¹ Utug ladi ka bɨbyɨb tswutswon ka, ənyyuŋ əbyo ǝsɨ nad bɨ lyag ku. Ba sɨ byoŋ əmyyo ǝniǝ ba jyi ə sag ni, nio ǝ byyo swam əko yed ni ² Ba sɨ tə di ə *byirɨg əfaŋ əka ə nfyyeb unuŋ lyag ka ni ə sag zan. ³ Kukwo ba sɨ ŋwwo, ba sɨ cad kwom Yesu Ətyə uli ku yway. ⁴ Ba sɨ bwwog ə yoŋ əzə bə tay ə tyu kyaŋ əkwo bay ni. Bə naŋ bud ǝyyi ni ba sɨ ka ndi +ətyog əfyyaŋ ufa baka, ba kub ətərəg əba ya ǝyyi ni. ⁵ Ba sɨ cyyo dyurug ǝsɨ tətoŋ +uyyi na əbyin. Kukwo ətyog əbyo ǝsɨ lyib ba nyyo, Yag ə mbyyo nyi ncad ətyo əwo shyyo əcəd ni bǝ əniəd kukwi ba? ⁶ Ə shyyo bɨ lyag ku dag. Ə wa kə ndərəg. Nyi jyuŋ kyaŋ əkwo gwo ku tag nyin naŋ gwo nɨ shyyo bə nyin bǝ əbyin Galili ku ni. ⁷ Əku nyyo ǝni, ‘Tɨlɨd kwo ə kyag Ŋgwon Ətyibishyi ka ə cyyo mbwag +kətug əniəd, bâ kpaŋ ka bǝ ətyiyem u hwu, utug nwam ntad ka u dərəg ucəd.’ ⁸ Əzə̂ ba sɨ njyuŋ əlyyad guna. ⁹ Bɨ bwwog baku bɨ lyag ku, ba sɨ tə kwog nnwan ntəm swag bu unyyuŋ na mbyyaŋ əkum ǝnied ka nkyaŋ ənay ni. ¹⁰ Ənyyug əbay ni Meri əwo nyyo bǝ əbyin Magdala ka ni, gwo, mbyyaŋ Yowana mbyyaŋ Meri əyaŋ Yakubu wu, mbyyaŋ ənyyug əyyaŋ ǝ ba ǝ ku shyyo dunduŋ bǝ mba ni. Ba byo ǝ ku tag +ətəm Yesu ba nkyaŋ ənay. ¹¹ Əwod ba ətəm Yesu ba, əlyyad ənyyug ənay ǝsɨ swan ənye də na byyo əpyyo ni, ba sɨ ŋwwag cucug dag. ¹² Sim bə ənyə Bitrus ǝsɨ dərəg ə tyab cuŋ ə nad bɨ lyag ku, ǝsɨ tə byyag, ǝsɨ ta ǝyyi ba ǝsɨ di cyyaŋ ətərəg əzə ə nniad kwom Yesu kuni ji myyan ənyin ji. Ə sɨ bwwog ə nkad ə tyu kyaŋ əkwo bay ni. ¹³ Bəbə nka utug əkyə nnwan ntəm Yesu ufyyaŋ usɨ kwa lwag u nyyed ukaraŋ uyyaŋ ə ŋgyi Imuwasu. Cyyed tswam shwwaŋ awa əfyyaŋ kwo bə tɨtag nyyo Urushəlima. ¹⁴ Bə ndwag ku ba sɨ ŋwwo bwoy əyyaŋ səlləy nkyaŋ əna ə nyyo Urushəlima u bə nnwam ənio ni. ¹⁵ Ba shyyo bɨ lyyad ku Yesu bǝ əpyyo gu ǝ̀sɨ shen ǝbay ǝ shyyo ba, ǝ̀sɨ ya uswon bɨ cyyed ku dunduŋ bə mba. ¹⁶ Ba sɨ di gu, səlləy bǝ ənyo ba sɨ fɨg gu dag. ¹⁷ Kukwo gwo sɨ lyib ba nyo, Yag ə nyi coŋ bwoy əyyaŋ ndyo bə ndwag ku? Basɨ bwwog ə yoŋ ə hwwan bə dyundyuŋ ntsswo. ¹⁸ Ətyə ənyyuŋ bə mba wo ə ŋgyi Kilyofas ni ǝsɨ lyib gu nyo, ŋwan