¹ Do̱o̱ ru'a gwanza gbi'zaz Rommaz, Kaisar Agostus pun gwantəz, esə dooka ina bii mariya buttirə yas. ² Ge'ema emi umi ge'ma seenumam, ru'a Kiriniwus pun gomnaa Suriyak rək. ³ Koo neeya na gəə gwandə dellə nok biika riira ulləl. ⁴ Yusufu bən ruu diga dəlla Nazerettallə buta Galilittə, rekarə della Beitalaamillə buta Yahudiyattə, ara i dingən Daudakrə nok ur bən zeeuwa Dauda rəuwi. ⁵ I kee nok biika riir naa Mariyamu kiiza ullə ke'luz pu naa baara wazzəl. ⁶ De i pu arkirə zoora ullə dinka wazzəl bo'rum. ⁷ Ding waza ullə seenzaz ya'zəz, ɓundusu naa yalləna i ɓundusun yangin sə ɓopsu ɓarka i esən negi rekak rə te' nok i kinə ar tiina pa. ⁸ Buttirə neebai uri ipii i kisə kaaka allə, pou Beitalaamirə, sə i zo' negiya iiyi naa tuks. ⁹ Malaika Billəz gbə'sirə, gbi'kəma Daa Billəzzəm okkəs ara i kissən ekirə haa ser kami. ¹⁰ Malaikazi doosi bonge, ser kana kamən pa, n kamtən pu paka tingkak yaksa zokrək marirə yas. ¹¹ Wonka della Dauda rəllə i dingsən pu Kweebaaz, ura Daa Bil təəguz Dangwanzaz. ¹² Ni i meekənak aa ak, i oksək waza lezzaz kinarə ɓarkrə roo i ɓundusu pu naa yallən. ¹³ Ni umkpa norak Malaikai uri gənŋa i tiitə sə i zaa dakən sə i noos Bil bonge. ¹⁴ ''Nooskaa na gau Billə ura naa gbi'kəmas, dellə te'bo gabta wessat naa mariya Bil ge̱e̱ tingtum iirə.'' ¹⁵ De Malaikaiya eyi i gəə paari, sei neebaiyi i dakən gwanirə te' gee' zan a ree Beitalami a ree gwentə ina bo'rum sə Daa Bil doosa an.'' ¹⁶ I ruu naa gbaku i ree oks Mariyamu naa Yusufu, naa wazzi pu kinarə te' ¹⁷ De neebaiyi i oksu, sei i doo ina Malaika doosi wazzirə paan. ¹⁸ Iya i ge̱e̱i məsəm kami ina neebaiyi i doosi. ¹⁹ Ama Mariyamu kam netti timlə sə gən sundume paa. ²⁰ Neebaiyi i ri'gə ipu noosək Billə nok ina i ge̱e̱n naa ina i ogan puni malaika doosinik. ²¹ De ublut samsaara bo'rəm i nau wazzi i də'su riir Yeeso, riira Malaika esu ina gə pe' baara wazzirəl. ²² De' dena Mariyamu naa Yusufu i bo'rəkən ina dokaa Bil esu Musaz keeka wenzu rəu, do'ga mariya Yeeso rəi i pe'u rekarə Ursaliima noka i yiikkunu Billə mu'uk' ²³ Ni pun biisənən dokaiaya Bil esi Musa rəirə, keeka wenzeurə gee, kita kiiz na dingk waza ullə seenzaz i esku Billə mu'.'' ²⁴ I ɗe'ez do'net sə i kuus kwaala goliya gwa'ai ittəko koo goliya woossəi ittəko.'' ²⁵ Maz uza pii Ursalima i deru Saaminu, ura duu Bil naa timr muloz pu zo'ok ublaa i keesəkən Israilakrə Rumsa Billəz puna ur. ²⁶ Rumsa bBilləz yiisu pu gee wərək pa, sei na oksapu Dangwanz, Kweebaaz ura Daa Bil teeguz sə tomtukuz. ²⁷ Ublaa ekirə Rumsa