¹ Utug uyyaŋ naŋ Yesu ə̀ cyyed ǝnied ba usham əlyyad Əgwaza ka bɨ tu utuŋ ku, ceced ənied fɨ zənaŋ ba ba ənied lyurug mbyaŋ +əkwog uswon ba əsɨ bay bə ngu. ² Basɨ nyo bə ngu ə nî, tag zɨd ətyo əwo jen a tyog əkwo a nnyyo nkyaŋ ənay ni, kwo ulwo əkyo a shyyo ku ni. ³ Ə̀ sɨ shim ba dyo nyo, nuŋ bwo nnə dyib nyin kyaŋ, nyi tag n botisman ⁴ Yohanna ji bɨ nyyo tuza a kə ji bɨ nyyo bə əniobɨshi? ⁵ Ba sɨ nyyo kənan bə əpio ba nyo, kə zɨsɨ nyo ji nyyo bə Əgwaza, ənə nyo bə dɨ yag ə mbyyo zɨsɨ ndag ŋwwag cucug u?" ⁶ Bə́ kə̀ zɨsɨ nyo ji nyyo bǝ əniobɨshi, səlləy ənied ba ənə maŋ zɨd bə nfaŋ, nwad ba kyag Yohanna naŋ ətyi lyyad əŋwwad Əgwaza ni. ⁷ Kukwo basɨ nyo də ba lyen ulwo əkyo ji nnyyo ni dag. ⁸ Yesu əsɨ nyo bə mba, də nuŋ nə tag ulwo əkyo n shyyo tyog nyyo nkyaŋ əkwi dag. ⁹ Ə̀sɨ tag ǝnied ba uma əlyyad əkay, "ətyog əyyaŋ byyo tɨtam ukwon inabi, əsɨ ŋwwag ǝsɨ nsan kurum əwod əsɨ nad əbyin əyyaŋ ə̀sɨ tə bwwo jen əsɨ də ba bwwog. ¹⁰ Jen kunuŋ guka ba əswum +ukwon ka ba nnyyo ni,ǝsɨ tǝm ǝnwo guwu. Basɨ təbad gu əsɨ tswod, əwod əsɨ bwwog mbwag nhwwod. ¹¹ Ə̀sɨ bwo təm əhwo əyyaŋ, basɨ bwo təbad ə̌sɨ tswod, basɨ cyyo əsɨ sswo nswum, ə̀sɨ bwo bwwog mbwag nhwwod. ¹² Ə̀̀sɨ bwo təm ətyǝ ətad wu, basɨ tə bwwoy gu nkun əwod basɨ jib gu tusa. ¹³ Nwad ənyo ətyo Uli wu əsɨ nyo, "yag ə nnə nyyo, yog n təm ŋgwon ə́lyo nka. Kə ba nyyed tə jen gu shi. ¹⁴ Naŋ ba tə ndi ŋgwon guka ni, basɨ nyo bə əpyo ba. Gwô nə kwog uli əcyo ka. Nyi bay zɨ hyad gu əwod kyaŋ əkwo gwo bɨ nyyed shyyo ku ni í yed shin zɨd. ¹⁵ Basɨ kyag gu ə jib məta ka basɨn hwi ə́sɨ tə hyad. Yag ə bəd ətyə ǝbyin wu ə nə nyyo bə mba? ¹⁶ Ə̀̀na bay ə ba hyay ənied khab əbyo əwod gwô ŋwwag +əyyaŋ ənied əbyin ka." Naŋ ba nfəg ni basɨ nyo "tyid-əgwaza tin ulwo əkyo." ¹⁷ Əwod Yesu əsɨ cyyaŋ ba əsɨ nyo, "Yag ə ə́ fa bɨ lyurug ku nyo, "əfaŋ əkyo ənied nog ba əbɨ lag ni ka kyo bwwag ə yed ətin nog ka?" ¹⁸ Kwo nyan ə shod ə kwa bə əfaŋ əkyo ənə cwarag ə cyyo cuncoŋ. Əwod kwo nyan ka nkwa ənə fwway. ¹⁹ Nwad ənyo ənied lyurug ba bə ənied fi zənaŋ ba ə́sɨ ka ncad ə́ təbad gu bə dɨ yoŋ əkwo, bɨ lyen baku naŋ gwo ndyyad uma əlyyad əkay tuza ba. Uwun ənied na usɨ yog ba dag. ²⁰ Basɨ ŋwwo cam gu shensham basɨ təm +əbaŋ əbyin bâ tə nyyo naŋ +ətan ənied ni kə bana shyyo kyaŋ bə əlyyad guna, bâ ga nshyyo nad bə nŋu mbwag tyog mbyyaŋ doka gwamna. ²¹ Basɨ lyib nyo, "ətyi cyyed, zɨ lyen naŋ a lyyad asɨ bu cyyed cecerag də ŋwa tyoŋ əyin