¹ BaFalisi nabamwe bakwali bakabeva kuJelusalema bakombunganila. ² Bakabona kuti balayijwa babe bakabelya chinkwa namaboko aloswibha, esijiloshambwa. ³ ( Nokuti baFalisi nabaJuda bose abatolya besijashamba maboko zubuyanan, nokuti bachilo bhatilila kumilayo yabakulwana. ⁴ BaFalisi kana beva kumusika, abatolya kana besashamba mibili yabo, bachilobhatilila kuzunu zwabakawana zunanga sokushambisa inkomeki, mipika, mikombe yekopa , nozugalo zwabanoshingisa kana belya.) ⁵ BaFalisi nabakwali bakabhuza Jesu beti, "Neni balayijwa babo besinotobela ungalilo wakabetiwa nabakulwana, koga belya chinkwa namaboko aloswibha?" ⁶ Wakati kwabali , "Ìsaya wakapolofita zubhodo namwi bachengeji. Sezwakakwalwa kuti, 'Banhu yaba banondikuja nondomo, koga mwoyo yabo ikokule nami. ⁷ Banonamatila pasina, belayija mulawo yabanhu somulawo wegubungano.' ⁸ Munolasha mulawo waMwali mubhatilila kumagalilo abanhu," ⁹ Wakati kwabali, " Zubuya na kulamba mulawo waMwali kutila kuti mugale nongalilo wabanhu wantolo! ¹⁰ Nokuti Mozisi wakati, 'Kuja dade namai babo; akale, 'Yoyo unolebeleka bubi pezhulu patate kana amai babe uchalangilwa kufa.' ¹¹ Munoti , " kana unhu eti kuna dade namai babe, "Lose lubhancho lwamunowana kuva kunami i Cobani"(zuleba kuti, Chipo), ¹² Nokudalo amuchinomvumija kubhancha dade namai babe. ¹³ Mumuta kuti ihwi lya Mwali kuti lisiwhikane nongalilo wenu wamumulalama . Nozumwe zunokwendelana zwamunota. ¹⁴ Wakashoba luvute lwabanhu akati kwabali, "Ihwililani, imwi mose, muhwisisise. ¹⁵ Akuna chinhu chinoboneka pazhe ponhu chinonswibhisa kana chingwina mukati. Zunhu zunobhuda ponhu ndizo ¹⁶ zunoonswibhisa. "Kana unhu eline nzebe jokuhwa, undekeni ehwe. ¹⁷ Ngweno Jesu paakasiya luvute lwabanhu wakangwina mungumba, balayijwa babe bakombuza nozontaniso. ¹⁸ Jesu wakati, "Namwibo amujanu mwawhisisa? Amutoziba na kuti chose chinongina mukati monhu chiva pazhe achitonswibhisa, ¹⁹ nokuti achitongina mumwoyo uwe, asi zunongina muntumbu mumwe zusikobhuda zunda muchimbuzi?" ²⁰ Wakati, "Zunobhuda mumwoyo wonhu ndizo zunonswibhisa. ²¹ Nokuti mukati monhu, zuva kumwoyo , ndiko kunobhuda miyeyo mibi, busangu, kukwiba, kubulaya, ²² kuchiba, moyo mbi, manyepo, kuleba zubi, ishanje, kunyeya, bushambwa, bulema. ²³ Zose zwibi yozu zunova mukati, akale ndizo zuswibhisa unhu." ²⁴ Wakanyamuka yopo akenda kubugalo bweTile neSidoni. Ekangwina mungumba, akale ajakabeda kuti banhu bezibe kwakabeli, koga ajakabesisika. ²⁵ Nokukambija unhukaji wakabeli nomwana wakabeli nemipepo mibi wakawha nozuzwe akanowila pamakumbo awe. ²⁶ Unhukaji yoyu wakabeli uGiliki, uSyrophoenician kukuzwalwa. Wakonkumbila kuti ebhise umpepo umbi kumwana uwe nsichana. ²⁷ Wakati kuna iye, "mani tangwa bana belye. Nokuti azujilokwelela kutola chinkwa chabana uchiposele imbwa." ²⁸ Koga wakashandula eti kwaali, "Eya, She, nembwa jinolya mudako mwetebuli jinungilila mafufu anobembwejwa nabana," ²⁹ Wakati kwaali, "Nokudalo nozwawaleba, inda mulunyalalo. Idimoni lyabhuda kunsichana uwo." ³⁰ Wakabwilila kungumba iye ekawana mwana uwe elilele pombheda, idimoni lyabhuda. ³¹ Akale wakabhuda mubugalo bweTile, akapinda nomuSidon enda kugungwa lyeGalileya engina mubugalo bweDecapolis. ³² Bakombuzila unhu wechinzebe esinotubula kulebeleka zubhodo, bekonkumbila kuti ombahate namaboko awe. ³³ Wakontola ekombhisa mbeli koluvute lwabanhu benda kundawo ilosisika, wakabiga tunyala tutwe munzebe jije, ekafila mate ekabhata lulimi lulwe. ³⁴ Wakalinga kudenga, ekafemuluka akati kwaali, "Ephphata," zunoleba kuti, "zhula!" ³⁵ Nokukambija inzebe jije jazkazhulika, nolulimi lukasungunulwa, ekatanga kulebeleka zubhodo. ³⁶ Jesu wakababuja kuti besibuje banhu. Koga paakabebabuja, ndipo pabakabepupula. ³⁷ Bakachenama kasa, beti, "Wata zunu zose zubhodo. Unota basinowha bewhe nabasinolebeleka belebeke."