Billəs tiitə ullə paa, zaa gwaaga Billəkrə. De do'ga mariya Yeeso rəi i kamtu sə i bo'rə ina dokaiya Bil esu Musai i doon. ²⁸ Saaminu puroo, ruu sə kwee wazzi sə noos Bil bonge, ²⁹ Daa Bil, ri'ak gə daam senza mooz na ree oomi, ni a doonak. ³⁰ N okəsapu ura a tomtu nok keesəka mariz. ³¹ Ura mon atəəgusu mari mu'uz. ³² Uzi kamtək oosa rekarə iya i me̱e̱ Bil pairə, naa gbi'kəm rekarə mariya moi Israilairə. ³³ Paka Saaminu doo wazzirə paa eki məs Daa naa Maiya wazzi rəi. ³⁴ Saaminu sə'si, sə doosə Mariyamu maiya ulləz gee, ke'en to wessawe' " Wazza az, i gakp nok kaska naa ruukaa marirək gənŋa Israila, mari i pagrək net gənŋa ullə paa. ³⁵ Ri'zi sə ina sums zok iirə timtirən gɓətək kaaka allə, moo boo a geek gomba moorə timlə ni fonkaazi bagag. ³⁶ Kita kiiz uza pii Anabiyazi, riira ulləl Hanatu ur waza Faanuyelləzzi, zeeuwa Aasha rəurə,do'gəsapu pu gwaaga Billəkrə. Ur tukuzzi ya'azza ulləz wərapu, diga i gamn kiim wi' gbansak. ³⁷ Gapsapu tuukəm wi' zu'nare naa komna naa narei, gbas zaka noosəka Billə pa tuks naa ubla noos Bil naa mu'uska reka rek naa weerəka Bil. ³⁸ Bəlla elirə ur bən ree ora Mariyamu naa Yusufu iirəkrə sə pak Yeeso rə paa naa iya ipu zo'ok ubla i keesəkən Israilaiyakrə yas. Yusufu naa Mariyamu i gəə gwanirə gwa' della Nazerettallə. ³⁹ Yusufu naa Mariyamu i gbams koo anya neta dookaiya Bil esu Muusai ina duun, i gəə Galili rekarə Nazarat della gwanirəllə. ⁴⁰ Arkirə wazzi noo naa gbam yi'is naa meeka, go'numa Billəm pu ullə paa. ⁴¹ Willəwi' do'ga mariya Yeesu rəi i ree Urusalima, nok naasa sunduka ublaa Bil keetini Masarak. ⁴² De' Yeeso puna wi' komna naa ettikəi ree naasə ni i kéésənak. ⁴³ De' naas ɓam i keetə bilaa gəəkarə gwa'ak Nazaratak, ama Yeeso de'tə sa' Urusalima, do'ga mariya ulləi i me̱e̱pa. ⁴⁴ I og ni pu marirə te'ek, i ri'gə ubla muko i ogupa i ma' laaku zeewi naa uriyangirə te' ⁴⁵ De i ogupa, i gəə Ursalima sə i laau. ⁴⁶ Ublut taatə ar sə i kinu gwaaga Billəkrə te' ganmnarə naa lamiya gbi'kiyai, ke'si to' sə dedisi. ⁴⁷ Iya i geeuwai yas inni məsi nok me̱e̱kaa ullək naa ni baggənak. ̃ ⁴⁸ Do'ga mariya ulləi i ogu, məsəm kami i me̱e̱ ina i dookan pa. Sei maiya ulləz doosu bonge, ''Waz nok an sə a bo'see ri'ari ya? Mii naa Daa mooz epu laakarə.'' ⁴⁹ Iisi bonge, ''Nok an sə i laye ya? I me̱e̱ ara to̱o̱ N gagkpən mində Daarə gwa'ak paya?'' ⁵⁰ Ama i meegəs ina doosin pa. ⁵¹ I gəə Nazeret yam, koo bənaya duu ina i doosun ama maiya ulləz kam neta eti timlə. ⁵² Yeeso noo naa meeka naa daksər, kin kwe̱eka Billə naa marirə.