¹ Bəlla roollo mari gənga ipu roo sə i daoosə Yeeso mariya Galiləi rə paa ni Bilatus tom mari ni i immnən de' ipu ma'kən neta Billət. ² Yeeso iisi gee, i sundə Galilii yawai i iwi ai, i ara an Galiliilaawai i seetəi hakeirə paya? ³ Ri'pa ii bən ina punaa pa i weerəkən yas. ⁴ Koo ni mari komna naa samsaara i werai bəlla gwaaga noo paari siluwamak kasən sə iwi telek. I sundə i ar mariya i seetə Urushelima hakeirə ya? ⁵ Ri' pa ii bən ina pu'na' pa i werkrən. ⁶ Sei Yeeso re'si pak gee, maz uza pii ura rug'tə rumb gwandə ba'rə, gədəmtə kinə nen te'a ekirə pa. ⁷ Sei doosə tombaaaza ullə ba'rə, "Gwenum, wi' taarəkə ri'ak n zaa akp nen te'ak rə ama n kinə pa dopsən nok an sə kweerək ar zuk ya? ⁸ "Tombaaza baa arkirəz doosə ura naa baakiz gee, dangwanz, daam rekarə wira zakallə, n pe'suku, but gə n kusuku səks wirallə. ⁹ Na rewo wira zakallə, wessam; na rewo pa səna dops zok." ¹⁰ Ubla esmgəska ukarə Yeeso pu kubruskən mari rora Yahudaawai i dakən allə. ¹¹ Sei kitakiiz uza pu roo ura pe' wi' komna naa samsaarai kunu konsu, koo topa le' leekaa paak pa. ¹² De' Yeeso ogu sei deru naa zaa mu'ka sə doosu "Kitakiiz n binsa pu kunuwa moourə." ¹³ Sei pa'au naa na'a ulləi, ni unkpa norak sei lees paa sə ma' noosəka Bil. ¹⁴ Baar sug doonza gbi'za roli rəz no̱k Yeeso ara rungbun kitakiizi ubla engəska rək, sei doosə mari gee, "Ublut pu bamrəzi kankpa tomsos, nok riik zan ina rungbun ubluta etirə ama kai zaa ubla engəska rə pa." ¹⁵ Daa Bil iisu gee, ii dangkaameya ai, neezi irə te; kees gumbaaza koo zegəza ulləz diga ar maanarə sə kamu ar maamrə ubla engəskarə paya? ¹⁶ Kita kiizza az urbən waza Ibrahim rəzzi sə seetan dogdu wi' komna naa samsaara, aibəzi pa ina rungbu kunuwa ulləurə ubla engəskarək." ¹⁷ De' Yeeso doo paka eki, sei keeriya ulləi i gee deksa zur, ama mariya i seei zok yagi naa neta məsəmrə bo'rə eti. ¹⁸ Sei Yeeso doo bonge, gwanta Billət gookən naa anya? i kwe'guskunu naa anya? ¹⁹ Gwanta Billət puni dokta mustattət uza rə ta'at, ullə baakrət, noo, dag sə noi i zaa bo'rəz dalita ulləttə." ²⁰ Sei Yeeso gebən doo bonge, "N ringəska gwanta Billət naa anya? ²¹ Puni yistiya kitakiiz uza de'əu sə fəu naa zuma alkamarəm taasai taarə haa zummu puutə yasak." ²³ De' Yeeso pu rekrə Urushelima duu dəlmiya gbi'kəyai na tompairə sə kubrusən paka Billək. ²² Uza desu gee, "Dangwanz, iya i kweu gə i gakp pu topa?" Yeeso dosu gee, ²⁴ Yaanən torka sognaa aapakrə no̱k n pu dooskəndəmari gənga i laak torka ama i le'ek pa. ²⁵ Nok Daa naa gwaagaz na gbe'es sogna i de'ek goka sə i oorə Daa naa gwaagaz, gbe'rəsəmee sogna; ama iisək gee, N mee ara i keetənnak pa. ²⁶ Ri'eri i iisuku gee, e' reg sə e' bo' naa moo, sə e' kubrusən ro'toya Billə rə. Ama gəə bagən gee, ²⁷ N mee ara i keetənnak pa, ri'gən ari moi ii engka baiya ai: ²⁸ I go'ok naa tebdika nu' zoora i ogən Ubrahim naa Ishaku, naa Yakubu, naa anabawai telə, gwanta Billəttə, íí bən i koskən goka. ²⁹ I zak diga di', naa nimz, naa aa, naa pa' rekrə tebullə gwanta Billəttə. ³⁰ Me̱e̱men, iya sa'kai i gakp iya seeniyai, iya seeniyai i gakp iya sa'kai. ³¹ Ni umkpa norak Farisaawaiyi uri i zaa ullə, i doosu bonge, "Ri'gəm ang no̱k Hiridus iya kankpa. ³² Yeeso doosi bonge, "Ren sə i doosə dangkaameza ezi, i keesək zam sə N rungbo mari wo̱nka naa bo̱'ta, gəbən, ublaa taatə N gɓaksək to̱msa miis. ³³ Koo rigaya, N rekrən mu'ka naa ri'gət wo̱nka naa bo̱'ta naa nakwanzə, nok to̱o̱ ara i kweekən anabi ar ye'na naa Urushelimak pa. ³⁴ Urusaliima, Urusaliima moowa a iu anabawai, sə a to'gə iya i tomtai, dən rigazi sə a toogəska yangiya mooi ni kəəz dakskən yangiya ulləi gwandə bentirə duk ya? Ama i íí ri'pa. ³⁵ Gwenən i mu'sapu gwaaga mook, N pu dooskəndə, i oke gəbən pa, sei ublaa i dookən bonge, sə'səm na gau naa ura pu zakrə naa riira Daarəllə.