¹ su mi kpọ olivi ọọ̀rẹ yọ. ² Urorun firifiri e mi de pila fọn Etempili yọ, ero abe mi ni ya ṣa; e mi ma e e te ba. ³ Isikiraburo aka Efarisisiro abe ṣe iyaro ọben ṣa yẹ ẹfa, nẹnẹ bẹ sẹ ónọsẹ na. Bẹ sẹ ya jọmọ wọ etin. ⁴ Bẹ ga nẹ ya ka, "otitero, tẹ sẹ iyaro ọnẹ ónọsẹsẹ í yọ osisiye ẹbẹba. ⁵ Ububuru, Imose buru ya nẹ to ka tẹ gban nero ẹgan nọ ọtare wan: amá ẹna ọ ga a?" ⁶ Bẹ ga ọnẹ bi di bi a mẹ balẹ bi di gba ẹpẹn bẹlẹ yọ oṣen, ama Ijesu fuwuru e mi fọ yọ ẹbẹbẹrẹ a a wọrẹ ọwọra ije e siye akọ ayẹ a ma wọ ba na. ⁷ Ama ọgḅọna nẹnẹ bi ki e ṣin ya na, a kpanmiwu kpọ, e mi ga ne, ba ka, "Ẹfẹna nẹnẹ e me su iluwe í ni iwu na, a tayi gban yọ ọtarẹ." ⁸ Emi de fuwuru, wọrẹ ewọra wi ije. ⁹ Ogbona nẹnẹ bẹ wọ ọnẹ na, bi e ve yọ ọyẹrẹyọrẹ, tọmẹ kaba osudosuda abẹ yọ jen ne re abẹ nẹnẹ munurun na. Iyọ osẹpa bi mi tebi Ijesu ayarẹ, aka iyaro ayẹ wọ etin. ¹⁰ Ọgbọna Ijesu fura na, a ga ne ya ka, "iyaro ọnẹ, abẹ nẹnẹ fọwọ ṣa na o? E e me su kórò òóre nẹnẹ ṣen webe na a?" ¹¹ A ga ka, "Emesu kòró ọ́ọ̀re, Idu." Ijesu di na ga nẹ ya ka, ka amẹ i ma ṣẹn we ebe. kẹ yọ u me pila siye iluwe. ¹² Ijesu mi da ga nẹ ba ka, "Amẹ a wa ẹrọ ọọsọ nẹ ẹrọ; ẹfẹna nẹnẹ a a yẹrẹ mọ na èke jejen ésiri ibe, ama éke su ẹrọ ọọ̀so. ¹³ Ọnẹbẹ uùba Efarisiro abẹ ga nẹ ya ka, "We e sie ubedi nẹ wi iwu; wu ubedi a maikwa." ¹⁴ Ijesu gunowo e mi ga ne, ba ka, "A a da ka i sisi siye ubedi nẹ mi iwu, mọ ubedi wa ikwa eka. I din ẹfa nẹnẹ i we ṣa na, I di e din ẹfa nẹnẹ ma a yọna, amá ne e di nẹ ẹfa nẹnẹ i we ṣa na, aka ẹfa nẹnẹ ma a yọ na. ¹⁵ Nẹ yẹrẹ iwukpe ọrẹ a a ṣenẹ ẹkarẹ; i ma ṣẹn kórò ọ̀ọ́re ẹkarẹ. ¹⁶ Ama me e sisi sẹnẹkarẹ, mẹ ẹkarẹ ọsẹnsẹn wa ikwa ẹka, ubaka a ma wa ame, aya rẹ ya, ama amẹ.Ẹdẹda nẹnẹ file mu na. ¹⁷ Ni sisi wọrẹ ẹ wọ nọ ubururu ibe ka, ikwa a wa ero ebọrẹ ubedi nẹ. ¹⁸ Amẹ a wa ẹfẹna nẹnẹ siye ubedi nẹ mi iwu na, aka Ẹdẹda nẹnẹ file mu na siye ubedi nẹ mọ." ¹⁹ Ọnẹbẹ uùba bi mi ga nẹ ya ka, "Ẹta wẹ Ẹdeda ma na a?" Ijesu gunowo ka, "Ni me din mu, ka egan ni me din tẹ Ẹda; a a da ka i ni din mu, è ébana ni din ka tẹ Ẹda bile amẹ" ²⁰ Ẹga ẹnanẹ ayẹ Ijesu ga ọkpọrọ ẹfa nẹ, akọ e sie e e te Ẹ́tẹmpili ibe na, kórò ọ̀ọ́rẹ e me si ṣẹ ya, ubaka yẹ ẹwakati e e mi re. ²¹ Ọnẹbẹ uùba e mi di na ga nẹ ba ka, "Ma a yọ; nè