¹ Lo' wessa pa , Yeeso zii dərmiyai gbi'kiyai naa ye'kiyai, sə doosə mari paka Billə tinka gwanta Billəttək. Kubrubaiya ullə komna naa ittəi ai yam. ² Naa kitaki' uri iya i keesi mai sə i go'si kunta iittai iirə te'ka, uza pii i deru Maryamu Magdaliya ura i keesusu mai gbansa gwandə zokrəi. ³ Naa Zuwana kiiza Kuuza rəz Tombaaza gbi'zaz Hiridus gwanzəz, naa Suzaana, naa kitaki' uri gənɲa. Iya i ri'gə yammai, kitakiya ei i po' Yeeso naa kubrubaiya ullə naa neta pissit. ⁴ De mari ipu tookənkarə gənɲa, dərmiya somaso̱ o̱irə ipu zakrə Yeeso rə, sei Yeeso re'si paka ak bonge. ⁵ Babaaz uza ree faak doktə, depu faak doktirə, sei dokt uta kasə bilarə paa, sə dikdəz zok sə noi i dopdəs. ⁶ Uta kasə buta ka'rə paattə sə ɓu' zo̱o̱ra ɓu'unal kinə yiir pa, sei kos nok puna yiise pa. ⁷ Uta kasə kəptə te' i noo yam haa kəpti zaa le'nu daksər. ⁸ Uta kas buta wessattə, nó̱ó̱ pu'us sə kees renti i ar a i ta'nii, uta dən zu'gbonaarə, uta zu'taarei, uta zur naa komnai.'' De Yeeso ɓams dooka neta eti sei təg gwera paari sə doo bonge, ura puna toka geekarəkkaz na ge̱e̱.'' ⁹ Sei kubrubaiya ulləi i desu ina re'sa pakki doon. ¹⁰ Yeeso doosi bonge, i essən pu meeka neta gwanta Billə tən, ama mariya i seetəi N doosi naa re'sa pak. Nok koo ina og i meegəska pa, ina ge̱e̱ boo i geegəska pa. ¹¹ To̱ ina pakki doon áa an, dokta eti utti paka Billək. ¹² Dokta kasə bilarə paat uti, mariya i ge̱e̱ paka Billəkai, ama sa'kaa roozə Setan zaa pe'es pakki gwanirə timtirə, nok bo'ta sə i esə timr sə i gbissə. ¹³ A kasə buta ka'rə paatət uti mariya ina ge̱e̱ paka Billək, i kwee naa yaksa zokkai, ama i wəngs timr pa, i esə timr zo̱o̱r zo'to topa, gwəka na zaa sei i kasə sə i gəə sa'ka. ¹⁴ A kasə kəptə te'et uti mariya i kwee paka Billək sə i kam tomsai, ama de i ree mu'ka sei gapta dellət naa neta na'rət naa tingtuma delləm ani gbam, haa I le' keesəka renti pa. ¹⁵ Dokta kasə buta wessattət uti, mariya i ge̱e̱ pakki sə i kwee naa timr muləi, sə wəngs timr sə i dinɲə yangi gənɲai. ¹⁶ Maza gaps fitila sə ku'su ɓenzə diiz koo tosu ar kittə diiz piipa, no̱k ri'ik gapsuku sə denɲə in de'esnarə paa, nok mariya i totək gwaagirəi sə ina og oosa. ¹⁷ No̱k ina pu sums zok sə keesək zok pan piipa, gəbən apu gbesənnin sə gbe'rək zok pan piipa. ¹⁸ Geengen ni i ge̱e̱n paka iya i esə zur geeka paka miikrəi yak, i baksəki meeka. Ama iya i ke'to' miirə pai, i sundə bonge bo me̱e̱men nan bən i pe'sək.'' ¹⁹ Sei maiya Yeeso rəi naa so'kiya ulləi, i ree ullə ama i le' reksəka ullə pa nok ora mari i dagənak. ²⁰ Sei uza ree doosu bonge, ''Maiya mooz naa so'kiya mooi ipu de'narə gokka, i iisapu okka.'' ²¹ Yeeso doosə mariya eyi bonge, maiya miiz naa so'kiya mii iyi mariya i ge̱e̱ paka Billək sə i bo'rə ina bil iin ai.'' ²² Ubla ukarə Yeeso naa kubrubaiya ullə i tor ɓarkrə, doosi gee, aga' ga'saa go'akrə sei i ruu. ²³ De ipu ga'akrə sei rum pe'u, zaka wiika ruutə gbona ekirə haa maam ma' yi'ka ɓarkirə te' sə ɓarki ii ɗumsəka sə i yirkum wessawe. ²⁴ I ree i weesu gee," dangwanz, dangwanz a wo'ok dera . Ruu sə bi'sə zaka wiika naa ya'tiya gbonarəi ar de'es kəs. ²⁵ Sei Yeeso des kubrubaiya ullə gee, eska timra iil aa palya? sei inni məsi sə sər kami, i deskən gonirə te'ka gee, nee aa az sə bi'sə zaka wiika naa za̱m haa sə i duu doon ya? ²⁶ Ur naa kubrubaiya ulləi i reks buta Garsinaawai rəttə, ga'saa po'musa