¹ Wakati kunayibo, ''Chokomende ndoti kwamuli, kuna bamwe benu bamile yopano bachalekeja kushangana nolufu besanu babona bushe bwaMwali buzha namasimba.'' ² Mushule mwamazhuba mashanu nakamwempela, Jesu wakatola Petulo, Jakobe na Johane kudunu gulwana, beliboga. Wakashanduka akaba kunechimwe chimo mbeli kwabo. ³ Zumbalo zuzwe zukachena, zokuchenesesa kupinda unchenisi womunyika kuzwichenesa. ⁴ Zwino Eliya elina Mozisi bakaboneka kuna ibo, bakabe mukulebeleka naJesu. ⁵ Petulo wakashandula akati kunaJesu, ''Ndayiji, zulokwelela na kuti tibe yopano, ngatibake ingumba natu, iyo, yaMozisi imwe ibe yaEliya.'' ⁶ (Wakazushayiwa zokulebeleka, nokuti bakababa nolutyo.) ⁷ Kwakezha makole akaba fulatila. Kwakawhikana iwhi liva mamakole liti, ''Yoyu mwananhulumyana wangu wandinodisisa. Whililani kunayiye.'' ⁸ Pakalepo, apana nhu wabakabona, koga Jesu chete. ⁹ Pabakabebheluka bevha mudunhu, wakabalayila kuti besulebe zwabakababona kuswika mwananhulumyana wamuka kubafi. ¹⁰ Bakawhilijila pesina wababuja, koga bekwejisa beli boga beti ''kumufa kubafi'' zunovhani. ¹¹ Bakombhuza , ''Ini bakwali beti Eliya etange kuzha?'' ¹² Wakati kwabali, ''Eliya wakezha kokutanga komusilija zusakabelipo. Ini kukakwalwa kuti mwananhulumyana unokwelela kusheteswa akale elingilwa pasi? ¹³ Koga ndoti kwawuli Eliya wezha, bakata zwabakabeda kunayiye, sozwazulo kwala mayelana naye.'' ¹⁴ Pabakezha kubalayijwa, bakabona igubungano lilo bakombeleja, nabakwali bemukukakabajana. ¹⁵ Pabakambona Jesu, igubungano lyakachenama lilabukila kwaali bemuusa. ¹⁶ Wakabhuza balayijwa eti, ''Ini mukakabajana nabo?'' ¹⁷ Umwe mugubungano wakonshandula, ''Ndayiji, ndezha nomwananhulumyana wangu kunawi. Unompepo unontisa kuti esulebeleke. ¹⁸ Zungobhata nesimba unombwelela pasi, ebhuda ifulu mundomo, enyeya meno, kova ekoma. Ndakabuja balayijwa kuti belibhise, koga bakakonelwa.'' ¹⁹ Wakabashandula eti, ''Luji lusinodimbwa, ndichagala konshaji nkulwana chini namwi? Umbuzeni kunami'' ²⁰ Bakonsenga mwana wechinhulume kunayiye. Umpepo pawakabona Jesu, zwakamposela pasi akatanga kupupa. Yoyu mwana pakambwela pasi wakabhuda mafulu mundomo. ²¹ Jesu wakabhuza dade babe kuti, ''Waba nonshajini eli ali?'' Dade babe bakati, ''Kuvha elimwana ntukutuku. ²² Zukombhata zwakabe mposela mumoto kana muvula zuda kumpalaja. Kana mutubula , tiwhileni she mutibhanche'' ²³ Jesu wakati kunayiye, ''Kana mutubula'? Zose zunotubulika kunabo banodimbwa.'' ²⁴ Pakalepo dade bomwana bakakwila beti, ''Ndodimbwa! Ndibhancheni kusodimbwa kwangu!'' ²⁵ Jesu paakabona igubungano lilabuka kunayibo, wakalayila mipepo mibi eti, ''Iwi mpepo usinowha nowusinolebeleka, ndoti kwawuli, bhuda mwaali, akale usibe ubuya kunayiye kakale. ²⁶ Lyakakwilila muzhezhulu likokombhata nesimba mwana nhulume akale likavha lyabhuda likenda. Mwana nhulume wakata soti unhu wabafa, zokuti banji bakati, ''Wafa.'' ²⁷ Koga Jesu wakombhata noluboko lulwe akonyamula, akale mwana nhulume yoyu akanyamuka. ²⁸ Wakati eswika mungumba Jesu, balayijwa bakombhuza beliboga beti, ''Ini tisijakali bhisa?'' ²⁹ Wakati kwabali, ''Yoyu nshobo wompepo awutobhisika koga kuzhe kweminamato.'' ³⁰ Bakabhuda benda bakapinda nomuGalaliya. Hajakada kuti banhu bezibe kwabakabeli, ³¹ nokuti wakabelayija balayijwa babe. Wakati kwabali ,''Mwana nhulumyana uchapilwa mumaboko abanhu bechinhulume besikombulaya.Engobulayiwa, mushule mwamazhuba matatu uchamuka. ³² Koga abakajakawhisisa indebo yeyo, koga bakatya kumbhuza. ³³ Pabakasika kuKapenawumi. Angina mungumba wakababhuza eti, ''Mwabe kwejisani munzila?'' ³⁴ Koga apana wakashandula. Nokuti bakabekakabajana muzila umwe nomwe eti ndiye nkulwana. ³⁵ Pabakagala pasi, wakashoba banegumi nabili bose akati kwabali, ''Kana umwe wenu eda kuba wotanga, unokwelela kuba wokupejeleja nokuba ndanda kubabose.'' ³⁶ Wakatola mwana ntukutuku akombiga pakati pabo. Wakombiga mukati mwamaboko awe akati kwabali, '' ³⁷ Ani nani unotambula mwana wakadalo muzina lyangu watmbula imi; unonditambula akale atotambula mi koga wakandituma.'' ³⁸ Johane wakati kunayiye, ''Ndayiji, takabona umwe nhu ebhisa madimoni nezina lyenu tikojibisa, nokuti hataba umwe wabatobeli bedu.'' ³⁹ Koga Jesu wakati, Unsiyeni, nokuti akuna uchata kana kubhata nshingo nkulwana muzina lyangu esikolebeleleka zunhu zubi nami. ⁴⁰ Ani nani usilomilana nasu ndokunasu. ⁴¹ Unokupa unkombe wevula kuti unwe muzina lyangu nokuti ndiwaKristu, chokomende ndinoti kwawuli, hatoshayiwa undipo uwe. ^{44 42} Wose unombweja bana batukutuku kana kubata kuti besudimbwe munayiwe, zulokwelela kuti esungwe ponchibha bemposele mugungwa. ⁴³ Kana luli luboko lulo akale lunotisa kuti umbwele mukudimbwa, lidubule. Zunobeli zubuya kuti ungine kudenga noluboka lumwempela pana kuti unde kuGehena, kuna moto usinopela. ^{45 46} Kana igumbo lilo likutisa kuti uchinye, lidubule. Zwibuya kunda kubushe bwedenga ulichikosha kana kuba namakumbo mabili akale kuposelwa muGehena. ⁴⁷ Kana izhisho lilo lita kuti uchinye, libhise.Zwibuya kungwina bushe bokudenga uli nezhisho limwempela kunokuba namabili usikoposelwa muGehena, ⁴⁸ pane honye jisinofa nomoto usinojimwa. ⁴⁹ Wose ucholungwa nomunyu unomoto. ⁵⁰ Munyu umbhodo, koga kana ukashayiwa bumunyu bwawo, unowuta chini kuti ulwele akale? Ibani munyu mube nolunyalalo kunomwe nomwe.''