¹ De' Yeeso teg no' sə og maza naa zaudiz pu esək esəkrə ara i esənnakrə. ² Sə og kita kiiza pu tuukuzəz zaz una pisu paz, esə penei ittəkə. ³ Sə doo bonge, "Zemazi N doosən, tuukuza punaa una pa az, esə pu ina ar an kooyarə esən yas. ⁴ Gwani yas i esə ina pisin de te. Ama kita kiiza az esə ina pisun yas. ⁵ Ni uri i ipu pakrə ootum naa ni i wo̱mn Gwaaga Billək naa bilək naa gə neta ootumrə i bo'rə te'et, ama doosi gee, ⁶ "Naka neta a oga at, wakatə pu zakrə i daak koo bil ularə paa pa, sə i tiisəka paal piipa." ⁷ I desu gee, "Lamz neta eti gə bo'rungba benaya? anni bo'rungba neeti nabo rektitə ya?" ⁸ Yeeso iisi gee, "De'sən zok nok ser kana kamən pa uri gənga i za naa ri'ra miil," i dook gee "Miizi ur, nok riik wakatə pu mis kai duui pa." ⁹ Ina gee ya'am naa gwaar ruukunka ində te' ser kana kamən pa. Netta eti bo'runkpa zanga ama gbamba dəl rektitə denpa. ¹⁰ Sə doosi gee, Dəl ula ruukun ya'am dəlularə gwant ruukən gwant uta. ¹¹ Ublaa ekirə but gbamtik gbi'tit sə dəl lame, dəlme uya bo wodu a rekrəu, uri bo neta mesəm rət. Neta mesəmrə gbi'ta gbi'it bo'rungba, naa net uta gbi'ta gbi'it diga Billə. ¹² Ama neta eti yas nagə bo'rum, i saasəkən nattə paa sə i gbesən baar, i ɓaakən pusunarə i keetit kən ro'riya Billəirə, sə i sənin nok ri'ra miil. ¹³ Wakatiya ezirə sə i kink bilaa i dooskən paka tinka miirək. ¹⁴ Nok ri'ik zəngs kana ke̱e̱sən pa, go'rusən wakatiya ezi nagə rektitə. ¹⁵ N eskən en ina dooka rən naa meegəskarən, umkeeriya iirə airə, nok sə kaina le'sən naa sənəm pakoo moirə te' ¹⁶ Keesə kaa diga, do'ga mari, zəi naa so'ki, zəəu naa ungwani i doorukən, haa i ipk uri iirə te' ¹⁷ Kooneeya mu'uskən nok ri'ra miil. ¹⁸ Ama koo suka iirə iirə zullo muko sə gberk baar pa. ¹⁹ Ina wengs zok i kink zəngsa ɓampas. ²⁰ Ina og Ursaliima ko'ospu zok naa soojai, me̱e̱m wo'oska ullək rektəpu. ²¹ Mariya ipu Yahudiiyal ina nog yiimrə, iya ipu dəllə te'ei bo gamn ama kai daa iya kanarəi sə ina totopa. ²² Nok ru'a ai, a gəəskarəiyi nok sə neta pu biisənən at na yi'is zok ni gwan i biin ak. ²³ Ina yirkurənni mooi íí iya ipu 'naa ɓa'tei, ubla ekirə naa iya ipunaa yangi nattəi! nok gberka baar piik dəllirə ubla ekiro. Noka riik dosən urinyagi. ²⁴ I ikpən naa fonkai sə i kamun se̱nurə dərmerə yas, menki wo'sək Ursaliima, haa sei zoora menkirəl na yi'ispu zok. ²⁵ "Neta məs zokat gbetək ubal, se'raasa naa zosirə te'. Dellə te' bo mariya somaso' i geek timgtum pa, i gapk naa se̱r noka dooka maam naa yaasa gbenarəs. ²⁶ Ri'erizi bən mari nok i riiki sə i kadə, nok ser naa neta gə i sundukat gbe'se ɓe' a borungbat dəllət. Nok gbi'kəma Billəm lamtək. ²⁷ I ok waa maz tiitikrə kolirə te' naa gbi'kəm naa yaksa zoka gbi'kak. ²⁸ Ama neta eti yas nagə ma' bo'rungba, ruun sə i teg zur sə i gwenə ara paak, nok kweeka iirək rektitə pu mis. ²⁹ Yeeso ma riisi pak gee, "Gwenən neta pu bo'rungbarət naa te' rumb naa teta seetət yas. ³⁰ Ina ma' suktuka dangs i me̱e̱gəs ingə wumsa rektitə pu mis. ³¹ Ri'erizi bən ina og neta at yas na pu bo'rungbarə, me̱e̱men gwanta Billət pu mis. ³² Zəmazə', N doosən, wakatiya az ark pa sei neta at tele na bo'rumsapu zanga. ³³ Ara paarik naa diik assək an, ama paka miik assək pa. ³⁴ Noka ri'ik de'sən zoka iik naa zu'tiya indəi, nok sə timtiya íí kaina gbe'sən baar nok neta i bo'ok sə kam at, naa neta i kink zəngsət, sə ubla eki naa zaa na oksən ipu ni tərak. ³⁵ Nok zak zan koo neerəya ura napu dəllə rooz. ³⁶ Ama gamn naa me̱e̱gəskəna wakatiya koo andəz ya, weerən nok wakatiya aa ezi na zaa, na oksən naa gbam wessawe, sə i gbisə gberka baara apu zakrə allə, sə i kin de'ka Waa Mazzə mu'.'' ³⁷ Ublaa yas pu kubruskəndə Gwaaga Billəkrə nimz yas kee Uruselima sə ri'gə gbaksəra i de̱r Zaitunakrə. ³⁸ Mari yas i zaa ullə, nittə dii nok geeka ina pu dookrən Gwaaga Billəkrən.