¹ Sei der kubrubaiya komna naa ittəkə eyi, sə esi gbama keesəka zamrəm, sə gəen ina go'os kala kunu apu marirəu. ² Sə tomi ina doo paka Billək, sə gəbən ina go'os mariya zok iisi pai. ³ Sə doosi gee, kai pe' una nok ri'gəttə at pa, koo burodi koo wees kai pe' yaluwa i te'kau pa. ⁴ Kala gwaaga i torunak, gamn roo sei bəlaa ina ri'gənnal. ⁵ Pat iya i kweetən pai, bəlla ina ruutəkən eli dagɓisən keega irə dentək, nok si ina mee nok sə ina mee seida zi iirə. ⁶ De' i daa arki, i tor dəllə te'ka naa gəbəm dərmiya keerr airə, sə i doo paka Billək sə i go'os mari koo araya. ⁷ Ipu eri Hiridus Gwanzi, de' gee neta bo'rum eti sə mesəm kamu, nok mari uri i doogee, Yohana ura bo'rə batismazzi gətə naa zengs. ⁸ Uri boo i doo bonge, anabi Iliya zi gə gbətə, uri bo gəbən i doo bonge, diga malaikairə te'kazi sə gətə naa zengs. ⁹ Hiridus doo bonge, Yohana zipa, nok n gepsapu zura ulləl, too neezi ura i dagunu net gbi'tit ullə paa azya? diga eri sə ree, mu'naa laak, səbo og Yeeso. ¹⁰ De' i gətə i doosu ina i bo'ton pat, sə gə ii ruu naa ur sə i ri'gə yam, dəlla i der Batsaidallə. ¹¹ Ama de' bansa mari i gee ara yeeso rennak, sə i duu eri, sə kweei sə doosi pak gwanta Billəttək, gəbən rungbo mariya Ii rungɓukai. ¹² De' ri'ak zur nimz ɓadə pu gorumkpa, sei kubrubaiya komna naa ittəkəi i zaa ullo sə i doosu gee, monaka iisəkee gə aka wa' bansa mariya ai, nok sə ina tor dərmərə te'ka, naa popsa baasəmrə, nok sə ina keni reka, ara i kiskənnakrə, də' ara a pin ak maz pu roopa. ¹³ Ama sə doosi gee, esni ina i rekkan, I iisu pat ina piseen uni, burodi topa gbanaarə naa dukt ittərə, e le'ek sə e yiptə reka sə daksək mariya ai pat pa. ¹⁴ Yara mari ipu mu' gbanaarə, doosə kuburbaiya ulləi ina doosi ina gau dii, ina gau zu' gbanaarə gba'. ¹⁵ Sei kubrubai i bo'rə ri'eri, mariya eyi pat i gau dii. ¹⁶ Sei pe' burodi gbenaarə naa dukta ittərə eti sə gwen ara paarik, sə bo'rə se'səm, sə we'gəsi topa to' sə esə kubrubaiya ulləi nok sə ina masə mariya eyi pat. ¹⁷ Ii pat i rəgə sə dagi, i rəg sə kubrubai i toogə a seen, yi' gbeni komna naa ittəkəi. ¹⁸ Ublaa ekirə Yeeso pu weerək werəkrə gwan muzo, kubrubaiya ulləi ipu yam naa ur. Sei desi bonge, ''Mari i doo bonge mii neeziya? ¹⁹ I iisu bonge, uri i doo bonge Yohana ura bo'rə batismazzi. Uri bo i doo bonge moo anabi Iliyazi, uri bo i doo bonge anabawaiya do̱o̱irə te'zi sə gətə naa zəngs.'' ²⁰ Sei doosi bonge, ''Íí gə i doo mii neeziya?'' Biturus iisu bonge, ''Moozi Kweebaaz ura Bil tomtuz.'' ²¹ Yeeso dosi pak naa gbam bonge kai na doosə koo neeya pa. ²² Sei doosi bonge, ''Waa Maz ɓerk baar nettə gənŋa, do'ga mari i mu'suku naa firissii naa biibai sə i ikkpu. Ublut taatə sə ruutuk naa zəngs.'' ²³ Sei doosi íí yas, kooneya duukəz na pe' vaga rauwa gwandəu koo benaya səna duuye. ²⁴ Ura i sumsuka zengsaz, yaasək, ama ura i yaasəka zengsaz nok miiz, seek seen. ²⁵ Anni sə maz kink dəllə sə yaasə zəngs ya? ²⁶ koo neeya zur na dəgu nok paka miik, Waa Maz bən zur dəku, zoora gətən gwandə gbi'kəmrəl naa Daarəl naa malaikaiya ooməi. ²⁷ Ama N pu doosəkəndə, zəma uri ipu ari de'etə, i werkpa sei ina oksapu gwanta Billət zanga. ²⁸ Ublutta samsaararə eti de' doosapu paka eki, sei pe' Biturus naa Yohana naa Yakubu, sə i dəg ge'rə paa nok sə i weerək weerəkak. ²⁹ De' ipu weerəkrə sei muuga ullək aszok, Yaluna ullən bo sə sekum, naa osaa ɗe'ku ɗe'ek. ³⁰ Ni umkpa norak, mari ittəkə ipu pakrə naa ur Muusa naa Iliya. ³¹ I yii gbi'kəma