1 Naŋ zɨzǝrag Ntswa u ǝ shyyo bǝ Yesu, əsɨ bwwog ə nyyo bə cen Urdun ku. Zɨzǝrag Ntswa u əsɨ lwi gu tsswo ku əsɨ dərog ə nad bə ntswa uyid ji. 2 Əzô əgwam utənyiraŋ wu əsɨ mmag gu ə mbwo nnwam nswag nnay. Ə̀ku ya kyaŋ dag bumi nnwam swag nnay na. Də nghan wu bə njen əzo zoŋ sɨ təbad gu bəd. 3 Əgwam utənyiraŋ wu əsɨ nyo bə ngu, "Kə ŋwan ə yed Ŋgwon Əgwaza ka, kam əfaŋ əkay ni kâ bwwag ə cyyo kuŋkwoŋ." 4 Yesu əsɨ shim gu ndyo nyo, "Əkə dyurug nyo, 'kuŋkwoŋ ǝ bǝ ǝnyin gu Ətyibɨshi wu ənǝ nshyyo ǝcǝd dag.'" 5 Kukwo əgwam utənyiraŋ əsɨ coŋ bə ngu ə nad ndyo ba əkətən ulwo. Əzô gwo sɨ ntwərag gu kəkəb bibyin Swanta na bə akǝday njen. 6 Əgwam utənyiraŋ wu əsɨ nyo bə ngu, "Nna joŋ a kəkəb bɨbyin əkwi ni bə kəkəb zwa ku ji â nnyyo tyog tuza na. Nwad əkə joŋ n kəkəb na kukwo mbyyo nna yəw ŋwag konyan ə ncad ṇwwag ku. 7 Nwad ənnyo, kə anɨ kparag huhwud a ba duyi nka dɨ kwog n toŋ, sə njoŋ a na kəkəb nû yed ushin a." 8 Əwod Yesu əsɨ shim gu ndyo, "Əkə ndyurug nyo, 'anɨ dyeb Əgwaza awu,ǝwod guwo bǝ nyin gu ani nyyo gu ntǝm,'" 9 Kukwo əgwag utənyiranŋ əsɨ nad bə Yesu Urushalima ətə sag gu bə akətən nnog uli Dyeb Əgwaza ka. Əsɨ nyo bə ngu, "Kə ŋwan ə yed ŋgwon Əgwaza ka ta ǝpyo a nyyo əji tɨnad əbyin. 10 Bə naŋ ə ndyurug ni, "ə̀na kam +ətəm ntswa gu ba dənian aka bâ ga cog a shensham.' 11 B́a na byoŋ a bə mbwag bana kəlag ani lwi tag bə əfaŋ.'" 12 Yesu əsɨ shim gu ndyo nyo, "Əkə nyo, 'yog cyyo Ətyə Uli Əgwaza awu bɨ mag dag.'" 13 Naŋ əgwag utənyiraŋ wu ə ntyag tyəram Yesu ku ni, əsɨ tə nkad ə wod gu sə jen jyaŋ. 14 Kukwo Yesu əsɨ bwwog ənad Galili bumi ced Zɨzǝrag Ntswa ku. Nkhaŋ tuza gu sɨ la byyaŋ dag nɨ sɨ gub kay əfam Galili ka. 15 Kukwo gwo sɨ ka təbad cyyed bumi tuntu Dyeb Əgwaza na. Ənied ba sələy əsɨ dyeb gu. 16 Ə̀ku bay bumi Nazarad ka dulwo əkya ə mbyoŋ gu ni. Utug nwam tswuŋ ka, əsɨ nad bu tu dyeb Əgwaza ku bənaŋ gwo ni nnyyo ni. Əsɨ dərog əyoŋ dɨ twaŋ əlyyad na. 17 Ə́sɨ nyyeb gu kwa əlyyad tuza Ishaya ətyə əlyyad əŋwwad Əgwaza. Əsɨ nyyib ətə shyyo ulwo əkyo ə ndyurug nyo, 18 "Tswa ətyə Uli shyyo tuza nka, dənian ǝkyo gwo nkworog n ǝmyyo nga usham əlyyad ka. Əku təm n nshey swan səd tuza +əhwo ka, ənied tɨtwan ba ə shyyo cyyaŋ ku, əwod ə fərog əsɨbyo ə faŋ ni. 19 Shay ǝlyyad tuza əlyyo nshog Ətyə Uli ka." 20 Yesu ə ntyag twaŋ kuni,əsɨ nyim kwa əlyyad ku əsɨ ŋwwag ətyə ntəm tu dyeb Əgwaza wu. Gwo nswan ni, kəkəb ənied əbyo shyyo bumi tu dyeb Əgwaza ku ni sɨ təb əyyi ba də ngu. 21 Əsɨka ndyyad bə mba nyo, "Utswun əkay ni, twərag kyaŋ əkwo ə lyurug əji ni bə tsutswo nyin ba." 22 Konyan əzǒ sɨ lyyad tan tuza guka əwod basɨ cyyo kwod tuza nyinyaŋ əlyyad əna ə wurug bə ununŋ guka ni. Kukwo basɨ lyib, "ŋgwon Isû əkyo kay dâ la? 23 Əsɨ nyo bə mba, "Cucug ə ndyen naŋ nyi na tag n uma əlyyad ə kay ni, 'əbwog, də ya nbwog əpyo a la. Kwo yag ə anyyo Kǝfarnahum, nyyo ǝnyo bumi ukaraŋ aka bwo .'" 