¹ Cəcəd Yahuda wa ba ǝsɨ dərəg kəkəb ba ə kyag Yesu ə nad ndyo bə Bilatus, ǝtyi ̧tyog Roman əwo byoŋ əbyin Yahuda wa ka ni. ² Ba sɨ tə ŋwwo lwoy gu əlyyad nyo, Zɨ təbad əfay əwi ni gwo fwud əniəd zɨ ba nyo ba lag hwi tyog Roman ku. Ə shey ba nyyo ba lag taraŋ Kaysar, gbondaŋ əgwam Roman u kurum əbyin ku, nyo ə nyo gu bwo gwo ə yed Kristi u, əgwam, wo Əgwaza ə khay ə təm dyo ni. ³ Kukwo Bilatus ǝsɨ lyib Yesu nyo, ŋwan ə yed əgwam əniə Yahuda u a? Ə sɨ shim gu dyo nyo, a karag na. ⁴ Bilatus ǝsɨ nyo bə cəcəd əniəd fi zənaŋ ba mbyyaŋ dɨdɨd əniəd u, N shyyo ətyo əwi bə əbun dag. ⁵ Əmgbom bə ənyo ba sɨ yoŋ tsərəŋ nyo, Cyyed guku fwo ulwo ka bǝ əbyin Yahuda ka. Ə tsa ku bǝ əbyin Galili ka ə byoŋ əba kwa Urushəlima u əji. ⁶ Bilatus ə nfəg ə cyyo ənyuŋ Galili ka ni, ǝsɨ lyib kə Yesu ə yed ətyə Galili. ⁷ Ə nfəg nyo Yesu ə nyo Galili, əbyin əka Hirudus ə nbyoŋ tyog ku ni, ǝsɨ təm bə ŋgu bə Hirudus, naŋ gu Hirudus əmaŋ shyyo Urushəlima bǝ njən əzə. ⁸ Hirudus ə ndi Yesu ni ǝsɨ fəg nyinyaŋ, nwad nyyo utsswun dag ə gwo ntsswoŋ nkhaŋ Yesu na. Ə sɨka cad ə shyyo di Yesu ə nyyo nɨtyog bǝ ǝyyi guba. ⁹ Ə sɨ lyirɨm Yesu nkyaŋ bədɨdɨd. Yesu ǝsɨ ya nkarag kɨkarag ə ntan gu a. ¹⁰ Cəcəd əniəd fi zənaŋ ba mbyyaŋ tɨntən əniəd cyed lwag Musa ba ǝsɨ wurug ə yoŋ. Ba sɨ ŋwwo lwoy Yesu nkyaŋ bə dɨdɨd bǝ əŋwwad njyo. ¹¹ Hirudus mbyyaŋ əniəd nzwaŋ guba ǝsɨ jyway gu, ba sɨ may gu. Mənta əkyə ba sɨ kyag ətan ətərəg kurum ə kub gu, əwod bǝsɨ bwwog bə ŋgu ə təm Bilatus dyo. ¹² Utug əkyə Bilatus mbyyaŋ Hirudus, ba ǝ byo dəba tyam wuwwo əyyaŋ ni dag, ǝsɨ bwwag ə yed kpondaŋ. ¹³ Bilatus ǝsɨ təm ǝsɨ yoroŋ gu cəcəd əniəd fi zənaŋ ba mbyyaŋ ətad ǝyyi ba, mbyyaŋ əkum əniəd ka bâ tuŋ ə bay. ¹⁴ Ba mbay ni kukwo gwo nyo bə mba, Nyi bay bə nuŋ ətyo əwi nyo ə fwud əniəd ba nyô ba lag hwi tyog Roman ku. N ndyɨrɨm gu nkyaŋ ənay du uyi nyinka nsɨ nshyyo gu bǝ əbun bə nkyaŋ əna nyi lwoy gu ni dag. ¹⁵ Hirudus bwo ə shyyo gu bə əbun dag kukwo mbyyo gwo mbwwog ba ŋgu ə bay dyo bə nzɨd. Di! ə nyyo kyaŋ kwo ntay ə hyad gu ni dag. ¹⁶ Naŋ i ndi ǝnî ni, n na ncyyo ə wad gu bǝ əyǝw ə fərəg gu ə wod. Bilatus ə ŋwwag Yesu ə hyad ¹⁷ [I yed tɨlɨd kwo dǝ njən ǝzə swoŋ ukwa paska ji nkarag bay ni, Bilatus ǝ fərəg ba əhwo ənyyuŋ wo ba cad, ni ə wod ] ¹⁸ Ba nfəg ənyo ni, kəkəb ba ba sɨ kworog nkun nyo, Hyad gu! Fərəg zɨd Bərabas. ¹⁹ Bərabas