¹ Də njən əzə əniəd bə dɨdɨd ǝsɨ tuŋ ə bay ə tsswoŋ Yesu, gag ǝ ba ngyyun, ə shay ǝyyaŋ. Kukwo Yesu ǝsɨ tsa ǝ kwag nnwan ntəm guna tswutsswo ba nyo, Nyi tyoŋ əkwa uyob ntoŋ Fərisawa ka gbaŋ əzǝw, maday, bɨrɨm +uyyi baku. ² Jən ji tɨba bay, koyag ə ə niad ətǝ ba wurug bǝ nku kpokpay. Kozan nkyaŋ kwo ə́ nyyo bə baŋ, ətǝ ba lyen ku. ³ Koyag ə nyi lyyad bǝ əbaŋ tutug ka, ǝba fəg ku tǝ nwam. Nkyaŋ ǝna nyi sshwaŋ bə ndyin bə anənda ka ni, əba gwoŋ na du usaraŋ na kpokpay konyan ə fəg. ⁴ Kpondaŋ mba nyi yog tsswoŋ uwun əniəd əba nɨ hyad lwam ətyibishyi ku, ba yǝw ə bwo nyyo ku kyaŋ ni dag. ⁵ M bay n tag nyin ətyə ǝwo nyi ni tsswoŋ uwun guna ni. Nyi tsswoŋ uwun Əgwaza wo mənta əka gwo n hyad ni, ə yǝw ǝ ta tswa ənuwu ji bu uli ndoŋ ni. N tag nyin, nyi fǝg uwun gu. ⁶ Kuyanje ətsswon byo ə lyyay kobo əfyyaŋ u dâ? Ba ka ngyed kyaŋ dag, səlləy bə ənyo kuyanje ənyyuŋ ə n shyyo wo Əgwaza u ə bwuŋ ni dag. ⁷ Nyin bwo kwo +tswa pyyo ǝzǝ shyyo bǝ pɨppyo nyi ku ni, Əgwaza u ə wa kǝ ntwaŋ ji sǝllǝy. Nyi jib uwun na. Nyi sswag usworoŋ kuyanje zan əzǝw bɨ uyyi Əgwaza ka. ⁸ Ətyo əwo ǝ twǝrag yed əshin kpokpay bǝ əniəd ni, nuŋ Ŋgwon Ətyibishyi, m ma twarag kpokpay nyo ə yed əshin bu uyi +ətəm ntswa Əgwaza ba. ⁹ Bə ənyo bwo konyan ǝ tən lyen nku bǝ əniəd ba, nuŋ Ŋgwon Ətyibishyi, n ma tǝn lyen gu ku bu uyi ətəm ntswa Əgwaza ba. ¹⁰ Konyan ə lyyad bibyyo əlyyad tuza n nuŋ Ŋgwon Ətyibishyi, Əgwaza u ə yǝw yurub gu dyo. Əwod ǝtyo ǝwo ǝlyyad bɨbyyo əlyyad tuza Zɨzərag Ntswa u ni əna yurub gu dyo dag. ¹¹ Jən əzə ə nkwag nyin ə nad dyo duswon tuntu utuŋ ba, mbyyaŋ cəcəd əgwam, mbyyaŋ ənied tyog ni, nyi yog ba sɨyed əpyyo nyin tuza kyaŋ əkyo nyi ba lyyad ni dag. ¹² Zɨzərag Ntswa u əba tag nyin gag ǝkwo nyi ba nshim ba dyo ni bə njən əzə. ¹³ Ətyog əyyaŋ bə ukpa əniəd u ǝsɨ nyo ənî bə Yesu, Ətyi cyyed, cyyo nənyyug ngu ǝ tyyan +zwa əzǝ əcyo zɨ wu ə hwu ə wod zɨd dyo ni, ə joŋ n kunuŋ nka. ¹⁴ Yesu ǝsɨ shim gu dyo nyo ənî, Ətuba, ənyan ə təm m fag əlyyad kwo ntyyan nyin zwa? ¹⁵ Kukwo gwo sɨ ya uswon nyo ǝnî, Nyi cam əpyyo nyin. Nyi yog wod ǝ́guŋ ufa tuza nzwa swanta ji san ntsswo nyina dag nwad dɨdɨd nkyaŋ əwo ətyibishyi u ə byyo ni gwô ŋwwad ǝtsag sɨced u dag. ¹⁶ Ə sɨ cyyed ba bə kidey jyaŋ nyo ənî, Ətyi shyyo ǝyyaŋ ə nshyyo wo ku bwwo yag bədɨdɨd bǝ əbyin guka ni. ¹⁷ Ə sɨ ŋwwo dam bə ntsswo gu ku nyyo ənî, Əgbaraŋ mba ə lad yag əkwi ni. N na nyo ni? ¹⁸ Əsɨ nyo, di kyaŋ əkwo n na nyyo ni. Nnǝ tyirɨb əŋgban mba əwod n nog əgacəcəd byo na kyag yag nku mbiyaŋ əkum nkyaŋ nka ni. ¹⁹ Nnə nnyo bɨ sswan nji, N tuŋ nkyaŋ bə dɨdɨd na nɨ nyyo n ndyyo bǝ ndyyo ni. Təm nku nini tsswuŋ yed kwo mbyyaŋ ya-sswo bɨ tsswoŋ nyinyaŋ. ²⁰ Utug ǝkyə Əgwaza u ǝsɨ nyyo əni bə ŋgu, Əgabwon əyin, tutug əkay ni əna kyag sswan əji. Zwa əzə a tuŋ sag ǝ́pyyo a dyo nkyaŋ ənay ni, ənyan ə nǝ byyo ji. ²¹ Yesu ə ntyag kidê əji ni ǝsɨ tag ba nyyo ənî, Ənyô i nɨ ndi bǝ konyan, wo tuŋ əpyyo gu +zwa bǝ swanta də gwo byyo zwa b'Əgwaza ni dag. ²² Yesu ǝsɨ tag nnwan ntəm guna nyyo əni,̂ Kyaŋ ǝkwi kukwo mbyyo n shey nyin nyyo nyi yog siyed əpyyo nyin bǝ swad nyin ku tuza kyaŋ ǝkyo nyi nɨ ya ni, kwo +ǝtǝrog ǝba nyi ni hwi ni dag. ²³ Nwad Sswon nyin ji lan kyaŋ ya ku. Lwam nyi ku sɨ lan ǝtǝrog ba. ²⁴ Nyi maŋ di zəŋhag ba: ba cyim dag dəba fway dag; bâ tuŋ kyaŋ-ya ə say bə nswaŋ kwo bǝ əŋban dag; ǝŋgbom bǝ ənyə Əgwaza u ə jyed ba kyaŋ-ya baku kəbə nyin əba wa sswag ba zənzan əzǝw d'uyi guka ni! ²⁵ Ənyan ǝ bə nyin siyed əpyyo gu ku nɨ mbyyaŋ gu kwo anjən bə dədəy bə swanta gu ku? ²⁶ Bə kə siyed ǝpyyo nyi ku yǝw i nyyo kan akədəy kyaŋ naŋ sɨkwi ni dag, yag ə mbyyo nyi n siyed əpyyo nyin tuza əkum nkyaŋ ka? ²⁷ Nyi cyyaŋ gag ǝkwo usum ka uyid ka nday ni : Təm a, ba nyyo dag, dəbá tad lulu n nyyo ətərəg dag. Əŋgbom bə ənyə kwo Suleman bɨ shyyo guku əku kub ətərəg əwo ə tad usum ənay usham ni dag. ²⁸ Bə kə Əgwaza u ə hwi əkwob ba bə shɨsham, ba ǝ byo nɨ labiyaŋ ni dag ə hwod ə yoŋ ə nnwad loŋ ni, nyin byo gwo wa nǝ nyim nyin +ətərəg hwi ba? Tyid! nyin ǝba dǝ sag ntsswo nyin ku bǝ Əgwaza tyag kyaŋ ni. ²⁹ Nyi yog wod nkyaŋ ǝna nyi nɨ ya sswo ni, i san dɨdam nyi wu kǝkǝb dag. Nyi yog siyed əpyyo nyin tuza na dag. ³⁰ Sǝllǝy ǝniəd dunio ba ǝ mun cad nkyaŋ ǝnay.