ə bǝ ənyin a yed ətyî-cən u Urushəlima wo ǝ cyi nkyaŋ əna ə nyyo əzə bə nnwam ənay ni a? ¹⁹ Ə sɨ lyib ba nyyo, Zan nkyaŋ nio? Ba sɨ shim nyo, Nkyaŋ ǝniǝ shyyo Yesu ətyə Nazəret u ni. Ə ku yed ətyi lyyad əŋwwad Əgwaza wo nyyo cəcəd nkyaŋ nɨtyog ni, ǝsɨ mun ə yed gbondaŋ ətyi cyyed bə lili Əgwaza mbyyaŋ əniəd ba. ²⁰ Gwô cəcəd əniəd fi zənaŋ zɨ ba mbyyaŋ cəcəd zɨ ba ə təbad ə cyyo cəcəd Roman ba dyo mbwag bâ hyad. Ə ́kpaŋ gu bǝ ətiyem ǝsɨ hwu. ²¹ Zɨd bwo zɨ wa ŋgyi gwo yed ətyo wo Əgwaza u ə təm ndyo əba fərəg əniəd Isɨrela ba mbwag nəndwan ba ka ni. Ŋgbom ə dag fa. Utsswun nwam tad əkwo kwi nyyo naŋ ə nnyyo nkyaŋ ənay ni. ²² Zan bə ənyo, Ənyyuŋ əyyaŋ bə nzɨd ə bay əba cyyo zɨ kwog mbwag say tunuŋ. Ba nad bɨ lyag ku bə nshuŋ utswon ku ²³ Basɨ tə cad kwom ku yway. Kukwo ba sɨ bwwog əba kwog zɨd ndyo nyo ba di +ətəm ntswa byo tag ba nyo Yesu ə shyyo əcəd ni. ²⁴ Kukwo əyyaŋ bə nzɨd ǝsɨ nad ə tə shyyo lyag ku bə dɨgag əkwo ənyyug ba ə ndyyad ni, əwod gu Yesu, ba sɨ di gu dag. ²⁵ Yesu ǝsɨ nyo bə mba, Ntsswo nyina swan kpəbəŋ. I byyo nyin cəd bəd nyin ŋwwag cucug bə sələy nkyaŋ əna ǝnied əlyyad ǝŋwwad Əgwaza ba ə lyyad ni. ²⁶ I myim nyi lyen naŋ tɨlɨd kwo Kristi u ə sswo zwod ənyo, Əgwaza u ə yyi də joŋ gu shi guku! ? ²⁷ Kukwo gwo sɨ ŋwwo cyyed ba səlləy nkyaŋ əna ə lyurug tuza guka bumi kwa ǝlyyad Əgwaza ku ni, nyyo bɨ cyyed Musa ku tɨ nad bɨ shin əkum ǝnied əlyyad ǝŋwwad Əgwaza ba. ²⁸ Ba tə ntad kpokpog bə akaraŋ əka nnwan ntəm guna u nnyyed ni, Yesu ǝsɨ nyyo ǝye əna sswag ni. ²⁹ Kukwo ba sɨ kwad gu nyo, "Tyyeb â kway bə nzɨd, dushwuŋ ji nyyo. Nwam ku bwad dədəy i kwa." Kukwo gwo sɨ hwi ba ə nad bu uli ka. ³⁰ Də njən ya kyaŋ-ya ji ǝsɨ swan əna ya kyaŋ ya ku mbyyaŋ ba. Ə sɨ kyag kuŋkwoŋ u, ǝsɨ gway bǝ Əgwaza u, ǝsɨ gbǝrəb ə ŋwwad ba. ³¹ Əzə ǝyyi ba ǝsɨka ntad ba, ba sɨ fɨg gu, ǝsɨ bwwug əzə bə mba. ³² Kukwo ba nyo bǝ əyyaŋ ba, Kəd, î cucug ǝ Kukwo mbyyo zɨ nfəg ntsswo zɨ na say də njən əzə gwo ŋwwo cyyed zɨd əlyyad kwa ǝlyyad Əgwaza na bə ndwag ku ni! ³³ Ba sɨ ka mbwwog ə nad Urushəlima. Ba sɨ tə shyyo nnwan