¹ Bo'rum de' Yeeso pu we̱erək Billə ar ukarə sei muzo diga kubrubaiya ulləirə te'ka dooge, Daa Bil kubrusəmee weerək ni Yohana kubrusən tombaiya ulləiyak. ² Ina pu weerəkrə doon inge Daa ri'ra mool na noos zok, gwanta moot na zaa. ³ Esmee ina e rek wonkan na koo benaya. ⁴ Ra'səsmee hakkeiya eerəi, nok ee bən e ra'səsə ran iya i go'see ina go'pamam. Ka daaye sə tor ɓasurə pa. ⁵ Yeeso doosi bonge, neezi iirə te' na punaa doowi, səna ree ullə gwa naa teeteeg səna doosu bonge ungwanz ese buroodi taarəkə. ⁶ Nok ri'ak ungwanza miiz zaa pu ginziz miirə gwa, nok n punaa ina n esku sə rəgən piipa. ⁷ Ungwanzi bo naa iisu rollə roo gee, ka' e̱'e pa! e kisəsəpu dii e gbesapu sogna, N le'ek sə n esa unapa. ⁸ N doosun koo na ruutə na eska buroodi nok ungwanz ulləzak pa, ama nok naaskaa mook ruukrun sə esa ina a iin nok keekken dəksa zullə. ⁹ Mii bo N doosun oorən i eskən laan i kink, dagɓən i gbe'rəskən. ¹⁰ Nok ura oorəz tele kweek, gə ura laaz kink, gə ura dagbəz i gbe'rusku. ¹¹ Aza Daa irə te' sə waz na orə duga sə esku biks ya? ¹² Koo na desu bal səesku ta'səz ya, bo'rumpa. ¹³ Nok ii engka bai i le'ek len eska yangiya ii neta wessat, an le'ek Daa Billə paaz eska Rumsa Billəs iya i orui rəya?" ¹⁴ Ubla uka de' Yesso kees zama le'en uza pakam, de' zammi kee sei mazzi paktə inni məs bansa pu arkərəs, ¹⁵ Ama uri diga erə te' i doo bonge, naa gbi'kəma gwanza Ba'alzabuba rəmmi sə kees zamn marirə zokrə. ¹⁶ I mari uri nok i iin gwenka Yeeso gə'na bo'tubo eta mesəmrət sə yiik ur keetə diga Billə. ¹⁷ Ama de' Yeeso meegəsapu sundəmiya ii, sei dosi gwanta merkək gwandə te'et geekənka piipa waagəska, ¹⁸ Seetan na markən gwandə te'ka, gwanta ullət rek mu'rigaya? N doosunən ak nok inge seetan zin esə gbi'kəma Ba'alzabuba rəmmi n keesən zamam. ¹⁹ Mii mina keesək zam naa ri'ra Ba'alzabuba sə i iya i duunai gə i kees zam naa gbi'kəma andəm ya? Nok ri'ik ini i gakp iya i zeesək bissai. ²⁰ Ama mina kees zam naa ri'ra Billəl gə gwanta Billət rektitə pu ində te'ka. ²¹ maza weng naa neta ya'am na'rət zo' gwaaga ullək koo una pok pa. ²² Ama maz uza naa na arnu gbam, pe'sək neta pu ullə gwa'at sə ree mar naa mariya ulləi. ²³ Mariya ungwaniya miirə pai, umkeereiyi, ura po' toogəska mari Billə paz, faksi fanzi. ²⁴ Rumsa go'pas na keepu mazzə zokrə, koollo dollo ara maam pin pakrə laa ar engəska na kin pa sei doo bonge, N geek mində gwa ara n daatəkrə. ²⁵ Na getə oka mazzi ni gwaaga i koosakak, sə i go'rus okapa ara uza gakpinnakrə. ²⁶ Sei ree pe'tə zamn una gbansa iya i aru engkurəi, sə ii yas i tor mazzi rə sə i gau roo. zama mazzirəm ark an ni ninkak. ²⁷ Sei gakp naa dena pu dookən netirə, kita kiiz uza ura pu marirə te'ez teg gwera sə doosə Yeeso gee, "Bil na sə' maiya aməsaz sə no̱o̱saz." ²⁸ Sei urbo dosu gee iya naa sə'səmaiyi iya i gee paka Billək sə i duu ina bo doo. ²⁹ Dena bansa mariya eyi rə i