Əwod Əgwaza u sɨ lyen naŋ nyi ncad na. ³¹ Nyi cad tyog gu ku, əwod səlləy nkyaŋ ənay ni ǝ̀ mun ə̀ ŋwwag nyin ə mbiyaŋ. ³² Nyi yog fəg uwun dag nyin acwaŋ na. Əcyo nyi wu əwa kə nkyag bə ntsswo bumi nyiyaŋ gwo ŋwwaŋ nyin tyog tuza ku. ³³ Nyi lyyay zwa nyi ji nyî kǝw kunag na kurum ku. Nyi nyyo ənyo nyî ntuŋ əpyyo nyin zwa əzə ŋway byyaŋ ni, zə də i tyyay ni dag tuza ka. Zə, dǝ ətaŋ ənǝ nyyin ni, də zwwu ji nɨ na byyan ji dag. ³⁴ Nwad, ulwo əka zwa nyi ji nshyyo ni ǝzǝ̂ ntsswo nyina nɨ nshyyo ³⁵ Nyi cam, nyi ləb lwam, nyi nyyo kyaŋ əkwo Əgwaza u ə cad ni, tutug bǝ tənwam. ³⁶ Nyi swan bǝ ǝyyi ba gbay naŋ ənied əba ǝ tsswoŋ ətyə uli bawu ə bwwog ə nyyo bə nyiraŋ ni. Tɨlɨd ko bâ swan bǝ ǝyyi ba gbay ə tsswoŋ, kǝ ǝba lwwi nuŋ kǝnywo ka, bâ nyiib gu dyo. ³⁷ Ənied lɨbraka byo yed +ǝhwo ǝbyo Ətyǝ uli u ǝba bwwog ǝba shyyo ba swan ǝ tsswoŋ gu ni ǝ ba fǝg nyinyaŋ Cucug əlyyad, gu bǝ əpyyo gu əba cyyo bâ bwwog ǝ swan, ǝ lǝb ufǝŋ, ǝ cad ba kyaŋ-ya. ³⁸ Kǝ̂ ba bay səkǝw tutug kwo bə nshuŋ utswon əhwo əba swan ə tsswoŋ gu ni əba fǝg nyinyaŋ. ³⁹ Nyi yog bwuŋ dag. Kǝ ǝtyə uli u ə lyen jən əzə ətaŋ u ətə mbay ǝ ŋam gu uli ka ni, sə ǝ swan bǝ ǝyyi ba gbay kəlag ətaŋ u əba ŋwwo gu uli ka. ⁴⁰ Nyin bwo tɨlɨd kwo nyî swan kətsag kozan njən nwad nuŋ Ŋgwon ətyibishyi n ma mbay bə njən əzə nyi dam ni dag. ⁴¹ Əzə Bitrus ǝsɨ ndyib Yesu nyo, Ətyə uli kidê əji ni, zɨ byo bǝ ənyin zɨd a lyyad bən zɨd a kə konyaŋ ə? ⁴² Yesu ǝsɨ shim gu dyo nyo, Ənyan ə bǝ ənyin ə di naŋ byyog əzə nyyo tswotswad ni, zǝ ətyə uli u ə ndərəg ə nyyed cyyed ǝsɨ cyyo əkum +əhwo ka mbwag ji, nyo ji ŋwwad ba kyaŋ-ya baku dənjən əzə myim ni? ⁴³ Ətya lɨbraka ǝ yed ǝ ǝhwo ǝwo kə ətyə uli ji gu əba bwwog əba shyyo ji nyyo ǝnyo. ⁴⁴ Cucug əlyyad, ətyə uli u əba cyyo uli guka səlləy mbwag gu. ⁴⁵ Kə də kunuŋ əkyə ǝhwo ə wo ǝ dam nyo, Ai, ətyə uli u əna hwum ə bwwog dag, ǝsɨ ŋwwo tswod əkum əhwo