¹ De' mari genga i dakən digdəkənkəke gwanirə te' Yeeso ma' pak naa kubrubaiya ulləi gee, "Ge̱e̱n ge̱n zuta iit yisti Farisaawairəzzə, nok dangkaam. ² Ina sums zok sə gbetək an piipa, koo a sums zok sə i meek pan piipa. ³ Ina i doo tegra rən i geek naa ubla, naa gə ina i womso doowin tikron rollo roon i wook rollo paa dəl yas sə geek. ⁴ N pu doosəkəndə, uriyangiya mii, kai serəm iya i ik zok tan ama sa'ka roozo ikp zengs pai pa. ⁵ Ama n geesən ura i serəngbuz: serumum Bil ura naa ipsa zok punaa gbama kosəkənən ra'a gbampak rə, n pu doosəkəndə serummu. ⁶ I yingə not sisiit gbanaaro sulei ittəkə pa ya? Naa riik a Bil zins koo muzo irə te'ez piipa. ⁷ I boo koo suka ɓu'tə zuttə rək tele pu ge'sənkək, nok riik ser kana kamən pa I Yeeso iisi gee a bo'rə pu wessa, rem arəə bo'rə ri'eri, a kink zegsa ɓampas. an sisiiti gənga. ⁸ "N pu doosəkəndə kala ura doye marirə mu' boo a miiziz, waa maz kweeku tombaiaya Billəirə mu' ⁹ Ama ura sinnə marirə mu'uz, mii Waa maz n mu'usku tombaiya Billəi mu'. ¹⁰ Gə ura pagrə neta go'pat Waa mazzə paan, i ra'susku, ama ura pak səra pak rumsa Billəssə paaz i ra'susku pa. ¹¹ Ina kamən ro'ra Billəssə, naa gwani naa iya naa gbikəm ai, kai gbee baar naa ina i dook nok sə i keesən zuran pa, ko ina ii dook an, ¹² Nok rumsa Billəs ge̱e̱skən ina i dook bəllirən. ¹³ Sei uza bansa mariya ei rə te', doosu gee, ''lamz, doosum dowiya miiz na mar ɓinta daa daaseetnaa mii'' ¹⁴ Yeeso iisu gee, ''maz, ne̱e̱ esə to̱msa ze̱e̱ska bissəz, koo marka ɓintə iirə te'es ya? ¹⁵ Sei doosə bansi yas, ''Ge̱e̱n ge̱n! kai gau naa sutum baar pa, nok toogəska neta dəllət uni zəngs pa.'' ¹⁶ Sei Yeeso riisi rəsa paka ak, gee, ''Gwana maz uza pii sə baa baak, willirə kin ina baan haa. ¹⁷ Sei doo gwandə timlə gee, 'N book anya? N pu naa ara n de'eskən ina n baan an pa,' ¹⁸ Sei doo bonge, n me̱e̱me̱n ina n bo'kan. N wa'gəsəka werəma pise an sə n wo̱m a gbinam sə n de'es neta miirə n baat roo. ¹⁹ N doosək zəngsa miiz, A pu naa rek naa ina kamkpa wi' na wi'in əngəm, regəm, bo'om, geem tingtun.'' ²⁰ Ama bil doosu gee, mo̱o̱ məsa as! wonka tuksassə n pe'sek zəngsa mo̱o̱s neta a toogəs at gakp a ne̱e̱t ya? ²¹ Riizi bo'rumka na ura toogəs neta dəllət ama timra ulləl pu gwanta Billət paa pa.'' ²² Sei Yeeso yer kubrubaiya ulləi rə sə doosi gee, n pu dooskəndə, kai gbee baar zəngsa iisə naa ina rekan, koo zokruma iim na a i te'kan pa. ²³ Nok zəngs ar an kinka rek, zok ar an kinka yalən. ²⁴ Gwenən goli: I baa pa, i toogəs p, ama Bil esi ina rekan. ²⁵ Mo̱o̱ ii i ar an noi! Zeezi iirə te' bag dəna gakkpən naa zəngsam dəllə no̱k gbeeka baar ya? ²⁶ Ina le'ek bo'ka ina to̱pan poa nok an sə i gbee baar a gbinandə ya? ²⁷ Gwenən ni burum nook, i kam to̱ms no̱k kinka yaləna tə'kan pa. Naa riik n doosən koo Suleimanu naa gwant, naa kima ulləm tele reks ni koo muzo iirə te'ek pa. ²⁸ Bil na esə buruma ɓu' wo̱nka bo'ta wəərǝm ootum, eskən ii ina ar a iin pa ya? Mo̱o̱ ii mariya eska timr dag pai! ²⁹ Kai gbeer baar naa ina i rek koo ina i bo'kan