¹ Ala vino Yesu akupita papipi, alola umunthu wino wakwasilwe anthonkho. ² Awa sambilizi wakwe wamuwuzya, ''Rabi, weweni wawembusile, umunthu wee pamwi awakwasi wakwe, ilyakuti weni akwatwe anthonkho?'' ³ Yesu atolelela, ''Asa luwembu lwa munthu wee, pamwi awakwasi wakwe, kweni ilyakuti imilimo yakwe Leza yingawumbulika mwe weliwe. ⁴ Tufwile tuwawomba imilimo yakwe wino wanthuma pano kuchili amusanya. Uwusiku wukwiza pano wumwi atanga wombe. ⁵ Pano inchili indi munsi, Nene ne kuwala kwansi.'' ⁶ Ala Yesu wavwanga ivinthu vyoo, weni aswilila pansi, akanda ivu namati, swinya apaka ivu mu minso yakwe. ⁷ Weni atili kwe weliwe, ''Yanga, usambe muchiziwa che Silowamu (chino chikupilula 'Tumwa''). Achaleka umunthu aya, asamba, swinya anyoka akulola. ⁸ Ngapano awa palamani wa munthunye weyo swinya walyanye wano wamuweni panthaliko akulenga watinji, '''Asa wee umunthu wino wikalanga nu kulenga?'' ⁹ Wamwi awati, ''Awenye wee.'' Wanji awati, ''Awe, kweni wakola nawe.'' Kweni weni ati, ''Anene.'' ¹⁰ Awati kwe weliwe, ''Ngafwandi aminso yako yiyulwa wuli? ¹¹ Atolelela, ''Umunthu wino akwitwa Yesu wakanzile ivu nu kupaka muminso yane nga ati kwe nene, 'Yanga ku Silowamu uye usambe.' Achaleka nayile nasamba, nga natalika ukulola.'' ¹² Awati kwe weliwe, ''Wuzye ali kwi?'' Atolelela, ''Nene nthamanyile.'' ^{13 15} Awamuleta umunthu wino walinji we nthonkho kuwa Farisi. ¹⁴ Nomba uwandanye wowo walinji pe Sabata pano Yesu wakanzile ivu nu kwiyula aminso yakwe. Apano swinya awa Farisi wakolowozya weliwe vino wapochzile ukulola. Weni watili kwe woliwo, ''Wapasile ivu muminso yane, nasamba, acho nomba nkhulola.'' ¹⁶ Wamwi awa wa Farisi awati, ''Umunthu wee atafumile kwe Leza amuno atakusunga e Sabata.'' Awanji awati, ''Chingawa wuli umunthu wino amuwembu ukuchita ivilolwa nge vyoo?'' Achaleka palinji ukupawunkhana pe woliwo. ¹⁷ Achaleka wakolowozizye swinya umunthu wa nthonkho, ''Wuzye ukuti wuli ivya weliwe, pakuti weni iyuzile aminso yako?'' Inthonkho yati, ''Weni amutumwa.'' ¹⁸ Nomba awa Yuda naponye watasuwizile ivya weliwe ukuti walinji anthonkho swinya wapochezile ukulola kwakwe wasuka wapunda awakwasi wakwe wino wapochezile ukulola. ¹⁹ Awakolpwozya awakwasi, ''Wuzye amwana winu wee wino mukuti wakwasilwe anthonkho? Nga chawa wuli pano nomba akulola?'' ²⁰ Achaleka awakwasi wakwe awatolelela woliwo, ''Tumanyile kuno wee amwana witu swinya wakwasilwe anthonkho. ²¹ Chawa wuli ukuti nomba weni akulola, tutamanyile, swinya weweni wino iyula aminso yakwe, tutamanyile. Kolowozya weliwe, weni we songo. Weni angayivwanjila.'' ²² Awakwasi awavwanga ivinthunye vyoo, amuno watinanga awa Yuda. Muno awa Yuda wazumilizyanie zuwa ukuti ndi wumwi anga zumilizya weliwe ukuwa we Kristu, aliwingwa mu sinagogi. ²³ Umulandu wakwe choo, awakwasi wakwe awati, ''Weni we songo, mukolowozyani. ²⁴ Achaleka pa mphindi ya chitiwili wizile punda u munthu wino walinji anthonkho nu kuti kwe weliwe, ''Mupe uwuchindame Leza. Tumanyile kuno umunthunye wee amuwembu.'' ²⁵ Ngapano umunthunye weyo atolelela, ''Nthamanyile kuno umunthu wee amuwembu. Chonga chino nene imanyile: Nalinji ne nthonkho, kweni nomba nkhulola.'' ²⁶ Apano watili kwe weliwe, ''Nga wawomvile chani kwe wewe? Wiyuzile wuli aminso yako?'' ²⁷ Atolelela, ''Nenji mbanenile kali, kweni mutateyelizizye! Achani chino mukulonda mwivwe swinya? Namwenye mutakulonda muwe mwe wasambilizi wakwe, vwile? ²⁸ Awamutuka nu kuti, ''Wenji we musambilizi wakwe, kweni swenji swe wasambilizi wakwe Musa. ²⁹ Tumanyile kuno Leza wavwanzile kwe Musa, kweni tutamanyile kuno wee wafuma.'' ³⁰ Umunthunye weyo atolelela nu kuti kwe woliwo, ''Choo achakuzungusya, ukuti mutamanyile kuno wafuma, kweni ayizwile aminso yane. ³¹ Tumanyile kuno Leza asiteyelezya ku wawembu, kweni ndi wumwi akuyitwala swinya akuwomba ukulonda kwakwe, akateyelezya kwe weliwe. ³² Muno insi yatalikila chitatele chivwike ukuti wumwi wiyula aminso ya munthu wino wakwasilwe anthonkho. ³³ Ndi umunthunye wee atafumile kwe Leza, weni atangawombe nanthi chimwi.'' ³⁴ Awatolelela nu kuti kwe weliwe, ''Wewe wakwasilwe mu luwembu lutupu, nga ukusambilzya sweswe? Ngapano awamusumbila panzi. ³⁵ Yesu wivwile ukuti wamusumbizile panzi pe sinagogi. Weni wamuzanile nu kuti, ''Wuzye ukusuwila mwakwe Mwana wa Munthu?'' ³⁶ Weni atolelela nu kuti, ''Wuzye weweni, Mfumu, ilyakuti insuwile mwakwe weliwe?'' ³⁷ Yesu atili kwe weliwe, ''Wewe wamulola, swinya aweliwe wino akulanda na wewe.'' ³⁸ Umunthu atili, ''Mfumu, nkhusuwila,'' ngapano wamupepela weliwe. ³⁹ Yesu atili, ''Avyo akupanzya kuno kwandeta munsi yoo ilyakuti waa wano watakulola wangalola swinya wano wakulola wawe anthonkho.'' ⁴⁰ Wamwi awa Farisi wano walinji nawe wivwile ivinthunye vyoo nga wamukolowozya, ''Wuzye naswenye anthonkho?'' ⁴¹ Yesu atili kwe woliwo, ''Ndi mwalinji mwe nthonkho, nge musi nu luwembu, kweni nomba mukuvwanga, 'Tukulola,' acho uluwembu lwinu lusyala.''