¹ Yeeso tor Jeriko sə pu arkrə. ² Eri maz uza pii i deru Zakka, uzi doonza iya i kwee sookairəz, gəə punaa zaudi wessawe. ³ Yaa i boka og koo neezi Yeeso ya, ama kin oku pa nok bansa mari, gəbən ur maza ye'pazzi. ⁴ Nok riik ɗa'an no mariya eyi rə te'ka, sə ree deg te'rə paa sə bo ohu, nok Yeeso ark erizi. ⁵ De' Yeeso zaa arkirə, teg no' paa sə doosu gee, "Zakka tiitəm ya'ya nok wonka n tiik mondə gwa." ⁶ Tiitə naa gbaku sə kweeu naa yaksa zok. ⁷ De' mariya erii i og inni, i pag i doo bonge, "Reepu de'sək maza naa hakeiyazzə." ⁸ Zakka ruu paa sə doo bonge, gwenəm Dangwanz n masək neta pisət te'te' sə n esə iya una pisi pai, sə gəə mina kweere uza una, na geskunu haa den nannə. ⁹ Yeeso doosu gee, "wonka kweeka totopu gwaaga akrə, nok urbən waza Ibrahimrəzzi. ¹⁰ Waa maz zaa nok laaka naa kweeka mariya iiyai rə. ¹¹ I gee pagn gee, ree mu' naa pak sə doosi re'sa pak, nok pu miss naa Urusalima, haa sə i mee gee gwanta Billət ɓe'tik ɓenyage. ¹² Sə doo gee naa riik, maz uza ree but utarə ar ye'na nok kweeka gwant sə bo getə sə bo getə. ¹³ Der seniya ulləi sə esi weesa i der minasas sə doosi gee, bo'rum neta yingurət mina gə gəttə. ¹⁴ Ama mariya ullə dəlləi i yu pa i tom su' sa'ka, "E ii ara maza az gakpin arik pa. ¹⁵ "Bo'rum de' getə zaa kwee gwanti rə, tom su' ina detubo seniya komna esi wees ai ina ina zaa. Sə boo mee bagzi a koo neeya kintə ar yingurə naa weesəz. ¹⁶ Ura seenzaz zaa gwandə mu' sə doo bonge, Dangwanz minasi a esəu az kintə bagsi minasi uri komna. ¹⁷ Dangwanzi doosu bonge "Usuko senza wessaz, noka a bo'rum go'num ina wessandək n gapska gwanta dəlmiya komna ai rə paa. ¹⁸ Ura ɓesaz zaa gee, n kin minasi gbanaarə a esəu muzo azzə paa. ¹⁹ Mazzi doo bonge, moo gamn wessa senza oomiiz, 'Moo a gakp gwanza dəlmeya gbanaarə airə paa.' ²⁰ Ur uza zaa gee, Daa minasi a moorə a esəu az n ɓopsu yalində te' okapai. ²¹ Nok ser mame kan nok moo maza a gom azzi, a pe' ina a gbops pan, sə a ɗe' ina a ta' pan. ²² Mazzi doosu bonge, n bi'iska naa paka keetə mondə su'rokki sən moo senza a engŋaz, a me̱e̱men mii maza n gomazzi n pa ina n gbops pan, sei n kwaas ina n ta' pan. ²³ Sə ri'eki an bo'rə sə a ɓops weesa miis banki rə paya, nok mina getə n kaa zaa pe' wessa miis naa bagsi paya? ²⁴ Mazi doosi gee i de' pourə, kweerin minas a ullə ezi, sə i esu ura naa minas komna ezi. ²⁵ I doosu bonge, Daa puna minasi komna ²⁶ "N doosun ura puna unaz i bagsku una, ama ura pisupaz koo a pisu waa topaz eni bən i kweerək. ²⁷ Ama unkeeriya miirə ai, i ii ara n gakpin gwant irə paa pa, kamtini sə e iwi mində mu'ka ang." ²⁸ De' ɓams dooka paka eki, kam bila deg rekarə Urusalima. ²⁹ Ipu ri'eri de' zaa dəlla mis i der Betafaji naa betanil iya ipu pou na ge'a teta zaitindək rəttək, sei Yeeso tom kubrubaiya ulləi ittəkə, ³⁰ doosi bonge. Ren waa dəlla dera allə npu torkrə, i oksək waa gumbaaz a i meɗe deku paz, bintunu sə i kamtu. ³¹ Uza na desin bone nok an sə ipu binsukurə ya? "Doon sunu inge Daa Bil iiu in." ³² Iya i tomi eyirə i oks waa gəme ni Yeeso doosinik. ³³ De' ipu binsuku rə, sei ura naa wa gumbaaz ezi desi bonge, "Nok an sə ipu binsuku rə ya?" ³⁴ I doo bonge, Daa Bi iiu in. ³⁵ I kamtu Yeeso rə sə i umo yaləna iin waa gumbaazirə paa sə i gaps Yeeso paa. ³⁶ De' pu ri'gəttə i umrə yalən bilarə paa. ³⁷ Ipu reksik rə mis ara ge'a zaitun pin krə, bansa mariya ipu yam eri, i ma' wooguka sut naa yaksa zok ipu noosək Billə nok neta məssəmrə i ogat. ³⁸ I doo bonge, ''Gwanza naa sə'səmmazi ura zaa naa riira Billəl az! Gapta wessat billə paari baa gbi'kəm paari!'' ³⁹ Farisaawai uri bansa mariya eyirə ta'ka, i doosu gee "Lamz bi'sum kubrubaiya mooi ina ree." ⁴⁰ Yeeso iisi gee "N doosən, iya ai inaka rees bileya aima ika wogo won sut." ⁴¹ De' Yeeso reksək dera sə og dəlli, go' nok dəlla rool. ⁴² Bonge ina ka meemen dəna andə, ina kamtə gapta wessat an, ri'akgə pu sumsunən iirə notto. ⁴³ Nok ubla pu zakrə umkeeriya ii i ko̱'o̱skənən ke̱e̱r naa ya'am sə sojai i ko'sən te'ar keeka pii pak. ⁴⁴ I wooskən naa mariya ii tele. I daak bil ula ularə paa pa no̱k i sundo naa dəna Bil zan iirən pa." ⁴⁵ Yeeso tor gwaaga Billəkrə, sə ma' nenka iya i yingə net rooi. ⁴⁶ Doosi bonge, ''Pu biisənən, "Gwaaga miik gakp ara noosəka Billək, sə yer ar wooka ruirə." ⁴⁷ Yeeso pu kubruskəndə koo bənaya gwaaga Billəkrə, firissii naa biibai naa dooniya marirəi i iiu ikkpa. ⁴⁸ Ama i kinə bila pa. Nok mari yas ipu ke'esku to'rə.