¹ Sə doosi re'sa pak, ni i weerəkən weerikak, kai na gau naa teka zur pa. ² Gee, alkali uza pii dəl ularə ura serəm Bil koos mari paz. ³ Gə tuukuz uza pii dəllirə, sə gedəmtə ullə, gee, "Po'me a zeesəsə bis naa dommeya miiz. ⁴ "Nok lo' Ii po̱'ku pa, ama sa'kaa roozo topa doosə zura gwndəl gee, koo noka n seerəmən Bil koo n esən maz gbi'kəm pak, ⁵ Ess, noka kita kiiza az ɓesnə baarak, "N po'ku n masuku bissi, nok səkana noosə naa gədətika ullək pa." ⁶ Dangwanz gee, "Geen ina alkali a punaa go'num paz doon. ⁷ Ri'eri gə Bil ka bo'rə go'num yangiya ullə teegəi sə i gosu wera tuks naa ubla airə paya? lo'ok lon geekirə ya? ⁸ Npu dooskəndə, kamtək kan go'num iirə naa gbaku, koo naa riik, Waa maz naa zaa oksək on eska timr dəllə ya. ⁹ Gə doorusu paka akki iya i yii ni boo bopu omi sə i see mari uri. ¹⁰ Mari ittəkə irəə gwaaga Billəkrə nok weerək ura muzoz Farisaawazi, ura muzoz bo ura kwee sookazzi. ¹¹ Farisaawazi de' sə weerə neta gwandəttə paa, gee, "Bil n iisa useiko nok n puni mariya i seetəi, rui iya i bo'rə neta go'pat ai, iya i ruuro ki' koo yaariya mari rə, koo ni ura kwee sookaz pa. ¹² N rii rek den ittinə luumarə, n esə zaka kala ina n kinəndə yas. ¹³ Ama ura kwee sookaz, de' ar ye'na, koo no' bən tegi Billə paa pa, be' gumb sə do gee, Bil gamn naa yirku, mii maza naa hakeiyazzi.' ¹⁴ N doosən maza ezi ree pu gwaaga okapaa ar an ura muzoz, nok ura noos zura gwandəl az i tiisku, ura tiis zura gwandəl az boo i noosku. ¹⁵ Mariya eyi i kamritə yangi nok səna pa' na' irə paa, ama de' kubrubaiya ulləi i og ri'eri, i bi'ri. ¹⁶ Ama Yeeso deri gwandə sə doosi "Daan yangiya ye'kiyai ina zaa miirə, kai ro'ni pa. Nok gwanta Billət a iyai retti. ¹⁷ Zəma zə' Npu dooskəndə ura gen zura ulləl ni waz waiyak pa kink sə tor gwanta Billəttə pa." ¹⁸ Gwanz uza desu gee, "Lamza wessaz, N bo'ok an sə na kinə gwanta Billət ya?" ¹⁹ Yeeso doosu gee, "Nok an sə a derə wessa ya? ura pu wessaz piipa sei Bil gwan mulo. ²⁰ A meemen ro'oknai, kaa ruuro ki' pa, ka iu maz pa, kaa ruuro pa, kaa esə seedakum songb rə pa, noosum Daa mooz naa maiya mooz." ²¹ Gwanz gee, "Neta eti yas n duusapu diga waktiya n piin wazzizal.'' ²² De' Yeeso gee ri'eri, doosu bonge, "Una piti muno ɓes aa duun pan, yingəsəm ina pisan yas, sə a masə iya pisi pai, ri'erizi sə a kink faasəma Billəm paa. Sə a zaa duuye." ²³ Ama de gwana mazzi gee neta eti zok tapsəsu seem, nok ur maza naa zaudizzi. ²⁴ De' Yeeso og mazi sei zok tapsusu sə doo bongee, ''Gom gon ara gwana maz torkən gwanta Billəttə! ²⁵ Gapsək gan geeloba naa koiɗum torkarə dura zilarəllə naa ara gwana maz torkən gwanta Billəttə.'' ²⁶ Iya i gee pakkii doo bonge, naa ri'erizi gə, "Nee ɓiik ya?" ²⁷ Yeeso doosi bonge, ''Neta maz le'ek bo'ka pat Bil bo'ruk bon.'' ²⁸ Biturus gee, "Ri'ak a daatə pu kala anya a een, sə e zaa duuwa." ²⁹ Sə Yeeso doosi bonge, "Zəma zə' Npu dooskəndə ura daatə gwaag, koo kiiz, koo zei naa so'ki, koo do'ga mari, koo yangi nok gwanta Billət pa. ³⁰ Sə kink gbi'nən dəllə roo ang, koo dəlla zak mu'ka allə, ublaa bo'takrə bo kink zebgsa ɓampas." ³¹ De' toogus iya komna naa ittikə eyi gwandə, sə doosi gee, "Gwenən apu ri'gəkrə rakrə Ursaalima, sə neta anabaawai i bii Waa Mazzə paat bo'rumkpa. ³² Nok esək zok mariya i esə timr Billəi pai rə na'rə, i ɓe'esku, sə i bo'su neta deg zurat, sə i tu'su tuttə. ³³ Ina ɗa'au i ikpu, ublaa taatə akrə ruutuk gəbən." ³⁴ Koo una i meegəs ina enirə pa, nok paka ullək pu sumsənkək iirə, gwanki i meegəsən ina ur doon pa. ³⁵ Zaa ri'eri, de' Yeeso pu ɓerkrə Jeriko, ruz uza pii gamnarə pou bilarə sə oorə ooruk. ³⁶ De' gee bansa mari arkrə sə des gee anni pu bo'runkpa rəya? ³⁷ I doosu gee Yeeso a Nazaratazzi pu arkrə. ³⁸ Sei ruza ezi woo su' sə doo bonge, "Yeeso Waza Dauda rəz oksme yirku." ³⁹ Mariya i asə mu'kai i bi'sə ruzzi, i doosu bonge na rəəs, ama bag wooka su', ''Waza Daudarəz, oksme yirkurə" ⁴⁰ Yeeso de'es sə doosi ina kamtə mazzi bondə. De' ruzzi pi mis Yeeso desu, ⁴¹ "A ii mina bo'sa anya?" Iisu bonge "Dangwanz n ii oka ar." ⁴² Yeeso doosu bonge, "Kinəm oka ar, eska timra mool go'sa pu" ⁴³ Ni unkpa norak ruzzi kin og ar sə duu Yeeso, pu noosə Bollə, De' mari i og inni i noos Bil.