24 Əwod əsɨ nyo "cucug ə ntag nyin, ətyə əlyyad əŋwwad Əgwaza ə shyyad shi bu ukaraŋ mbyin gu ka dag. 25 Əwod bumi cucug ntag nyin naŋ əku byyo dɨdɨd +kponyyug bə Israila, bə njen Iliya ji naŋ əku nkub tuza ji əlyyo ǝtad bɨ zwad utâ dǝ bɨ zaa, gbodǝrag nzwoŋ ǝsɨ kwa bɨ ukǝraŋ ka. 26 Əwod əku təm Iliya gwô nad bə ətyə nyyuŋ ba dag, sə bə kponyyug əwo ku shyyo Zarefad kpǝkpǝg bə Saydon ni. 27 Əku byyo ənied gbab bədɨdɨd bə əbyin Israila ka də njen Ilisha ətyǝ əlyyad əŋwwad Əgwaza. Əwod kwo ətyə nyyuŋ bə mba əku shyyo corog ku dag sə bə Naaman ətyə Siriya wu bə nyin gu." 28 Bâ nfəg nkyaŋ ənay ni, kəkəb ənied ba bɨ tu dyeb Əgwaza ku ntsswo bana sɨ byyan. 29 Basɨ nɨm ə dərog ətɨ nkwa bə Yesu ə kwag gu wwud dyo bu ukaraŋ ka. Basɨ nad bə ngu ufa əfan əkyo ə nnog ukaraŋ baka ni bâ tə yurug gu ǝ ta ǝbin. 30 Əwod kukwo gwo sɨ coŋ ə tyaraŋ ba bə kəucyo wu əsɨ nkad nkyaŋ gu. 31 Kukwo gwo swag ənad Kǝfarnahum bə əbyin Galili ka. Utug nwam tswuŋ ka əsɨ cyyed ba butu dyeb Əgwaza ku. 32 Basɨ cyyo kwod bə təŋkay cyyed guku dənian əka gwo ndyyad dɨ byyo tyog ni. 33 Əku byyo ətyog bumi tu dyeb Əgwaza ku wo byyo tswa utənyiraŋ ni. Əsɨ kpaŋ kún nyo. 34 "Kəd ey! Yag ə bəd zɨ nǝ nyyo bə ŋwwan Yesu ətyə Nazarad? A bay â bug zɨd a? Ndyen kwo yan ə a yed. Ŋwan ə yed Zɨzǝrag ətyə əwo nyyo bə Əgwaza u ni!" 35 Yesu əsɨ kam utənyiraŋ ka nyo, "cyo nyuaŋ! wurug bɨ lwam guku a wod gu!" Utənyiraŋ ka sɨ hwwad gu ukag əbyin usɨ wurug də bɨ la gu ulwo. 36 Kəkəb ənied ba sɨ cyo kwod! Basɨ ya uswon bɨ lyyad bə əyyaŋ ku. Basɨ nyo, "Zaŋ təŋkay swaŋ əlyyad ko kwɨ? Ə̀ kam +utǝnyiraŋ na bɨ twərag tyog bɨ byyo ced. Basɨ wurug." 37 Nwad, usham əlyyad tuza guka sɨ gub səlləy +ukəraŋ na. 38 Kukwo Yesu sɨka ngwod tu dyeb Əgwaza ku əsɨ ŋwwo buli Siman ka. Əsɨ shyyo əkwaŋ Siman wu naŋ lwam guku shway kpakpay. Ənied ba sɨ nay Yesu gwô corog gu. 39 Yesu sɨ ka nnad ətə yoŋ kpokpog bə ngu əsɨ kam lwam shway ku, yog ku shyim. Bə də njen əzo, zwan ji sɨ kə ngwod gu. Əsɨ nɨm ə dərog əsɨ cad bǝ kyaŋ ya. 40 Dǝ njen ǝzǝ nwam ku nkway ni, konyan ə́ byyo ətɨ nzwan əsɨ nad ətə bay bə ngu bə Yesu. Yesu əsɨ say mbwag gu na bǝmba, kəkəb ba basɨ corog. 41 +Utənyiraŋ bwo sɨ wuud bə ənied bədɨdɨd byo sɨ twi nyo, "Ŋwan ə yed Ŋgwon Əgwaza ka! Yesu əsɨ kam +utənyiraŋ na nâ cyyo nyuaŋ dənian əka ba ndyen naŋ gwo yed Kristi ni. 42 Jen əzo utswon ka u ntǝyag ni, Yesu əsɨ wurug ənad dulwo əkyə ənied ə nshyo ni dag. Əkpa ənied əsɨ wurug cad gu. Basɨ bay əba shyyo ulwo əkyo gwo ntəkub ni. Basɨ kwád gu bəd gwô yog wod ba dag. 43 Əwod əsị nyo məmba, "Tɨlɨd kwo nshey usham əlyyad tuza tyog Əgwaza ku bə +ukaraŋ bədɨdɨd. Kyaŋ əkwo ə təm aji ni iko yo ku ni ə." 44 Kukwo gwo sɨ ya uswon bɨ shey bumi tuntu dyeb Əgwaza kwo əji bə Yahudiya.