¹ Mari gənŋa i yaan biika netta pu yi'sintət ande te'et. ² Ni i esənaa puk diga ma'karə iya i og naa norai rə naa gəbən, seeniyai i kamtə pakkəi . ³ Okaa mikrə gə de' n wi'gəttəpu netti gbo'sirə gbo' diga ma'karə, go'gon n ka bisaa ni bo'rummunak, do̱o̱nza miiz Tiyofolos, ⁴ Sə a mee zəmaa neta i kubrusəna etirə. ⁵ Ru'a Hiridus pun gwantə yahudiyattə,Frissa Billəz uza pii i deru Zakariya ura pu gɓaara toriya Billəi Abiza rəirə, kiiza ullə Alisabatu, keetə zeewa tozza Billəz Haruna rəurə. ⁶ Ii ittəko yas i puna aibe Billə mu'pa, i duu dookaiya Billəi yas naa ina Bil doo bonge, na bo'rə zokan. ⁷ Ama i puna waspa, nok Alisabatu ku'mulli, gəbən gwani yas ido'gəsapu. ⁸ Ubla ukarə Zakariya pu tomsa ullə Firissəm rə nok ɓaara iili naa toms. ⁹ I təəgu naa billaa wooka woogəzzək, ni langsiya Firissei billə rəz pinnak, na tor gwaaga Billəkrə səna du'tə urdii. ¹⁰ Bansa mariya ei yas ipu goka, ipu weerək Billə bəlla pun du'kən urdirəllə. ¹¹ Sei malaika Billəz gbəsurə, de'narə pou naa ara i du'un urdiiyak. ¹² De Zakariya ogu, zəngs keesu sə sər kamu. ¹³ Ama malaika Billəz, doosu bonge, ''Sər kana kama pa Zakariya, Bil geesa pu weerəka mook, kiiza mooz Alisabatu dinsəka waz ya'aziz, i derku Yohaana. ¹⁴ A geek tingtum naa yaksa zok haa, gəbən mari gənŋa i geek tintum naa dinkaa ullək . ¹⁵ Noka ri'ik wazzi gakp maza gbi'zaz Daa Billə mu', i yi'suku naa Rumsa ookapas Billəz diga gwandə mairə baalə, kana bo' maama inabirə koo ina ta'as sə bo'rukunpa. ¹⁶ Uzi yetək mariya israilai gənŋa Daa Billa illə, ¹⁷ uzi assək Daa rə mu', kamkp toms naa Rumsa gbi'kəma pissə Iliyas. Kamtək gamnaa wessak dai naa yangirə te', yetək mari gənŋa iya i gee to' pai sə i yerə mariya wessai. Ri'erizi sə goptək mari sə i gau naa zo'ka nok Bil. kiiza miiz bən do'gəsapu. ¹⁸ Zakariya des tombaazi gee, bo'ok riga sə n mee minge ina an bo'rumkpa ri'ya? mii n do'gəsapu, kiiza miiz bən do'gəsapu. ¹⁹ Tombaazi iisu gee, miizi Zibiril'lu ura də' Billə mu'uz, sə Bil tomte mina zaa pak naa moo sə mina doosa dooma tingnumam. ²⁰ Noka ri'ik de a essə timr paka n doosa ekirə paa pa, a rəəsək, a le'ek pakpa sei ublaa neta n doo at bo'rumunnak bəlla Bil təəgənullə. ²¹ Mari ipu zo'ok Zakariyarə. Inni məsi nok lo'tən gwaaga Billəkrək. ²² De keetə le'pak naa iipa, yiirisi net naa na' sə i mee bonge Bil yiitupu una gwaaga gwandəkrə, sei yiigisi naa nat kotto le'pakpa. ²³ De ublaa ullə tomsək ɓam sei gəə gwa' ²⁴ De ru'a ei i ar, kiiza ulləz Alisabatu