¹ Mumazhuba yayo, kwakaba kuli noluvute lwabanhu, koga abajakabelina zokulya. Jesu wakashoba balayijwa babe akati kwabali, ² "ndimuwhila yolu luvute lwabanhu nokuti mumazhuba matatu apinda bamunditobela koga abana zokulya. ³ Kana ndikababwiliza kujingumba jabo besijalya, bengazilikila munzila. Nokuti bamwe babo banova kule." ⁴ Balayijwa babe bakonshandula beti, "Ndikupi kwatingawana chinkwa chinokwana luvute lose yolu tilimushango yakadayi?" ⁵ Wakababhuza eti, "Munazunkwa zungana?" Bakati, "Zwishanu zuna tubili." ⁶ Wakalayila luvute lwabanhu kuti lugale pasi. Wakatola zunkwa zushanu zunatubili, ekaboka, akazukwamula. Wakapa balayijwa babe kuti bekobele luvute lwabanhu. ⁷ Bakabeli notukobe tushoma, paakapeja kuboka, wakalayila balayijwa babe kuti bekobebo. ⁸ Bakalya bekaguta, bekanungilila tusyepu twakabasala , zwakazhala muzuzuma zushanu zunatubili. ⁹ Kwakabeli nabanhu bakabelizulu zuna. Wakabatata. ¹⁰ Nokukambija wakanongwina mubwato nabalayijwa babe, bakenda kuDalumanuta. ¹¹ BaFalisi bakabhuda bekatanga kukakabajana naye. Bakabonkombeleja kuti ete chichenamiso, beda kunkweja. ¹² Wakafemeleka kasa mumpepo uwe ekati, "Ini zunotisa kuti luji yolu lude zuchenamiso? Chokomende ndinoti kwamuli , apana chichenamiso chandichatondeja luji yolu." ¹³ Wakabasiya akenda kunongwina mubwato kova enda kunelimwe bhazu. ¹⁴ Feno balayijwa bakakanganwa kunyamula chinkwa chabo bengina mubwato. Bakabasala nechinkwa chimwempela chete. ¹⁵ Wakabalaya, eti, "Lingani, muchenjelele unkukumuso wabaFalisi nonkukumuso waHelodi." ¹⁶ Balayijwa bakabekakabajana boga nokuti besina zolya. ¹⁷ Pakawhisisa yozu, wakababhuza eti, "Ini mukakabajana nokuti amuna chinkwa? Ini mwoyo yenu ikakoma ali? ¹⁸ Munamesho, amutotobona na? Munenzebe, amutowha na? Amutoyeya na? ¹⁹ Pandakakwamula zunkwa zushanu zukalyiwa nabanhu bananga zwiulu zwishanu, zwitundu zungana zwakasala nozusyepu zwechinkwa zumakanungilila. Bakati kwaali, makumi anatubili. ²⁰ "Pandakakwamula zunkwa zushanu notubili kuti zukwane banhu bananga zwiulu zuna, zwitungu zungana zwakabelizhele tusyepu?" Bakati kwaali, "zushanu notubili." ²¹ Wakati kwabali, " Amujanu mwawhisisa nanhasi?" ²² Bakaswika kuBethisayida. Bakabuzila Jesu unhulume wakabelibhofu kuti ombhate. ²³ Jesu wakabhata luboko lwebhofu ekombhisa kuzhe konzi. Paakafila mate mumesho awe ekatambanuja maboko awe pezhulu pape, wakombuuza eti, "Kunazwawubweni na?" ²⁴ Wakalinga pezhulu, ekati " ndibweni banhulume bana semiti imukwenda." ²⁵ Wakombhata pamesho awe zwakale, pakalepo wakava abonesesa zubhodo. ²⁶ Jesu wakontumija kungumba kukwe akale ekati, "Usingine mumizi." ²⁷ Jesu wakatola balayijwa babe bekangina kumizi yeKesaliya yokuFilipi. Bechimunzila wakabhuza balayijwa babe eti, "Banhu banoti ndimi ani?" ²⁸ Bakonshandula beti, "Johane umbhabhatizi. Bamwe banoti, 'ndimwi Eliya,' bamwe nebo beti, ' Umwe wabapolofita." ²⁹ Wakababhuza eti, "Ani imwi moti ndimi?" Petulo wakonshandula eti, "Ndimwi Khristo." ³⁰ Jesu wakabalayila kuti besibuje banhu nozuzwe. ³¹ Wakatanga kubalayija kuti Mwananhulumyana wonhu unokwelela kusheteswa, noudalo ucholambwa nabakulwana nabatebuji bakulwana nabakwali, esikobulayiwa, esikomuka muzhuba lyatatu. ³² Wakalebeleka inyaya yeyi pachena. Petulo wakonshobela kumbali ekatanga kuhatamija. ³³ Wakachingunuka ekalinga balayijwa babe ekakalaliwa Petulo akati, "Inda mushule lyangu, Satani! Awujimubiga indangalilo iyo muzunu zwaMwali, koga muzunu zwabanhu." ³⁴ Wakashoba luvute lwabanhu nabalayijwa babe pamwempela, akati kwabali, "Kana unhu eda kunditobela, unokwelela kuzulamba, enyamule unchinjikwa uwe, esikonditobela. ³⁵ Nokuti yoyo unoda kuchija bupenyu bubwe buchondashikila, koga yoyo unolashikilwa nobupenyu bubwe muzina lyangu nendebo mbuya unobukwabilila. ³⁶ Zunobhancha neni kuti unhu ewane zose zopenyika esikolashikilwa nobupenyu bubwe na? ³⁷ Ini zwangape unhu kuti ewane bupenyu bubwe? ³⁸ Yoyo unaneshoni nami namawhi muluji yeyi yobupombwe noluchinyo, Mwananhulumyana woNhu uchaba neshoni nayepachezha kubushe bwaTate babe neNhumwa inchena."