Galilirəz. ²⁷ De Yeeso keetə ɓarkirə sei maza naa zam az zaa ullə diga dəllirə, lo'sapu kandəzzəz te' yallən pa, gəbən gau gwa'pa sei ar gagirə. ²⁸ De og Yeeso, sei woo su' sə kasə dii ullə mu'ka, sə tek gwera gee an kassa naa miiya Yeeso waza Billə gbi'zas, n oora kaa ɓəssee baarpa. ²⁹ Sei Yeeso bi'sə zammi nakee nadaa mazzi' nok dən gənga ina dokdu naa sarkai sə ina gbe'su, ɗa'rəz sarkaiya eyi nok zama go'pam emi nengu sə kamu doolo roo. ³⁰ Sei Yeeso desu gee" riira mool neeya? '' sə iisu gee " Gənga nok e dakdan'' ri'erizi nok zam gənga sə tor mazzirə zokrə. ³¹ Zammi oorə Yeeso gee kana tozbo dura surkapallə pa. ³² Gbo'a yawirək pii gbi'ki arkirə, sə i oorə Yeeso na daabo, bo torək yawiya eirə te' sə ur boo iisi. ³³ Zammi da̱a̱ mazzi sə tor gboəga yawiya eirə de i tor, sei yawiya rooi i vekkən sə i ree tor gbona rə sə ɗums. ³⁴ De mariya i neebaiya i nee yawi eyi i og ina bo'rəm eni, sei i nog, sə ree doo ina bo'rəman dellirə naa iya kerrairə. ³⁵ De mari i ɗa'gə, i ree sə boo og ina bo'rəman. I zaa ara Yeeso pinnakrə sə i og maza zam kee ullə zokrə ezi te'sapu yallu pu gwaaga Billək, sei sər kami. ³⁶ Mariya i og ina bo'rəman eyi i doosə uri, ni i keesən mazzi zam sə go'sənak. ³⁷ Sei mariya ipu Garinaawairə buttəi naa iya pourəi i oorə Yeeso na ri'gə nadaa buta boot nok sər kami wessa, diga rik Yeeso naa kubrubaiya ulləi i tor ɓarkrə sə i ri'gə. ³⁸ Maza zam kee ullə zokrəz ezi oorə Yeeso gee, Daa mii nri'gək naa moo, ama Yeeso doosu gee. ³⁹ Gəəm mondə gwa sə a doo gbi'na Daa Bil bo'san. Mazzi ri'gə pu noosə billə, sə doosə mariya dellirə ina Yeeso bo'sun yas. ⁴⁰ De Yeeso gətə mari i kweu, nok ipu zo'kurə. ⁴¹ Sei maz uza muzə diga dooniya gwaaga Billək rəirən i deru Yahirus, zaa Yeeso pourə sei gu'dii gon sə ooru na zaa boorə gwa'. ⁴² Nok waza wi' komna naa ittəi pu wərkrə na'rə, gon muzəzi waza ulləz kotto. Ama de Yeeso pu ri'gəttə bansa mari gənga i moosu. ⁴³ Kita kiiz uza pii arkirə, ura pu kuusək kwa'irəz haa wi' komna naa ittəkoi ibs weesa ulləz yas ar laka tettə not sə ina go'osbo, ama koo uza le' sə go'supa. ⁴⁴ Sei duutə Yeeso rə sa'ka sə pogə yaluwa ulləu, de po'gu sei kuuska kwalla ulləl də'əs. ⁴⁵ Yeesu doo bonge'e, nee pa'e ya? Sei iya i ko'sui koo neeya doo bonge n pa'apa, Bitrus bagu bonge, Dangwanz bansa mari gənŋa i ko'saapu ipu zakrə moorə pourə.'' ⁴⁶ Ama Yeesu doosu bonge, ''N me̱e̱ uza pa'epu nok gbam keepu miirə.'' ⁴⁷ De kita kiizi meegəsapu le'ek wooka pa sei zaa ullə naa ser, sei gu' dii Yeesorə mu'ka bansa mariya eyirə te'ka tele sə doo ina bo'ru sə pok Yeeson naa gəbən ni go'sənak. ⁴⁸ Ama Yeeso doosu gee, waz eska timra mool go'sapu rem oomi. ⁵⁰ De pu dook pakkirə, sei uza diga gwaag doonza gwaaga Billək rəirə zaa doosə doonzi gee, waza wərpu kaa moos lamz pa. ⁴⁹ Ama de Yeeso geu rii, sə doosu gee kaa sərəm pa, esəm timr ruutək. ⁵¹ De zaa gwaagirə, da̱a̱ koo uza sə tor gwaagirə pa, sei Bitrus naa Yahaya naa Yakubu naa maiya wazzirəz naa Daa ullə. ⁵² Mariya arkirəi yas ipu wərarə nok yirkuwa waza wər ezi. Ama Yeeso doo bonge, ina daa wəra, wərwənzi pa rəsrənzi kotto. ⁵³ Mari i mandu mutum,nok i me̱e̱men wazzi wərapu. ⁵⁴ Ama kam na'a ullək sə deru bonge, ''Waz, minge Ruutum!'' ⁵⁵ Sei zəngsa ulləz gətə, sei ruutə law hi umkpa norak. ⁵⁶ Do'ga mariya ulləi inni məsi, ama Yeeso doosi gee kaina doosə ko neya ina bo'rəmman pa.