ndivino Yona walinji achimanyilo ku wa Ninive, achilichonga nu Mwana wa Munthu aliwa chimanyilo ku nkhwatwa yoo. ³¹ Imfumukazi iyakukambazya yili katuka pipanzyo na wanthu wankhwatwa yoo nu kususya woliwo, amuno weni wizile ukufuma kunsilo yansi mukwivwa amano yakwe Solomoni, ukuwa lolani, wumwi umukulu ukulusya Solomoni ali paa. ³² Awanthu waku Ninive wali yimilila pi panzyo ni nkhwatwa yoo iya wanthu swinya wali susya yeneyo, amuno watontholosile pa kulumbilila kwakwe Yona, ukuwa lolani, wumwi umukulu ukulusya Yona ali paa. ³³ Nanthi wumwi, ndi wakozya ulokozyo, akaluwika pa masyo amafisame, pamwi mwivungululu lya chitundu, kweni pachilemelo, alyakuti wawo wano winjila wangalola uluswepo. ³⁴ Ilinso lyako alukozyo lwa muwili. Pano ilinsol yako lili chete, umuwili wonsi wukwizula nu luswepo. Kweni ndi ilinso lyako aliwipe, umuwili wako wuli mmfizi iyikulu. ³⁵ Achaleka, chenjelani kuno uluswepo mwakwe wewe asa mfizi. ³⁶ Ngapano ndi umuwili wako wonsi yizwile nu luswepo, nanthi ambali yimwi mu mfizi, apano umuwili wako wonsi wuliwa ngati pano ulukozyo lukukozya uluswepo lwakwe pakwe wewe.'' ³⁷ Ngapano wamala ukuvwanga, umu Farisi walenga weliwe ukuti alye na weliwe ku ng'anda yakwe, achaleka Yesu winjila nu kulambalala. ³⁸ Umu Farisi azungusile kuno Yesu atasamvile tasi mu makasa pa chakulya. ³⁹ Kweni Imfumu yatili kwe weliwe, ''Nomba pano, mwemwe mwe wa Farisi mukaswefya kunzi kwa zyamphindi ni zyambale, kweni mukasi mwinu mwizula ukuyitemwa ni viwipe. ⁴⁰ Mwe wasowe amano! Wuzye weyo wino wapanzile kunzi asa weliwe wino wapanzile mukasi? ⁴¹ Panji awa saluke chino chili mukasi, nga pano ivinthu vyonsi viliwa viswepe kwe mwemwe. ⁴² Kweni akalanda kwe mwemwe awa Farisi, umulandu mukapa ichikumi vya kununkhila, ni vya nthwilo na vyonsi ivya muchalo, kweni mukusya ipanzyo nu lukundo lwakwe Leza. Achakulondeka ukuwomba ni panzyo nu kukunda Leza, nanthi kupotwa ukuwomba ivinji ivinthu navyonye. ⁴³ Akalanda kwe mwemwe awa Farisi, amuno mwakunda ivilimba vya nkholelo mu ma sinagogi nu kulamukwa ukwa muchinzi mu masyo yakukazizyamo. ⁴⁴ Akalanda kwe mwemwe, amuno muli ngati ankhungwe zino zitamanyikwa zino awanthu wakapita papela nanthi kumanya.'' ⁴⁵ Wenga uwa wa kamanya masundo atili kwe weliwe, ''Musambilizya, chino ukulanda chikututuka naswenye.'' ⁴⁶ Yesu atili, ''Akalanda kwe mwemwe, wasambilizya wi sundo! Amuno mwemwe mukuwika awanthu pansi pa wung'wame wuno chatala ukunyamula, kweni mutakulema iving'wame ni kasa linu nanthi lyonga. ⁴⁷ Akalanda kwe mwemwe, umulandu mukuzenga inkhungwe izya watumwa, kweni awa tatakulu winu wano wakoma woliwo. ⁴⁸ Acho mwe wakamboni swinya mukuzumilizya ku milimo ya watatakulu winu, amuno amwelimonye wakomile woliwo nga mwemwe mwazenga inkhungwe zyawo. ⁴⁹ Pa mulandu woo swinya, amano ya kwe Leza yatili, 'enji ndituma kwe woliwo awatumwa na wa positole, nga waliyimvya nu kukoma wamwi mwe woliwo,' ⁵⁰ Inkhwatwa yoo, apano, yilisundwa amuno uwazi wonsi uwa watumwa wuno wapungulwa ukufuma pano insi yatalika, ⁵¹ ukufuma pa wazi wakwe Abelo ukufika uwa Zakariya, wino wamukomile pakasi pakavuwa na masyo yakupepela. Nakawuzyenye, nkhuwanena, inkhwatwa yoo yilisundwa. ⁵² Akalanda kwe mwemwe wamanya masundo, umulandu mwasenda imfungulo ya kumanya; Mutakwinjila mukasi mwewenecho, swinya mukulesya wawo wano wakwinjila.'' ⁵³ Ala pano Yesu wafuma penepo, awa kawalika na wa Farisi ukumususya nu kupazinkhana na weliwe ivya vinthu ivivule, ⁵⁴ ukwelezya ukuti wateye weliwe mu mazwi yakwe umwenecho.