¹ De' neta eti bo'rumspu, dangwanzzə teegi, zu' taarə naa komnai, sə tomi ittikə i', dərmiya rekənəinak. ² Sə doosi bonge pe'ka tomsa o'os pu tektapa, gə tombai i dak pa. Noka ri'ik ina weerə go'suma Dangwanz pe'ka tomsə o'oz, səna tomtə tombai gwandə o'ka. ³ Ri'gən gwenən n tomun puni yanga maiyak marirə te'ka. ⁴ Kai pe' ɓunaa weesək koo ɓunaa ri'gəttək koo tag kai de'es koo maz bilarə pa. ⁵ Kala gwaaga i torunak, i ma' dooka, oosa na gau gwaagakrə. ⁶ Urbo maza na punaa osaz bo na gau ullə paa, ama oosa na piipa iik na gətə ində. ⁷ Gəbən gwaagirə regən sə i bo' ina i essənan. Nok tombaaz loton faasika, kai duu gwaagak pa. ⁸ Kala dəlla i torən sə i kweenən nal, i ri'gən ina i asə iirə mu'un. ⁹ Rungɓuka kuni a irə te'kai, doosini gwanta Billət rektitəpu. ¹⁰ Ama kala dəlla i torunal, sə ina kween pa, ri'gən bilit ittə sə i duu. ¹¹ Koo keeg dəllirəu na laksən dent, dagɓisin na gau seedaakum, ama ina mee gwanta Billəttə pa. ¹² I doosunpu ublaa zeesikarək Sodom ark dəlla al kinka yirkurə. ¹⁵ Iina yirkurənni naa ii mariya Kaisiinui! ina yirkurənni ii mariya Basaidai! neta məs zok sə i bo'rə moo irə dəlmərə at, naka bo'rə zok dəlmiya Taya naa Sidonairə ika pu'sapu na' ɓala ika te' yaləna rəuron sə ika kuu tam zullo. ¹⁴ Ina yirkurenni moo Taya naa Sidonairə ubla bisəkrə. ¹³ Moo Kafarnahum apunaa meeka arək haa billə paariya? ewe i tiitka diiri naa Hadesak. ¹⁶ Neeya ke' to' moorəz ke'i miirəzi, gə ura mu'saz mu'se miizi, gəbən ura mu'ses mu'us ura tomtezzi.'' ¹⁷ Iya zu'taarə naa komna i gətə naa yaksa zok, I doo bonge, ''Daa am zam ɓai bən i duu ina a doon riira moolo.'' ¹⁸ Sei, Yeeso doosi bonge, ''N og seetan katə billə paa naa oosa. ¹⁹ N esən pu gbi'kəma dika big naa ta'si naa gbma umkeere seetan le'ek bo'kənən una pa. ²⁰ Ama noka ri'ik zoka kana yagən nok zam duun nok ina i doonak pa. Ama zok na yagən nok ri'təya ii ipu biisəni paari.'' ²¹ Zoora elirə yi' naa yaksa zok Rumsa Billəsə sə doo bonge, ''Npu nooskarə Daa, Daa billa paaz naa diiz nok a sums tomteya mooi iya i ɓe' naa iya i le'ei rə, sə a yiisi mariya i mee una pai, Daa a bo'rə ri nok go'numa moom.'' ²² ''Koo anya tele Daa miiz essəsəpu, neya ,mee wazəz pii sei gwan Daa, bən neya mee Daa ziz piipa sei gwan waz. Sei waz gwan iisa pu geeku Daazi.'' ²³ Sei yerə kubrubaiya ulləirə sə doosi gwani muyo, ''Iya naa sə'səmaiyi iya i og ina i ogan. ²⁴ N doosən neta i og at anabawai i ii oka ina i ogan ama i kin sə i og pa, gəə i ii geeka ina i geen ama i gee pa.'' ²⁵ Sei lamza dookaya Yahudaawairəz zaa ullə noka bo gweknuk, sə doo bonge, ''Lamz, n bo'ok an sə n kin zəngsa ɓampas ya?'' ²⁶ Yeeso iisu bonge, anni pu biisənən dookairə ya? a zangə dookai rigaya?'' ²⁷ Sə iisu bonge ''Iim Daa Bila mool naa timra mool, naa gbama moom, naa sundəmeya mooi tele, gəbən iim ura i gau ar muko yamaz ni a ii timra moolak.'' ²⁸ Yeeso doosu bonge, ''A iipu wessa, rem a ree bo'rə ri'eri, a kink zəngsa ɓampas.'' ²⁹ Ama lamza rooz i boka yii nibo meemen ina bopu dookrə, sə des Yeeso bonge, neezi ura e gau ar mukoz ya?'' ³⁰ Yeeso re'su pak gee, maz uza pii pu ri'gətə keetina Urushelimak pu rekrə naa Jerikok, sei tor rui ro na'rə. I tudusu sə i kwee neta pisu ullət yas, sə i vobdu i daau arkirə zengs Billə na'rə. ³¹ Sei firist uza pu duuk bilaa ekirə de' ogu kinarə, sei ar ullə pourə ri'gə ina ullən daau eri. ³² Ri'eri bən Levi, urma de ogu sei keegəs kanarə sə ar. ³³ Ama mara ginza Samriyaz pu rekrə gənim rə sei duu bilaa ekirə, de' zaa oks mazzi ni pinnak de' og mazzi sei yirku kamu. ³⁴ Zaa ara pinnakrə, rəə ullə sə negrusu nogruma ulləm naa maa̱ma inabi rəm, woosu waag sə dogdusu nogrummi, sə gapsu gwandə gumbaazə paa, sə kamu ara tiinakrə, sə baau. ³⁵ De' ar oo, pe wees dinarəi ittəkə sə esi maza zo' arkiz, mina gətə sə n toga. ³⁶ Iya taarəke airə gə, nezi gau armuko naa ura tor ruiro na'rə ezi ya? ³⁷ Sei mazzi doosu gee, ura oksu yirku rəz, Yeeso iis gee, mooma rəm arəə bo'ro ri'eri. ³⁸ De' i pe'bila ipu ri'gəkrə, i zaa dəl ula rə, sei kitakiiz uza i deru Marta kwei gawndə gwa. ³⁹ Punaa doowi i deru Maryamu, ura gau Yeeso rə mu'uz sə ke'to' ina Daa bil doonrə. ⁴⁰ Marta bo tomsa kiisəm rəs pe'su hakilo, sə zaa Yeeso rə doo ge Dangwanz, Daa Bil una kasa naa doowiya miiz paya, daaye min muzo sə n kam toms, doosumu na do'serə. ⁴¹ Ama Dangwnz Iisu sə doosu gee, Marta, Marta, hakilo a mooz ruu sə a gber baar naa net gengga. ⁴² In munoni ii zok, Maryamu teegəsapu ina wessan, ne̱e̱ya kweerəkaz piipa.