éke ni mu, nè éke mi fo ni ilume ibe. Ẹfa nẹnẹ ma a yọ na, ne èke di ṣa." ²² Ọnẹbe uùba ijuro abẹ ga ka, Á áka nwan yi iwu họn? Yu uba a wọrẹ ka a ga ka, 'Ẹfa nẹnẹ ma a yọ na, ne èke di ṣa.' ²³ E mi ga nẹ ba ka, "Ewu ni we ṣa; ẹ ṣa kaba ososi ẹro ọnẹ ẹka nẹ wa; i ma wa ẹro ọnẹ ẹka. ²⁴ Ọnėbẹ uùba ayẹ i a ga nẹ nọ ka, Nè éke fo wọ ni iluwe ibe. Eme fura ka, i nẹ nawọ ka, AME YA, í nè éke fo wo ni iluwe íbe." ²⁵ Onobe uùba bẹ ga nẹ ya ka, Ẹra u kpoto wa a? Ijesu ga nẹ ba ka, "Ẹga ọ̀ọ́rọ́ọrẹ nẹnẹ ẹ tai ki ga ne nọ ọ́tọtọmẹ na. ²⁶ I su ẹga ọyọyọ nẹnẹ ma ka ga na aka nẹnẹ mà áka a ṣẹn nẹ ẹkarẹ yẹrẹ nẹ ẹpan na, unẹbẹ uba, ikwaro a wa ẹfẹna nẹnẹ file mu ṣa na, ẹkẹna nẹnẹ i ke wọ kaba yẹ ẹfa ṣa na, ẹnabẹ ẹ ga a nẹ ẹrọro nẹ. ²⁷ E me ye ba ka, Ẹdeda ẹga a a ga a nẹ ba bẹ nẹ́. ²⁸ Ọnẹbẹ uùba Ijesu ga nẹ ba ka, "Ọgbọna nẹnẹ na a kpan òròkòrò Oògben kpọ ke na, ọgba ọnẹbẹ ayẹ nè éke din ka, AMẸ A WA AYẸ nẹ aka ka e me su enaide nẹnẹ i sie na nẹ mi iwu, ama akọ tẹ Ẹda siye te mu na, i a ga ẹpẹn ẹnanẹ nẹ. ²⁹ Ẹfẹna nẹnẹ file mu na jọmọ gbeli mu, e me tebi mu wije, ubaka me e siye ẹkẹna nẹnẹ barẹ na ógba fenyan. ³⁰ Ako Ijesu siye a a ga ẹpẹn ẹnanẹ na, ero ọyọyọ na ẹ wọ. ³¹ Ijesu ga nẹ ijuro abẹ nẹnẹ na ẹ wọ ke na ka, "Ne e jọmọ wo mẹ ẹga ọgba ọnẹba ayẹ ka nẹ wa mo egbennurunmẹka ikwa ẹka nẹ; ³² ne éke din ni ikwa, ikwa ayẹ áka sẹ nọ ṣina ọfanro." ³³ Bi guna yo owo ka, "Abrahamu ibire oògben tẹ wa; ti ma wa ọvan ki isi ọọrẹ nẹ kórò ọ̀ọ́re gba; ga na we ke siye gẹ k, Wa ka sẹ to ṣina ofanro?" ³⁴ Ijesu guna bo wo ka, "Ikwa ẹka,ikwa ẹka, ayẹ ẹ ga nẹ nọ Ẹfẹnẹfẹna e luwe na, ayẹ a wa iluwe ọọ̀van nẹ. ³⁵ Ọvan a a ma nọ úbowo e fo mọ rẹ; ogben a da ma nọ úbowo fo mọ rẹ. ³⁶ Ọnẹbẹ uùba, ogben a a ṣe nọ ṣina ọfanro, í nè éke ṣina ọfanro égaba. ³⁷ I din ka Abrahamu ibire oògben ayẹ nẹ wa; amá ne e ni ọrẹ ka nẹ nwan mọ, ubaka mẹ ẹga a ma gba ẹfa ma í ni ibe. ³⁸ Ẹkẹna nẹnẹ ẹ gba i tẹ Ẹda ẹfa na ayẹ ma a ga, ka anọ e e sie ẹkẹna nẹnẹ ni ke gba i nẹ" ³⁹ Bi gunowo bẹ ga nẹ ya, "Aburahamu a wa rẹ da nẹ. Ijesu ga nẹ ba ka, A a da ka Aburahamu eègben nẹ wa, é ébana ni siye utun abẹ nẹnẹ Aburahamu siye na. ⁴⁰ Ama akana ne e ni ọrẹ nẹnẹ nà áka a nwan mọ na, ẹfẹna nẹnẹ ga ikwa nẹ nọ na, ọnẹ, nẹnẹ i ke wọ na Ósibina ẹfa