pa, Mariya i me̱e̱ Bil pai iiya i gbeer baar ³⁰ kinka irəm nettirə, ama Daa iiz me̱e̱me̱n i ii in netti. ³¹ Ama laan gwanta ullət, eskən en neta eti gəbən. ³² Kai serum pa ii gbo'a topak, nok Daa iirə paariz pu naa yaksa zoka eskən gwanta ulləttak. ³³ Yingəsən ina pisən nan sə i esə iya naa zaamai naa riik i toogəsək zaudiya bampaz Billə paa. Ara ya'rəkən pakrə, ara ruuz rurukən pak , koo mo'or laksəkən pak. ³⁴ No̱k ara i de'sən zaudiya iiz zak, timteya ii i gakp roo. ³⁵ Dogən seeg pitilaiya ii ipu okəkrə, ³⁶ Ni seniya i zo dangwanzza iiz na gətə naasa kiim rəssə, na gətə naa də'əs su' i gbe'rusku naa lakska bəl pa. ³⁷ Seniya i geek tingtum dangwanza iizə na oksi ipu zo'okrə. N doosən zəmazi, tə'ək yaləna tomsən, gapski dii sə esi rek. ³⁸ Noosən koo na gətə naa te'teeg koo ar oonarə seniiyi i geek tingtum naa oksi ina pu zo'krə. ³⁹ Ama me̱e̱n an ura naa gwaagaz naa me̱e̱me̱n bəlla ruuz zakənaz ka daa səka wa'su gwaak sə ru'u una pa. ⁴⁰ Ii bən gawun naa gbaksa tok, nok Waa Maz gətək zoora i tammunu paazə. ⁴¹ Biturus doosu gee, ''Daa a rii paka ak nok ee ya koo nok mari Yasso?'' ⁴² Sei Daa iisu gee, ''senza pazi pu wessa naa be'ru ya? Uzi ura dangwanza ulləz esək koo anaya ullə na'rə səna kam gwaagi sə esi rek bəlla go'ozzə. ⁴³ Senzi geek tingtum dangwanza ulləz naa gətə səna ogsu bo'ruk ina doosundə wessa. ⁴⁴ N doosən zəmazi, gapsək senzi neta ulləttə paa sə gbaa. ⁴⁵ Ama senza rooz naa doo gwandə timlə gee, 'Dangwaza miiz gətək ya' pa', səna ma' duka seniya yariyai naa kii'yai yas səna reg na bo' haa na kamu, ⁴⁶ Dangwanza ulləz gətək ubla a tammun pak gəbən bəlla me̱e̱ paz zək. ⁴⁷ ''Senza me̱e̱men ina Dangwanza ulləz ii na bo'rə ama de'es zok sə bo'rə pa ezi kink ɗa'at wessawe. ⁴⁸ Ama senza me̱e̱ ina Dangwanza ulləz ii na bo'rə pan sə ina to̱o̱ da'kan kink da'at to̱pa, ura i esu gəngas, i iik gənga ullə, ura i esu dag haaz i laak gbinən ullə'' ⁴⁹ Doosi gee mariya eyi gee, "Zakaa miirə dəllə te'ka nok n kamtikən ra'ak, ika miik ika gapsapu ra'a eki. ⁵⁰ N punaa batisma gombaar n kweekuz, gəbən eki. ⁵¹ N inge n zaa nok kamtəka gamna wessak dəllə te'ya? sam n doosən n kamtən markəbka ki. ⁵² Diga ri'ak mari gbenaaarə gwaaga mu'kakrə te' i markənka i geekənka pa. Mari i taarəkə i bo'ok keerəs naa mari ittəkə, mari ittə kə bo i bo'ok keerə naa mari taarəkə. ⁵³ Daa naa waz i mu'səkənka, mai naa wai kiizaz i ruuskən mai gunurə i mu'skənka naa yara ki" ⁵⁴ Yeeso dossə bansi: "Ina og koli na ma'tə dibla Billə, i doo inge, maa̱m langtək, boo langə." ⁵⁵ Zaka na keetə diga aari ar ma'ak, bo'rum ri'eri. ⁵⁶ Ina naa bangəmmaiyi i gwenkən ara paak naa dii sei i doosə mari ina bo'runkpan, nok an sə i mee ni i diikən neta bo'rum ri'kak at paya? ⁵⁷ Nok ansə i mee ina to̱o̱ ika bo'rən paya? ⁵⁸ Muna pu rek rekarə ar bissə naa umkeeriya mooz yamma ioks bilarə ina bo reks naaa ri pa kankpa ura zeesəska bissazzə, urbo eska ura dog marirəzzə, sə gbe'a ara i gbe'en marikrə. ⁵⁹ N doosən i keek pa,sei ina teegəsapu wessa i laaz koo kobo seetək pa.