ko'səm, sə i pag naa Yeeso nok rekapu a ullək lo'ok pa Urushelimak. ³² Biturus naa kubrubaiya ipu yamma eyi, ruma gbi'mam pe'si, de' i wee rumrə sei i og gbi'kəma Yeeso rəm, sə gəə i og mari ittəkə de'ettə naa ur. ³³ De Muusa naa Iliya ipu daak ara Yesso pin eki rə, sei Biturus doo bonge, ''Dangwanz to̱o̱ton ara a pin ak, eka go'rə nu'tə taarə, mulo nok moo mulo nok Iliya mulo nok Muusa.'' Ama bo zəmazə', me̱e̱ ina ur pu dookrəndə pa. ³⁴ De'pu dook pakkirə sei koliya paarəi i tiitə, sə i gbe'si. ³⁵ Sei gwera uka keetə diga kolirə te'ka doo bonge, ura az Waza mindəzzi ura N teeguz, ke'sunu to. ³⁶ Zoora gwera ekirəl ɓamsən pakal, sei Yeeso pu eri gwan muzo, i gau kotto i le' dooka una pa, ina i ogandə zoora elirə. ³⁷ De' ar oos i tiitə ge'ekirə paa, sei mari genŋa i zaa ullə. ³⁸ Arkirə maz uza diga bansa mariya eyi rə tə' pag naa gbam, lamz bo'rum una sə a po' waza miiz, gwanzi muzo miirə piisez. ³⁹ Zama go'pam kangbusupu sə dogdusupu, zama room yegu naa gbam arkukarə haa pokti i keetə su'ro. Zammi daau yapa sam haa kamtu kan gombaa waanik pa gə daau ɓala pa sam. ⁴⁰ N orə kubrubaiya mooi ina doosə zama go'pa emi na keegəs ullə zokrə, ama i le'pa. ⁴¹ Yeeso iisi sə doo bonge, íí mariya i esə timrpa zamanuwazzə ai, haa bəna sə N gakp naa iiya? kamtun waza moorə ezi ang. ⁴² De' wazzi i kamtu sei zama ullə zokrə emi me'es wazzi buttə dii yegu go'suma. Ama Yeeso bi'sə zama go'pa emi, sə rungɓo waza ezi, sə yii wazzi do'ga mariya ulləirə. ⁴³ Ii pat mesəm kami go'suma, sə i noos gbi'kəma Billəm. Ama de' ipu mesəmdə naa neta naa neta məsəmrə bo'rum eti, sə doosə kubrubaiya ullə. ⁴⁴ Ina ke' to' oomi ina bo doosi ki andə lo'ok pa i esək en waa maz marirə nattə. ⁴⁵ Ama kubrubaiya i meegəsən ina ullə pu dookrən pa, nok kaina mee ar nutton pa, ser kami ara i deskunuk rə. ⁴⁶ Ubla uka kubrubai i ma' sənəm gwanirə te, bonge neezi ar gbi'kəm gwanirə'taya? ⁴⁷ De' Yeeso meegəs ipu go'ok sənəm gwanirə timtərə pe'to waz uza waa finti, sə de'su gwandə pourə, ⁴⁸ sə doosi bonge, kooneya kwee waa waz ni ri'ra miilaz, kwee minzi, naa gəbən maza kwee miiz, kwee ura tomtəzzi. Ura famɗe iirə te'ez uzi ark dakarə. ⁴⁹ Yohana iisu bonge, dangwanz, uza doosə kees zama go'pam naa ri'ra mool, sə e doosu enge na daa go'ka nok pu eerə te'pa. ⁵⁰ Yeeso iisu gee, kai ro'nu pa, maza go'rə keeriz naa moo paz, too a moozzi. ⁵¹ Bo'rumsa pu ri'eri, nok bəl rektitəpu ni ri'gəgəkən paaril, iisa pu bo rek Urushelima. ⁵² Səi tom tombai uri. Sə i tor dəlla Samariyal noka sə i go'os kunuk arak. ⁵³ Ama mari aa ai i kweeu pa de' pu ri'gəkrə urushelima. ⁵⁴ De' inni bo'rumsapu ri'eri, Kubrubaiya ulləi, Yakubu naa Yohana sə i doosu bonge, a ii ra' na tiitə diga billə paari na wo'si ya? ⁵⁵ Ama yer sə oksi yirku rə. ⁵⁶ Sei i ri'gə dəl ula rə som. ⁵⁸ De' ipu ri'gəttə bilarə paa, sei maz uza doosu gee n ii duuka ara a rekənnakrə pat. ⁵⁷ Yeeso iisu gee, "Gbema zai ipu naa du'tə, naa gəbən noya billə paai ipu naa pums a i torkənnas, ama waa maz punaa ar kina pa."̈ ⁵⁹ Yeeso dosə maz uza na duutub, ama mazzi doosu gee, dwangwanz daamə n rətə gwa n ree iitə daa miiz. ⁶⁰ Ama Yeeso dosu gee daam iya i wer pui ina ii iya i werai, ama moo rem arə doo gwanta Billə koo araya. ⁶¹ Uza gə zaa bonge dangwanz n ri'gək naa moo, ama daame n retə gwa, n rətə gwa n ree wa'tə mariya miirə ipu gwa'ai. ⁶² Yeeso iisu gee kooneya ma'sapu ruusuka ba'ak too ara ka yerkən no'ok sa'ak pa, ri'eri zi gwanta Billət.