əwi, ə ku fiyeb gu bɨ hwo dənian tyi əniəd uyarag mbiyaŋ hyad əyin bǝ ukaraŋ Urushəlima ka. ²⁰ Naŋ Bilatus ə ncad ə fərəg Yesu ə wod ni, ǝsɨ yam ǝsɨ bwo lyyad bə mba. ²¹ Kukwo ba sɨ ya uswon bɨ gwoŋ ku nyo, Ə kpaŋ gu bə ətiyem ə hwu! Ə kpaŋ gu bə ətiyem ə hwu! ²² Bə ncyan utad ku ǝsɨ bwo lyib ba nyo, Di yag ə əna nhyad gu? Zan kətug kyaŋ ə gwo nyyo. N di kyaŋ əkwo gwo nyyo i ntay ə hyad guni dag. N na cyo ə wad gu bǝ əyǝw ə fərəg gu ə wod. ²³ Səlləy ba ba sɨ yoŋ ŋag tsarag ə gwoŋ bɨ cəd nyo ə kpaŋ Yesu bə ətiyem u, had gugwoŋ ba wu ǝsɨ sswag cəd Bilatus ku. ²⁴ Kukwo gwo sɨ nyyo naŋ ba ncad ni. ²⁵ Ə sɨ fərəg ətyǝ əwo ba cad ni ə wod, wo ə faŋ bɨ hwo ku dənian tyi uyarag mbiyaŋ hyad əyin ni, əwod ǝsɨ ŋwwag Yesu bâ nyyo bə ŋgu naŋ ba ncad ni. ²⁶ Əniəd nzwaŋ ba ə ŋgurug bə Yesu b'uli Bilatus ka ə niyed dyo ni, ba sɨ mwun bə ətyog əyyaŋ ə ŋgyi Siman, ətyə Siren. Ə ku nyyo bu ukaraŋ kyə ə niyed Urushəlima. Ba sɨ nkwa bə ŋgu, ba sɨ farag gu ətiyem Yesu u, ba sɨ cyo gwo hwi gu lilyim. ²⁷ Əniəd bədɨdɨd ǝsɨ mun ə nhwi. Bumi ba ka ənyyug əyyaŋ ǝsɨ nshyo ba pyyed mbwag əpyyo, ə gwoŋ nkun dənian gu. ²⁸ Yesu ǝsɨ bwwag ǝsɨ nyo bə mba, Nyin ənyyug Urushəlima, nyi yog twi dənian n dag. Nyi twi hwod əpyyo nyin mbyyaŋ nnwan nyin na. ²⁹ Jən ji tɨbay zə ə ba nnyyo ənied labarka ba yed ənyyug əba yed nənhwu ba ni, ba də kə ntyi nnwan ni, ba də əkə ŋway bɨbiyen baba ni. ³⁰ Də njən əzə əniəd ba ba nyyo bə fɨfan ku, Nyi shwod kway bə nzɨd! Bâ nyyo bɨ tswog ji, Nyi kub zɨd. ³¹ Kə bǝ nyyo ǝni naŋ ukwon ka u yed əshyim, i ba di ni bǝ usɨka u hwod ni. ³² Ətyog əfiyaŋ ǝsɨ nshyo, kətug əniəd byo. Əniəd nzwaŋ ba ǝsɨ mun ǝ wurug bǝ mba ǝ ta duswon, ə tə hyay ba dunduŋ bə Yesu. ³³ Ba sɨ tə tad du ulwo əka ə ŋgyi Kpaŋyyag əpyyo u ni, əzâ ba sɨ nkpaŋ Yesu mbiyaŋ kətug əniəd əfiyaŋ əbay bǝ ə̂tiyem ba, ənyyuŋ bə əfam mbwag yag guka, asɨwu bə əfam mbwag myyan ka. ³⁴ Kukwo Yesu ǝsɨ nay Əgwaza nyo, Əcyo, yurub əniəd əbay kətug ba ku, nwad ba lyen kyaŋ əkwo ba nyyo ni dag. Əniəd nzwaŋ ba ǝsɨ kworog zunzu bə ətərəg guba ə di əniəd əba ənə shyo ba ni. ³⁵ Əniəd ba ǝsɨ bwog ə yoŋ ə cyaŋ Yesu naŋ cəcəd Yahuda wa ba ə may gu nyo, N ngyi kə ə say əyyaŋ əniəd bə əhwu ka? Də yog gwo yan san əpyyo gu la, kə gu ǝ yed Kristi əwo Əgwaza u khay ni. ³⁶ Əniəd nzwaŋ ba ǝsɨ mun ə miyed gu, ba sɨ shen ə nad kpǝkpǝg bə ŋgu ətə niyeb