¹ Ẹ tẹyẹ nọ ekwin, mẹ ẹda abẹ Osibina yọ eyi, nẹ fọ nọ iwukpe akọ ọ iyanpun na, ọnwọnwọn nẹnẹ Osibina aka ná na. Wọ utun oboro awọnẹ. ² Uma fọ iwu gbeli erọ ọnẹ, ama bile wo iwu ogugule ọsẹ wọ ọkan ṣi na owowo. Siye ọnẹ udidin ẹkẹna rọnmuro, awọ ọnẹna aka Osibina yọ ibopin. ³ Ese nẹ biya nẹmọ na uba, Ẹga anẹ anọ fenyan: Ume roro wọ iwu pọ ososi fọrẹ akọnẹ abọwọ ka e siye da na, ama, roro aka á yenron ėokarẹ ọṣen ororo akọ ọnawọ nẹnẹ Osibina ya nẹ nọ na. ⁴ Ubaka ti su ẹfa ororo iwukpe ọyẹrẹ, ámà ẹfa fenyan ọnẹbẹ beme siye utun ọyẹrẹ. ⁵ Orikpokpo ọyẹrẹ, atọ nẹnẹ tẹ yọ na iwukpe ọyẹrẹ ayẹ tẹ wa Ẹkraist, aka atọ fenyan ti mi fọn ma bẹn. ⁶ Ti su ọva oboro, ese nẹnẹ biya netọ na. Adaka oro ọbẹn yọ ọva awọ ẹsẹ ọga, nijọmọ eke siyẹ akọ nẹnẹ yọ ọnawọ siyw wana. ⁷ Adaka oro ọbẹn yọ ọva awọ osisiye oro ayẹ eki siye. Adaka oro ọbẹn su ọva ka eki te, jọmọ ekite. ⁸ Adaka oro ọbẹn yọ ọva awọ uba ogugwe eki siye oguba ayẹ. Adaka oro ọbẹn yọ ọva awa ka akẹ ve rẹ pẹn, eki siyẹ kibe kibe. Adaka oro ọbẹn yọ ọva awaka akẹ fo orikpokpo kẹ yẹn ne ro, oro ayẹ afọ ọ iwu fẹyan ki siye. Adaka oro ọbẹn yọ ọva awa ka, akẹ sọn meyi, oro ayẹ eki siyẹ akọ ẹbẹnbẹn. ⁹ Ni jọmọ unini ewa mọ emesu irekureku. Tebi ẹkẹna wọ odudu na, sẹ ọnẹ wọ oboro na dọn. ¹⁰ Nọ ọ ẹda abẹ unini, ni ni abẹ nẹga rọ ibe. Nọ ọ okuru nọ, ni kuru kẹ na bẹn. ¹¹ Nọ ọfẹpantasiye ni siye owọtan. Nọ ọ ẹfunwẹnfunwẹn, fọ iwu fẹyan ki ni yan. Nọ ọ Idu, siye okotl nẹ yan. ¹² Kẹ ben ọfanyẹnyẹrẹ, fọ iwu na erọnanyẹn. ¹³ Ruwa, ẹpẹn nẹ Osibina yọ ero ọnwọnwọn eni na. Ni orikpokpo ọyọyọ nẹnẹ we ke diye ki siyọ ésè na. ¹⁴ Siye okurubile nọ ẹnanẹ goli wu na, siye adura, ume ṣuwa adan. ¹⁵ Mọ ọ ẹnanẹ abẹn na kẹbẹn, mọ ọ ẹnanẹ eyi iwo na ki yi iwo. ¹⁶ Ni su ọkan ọyẹrẹ to abẹn. Ume roro ọkẹkẹrẹ ọrẹ, ama, na ẹnanẹ su ẹpan nọ tọtọ mẹ na. Ume ro ro ka awọ ebi ayẹn no gbigben fenyan. ¹⁷ Uma fọ odudu duna koro ọyẹrẹ. Ki siye ẹpẹn no boro ero fenyan ayẹn. ¹⁸ Esu osiye, wọ uba ama, ma aka alafia akọ ero fenyan. ¹⁹ Ni me ya ẹrọ nẹ niwu, me ro nẹnẹ ini na, fọ ọrẹ nọ ọ Osibina yọ ọkẹkan. Ubaka bẹ wọrẹ, "Uri-odududu wa mẹ ka, me ke duna, ẹgan Idu siye ga nẹ." ²⁰ Ama, "adaka awọn asẹ wọ ebero, fọ Ijen nẹyan. Ebi ọkọrẹ akẹ sẹya vẹ yọ ebi wa. Ubaka we siye ọnẹ, uwa ka kọ esuruku ẹ ẹra yẹrẹ yẹ ẹpan." ²¹ Ume ya ka ududu eri wu, ama ri odudu akọ oboro.