ma' dakənka, doosi gee, ii mariya ri'kak ai, ii engkabai gə, i ii oka ina məsan, n yiiskən ina məsan muno kotto, a Yunana rəm. ³⁰ Ni gwan Yunana gamn ina məsan mariya Ninevah rə, ri'zi gə Waa Maz gakp mariya ri'kakai rə. ³¹ Gwanza kiizaz, ninka gau gwanta Shebat, de'ek zoora Bil zeesəkən mari bisan sə le'sən, nok zaa diga ar ye'na noka geekə paka Suleimanu dook, sə gə na og, ura ar Suleimanu gbi'kəm az aa az. ³² Mariya Ninevai i de'ek sə i gok bis naa mariya zamnuwazzəi, nok ipunaa dena Yunana doosini paka Billəkak pa' ri'ak bo ura ar Yunanaz gbi'kəmaz aa az. ³³ "Maza gapsək fitila sə ku'su naa gbenzaz piipa. Sei dei dengku ar de'na rə noka mariya i tork ar gwagərəi sə i okən oosak. ³⁴ No̱'a iik iiyi fitila zokrəz. Ama no̱'a ii ina laapu, zoka iik yi'ik naa tegra. Ge̱e̱n ge̱n bo'ta oosaa iik yer tegra. ³⁵ Oosaa Billək napu irə sə ar uka naa see tegrarə pa, ³⁶ oosaa iik okək ar tele ni ra'a fitilarə okənnak." ³⁷ De' gbams pangni, sei Farsaawaz uza deru gwandə gwa, na zaa reg reka na bo' sə Yeeso tor sə ree gau dii. ³⁸ Farisaawazi hakləsən og Yeeso ma' nekska na' zanga sə reg reka pa, sei inni məsu. ³⁹ Ama sei Daa Bil doosu gee, moi ii Farisaawai i neks ara gokak tan, ama timtəya ii i yi' naa engku naa sutum baar. ⁴⁰ Moi ii mariya ipu naa sundəmei pai, ura go'rə ara go'kak uzi gəə, go'rə ara rook paya? ⁴¹ Ama esən iya naa zaamai ina pu kəllə te'en, Bil geek tingtum naa ii. ⁴² Ina yirku ronni ii Farisaawai, nok i esən sookai dannga gussei, ama i mu'us bo'ka bisa wessas naa gə i ii Bil pa. Neta ettiti ika bo'rə naa zinska una pa. ⁴³ "Ina yirkurənni ii Farisaawai, no̱k i ii gapt ata wessa mu'utə ro'təya Yahudaawai dakənkənal Billəmdə, gəbən i ii mari ina esən gbi'kəm ina de'sən ar yingurə. ⁴⁴ Ina yirkurənni naa ii no̱k i goopu gaga i gber pa sə mari i me̱e̱ pa i duu pai" ⁴⁵ Gəbən lamz uza diga bisə Yahudaawai rez iisu gee, ina a doon sugəə sun baar eema. ⁴⁶ Sei Yeeso dosi gee "Ii lamiya i mee ro'oknaiya, ii bən ina yirlurənni naa i nok ni geesə mari ina i le'ek an pa inge ina bo'rə naa gbam, ii naa zuta iit boo koo to̱pa po'i ara i bo'kən ina i geesənnan pa. ⁴⁷ Ina yirkurənni naa i go'rus gwaaga anabawairək, iya do'ga mariya ii i iwii. ⁴⁸ Sə bo'kaa ri'ik sə yii tungtuma do'ga mari i bo'rən. ⁴⁹ Nok inanni meeka Billək doon N tomtək manzaani naa anabaawai, iirə te' gə i yiisəkən ɓərka baar haa ma i wiikən uri iirə te. ⁵⁰ Wi'a airə i pe'ek hakkeiya kwaala anabawaiya i iwii diga ma'ka dəlləi. ⁵¹ Diga kwaala Habilallə haa zakarə Zakariyallə, ura i iwu ar noosəka Billəkrə oomi rə. N pu doosəkəndə i laak kwaala iyi airə zoora allə. ⁵² Ina yirkurənni dooniya bissə Yahudawairəi, nok i zuksa pu mari bilaa me̱e̱ka Billək, íí naa zuta iit i torpa, gə i ro'on uri torka.'' ⁵³ De' Yeeso daa arki, Biibai naa Farisaawai, baar gomi sə i ma' e̱'kəna Yeeso naa des somaso. ⁵⁴ I yaa səna satə pak səbo kamu.