¹ Nomba umunthu wumwi izina lyakwe Lazaro walwile. Walinji waku Betaniya, akya ke Mariya ni nkhazi yakwe e Marita. ² Walinji we Mariya wino wapasile Imfumu ne Mure nu kumupukuta amatamba yakwe ni nyele zyakwe, wino indume yakwe Lazaro walwile. ³ Inkhazi zyakwe apano watuma kwe Yesu awati, ''Mfumu, lola, wino watemwa alwile.'' ⁴ Ngapano Yesu wivwa choo, ati, ''Uwulwale woo asa wa kuwufwe, Kweni achakuti awuchindame wakwe Leza ilyakuti Umwana wakwe Leza achindamikwe na woliwo. ⁵ Lelo Yesu watemwile Marita ni nkhazi yakwe ne Lazaro. ⁶ Ala pano wivwa kuno Lazaro walwile, Yesu wisile amanda yawili ku chipya chino walinji kweneko. ⁷ Apano papita choo, watili kuwa sambilizi, ''Tuyani ku Judeya swinya.'' ⁸ Awasambilizi watili kwe weliwe, ''Rabi, nombanombanye awa Yuda walondanga ukukupola na mawe, apo ukunyochela koko na swinya? ⁹ Yesu atolelela, ''Pasi amawola ikumi na yawili iya musanya? Ndi wumwi akupita mumusanya, atanga apunule, umulandu akulola uluswepo wansi yoo. ¹⁰ Ukuwa kweni, ndi akupita uwusiku, alipunula amulandu uluswepo lutali mwe weliwe.'' ¹¹ Walanzile ivinthu vyonye vyoo, pansizi pakwe vyoo, watili kwakwe woliwo, ''Ichiwuza chitu e Lazaro aponechile utulo, kweni nandi inje ukuti nkhamukatusye mutulo.'' ¹² Awasambilizi achaleka watili kwe weliwe, ''Mfumu, ndi aponechile utulo, wandi apole.'' ¹³ Lelo Yesu wavwanzile kuvwa mfwa yakwe. ukuwa welenginie ukuti walandanga pa tulo utwa kupuza. ¹⁴ Apano Yesu ati kwe woliwo umwakuvwika, ''Lazaro afwile.'' ¹⁵ Nthemilwe umulandu wakwe mwemwe, muno nthalinji kweneko ilyakuti musuwile. Tuyani kwe weliwe.'' ¹⁶ Tomasi, wino witwanga Didimu, watili kuwawuye awasambilizi, ''Tuyani nasweswenye swensi ukuti tukafwe nu Yesu.'' ¹⁷ Pano Yesu wizile, wazanile kuno Lazaro ali munkhungwe amanda yani. ¹⁸ Nomba Betaniya walinji papipi nu Yerusalemu, mufupi nimbali amakumi yasano mukuya. ¹⁹ Awavule awa Yuda wizile kwe Marita nu Mariya, mukuwasuwalizya pa mulandu we ndume yawo. ²⁰ Apano Marita, pano wivwa kuno Yesu akwiza, wayile mukumusunkhania, kweni Mariya wisile mu ng'anda. ²¹ Marita watili kwe Yesu, ''Mfumu, wanga uwe penepo, indume yane nge yitafwile. ²² Nakanonzinye, manyile ukuti chino ungalenga kwe Leza, alikupa wewe.'' ²³ Yesu ati kwe weliwe, ''Indume yako yilizyulupuka swinya.'' ²⁴ Marita ati kwe weliwe, ''Imanyile kuno alizyulupuka swinya mu wakuzyulupukwa pa wanda wakulechelezya.'' ²⁵ Yesu ati kwe weliwe, ''Ne kuzyulupuka nu wumi; wensi wino wasuwila mwe nene, napano afwe, aliwa nu wumi; ²⁶ swinya wino ali nu wumi nu kusuwila mwe nene atalitela afwe. Ukusuwila vyoo?'' ²⁷ Atili kwe weliwe, ''Molimo, Mfumu, nkhusuwila ukuti we Kristu, Umwana wakwe Leza, win akwiza munsi.'' ²⁸ Pano walanzile choo, wayile nu kwita inkhazi yakwe Mariya kumbali. Atili, ''Umusambilizya ali paa swinya akukwita.'' ²⁹ Ngapano wivwa choo, wakatusile zuwa aya kwe weliwe. ³⁰ Lelo Yesu wachilinji ukfika mu kaya kweni walinji pa masyo yano Marita wasunkhine nawe. ³¹ Achaleka pano awa Yuda, wano walinji na weliwe mu ng'anda wano wamusuwalizyanga, waweni Mariya wakatuka zuwa ukuya panzi, wamukonsile, welenganianga wakuti waya kunkhungwe mukulila kulyanye. ³² Ngapano Mariya wafika pamasyo yano Yesu walinji