pe' baara wazzel, sums zura gwandəl seer gbanaaraə kee goo pa. Alisabatu doo bonge, ²⁵ ''Gwenən ina Daa Bil bo'rən po'epu ri'ak, sə ogse yirkuu sə pe'ese dəksa zur, marirə mu'.'' ²⁶ Seera bamrattə Bil tom malaika Zibirilu dəlla i der Nazerattallə buta Galilittə. ²⁷ Rekarə waa nuuza mee yaari pazzə, Mariyaamu ura Yusufu ke'luz, Yusufu keetə zeeuwa Dauda rəurə. ²⁸ Malaikazi zaa Mariyaamurə sə doosu gee, n de'sa moo a naa sə'səm Billə mu'uz, Daa Bil puna moo. ²⁹ Paka malaikazirək gbe' Mariyaamu baar, nok mee de'əkaa eki pa. ³⁰ Ama malaikazi doosu bonge, "Kaa sərəm pa, Mariyamu Bil ge̱e̱ pu tingnum naa moo. ³¹ Gwenum a pe'ek baara wazzəl sə a dingə waz ya'zəz, i də'əsku riir 'Yeeso.' ³² Gakp maza gbi'zaz, gəə i derku Waza Billəz ar koo neeya gbi'kəmrəz, Daa Bil esku teng gwansa domdaa ulləz Dauda rəz. ³³ Gakp gwanta ɓamkpa piipat, yangiya Yaakubu rəirə paa. Gə gwanta ullət ɓank pa.'' ³⁴ Mariyamu doosə malaikazi bonge, ina a doo eni bo'rumkpa rigaya? N meen yaara mazpa ak?'' ³⁵ Malaikaazi iisu bonge, "Rumsa Billəs tiitək moorə, gə gbi'kəma Daa Billa paaləm ko'suka, nok ri'ik wazza a dingkuz i derku maza punaa aibe paz, Waza Billəz. ³⁶ Gwenum Alisabatu zeeuwəza mooz do'gəma ulləmrə ma puna baar ser bamrə, ura i deru ku'muraz. ³⁷ Nok ina le' Bil bo'karən piipa. ³⁸ Mariyamu doosu bonge, mii senza kiizaz Daa Billəzzi, ina a doon na bo'rum ri' naa mii. Sei malaikaaz ezi ri'gə sə daau. ³⁹ Dennirə, Mariyamu bo'rə genum, sə ri'gə naa gbaku dəl ularə yiima Yahudaawai rəmrə, ⁴⁰ Ree tor Zakariyarə gwa' sə də'əs Alisabatu. ⁴¹ De Alisabatu ge̱e̱ də'səkaa Mariyamu rək, sei waza ullə baaləz lamə sə Rumsa Billəz tor ullə timlə. ⁴² Sei təg gwera paari sə doo bonge, moo kita kiiza naa sə'səmazzi, kita ki'rə te', gəə Bil sə'sapu waza moorə baaləz. ⁴³ Nok an sə maiya Daa Billa miiləz zaa miirə ya? ⁴⁴ Gwenum de n ge̱e̱ də'əskaa mook sei waza miirə baaləz lamə nok yaksa zok. ⁴⁵ Bən ura naa sə'səmazzi, ura esə timr bonge, ina Bil doon bo'rumkpan.'' ⁴⁶ Mariyamu doo bonge, ''Zəngsa miiz pu noosək Billə, ⁴⁷ gəbən rumsa miis puna yaksa zok, naa Bil Kweebaaza miiz. ⁴⁸ Nok sundə naa mii senza n kwén unapaz, diga ri'ak mari pat, i derke mii ura naa sə'səmaz. ⁴⁹ Nok ura naa noosəkazzi ura bo'sə neta gbi'tat. Nok riira ulləl pu noosəndəl. ⁵⁰ Ur Billa naa yirkulli iya i sərmuirə paa, diga ma'karə rekarə ɓamkarə, iya i noosəirə paa ⁵¹ Bo'rəsapu ina məsəmrən , faksapu iya i teǵ zurai naa sundumiya iiyai. ⁵² Tiisapu gwani