ka, ǝnyyug bǝ̂ ǝtyog, ya sswo, hyoŋ, ⁴⁶ ətyə uli u əba bwwog utug ǝkyǝ, mbyyaŋ jən əzə gwo lyen ni dag, ə nyyeb gu shǝnsham, ə cyyo gu dunduŋ bə ǝsɨba yed kɨnkaŋ +ǝlag tsswoŋ ba naŋ gu ni. ⁴⁷ Əhwo əwo lyen kyaŋ əkwo ətyə uli guwu ə cad gwo nyyo ni, ǝsɨ lag ləb lwam ǝsɨ nyyo kuni, ə ba tyirɨb gu bɨ tswod. ⁴⁸ Əsɨwo də ǝ lyen kyaŋ ǝkwo ətyə uli guwu ə cad ni dag, ǝŋgbom bǝ ǝnyo ǝ sɨ nyyo nkyaŋ ǝna n tay ǝ nyyeb gu ni, əba nyyeb gu dədey. Konyan ə ə joŋ gu kyaŋ əkwo shi bəd ni, əba cad kyaŋ əkwo shi ni mbwag gu. Ətyo əwo ə cyyo gu nkyaŋ bə dɨdɨd mbwag ni, əba cad nkyaŋ bə dɨdɨd mbwag gu. ⁴⁹ M bay tswub loŋ kwo bə Dunio ku. N cad sǝ ku təfɨd mgbom! ⁵⁰ Əmgbom bǝ ǝnyo sǝnaŋ n ya ntsa nsswo botisman zwod. Tsswuŋ i nshyyo n dag sənaŋ ji ba tyag. ⁵¹ Nyi ŋgyi m bay mwun pɨpyyo ənied bə Dunio ku a? Gad. N bay fwo pɨpyyo kwo. ⁵² Kyag nyyo nini uli ǝka ǝnied ba ǝ nshyyo ǝtsswon ni una gaŋ, ba ya kǝnan bǝ ǝyyaŋ; ǝtad bǝ ǝfam ǝnyyuŋ, ǝfyyaŋ ba bǝ usɨka. ⁵³ Bana kam +ǝcyo ə lag di nnwan ba na, na bwo u lag di ba ku; +ǝ́yaŋ ǝ lag di nnwan +ǝ́nab bana, na bwo u lag di ba ku, Əyaŋ ətyog ə lag di +ənyiraŋ gu ba, ba bwo ə lag di gu ku. ⁵⁴ Yesu ǝsɨ bwwag ǝsɨ lyyad bǝ ukpa əniəd u ka bə kidê jyaŋ nyo, Kə nyi di ulwo ka u yywob uza ka nyi nɨ nyo əna lǝw za, əmaŋ dǝw ji. ⁵⁵ Ənyo bwo kə nyi fəg wun ku shay, i hyab ban, sə nyi nyo əna nyyo əfɨrɨm, ənyo i maŋ i ndi.’ ⁵⁶ +Əbaŋǝbyin uyyi! Nyi nɨ cyyaŋ tuza ka mbyyaŋ əbyin ka nyi fɨg gag əkwo ulwo ka u nɨ ndi ni. Bə nkyaŋ əna nyyed mbwwod nini ni, nyi nyo ni n ŋway fɨg kyaŋ əkwo kwog ulwo ka nini ni? ⁵⁷ Yag ə lwoŋ nyin cyaŋ bǝ əpyyo nyin nyi di kyaŋ əkwo myim nyi nyyo ni? ⁵⁸ Kǝ əyin ə nad bə ŋwan bǝ Agwam tuza əlyyad ǝsɨ yoroŋ a, kə a dərəg nyyed ku asɨ mwun bə ŋgu bə ndwag, kwan bəd a jyi əlyyad na bə ŋgu nyyo naŋ nyi nɨ nshyyo bə ndwag ku. Nyyo ǝnyo kəlag gwo ba tə cyyo â yoŋ du uyi ətyi fag əlyyad ka, gu bwo ə kyag ə ŋwwag ŋgwon shan gu ka, bwo, ka kyag a fyyeb bɨ hwo. ⁵⁹ N tag a, a lad bɨ wurug əzə̂ sə jən əzə aba n tan səlləy kyaŋ əkwo ə hwi a ni.