¹ Ubla ukarə Yeeso pu kubruskən paka tingkak gwaaga Billəkrə, firissii naa biibai naa dooniya marirəi i zaa ullə. ² I desu bonge, ''Doosme naa gbi'kəma pammi sə a bo'rə neta atya? koo gə neezi esa gbi'kəma room ya?'' ̧ ³ "Iisi doosi gee, mii bən n deskən des doosne. ⁴ Batisma Yohana rə bo'ru azge keetə pariya koo marirə ya?" ⁵ I deskən gwanirə te' bonge, ''Ana doo, 'Keetə billə paa,' dook bonge, 'Nok an sə a esə timr paya? ⁶ Ama ana doo ange, 'Marirə' mari yas i to'gəkaa nok i me̱e̱sapu Yohana anabizi.'' ⁷ Noka ri'ik i doo bonge, bo me̱e̱ ara keetən akpa. ⁸ Yeeso doosi bonge, "Mii bən n dooskən koo naa gbi'kəma pammi n bo'on nettam pa." ⁹ Doosə mari re'sa paka ak gee, "Maz uza pii sə de'rə te'ta inbi rət, sə doosə iya i bo maama inabirəm ai, sə ri'gə but uta rə ar ye'na sə lo'to. ¹⁰ Sə tomto senza ulləz baabairə nok sə ina etu nen rata inbirət, ama baabaiyi i ɗu'u sə i nenu nat kotto. ¹¹ Sə gə tom uza urbən gə i ɗu'tu, sei i doksu zur, i nenu gəə na' kotto. ¹² Gəə tom senza taazaz ezi urbən gə i ɗu'tu sə i ɓe'su, i ɗongsu goka. ¹⁴ Sei Dangwanza naa baak ezi gee, anni n bo'ok naa tombaiaya aiya? n tongb waza mində n iiuwaz, leegə i noosuku. ¹³ Ama de' baabai i ogu, i dogo su' gwanirə te' gee ura pe'ek ɓintaz uza az, nok riik zan a ipsu sə ɓinta root na seesaa an. ¹⁵ Sei i keesu baaka ekirə, sə i ipsu, ura naa baak ezi bo'ok baabaiya eyi rigaya? ¹⁶ Zak sə wo'os baabaiya eyi, sə esə uri baaka eki, De' i gee ri' i doo bonge, "Bil na ro'on." ¹⁷ Yeeso gweni, sə doo bonge, "Anni ina pu biisənin gee bila womba i mu'us al ulli ark go'ka rəya? ¹⁸ Kala maza kasə bilirə paaz ka ka'gəs, ama kala ura kasu rə paaz namsək. ¹⁹ Biibai naa firissii i íí biika na gwandə paa wakatiya ezirə nok, i me̱e̱men re'si ííyi pakki, ama ser kami kin mariya eyi rə. ²⁰ I gyebdu naa muuz sə i to̱m umkeerei iya i yes zui ni mariya wessai ak sə ina de̱dusu. I íí sə bo kam Yeeso na doo ina go̱'pan gə se bo kamu go̱mnaa Roomannaz rəmu' ²¹ I desu bonge, "Lamz e me̱e̱men a doo sə a kubrusən ina wessan, sə gə una kassa naa goosa mazəspa, ama a kubrusən ina Billə zeman. ²² Tooton ara eka esəm sook Kaisarə ya koo topaya?" ²³ Ama Yeeso meegəs pu sundumiya iirəi, sə doosi gee, ²⁴ "Yiitən weesa roos, muuga neeki naa riira neeli paya? i doo bonge Kaisar." ²⁵ Sə doosi gee, "Sook esəsən Kaisar ina Kaisar esən Bil, Bil bo ina Billən." ²⁶ I kinnu aibe una deu paka pag mariya eirə mu'ka pa, nok riik i rees i ri'gə naa deksa zur. ²⁷ Saduyiyaawai uri i zaa ullə iya doo bonge ruukaa roobaamrək piipa. ²⁸ I desu bonge, "Lamz" Musa biisə ge maz na kam kiiz səna wər na daa kiizii dingpa, uza kank kiizi sə dingsə umdoom wazya? ²⁹ Uri yangi ipu gbansa, ³⁰ ura seenzaz kam kiiz, wer daa waz pa. ³¹ Ura taazaz, ur bən ri'eri daa waz pa, haa gwani gbansa yas i wer i daa yangi pa. ³² Sa'kaa roozo bən kitakiizi zaa wer. ³³ Ubla ruukaa roobaamrəkrə, gə ur gakp kiizza neeza ya? ³⁴ Yeeso doosi gee, "Yanmariya dəlləi i kamrə ki' sə gə uri i ree kiimrə." ³⁵ Ama iya i de'si ookapai bo nok kweeka roobaam a iya i werai rəm, i rek kiimrə gə i kampki kiim pa. ³⁶ Werk bən i wer pa es, nok kweekən kwen naa tombaiya Billəi, naa yangiya Billəi i ruusi roobaamrəi. ³⁷ Ruuka roobaamrək Musa bən yii pu, wo'oso roo, ara derən Daa Billa Ibrahim rəl, naa Biila Ishaku rəl, naa Billa Yakubu rəl. ³⁸ Ur Billa iya i wer airəlli pa, ama iya ipu naa zəngsai rəlli, nok ii yas ipu naa ur. ³⁹ Biibaiyi i iisu bonge, "Lamz a doopu wessa." ⁴⁰ I gəə i desnu una gəbə pa. ⁴¹ Yeeso doosi gee, " Ii i doon kweebaaz waza Dauda rəz aggə i doo riga aiya?" N ⁴² ok Dauda naa zura gwandəl bən doo rababaaza neta ɗu'karəttə Zabura gee Daa doosə Daa miiz gamn na' go'na rə. ⁴³ Sei mina getəpu umkeerəi ya mooi, ar de'es naa de'a mook. ⁴⁴ Dauda naa zura gwandəl der kweebaaz "Daa sə gazi Ura Bil te̱e̱guz sə yerk waza ulləz ya?" ⁴⁵ Mari yas ipu geekurə sə doosə kubrubaiya ulləi. ⁴⁶ Ge̱e̱n ge̱n biibai, iya i ii te'ka yalina gbi'na ɓi'in, sə ina de'es bo ar luumairə, naa gakpa tentiya gbi'kiyai rə ara naasəkrə. ⁴⁷ I kweerə gwaama tuukirəm, sə i weerə werik a lo'ok sə i yaasən goossa iis, i kink bisa gomas.