təngwansa iisə. Ama sə tək mariya i tiis zurai. ⁵³ Esəpu iya naa zaamai neta wessat, ama nen iya naa na'ai na'kotto. ⁵⁴ Esəpu senza ulləz Israi'la, sə ina sundə sə ina yii yirku. ⁵⁵ (ni doosən do'ga mariya aarei yak bonge) ni gwan dossən Daa aaz Ibraahimrə naa yangiya ulləirə haa rekarə ɓapsarə.'' ⁵⁶ Mariyamu gau naa Alisabatu seer taatə, sə gəə gwandə gwa'. ⁵⁷ De zoora Alisabatu dingkən wazal rektə sei dingə waza ya'zaz. ⁵⁸ Mariya i gau ar mukəi naa zeeuwiya ulləi i ge̱e̱ ni Daa Bil bo'sunu go'numak i do̱'su yaksa zokrə. ⁵⁹ De wazzi reks ublut samsaara, mariya i zaa nakɓurəi gee, bo de'su riir ''Zakariya,'' ni Daa gwandəzzak. ⁶⁰ Ama maiya ulləz mu'us gee bo'rumkpa ri'pa, i derku Yohaana.'' ⁶¹ I doosu bonge, ''Uza pii iirə zeeurə naa riili pa.'' ⁶² Sə i riisə Daa ulləz naa na' səbo me̱e̱ riira i de'sək wazzil. ⁶³ Doosi bonge ina etubo ina bo biiskini paan, biisi riira ulləl Yohaana inni məs mari tele. ⁶⁴ Ni umkpa norak, sei su'a ullək gbe'rəm meela ulləl bins zok, sə ma'pak, pu noosək Billə. ⁶⁵ Ser zasə mariya ipu yammai, naa məsəm gə koo araya yiimma Yahudawai rəmrə, mari i doorə pagn nettirə paa. ⁶⁶ Iya i ge̱e̱ pakki i kam gwanirə timterə, i dedəs gee waza az gə na nootə gook rigaya, nok na'a Billəi ipu ullə paa. ⁶⁷ Daa ulləz Zakariya yi'is naa Rumsa Billəz sə ma' dooka ina bo'rumkpan bonge. ⁶⁸ Daa Billa Israilairəu na no̱o̱s zok, nok zaa ko̱o̱s mariya ulləi sə keesi. ⁶⁹ Təktəpu gulla kweekaal Kweebaazəl diga zeeuwa Dauda rəurə. ⁷⁰ Ni gwan doon anabawaiya ulləi rə su'rək iya ipu ookapai, diga do̱o̱ dook. ⁷¹ Gə keeskaa umkeereiya aarə diga gbama iya i iyaa pairə na'rə yas. ⁷² Doo bonge n bo'rəri sə n yii yirkuwa do'ga mariya aarəu, səna sundə naa doksəkaa ullək naa aibe pak. ⁷³ Ni gba'təmsən Daa aaz Ibrahim ak. ⁷⁴ Gee bo keeskaa nata umkeereiya aarəttə sə na noosbo naa serpa. ⁷⁵ Ana gau ookapa naa gəbən mariya na'a íí puna hakkei pai, sə a bo'rə net ni Bil iinak dellə te' yas. ⁷⁶ Yer wazzirə sə doosu bonge, waza miiz, moo boo i derka anabi a ura naa Gbi'kəmaz, nok a gakp ura assək Daarə mu'uz sə a go'rəs billutta ullət. ⁷⁷ N essək meeka, naa kinka keeska naa ra'səskaa hakkeiya íírək. ⁷⁸ Bo'rumkpa ri' nok daka yirkuwa aarə Daarəu, oosaa ar oonarək diga paari okək aarə pa sə po'aa, ⁷⁹ sə okek mariya i gau təgrarəi naa zenŋəya wərkrəi sə geesaa bilaa a gakpən wessa naa Billak.'' ⁸⁰ wazzi noo zokrə sə gau naa gbamma Rumsəm. Gau doolə roo haa sei de zoora ullə ma'an toms kaaka allə Israilallə.