ntəm swag bu uyyuŋ guna dunduŋ bə əkum əniəd hwi Yesu ka. ³⁴ Cucug əlyyad ə, Ətyə uli u ə dərəg bɨ lyag ku. Ə twarag əpyyo gu bə Siman. ³⁵ Ba bwo, ba sɨ kwog kyaŋ əkwo shyyo ba bə ndwag kuni, mbyyaŋ gag əkwo ba nfɨg gu də njən əzə gwo ngbarəb kuŋkwoŋ u ni. ³⁶ Nnwan ntəm ufyyaŋ ənay u shyyo bɨ bwoy ba nkyaŋ ənay ni ba sɨ ka ndi Yesu bǝ əpyyo gu ə yoŋ bumi ba ka. Kukwo gwo sɨ nyo bə mba, Əgwaza ǝ naŋ nyin nda. ³⁷ Ba ndi gu ni ba sɨ cyyo dyurug bəd, ba ŋgyi ətyi shyyid ə. ³⁸ Kukwo gwo nyyo bə mba, Yag ə mbyyo nyi ntsswoŋ uwun na? Yag ə mbyyo nyi ndyirim ǝyyan bǝn ntsswo nyi na? ³⁹ Nyi di mbwag nna mbyyaŋ ukpyay tɨtag na. Nuŋ ə bǝ əpyyo n. Nyi byǝrəm m nyi fəg, ətyi shyyid ə byyo lwam bǝ kunkob naŋ nuŋ ni dag. ⁴⁰ Ə nkarag ənyo ni ǝsɨ cyyo ba sɨ di ukpyay tɨtag guna mbiyaŋ mbwag na. ⁴¹ Nyyo naŋ ba ni shyyo bǝ əgway u, ba nyo kəle əlyem kyo, ǝsɨ lyib ba nyo, Nyi byyo kyaŋ-ya əji? ⁴² Kukwo ba sɨ joŋ gu əkum əfən əkyə ə́ shway ni. ⁴³ Ə sɨ san, ǝsɨ ya bǝ ǝyyi baba. ⁴⁴ Kukwo gwo sɨ nyo bə mba, Nkyaŋ ənay na nio n ku nshey nyin naŋ n nɨ nshyyo bə nyin. N ku ntag nyin naŋ tɨlɨd kwo koyag ə ə lyurug tuza nka bə ndwag Musa ku, mbyyaŋ kwa ǝnied əlyyad ǝŋwwad Əgwaza ku, mbyyaŋ zabura dyeb ku, i nɨ bay də nyinyuŋ ba. ⁴⁵ Kukwo gwo sɨ cyo ba sɨ fɨg kyaŋ əkwo kwa ǝlyyad Əgwaza ku lyyad ni. ⁴⁶ Ə̀̀ sɨ tag ba nyo, Ə lyurug nyo: Tɨlɨd kwo Kristi u ə sswo zwod, ə hyad gu, utug nwam ntad ka ə dərəg əcəd. ⁴⁷ Bə əlyurog gu əkyə əna nshey nŋwab na bâ bwwag ə wod +kətug bana, Əgwaza u ə yurub ba dyo. Ə́́ na tsa Urushəlima. ⁴⁸ Nyi byo di nkyaŋ ənay ni. Nyi tɨ shey əniəd ba. ⁴⁹ Di! n na ntəm bə nyin zənaŋ əzə Əcyo ŋgu ə nyo ənâ joŋ nyin ni. Tɨlɨd ko nyi ya nswan Urushəlima u sənaŋ cəd ku nyyo tuza ni ba kub nyin. ⁵⁰ Mənta əkyo ǝsɨ wurug bə mba, ə nad dyo bə nfəm Betani na, ǝsɨ tə təkyem mbwag na tuza, ǝsɨ kworog ba mmyaŋ. ⁵¹ Ə̀̀ shyyo bɨ nyyo ənyo ku ǝ̀sɨ wod ba, ǝsɨ kyag gu ə nad ndyo tuza bu uli Əgwaza ka. ⁵² Ba sɨ kwog gu ntoŋ, ba sɨ bwwog ə nad Urushəlima u bǝ əgway. ⁵³ Ba sɨ tə coŋ ə sswad bə gbondaŋ tu u ə́ gway bǝ Əgwaza u.