gu sɨssad sǝhwod ³⁷ Naŋ ba nyo, Kə ŋwan ə yed Əgwam Yahuda wa u, da san əpyyo la. ³⁸ Bǝ ətiyem u naŋ utən əppyo guka ni, ǝsɨ lyurug ə kpaŋ nyyo əni, Əgwam əniə Yahuda wa əwo wi ni. ³⁹ Ətyə ənyyuŋ bə ətaŋ əbyo ə kpaŋ dunduŋ bə ŋgu ni ǝsɨka lyyad gu bibyyo əlyyad nyo, Kəla, ŋwan ə yed Kristi u dâ? San əpyyo a, mbyyaŋ zɨd la. ⁴⁰ Əsɨwu ǝsɨ kam gu nyo, Kwo uwun Əgwaza ə bɨ tsswoŋ dâ? ŋwan mbiyaŋ gu ə fiyed nyin əlyyad ənyyuŋ nio a? ⁴¹ Kyaŋ əkwo zɨd cwi ni kukwo zɨ́ fway. Əwod gu, ə byyo əbun dag. ⁴² Kukwo gwo sɨ nyyo bə Yesu, Ba jyuŋ n də njən əzə aba ŋwwo nyyo tyog əku ni. ⁴³ Yesu ǝsɨ shim gu dyo nyo, Cucug əlyyad, utsswun əkay ni ani shyo dunduŋ bə nuŋ bɨ uli Tuza ka. ⁴⁴ Nyyo naŋ nwam ku nɨ shyo dudurug tuza ka tɨ nad tswam tsad ji utug əkyo ulwo ka usi hwad utug sǝllǝy tinad tswam kubǝnyyuŋ ji. ⁴⁵ Nwam ku sɨ nyyib, lyin sɨ kub əbyin ka səlləy. Cyyaŋ ǝtǝrǝg əzo ə lyǝw bumi gbǝndaŋ tu dyeb Əgwaza ku ni sɨ siyeb ncyo cyaŋ shuyaŋ. ⁴⁶ Yesu ǝsɨ kpaŋ kun nyo, Əcyo ŋgu, n cyo tswa nji mbwag a. Gwo nkarag bə ənyo ni ǝsɨ nwad tsswo ku. ⁴⁷ Gbǝndaŋ u bǝ əniəd nzwaŋ ba ə ndi gag əkwo Yesu ə nhwu ni ǝsɨ dyeb Əgwaza nyo, Zəm, ətyə əwi ə byyo əbun dag. ⁴⁸ Dɨdɨd əniəd əwo ə tuŋ ə bay cyaŋ kyaŋ əkwo ə nyyo ni, ə ndi ni, ba sɨ pyyed mbwag əpyyo, ba sɨ bwog ə nkad b'usa bana bə ǝtsswod nfɨrɨŋ bana. ⁴⁹ Səlləy ǝsɨba lyen Yesu ni, mbyyaŋ ənyyug əbyo ə hwi gu nyyo Galili ni, ǝsɨ yoŋ zan ə cyaŋ. ⁵⁰ Ətyog ayyaŋ əku nshyo ə ŋgyi Isuwu. Ə ku shyyo bǝ ǝkwog uson ba ǝsi bɨ yed zɨzǝrǝg ǝnyin. ⁵¹ Ətyog ǝwi ǝku shim bi kyaŋ ǝkwo ba ndǝp unuŋ ka ni mbyyaŋ kyaŋ ǝkwo ba nyyo ni dag. Ə ku urug bu ukǝraŋ Arimatiya bǝ ǝbin Yahudiya ka, wo tsswoŋ bay tyog Əgwaza ku ni. ⁵² Ətyǝ ǝwi ǝsi nad ǝtǝ shyyo Bilatus ǝsi nay ǝ joŋ gu lwam Yesu ku, ⁵³ Ə sɨ cyog bə nku bǝ ətiyem u, ǝsɨ gad ku bǝ ətan jijyad ətərəg, ǝsɨ cyo ku bɨ lyag əkwo ə shap b'afaŋ ni, ko də əkə nyyad əyin ni. ⁵⁴ Ə nyyo nkyaŋ ənay naŋ nwam ku sɨ niyed kwa utug juma'a ka, də njən əzə ə njyi nkyaŋ-ya nwam tsswuŋ na ni. ⁵⁵ Ənyyug əbyo ku bay dunduŋ bə Yesu nyyo b'əbyin Galili ka ni ǝsɨ hwi Isuwu ə nad ə tə di lyag ku, mbyyaŋ gag əkwo ə nyyad kwom gu ku ni. ⁵⁶ Ba sɨ bwog ə nad b'usa əna bə nhwad Urushəlima u ni, ba sɨ tə jyi əmyyo əna byyo swam ku kwo yed usham ni, nio baba tə kwon kwom ku ni. Utug nwam tsswuŋ ka ba sɨ tswuŋ bə naŋ cyed Musa ku i ndyyad ni.