¹ Naasa i rəkən buroodi naa yisti pak rektitəpu mis, naasa i der paskas. ² Firissii gbi'kiyai naa biibai i daks su' ni i kamkpən Yeeso, nok ser kami kan marirə. ³ Sei seetan tor timra Yahuza rəllə ura i deru Iskarayoti, pu muzo iya komna naa ittəkə eyi rə te'. ⁴ Yahuza ree sə i daks su' naa firissii naa soojai ni ur eskən Yeesok. ⁵ Zok yagi haa i doks bo esku wees tomsa esirə. ⁶ Sei ii, sei laa ara kinkən, ara eskunuk, ara mari i tookən pak. ⁷ De ubla naasa burodiya yisti piipa rektitə, ublaa i maam ma'za i kamtu ubla paska rəzak. ⁸ Yeeso tom Biturus naa Yohana sə doosi "Ren i kintə neta e rek paskarət. ⁹ I desu gee, "A ii ena go'rə netti araya?" ¹⁰ Isi bonge "Ina tor dəllə te' i sark naa maza gumtə sabdira maamrəl. Duunu gwaaga torunakrə, ¹¹ sə i doosə ura naa gwaagaz, lamz gee rora bo rekin rekal paska rəl naa kubrubaiya booiyal palya?" ¹² Re yiisikin yin rora gbi'lal, i kink ina i iin roo yas, eri zi i kwe'səkaa ina a rekan. ¹³ I ruu i ri'gə dəllə te' i ree oks koo anya pat ni Yeeso doosinik, sei kwergəs neta i rek paska rət. ¹⁴ De' wakatiya rooz bo'rums, Yeeso dakən naa kubrubaiya nok reka rek. ¹⁵ N ii reka paska az naa ii minagə ɓer baar. ¹⁶ Ama n doosən i rek rekki pa sei ina yi'sapu gwanta Billət. ¹⁷ Sei Yeeso pe' koppa maama inabi rəm sə iisə Bil usuko, sə doo bonge, kween i mar ində te' ¹⁸ Nok Npu dooskəndə n bo'ok maama inabirəm pa, sei Gwanta Billət naa zaa pu zanga. ¹⁹ Sei pe' burdi sə iisə Bil useiko sə we'gəsiu sə esiu, sə doo kween sə i bo' ində te'. Sə doo bonge an zoka mii rə n esən nok iiki, dingən bo'ka ri'eri nok sunduka naa mii. De esi zoka ullə ekki pat, ²⁰ pe' koopa maama inabi rəm sə doo bonge, "Maama inabi rəm am yii dooka pe'ka Bil go̱'rə naa mariya ulləi kwaala miirə, n kuusiki no̱k iilə. ²¹ Nok waa maz ri'gək rin, ni artə bo'rusən puk, ama ina yirkurənni naa ura esku iya iya i iiu pairə na'rəz. ²² Waa maz werk ni Bil doonak, ²³ Sei kubrubaiya ulləi i ma' dediska gwanirə te, koo neezi bo'ok irəm tomsa ri'as ya? ²⁴ Gə i sinkin gwanirə te' gee neezi ar gbi'kəmrə ya? ²⁵ Yeeso doosi gee gwaniya dəlləi i yiisə mari senu naa gbam naa riik i ii mari ina derbo boo abo pu' mariz. ²⁶ Ama kai i gau ni iik pa, goptur a eki gbi'za iirə te'ez na gau waizəz, doonz na gau ura kam tomsaz. ²⁷ Neezi ar gbi'kəmrə ya ura regə rekaz ya, koo ura esə mari rekaz ya, ura gau ar rekrəz ya. Ama n gau iirə te' ni ura sənən azak. ²⁸ Iya i ii gamna naa mii wakatiya n torun gberka balaə. ²⁹ Gapskə gwani ni Daa miiz esə bila mina gau gwanta, ³⁰ i rek i bok naa mii gwanta miitə sə i gau teng gwansə sə i zeesə me'tiya komnaa iitikə Israi'la ai bis. ³¹ Sei Yeeso doosə Biturus bonge, Siman, Siman ge̱e̱m seetan oorusapu bila sə bo gwegə. ³² Ama N weerəsapu Bil nok eska timra mool, kana kasə pa, mona getə miirə po'om doomeiya mooi." ³³ Ama Biturus iisu bonge, "Daa Bil n iispu koo pusunarə a rek yam koo na kam wer bən." ³⁴ Yeeso iisu bonge, ''N pu dooskarə wonka kəəz nagə kwii ya a sinkinə dən taanə monge bo meeye pa.'' ³⁵ Yeeso doosə kubrubaiya ulləi, ''Ninka N tomən go'ka wa'azirə naa pe'ka ɓunaa we̱e̱sək pa, naa ɓuna naa tag, una le'ən ya?'' I iisu bonge, ''Ouwo.'' ³⁶ Sə doosi bonge, "Ama ri'ak gə ina punaa we̱e̱s naa ɓuna, pe'en gəbən ina punaa fongkaaz pa yingusən yaluwa mooi iiu sə i yiu muzo. ³⁷ Npu dooskəndə, ina pu biisənən miirə paan yi'sək yin zok, 'I ge'u pu mariya engairə te'.' Ina i doo miirə paan eki bo'rumkpa naa mii.'' ³⁸ Kubrubaiya ulləi i doo bonge, ''Dangwanz, gwenəm! Epunaa fonkaai ittikə.'' Doosi bonge, ''Daksapu ri'.'' ³⁹ De i ɓams reka jiibi, Yeeso kee ni keesənak sə ri'gə yiiga Zaitundək, kubrubaiya ulləi i duu sa'. ⁴⁰ De i reks arkirə, sei doosi bonge, ''Weerən Bil nok kai tor ɓasurə pa.'' ⁴¹ Yeeso se̱e̱ mu' naa biliya eyi rə topa sə weerə Bil gee, ⁴² "Daa mona iiik gə pe'səsimə ɓerka baala al, kaa duu ina n iin pa, ama bo'rum ina a iin." ⁴³ Sei malaika diga billə pàà gbəsurə nok sə po'u nok səna de'es zok, noka pu geekən gombarə wessawe'ek. ⁴⁴ Ree mu' naa weerəka Bil naa gbam haa ar ma'ra ullək ɗektə buttə dii ni kwaalak. ⁴⁵ De ɓams weerəka Bil sə gəə kubrubaiya ulləi 'rə, oksi yas rumrə nok gomta baara baaləu, ⁴⁶ sei desi bonge, ''Nok an sə i rugo ya? ruun paa i weerə Bil bo'ta i kasə ɓasurə.'' ⁴⁷ yeeso piipin pakrə sei bansa mari i rektitə, ura atiimu'uz uzi maza i deru Yahudaz, pu muzo diga iya komna nna ittikə eyi rə te' ree sə bo kuu, ⁴⁸ Yeeso desu gee Yahuda a esik waa maz naa so'muka lajtə ya? ⁴⁹ De' iya i duu Yeeso i og ina bo'rumman, i doo bonge, "Daa Yeeso ena gwaa naa fonkai ya?'' ⁵⁰ sei uza iirə te' ɓaa senza firissa gbi'zazzəz haa ɗe'su toka na' go'narək. ⁵¹ Ama Yeeso doosi bonge, ''Dáán gwaar!'' pok toka mazzi rək sə rungbu. ⁵² Sei Yeeso doosə firissiya gbi'kiyai naa dooniya marirəi i zaa kamkperə naa gbalit naa fokai ni mii ruuzak ya? ⁵³ Koo benaya n gau naa ii Gwaaga Billərə, i kamə. Ama nok wakatiya iizi ara gwanta tegra rət kampkən tomsak. ⁵⁴ Sei i kamu i ri'gunu, i rennu firissa gbi'zazzə gwa. Biturus duui sa'ka sa' ar ye'na. ⁵⁵ De' i kwees ra' gwa' roo kaka allə mari i gau ar muko. Biturus bən zaa gau naa ii. ⁵⁶ Waa kitakiiza kam toms gwaagirəz ogu gamnarə pourə desu gee, maza az pu naa Yeeso. ⁵⁷ Ama Biturus sin doo bonge, ''Kita kiiz n meeu pa.'' ⁵⁸ I gau topa uza ogu sə mee̱u, sə doo bonge, ''Moo yam apu naa iirə te'.'' Biturus iisu bonge, n pu iirə te'pa.'' ⁵⁹ I gau ni awa muzok topa, maz uza de' naa gbam sə doo bonge, zəma maza az punaa Yeeso nok maza Galilizzi. ⁶⁰ Biturus iisu bonge, n mee ina apu dookrən pa, sei kəəs kwii. ⁶² Daa Yeeso yer sə gwen Biturus. Sei Biturus sundu ina Yeeso doosun gee, "wo̱onka kamin keez nabo kwii ya a sinkinə meeka den taanə." ⁶¹ Biturus kee goka sə go'to wesawe'. ⁶³ Mariya i geu Yeesoi i ma' ɗu'ku sə i iirusu leem. ⁶⁴ I doksu muug , sə desu neezy vowa ya? ⁶⁵ Iree mu' naa doorusku pagn na go'pam. ⁶⁶ Ar oonarə dooniya marirəi naa firissiya gbi'kiyai naa biibai, i tookən sə kam Yeeso gwanirə mu. ⁶⁷ I doosə Yeeso bonge, "Na moozi Ura Bil teeguz, doosimee." Yeeso iisi bonge, koo mina doosun ma i kweek pa. ⁶⁸ Gə mina desən i iisikə pa. ⁶⁹ Ama ri'ak rekarə mu' waa maz gakp naa go'na a Billəkrə mu'. ⁷⁰ Sei ii yas i desu gee, "Moo waza billəzzi ya?" iisi gee, "I doopu wessa." ⁷¹ Sei i doo bonge, "A laan an seedaakum uma ya? A geesapu diga gwandə Su'ro.