nu kumulola, wizile pona pansi pamanama yakwe nu kuti kwe weliwe, ''Mfumu, wanga uwe penepo, indume yane ngali itafwile.'' ³³ Pano Jesus wamuweni akulosya, swinya awa Yuda wano wizile nawe nawonye wakulosya, walinji na malanda nkhaninye mu muzimu wakwe swinya wachulisile; ³⁴ Watili, ''Ngamumulalisile kwi?'' Watili kwe weliwe, ''Mfumu, zanga swinya ulole.'' ³⁵ Yesu alosya. ³⁶ Ngapano awa Yuda awati, ''Lola vino wamutemilwe Lazaro!'' ³⁷ Ukuwa wamwi mwe woliwo watili, ''Chitanga chiwe ukuti umunthu wee, wino wiyuzile aminso yanthonkho, Alenge umunthunye wee ukuti atakafwe?'' ³⁸ Apano Yesu swinya, akuyilizyania nkhaninye mwe weliwe, wayile ku nkhungwe. Lelo chalinji achizinji, swinya iliwe lya lazile penepo. ³⁹ Yesu ati, ''Fumyani iliwe.'' Marita, inkhazi yakwe Lazaro, wino wafwile atili kwe Yesu, ''Mfumu, ukufika imphindi yoo umuwile wukuwola, amuno amufwe amanda yani.'' ⁴⁰ Yesu atili kwe weliwe, ''Nthakunenile ukuti, ndi ukusuwila, ulilola ukuchindamikwa kwakwe Leza?'' ⁴¹ Achaleka wafumizye iliwe. Yesu winuzile aminso nu kuti, ''Tata, nkhukusalifya amuno ukanjivwa. ⁴² Namanyile kuno lyonsinye ukanjivwa, kweni muno aliwumba lino limilile ukundiwilizya alyakuti nkhulanda choo, ukuti wasuwile ukuti wanthuma.'' ⁴³ Pano wavwanzile choo, wapunzile nizwi kulu, ''Lazaro, fuma panzi!'' ⁴⁴ Umufwe afuma panzi; Amatamba na manama yakwe yanyefilwe ni myenda, swinya paminso pakwe panyefilwe umwakuliwilizya nu mwenda. Yesu atili kwe woliwo, ''Musapulani nu kumuleka apite.'' ⁴⁵ Achaleka awavule awa Yuda wano wizile kwe Mariya nu kulola vino Yesu wawomvile, wasuwizile mwe weliwe. ⁴⁶ Kweni wamwe mwakwe woliwo wayile kuwa Farisi nu kuwanena ivinthu vino Yesu wawomvile. ⁴⁷ Apano awa simapepo wakulu na wa Farisi awawungana ponga swinya awati, ''Twandi tuchite chani? Umunthu wee akuchita ivilolesyo ivivule. ⁴⁸ Ndi tungamusya wenga woonye, wonsi wandi wasuwile mwe weliwe; awa Roma waliyiza swinya nu kupoka ponga amasyo yitu nu luko lwitu.'' ⁴⁹ Ndachino umunthu wumwi mwakwe woliwo, Kayafasi, wino walinji we simapepo mukulu mu mwaka wowo, watili kwe woliwo, ''Mutamanyile nanthi chimwi. ⁵⁰ Mutakwelengania ukuti achizima kwe mwemwe ukuti umunthu wenga angafwila awanthu ukuchila ukuti insi yonsi yifwe.'' ⁵¹ Lelo choo walanzile asa chakufuma mwe weliwe. Kweni, ukuwa e simapepo mukulu mu mwaka wulyanye, wachimile ukuti Yesu afwile ukufwila insi yonsi; swinya asa kunsi konga, ⁵² kweni ukuwa awana wakwe Leza wano wasalangine wangawungana ponga. ⁵³ Achaleka ukufuma uwanda wulyanye ukuya kunkholelo wapanzanianga muno wangawika Yesu kumfwa. ⁵⁴ Yesu walesile akupita apatiswe muwa Yuda, kweni wafumile kulyanye nukuya mu makaya kupipi nu lupalang'ang'a ukuya mu musumba wuno witwanga Efurayimu. Kokonye wikalanga nawa wasambilizi. ⁵⁵ Nomba ipitililwa lya wa Yuda lyalinji mupipi, nga awavule wayile ku Yerusalemu ukufuma mukaya pano kwachilinji ipitililwa ukuti wakayiswefye. ⁵⁶ Wavwambanga Yesu, nga pano wakuvwanga wenga nu muwuye pano wimilile pa tempeli, ''Mukwelengania chani? Ukuti wandi apotwe ukwiza ku kwipitililwa?'' ⁵⁷ Nomba e simapepo mukulu nawa Farisi wapinguzile ukuti ndi pali wumwi wino amanyile kuno Yesu ali, angatunena ukuti waye wakamuleme.