Aburahamu e me siye ọnẹ. ⁴¹ Ni siye nẹ ẹdeda uùtun." Ḅẹ ga nẹ ya ka, "Bi ma ba tọ ónini ọọrẹ; ti su Edede ọọrẹ: nẹnẹ wa Ósibina na." ⁴² Ijesu ga nẹ ba ka, "A da ka Osibina a wa nẹ Ẹdeda, è ébana ni ni mẹ ẹga, ubaka Ẹdẹda ẹfa i we ṣa i mi ṣa; e me gbe ka ẹ ṣa nẹ mi iwu, amá ayẹ e file mu. ⁴³ Ẹna a wọrẹ nẹnẹ mẹ̀ ẹga e me ye nu a? ubaka ne e di a wọ mẹ ẹga a wọrẹ nẹ. ⁴⁴ Ẹsu nẹ ẹdẹdaẹka ayẹ ne e siye, nẹ ẹdeda osiye gbogbagbọgbanè éke siye. Ọwannoro aya wa kaba ọtọtọmẹ nẹ, eme di a jọmọ yẹrẹ ikwa ubaka e me su ikwa í yi ibe. Ogbọna nẹnẹ e e ki siye akpẹ na, kaba yi iwu ẹka e de we ga, ubaka akpẹro ya aka akpe wẹ ẹda. ⁴⁵ ka ẹga, ubaka ma a ga ikwu nẹ nọ, ni ma na mọ wọ. ⁴⁶ Ẹra í ni iwu a ṣẹn mọ iluwe ebe gba a? Ma a ke, ga ikwa ẹna e siye a nẹnẹ ni i ma na mọ wọ na? ⁴⁷ Ẹfẹna nẹnẹ wa Osibina ẹka na, à áka kẹ wọ Osibina ẹga; ọnẹ uùba a wọrẹ nẹnẹ ni i ma wọ nẹ, ubaka ni ma wa Osibina ẹka. ⁴⁸ Ijuro abẹ gunowo bẹ ga nẹ ya ka, Í ti i ma ga ẹ ẹgaba ka, Ẹsamariaro ayẹ ọ wa, aka ka u su Ẹsu ẹfwenfwen họn? ⁴⁹ "Ijesu gunowo ka, I me su Eṣu ẹfwẹnfwẹn, ama i kuru a a nọ tẹ Eda, anọ e me kuru nẹ mọ. ⁵⁰ I me ni amẹ ėbẹba ugbugbodi; oro ọbẹn wa mọ nẹnẹ e e ni ya na aka nẹnẹ a a sẹn nẹ ẹkarẹ na. ⁵¹ Ẹgaba, egaba ayẹ ẹ ga nẹ nọ, Ẹfẹna a a fọ mẹ ega sie utun na, a àka gba ufo otutun. ⁵² Ijuro abẹ ga nẹ ya ka, Akana ti din ka u su Eṣu ẹfwẹnfwẹn nẹ. Aburahamu aka ẹsẹro abe; u mi ga ka, Ẹfẹna a a fọ mọ ẹga siye utun na, a àka tọọre ufo balẹ otutun. ⁵³ Une gbodi fọrẹ Aburahamu tẹ ẹdẹda nẹnẹ fo na, họn? kọ ẹsẹro bi fo. Ẹra u roro ka ọ wa a? ⁵⁴ Ijesu gunowo ka, Me e ki kuru kẹ nẹ mi iwu, mo ugbogbodi e me gbe kenakide; tẹ Ẹda a wa ẹfẹna nẹnẹ kuru a a nẹ mọ na, ẹfẹna nẹnẹ nẹ ga ka Nọ Osibina a wa na. ⁵⁵ Ni me ke din ya, ama i din ya. Me e si ga ka, 'I me din ya,' i mè éke ṣina akpẹro aka anọ na. Ọnẹbẹ uba, amẹ i din ya, i di a fọ yẹ́ ẹga e e siye utun. ⁵⁶ Aburahamu nẹ ẹdẹda bẹn ka ayẹ gba mi isubu; a gbẹ ẹ e mi bẹn. ⁵⁷ Ijuro abẹ ga nẹ ya ka, "We ẹnyẹn e e mi re ibọrẹkakọrọfọ, gana u mi siye di gba Aburahamu a?" ⁵⁸ Ijesu ga nẹ ba ka, "Ẹgbaba, ẹgbada, ayẹ ẹ ga nẹ nọ, sana Aburahamu di e wamo, AMẸ I WAMỌ." ⁵⁹ Bi tiye ọtarẹ nẹnẹ ba ka gban ya na, ama Ijesu fọ yi iwu bẹbẹ e fura ẹfẹ nẹ bẹ e mi fọ mẹ etempili yọ.