dag, a cyyed lyyad Əgwaza na də cucug. ²² I nkwa zɨ taraŋ kurum əbyin bə Kaisaar a kə́ də̀ i nkwa? ²³ Yesu əsɨ fɨg mumwaŋ baku, əsɨ nyo, ²⁴ Nyi jen dinari ənyyuŋ əji. Əlyorog mbyyaŋ wuwuo ənyan kwo nshyyo?" Ba nyo Kaisar. ²⁵ "Əsɨ nyo bə mba, "sə nyi ŋwwag Kaisar nkyaŋ əna yed nshin Kaisar nani, əwod Əgwaza u nsɨ nio yed nshin Əgwaza na ni. ²⁶ Basɨ yəw ə shyyo kyaŋ bə nkyaŋ ənio gwo lyyad bə mba bu uyyi ənied kani dag, shim guku sɨ yed ba kyaŋ uwun basɨ bwo may ə́ bwo karag dag. ²⁷ Sadukiyawa əyyaŋ əsɨ bay bə ngu, byo ə nyo dǝ dərəg ənied kukwi nshyyo ni dag, ²⁸ basɨ lyib gu nyo, "Ətyi cyyed, Musa əbɨ lyurug zɨ dyo nyo kǝ nənyyug ə hwu ə wod əbyyug də bə ŋgwon, sə nənyyug wu ə sag əbyyug nənyyug guwu ə mbyyo gu ŋgwon. ²⁹ +Nənyyug natad ən shyyo, əwod əhwwob wu hwu ǝsɨ əwod əbyyug wu də bə ŋgwon, ³⁰ Ətyə əfyyaŋ bə ənyo. ³¹ Ətyə ətad wu əsɨ bwo sag, bə ənyo ku sɨ ndi tinad ətyə natad wu, əwod əsɨ hwu. ³² Məta əkyo əbyyug wu bwo əsɨ hwu. ³³ Utug dərǝg ənied kukwi ka əbyyug ənyan ǝ gwo ba yed, naŋ gwo ngyed əbyyug ba səlləy ba natad ni?" ³⁴ Yesu əsɨ nyo bə mba, "Nnwan dunio ənay u nyyo nnyaraŋ usɨ ŋwwad nnyaraŋ. ³⁵ Əwod əsɨbyo ə́ di bə ncey ə kwoy ni ba may ə́ dərǝg kukwi kuni banə nyyo nnyaraŋ kwo ba nyyed nnyaraŋ dag. ³⁶ Nwad ba bwo nə kwi dag, ba dɨ naŋ +ətəm ntswa ni, əwod basɨ yed nnwan Əgwaza nio, naŋ ba ngyed nnwan dərǝg ənied kukwi ni. ³⁷ Naŋ əlyyad dərǝg ənied kukwi na ni, Musa mgbom ə̀ twarag ulwo əkay, bə ntswa uyid, naŋ gwo ngyoroŋ ətyo uli səllay, Əgwaza Ibrahim bə Əgwaza Ishaku mbyyaŋ Əgwaza Yakubu ni. ³⁸ Nini ə bwo yed Əgwaza ənied kukwi dag, Əgwaza ənied nsswon ə, nwad səllay ba ba sswan bə ngu. ³⁹ Ənied əyyaŋ ə́sɨ shim nyo, "ətyi cyyed a shim shensham." ⁴⁰ Basɨ bwo lyɨrɨm gu nkyaŋ njyyaŋ dag. ⁴¹ Yesu əsɨ nyo bə mba yag ə mbyyo ba nyo Kristi ə yed ŋgwon Dauda kyo? ⁴² Dauda bə ǝpyo gu əbɨ karag bɨ kwa bubwom ku, ətyə uli əsɨ nyo bə ətyə uli nŋu, sswan bə mbwag yag nku, ⁴³ Sənaŋ n cyyo +nəndwan aba bə əniyyo ntag aka. ⁴⁴ Dauda ə̀ yyi Kristi ətyə uli, bə əbwo tsan tsan ku ni ə́ ngyed ngŋwon Dauda ka?" ⁴⁵ Səlləy ənied ba ə fəg gwo nyo bə nnwan ntəm guna, ⁴⁶ nyi təlwam bə ənied lyurug ba, byo ə́ cad hwi ceced +ətərəg wu ni, ba ə bwo cad ə́ byad ba bə +kasswo mbyyaŋ ceced +ulwo nswad bə tuntu dyeb Əgwaza mbyyaŋ ceced +ulwo nswad bɨ +ulwo +nswoŋ. ⁴⁷ Ba byo ə say usa na ə́ wwod kpəyyug ba, nwad cad cin ba nyyo ga junjun nay. ba byo ənə sswo zwod lyyag ku.