¹ Awenche, awenche, nkhunene kwe mwemwe, weni wino asikwinjila ukpitila pachimphongolo cha chipimpho cha ng'onzi, ukuwa akwela papela yimwi inzila, umunthu weyo amung'o swinya we kapoka. ² Weni wino akakwinjila pachimphongolo atela amuchemi wa ng'onzi. ³ E kasunga wa mphongolo ukumwiyulila. Ing'onzi azivwa izwi lyakwe, swinya akazyita ing'onzi zyakwe ukuwombela izina nu kuzikololela kunzi. ⁴ Ngapano wazifumya kunzi zyonsi izyakwe, weni azikololela, nga ing'onzi zyakonkha weliwe, amuno zyamanya izwi lyakwe. ⁵ Zitanga zikonkhe wino zitamumanye kweni zingamusamala, amuno zitamanya izwi lya wino zitamumanya.'' ⁶ Yesu avwanga umulumbe kwe woliwo, ukuwa nanthi kwiluka kuno avinthuchi vino wavwanga kwe woliwo. ⁷ Apano Yesu ati kwe woliwo swinya, Awenche, awenche, nkhuwanena, nene ne mphongolo iya ng'onzi. ⁸ Wonsi wano wakwiza pankholelo pakwe nene amung'o swinya kapoka, kweni ing'onzi zitateyezizye kwe woliwo. ⁹ Nene ne mphongolo. ndi wumwi angapitila mwakwe nene, ali pusuka; aliwayinjila nu kufuma swinya alizana umulemvwe. ¹⁰ Umung'o atanga ayize kanonzi pakwiwa nu kukoma nu konona. Nenji niza ilyakuti ziwe nu wumi swinya uwuvule nkhaninye. ¹¹ Nene ne muchemi umuzima. umuchemi umuzima akuwika uwumi wakwe pansi umulandu wakwe ng'onzi. ¹² Umuwalikwa wino asa muchemi swinya ing'onzi asazyakwe. Weni akalola imphumpi yikwiza azisya ing'onzi nu kusamala, nga imphumphi yazilema nu kuzisamphania. ¹³ Weni akasamala umulandu weni amuwalikwa swinya atapechela ing'onzi. ¹⁴ Nene ne muchemi umuzima, swinya nene manyile awane, swinya awane wamanya nene. ¹⁵ E Tata wamanya nene, swinya nani namumanta Tata, swinya nkhalambalika pansi uwumi wane umulandu wa ng'onzi. ¹⁶ Ndi ning'onzi zinji zino asa zya muchipompho choo. Mfwile nzilete nazyonye, swinya ziliyivwa izwi lyane ilyakuti uwufyo wongo nu muchemi wonga. ¹⁷ Achaleka e Tata wankhunda nene: Nene nkhalambalika uwumi wane pansi ilyakuti ningawusenda swinya. ¹⁸ Nanthi wumwi akawusenda ukufuma kwe nene, kweni nkhawulambalika pansi nemwenecho. Nene ndi maka ukuwulambalika pansi, swinya nene ndi maka aya kuwukatusya swinya. Nene napochezile ukukomelezya koo ukufuma kwe Tata wane. ¹⁹ Ukupawunkhana akuchitika swinya pakasi pa wa Yuda umulandu wa mazwi yanye. ²⁰ Awavule mwakwe woliwo awati, ''Weni ali nivimuzimu swinya ali nichipena. Nga chani chino mukumuvwila?'' ²¹ Wanji watinji, ''Yaa asa mazwi yakwe munthu wino ali nichimizimu. Wuzwe ichimuzimu chingiyula aminso ya nthonkho?'' ²² Ngapano yalinji amphindi yamasika iya kwimichila mu Yerusalemu. ²³ Yalindi amanda yakutalala sana, nu Yesu wapitananga mwi pembo lyakwe Solomoni. ²⁴ Ngapano awa Yuda awamuliwilizya nu kuti kwe weliwe, ''Ngafwandi wandi utuwike mfizi mphaka linye? Ndi we Kristu, tunene palwenze.'' ^{25 26} Yesu atolelela kwe woliwo, ''Nene nawanena, kweni mutakusuwila. Imilimo yino nkhuwomba mwi zina lyakwe Tata wane, yoyonye yikusimichila ukuyana na nene. Kweni mutakusuwila amuno asa mwe ng'onzi zyane. ²⁷ Ing'onzi zyane zikakwivwa izwi lyane; nene nazimanya, swinya nazyo zikakonkha nene. ²⁸ Nene nkhuzipa uwumi wa muyayaya; zitalitela zifwe, swinya pasi wumwi angize asomphole ukufuma mwikasa lyane. ²⁹ E Tata wane, wino wapa zyolizyo kwe nene, amukulu ukulusya wonsi awanji, swinya pasi nanthi wumwi wino angasomphola ukufuma mwikasa lyakwe Tata. ³⁰ Nene nu Tata swe wonga.'' ³¹ Ngapano awa Yuda wasewa amawe ukuti wapole weliwe. ³² Yesu atolelela woliwo, ''Nawalanjizya imilimo iyizima iyivule ukufuma kwe Tata. Amulimochi pa milimo yoyo wuno mukulonda mupole nene?'' ³³ Awa Yuda watolela weliwe, ''Tutakupola wewe pa milimo iyizima, kweni pa kukwelengula, amuno wewe, umunthu, ukuyiwika wenga ngati we Leza.'' ³⁴ Yesu atolelela woliwo, ''Wuzye kutawalikwa mwi sundo lyinu, 'Nene natili, ''Mwemwe mwe twaleza'''? ³⁵ Nanthi weni wisile woliwo twaleza, kwe wano izwi lyakwe Leza lyizile (swinya amawaliko yatanga yaputulwe), ³⁶ wuzye mukumunena wino e Tata wasola nu kutuma kunsi, 'Wewe ukukwelengula,' umulandu nati, 'Nene ne Mwana wakwe Leza'? ³⁷ Ndi nene nthakuwomba imilimo iya kwe Tata wane, mutakasuwile nene. ³⁸ Kweni ndi nkhuyiwomba, naponye nanthi mutangasuwila nene, suwilani mu milimo ilyakuti mungamanya nu kwivwichisya kuno Tata ali mwakwe nene swinya naninye ndi mwakwe Tata.'' ³⁹ Awelezya ukuti wamuleme swinya, kweni weni afyunthumuka mu makasa yawo. ⁴⁰ Weni waya swinya mumbalama mwe Yorodani ku masyo yano Yohani pakutalichila wabatizyanga, nga wikala kulyanye. ⁴¹ Awanthu awavule awiza kwe weliwe nu kuti, ''Amwelimo Yohani atawomvile nanthi avilolesyo, kweni ivinthu vyonsi vino Yohani wavwanga ivya munthu wee achisinkha.'' ⁴² Awanthu awavule awasuwila mwakwe weliwe kulyanye.