¹ Ọgbona ẹkẹnẹnana ṣun na, Ijesu ṣun mẹ Égalili, ubaka e me ni ka ayẹ a fọn me Íjudia, ubaka Ijuro abẹ nẹnẹ be ni ọrẹ ka bẹ nwan ya nạ ² Ijuro abẹ ùgule nẹnẹ wa uturu ọṣẹsẹn turu a a ṣa. ³ Ọnẹbẹ uùba yẹ ẹda abẹ ga nẹ ya ka, fura ẹko yọ, umi yọ Ijudia, ka wo, egbenurumẹka abe e di gba utun abẹ nẹnẹ we e sie na. ⁴ Eme su ẹfẹna siẹ ẹpẹnkẹpẹn ébebe na, a da ka ayẹbẹba e ni ka bi din ya yẹ ógbanadala na. We e ki sie ẹpẹn ẹnanẹ, fọ wi iwu nyẹn ẹroro. ⁵ Kẹ ega, yẹ ọda abẹ e me si nẹẹ wọ. ⁶ Ijesu ọgba ọnẹbẹ ga nẹ ka, "Mọ ọgba e e mi re: ama nọ ọgbạ de wamọ ógba fenyan. ⁷ Ẹrọre abẹ e e di e goli nu, ama bi goli mu ubaka í sie ubedi ka yu utun wa odudu. ⁸ Nẹ kpọ yọ ejemẹ ayẹ akana; ubaka mọ ọgba e e mi re. ⁹ Ọgbọna nẹnẹ a ga ẹkẹnẹnanẹ nẹ ba ke na, e ki ma wọ Égalili. ¹⁰ Ámà ọgbọna nẹnẹ yẹ ẹda abẹ pọyọ ejemẹ ẹfa na, ọgba ọnẹbẹ ayẹ mi kpọ yọ ejeme, ayẹ nẹ, a ma wa ógbandala, àmá e jọmọ ẹ́bẹbẹ. ¹¹ Ijuro abẹ bi ye ni ya ejemẹ ọgba, bi ṣin ka "Eta a ma na a? ¹² Ihuhunu ọyọyọ mi wọ èròkòrò abẹ eètin í yu uba. Ero ẹbẹ ga ka,"Òròkòrò oboro ya." Ero ẹbẹ ga ka, "Hẹnhẹn,a wọrẹ ero abẹ a fọn mẹ ẹmẹ. ¹³ Ama e ma su ẹfẹna ga yẹ ẹga ógbandala na ubaka ijuro abẹ ọrọrẹ. ¹⁴ Ọgbọna nẹnẹ ejemẹ re etin ke na Ijesu kpọ yọ Ẹtempili, e mina e e te ero. ¹⁵ Ijuro abẹ mi jinowofuwa, bẹ gẹ ka, "Gana oforo one siye din nọ emumu ọnẹ ri je a a,esí na e gbe ka e me kpia okpikia na." ¹⁶ Ijesu guna ba owo, a ga ka, "mo ótite a ma wa mẹ ẹka efura ka ẹfẹna nẹnẹ file mu na ẹka. ¹⁷ E gbe ka e su ẹfẹnẹfẹna e e ni ka ayẹ e siye yi ibe-opin na, è ke din ótite ayẹ, a a da ka Osibina ẹka ya na, sa mi iwu ẹka ma a ga. ¹⁸ Ẹfẹna nẹnẹ a a ga yi iwu ẹka na e e ni ayẹ ẹbẹba ugbugbodi, ama ẹfẹna nẹnẹ e e ni ẹfẹna nẹnẹ file ẹ na ugbugbodi ayẹ a wa ikwaro, e me di e su ọnẹ nẹnẹ a a ma wa ọsẹrẹ na í yi ibe. ¹⁹ Me sei ka, Imose va nọ ububuru? e me di ne su kórò ọyẹrẹ ini iwu nẹnẹ fọ ububurub ayẹ siye utun na. Ena a wọrẹ nẹnẹ ni e ni ọrẹ ka nẹ nwan mọ na? ²⁰ Ero abe gunowo bi mi ga ka, "u su ẹfwenfwen no odudu Ẹra e ni ka ayẹ nwan wọ a? ²¹ Ijesu gunowo a ga ne ba ka, "utun ọọre ọgbogbọ ayẹ ẹ kara siye ne anọ fenyan jinowo-fuwa. ²² Imose fọ ọ ẹfọọsẹ nẹno (a ma wa ubaka Imose ẹka ya nẹ, amá ededa abẹ ẹka), ọnẹbẹ uùba ni da fọọsẹ oro emu na nẹnẹ wọ ẹyẹ-ofile, iìsubu na. ²³ A a da ka bi da fọọse oro ẹyẹ-ofile iìsubu, ubaka ni ma file, fọn Imose ububuru, ẹna e mi ẉorẹ nẹnẹ ni a kaniwu e to mu na, ubaka ẹ fo oro ọọre iwu siye kaara ẹ́yẹ-ofile iìsubu?. ²⁴ Ni ma yẹrẹ anyẹnrọn uba ṣe nẹkarẹ amá nẹ kẹ ṣenọ ọsẹrẹ ẹkarẹ ²⁵ Ọgba ọnẹbẹ ayẹ ero ẹbẹn nẹnẹ wa Ijerusalemuro na ga ka, Ẹfẹna nẹnẹ be ni ka bẹ nwan na amá ayẹ a wa ọnẹ ẹ? ²⁶ Wagbẹẹ, a a ga ẹga ógbandala, bi me sisi ga kẹnakide to ẹ. Eé dina da ka ẹnanẹ wa Épan na be, na din egaba ka, ọnẹ e kpoto wa onorofan ayẹ họ? ²⁷ Ama ti din ẹfa nẹnẹ oforo ayẹ we ṣa na, Ama ọgbọna nẹnẹ Ikristi ayẹ a ṣa na, e me su ẹfẹna nẹnẹ éke din ẹfa nẹnẹ ebwe ṣa na. ²⁸ Ọgba ọnẹbẹ ayẹ Ijesu yi ọga Ẹtempili ibe akọ e siye e e te ero na ka, Ni din mu, ni di e din ẹfa nene i we ṣa na, i ma ṣa ne mi iwu, ama ikuwaro a wa ẹfẹna nẹnẹ file mu na, ama ni me din ya. ²⁹ Ama i din ya, ubaka yẹ ẹfa i we ṣa aye e sisi file mu. ³⁰ Ọnẹbẹ uùba bi e ni ọrẹ ka bẹ sẹ ya, ama e me su kórò ọ̀ọ́re nẹnẹ di fọ uba de, ya na, ubaka yọ ewakati e e mi re. ³¹ Ama ọyọyọ ígule ayẹ nẹ wọ bẹ ga ka, ọgbọna nẹnẹ Ikristi ayẹ áka ṣa na, è éke di siye ojinorowofuwa nẹnẹ fọrẹ ọnẹ oforo ọnẹ siye na hon? ³² Efarisiro abẹ wọ ka, ero abẹ e e huhunu ẹ́ga ẹnanẹ yẹrẹ Ijesu ẹpan, Efarisiro abẹ aka alufaa ẹpan abẹ mi file utunro abe yọ ka bẹ sẹ ya. ³³ Ọnẹbẹ uùba Ijesu ga ne, ba ka, nọ ọgbo keke ayẹ i e wo ne etin, mè éke mi yo, ẹfẹna nẹnẹ file mu na eèfa. ³⁴ Nè éke ni mu ama na aka gba mọ; ẹfẹ na nẹnẹ ma yọ nà éke di sa. ³⁵ Ọnẹbẹ uùba ayẹ ijuro abẹ we ma abẹn a a ga ẹ ka, "Eta oforo ọnẹ éke mi yọ a, nẹnẹ tẹ̀ éke di gbẹ ẹ na? Á áka yọ Igirikiro abẹ nẹnẹ panwara na eètin, e mi ki te ba họn? ³⁶ Ẹga ọla ọọna a a ga ọnẹ a, Nè éke ni mu, na àka gba mọ, aka ẹfẹna nẹnẹ me yọ na, ne eke di ṣa? ³⁷ Isubu omunuru, nẹnẹ wa ejemẹ ayẹ iisubu ọkẹka na,Ijesu jọmọ e yi ọga, ka, "E e su ẹfẹnẹfẹna ebi ọkọre a a se na, e ni mu ṣa, a wa. ³⁸ Ẹfẹna a a na mọ wọ na, kpẹnẹkpẹnẹ akọ bi siye wọrẹ wọ emumu ọnwọnwọn ọnẹ be na, ka kaba yi ibe ayẹ ẹrọ oògbolo ebi éke we ra ve kẹ ṣa nẹ." ³⁹ Amá a a ga ọnẹ yẹrẹ Ẹfwenfwen ọnwọnwọn nọ orẹ, ubaka be e mi sẹ Ijesu ṣina ugbugbodiro. ⁴⁰ Ọgbọna nẹnẹ ero ọyọyọ wọ ẹga ọnẹ na, be, ga ka, "Ẹgaba ọnẹ e kpoto wa ẹsẹro ayẹ nẹ." ⁴¹ Ero ẹbẹn ga ka, ọnẹ e kpoto wa Ikristi nẹ. Ama ero ẹbẹn ga ka, Egalili ayẹ Kristi éke we ṣa họn? ⁴² Ámá emumu ọnwonwọn ga ẹ ka, Ikristi éke wọ Edafidi ubanẹ ọọre ṣa aka Ẹbẹtilẹhẹmu, iken nẹnẹ Edafidi we ṣa na na? ⁴³ Ẹgan nẹ oruruwa sie wobe etin nẹ ubana ayẹ. ⁴⁴ Ero ẹbẹn í bi iwu e e ni ka bẹ sẹ ya, ama e me su ẹfẹna fọ uba dẹ ya na. ⁴⁵ Ọnẹbẹ uùba utunro abẹ pila ni Efarisiro aka Asigiri eẹ́pa abe ṣa, bi mi ga nẹ ba ka, "Ena a wọrẹ nẹnẹ ni i ma sẹ ya ṣa na? " ⁴⁶ Utunro abẹ gunowo ka, E me su ẹfẹna nẹnẹ ga ẹga aka oforo ọnẹ gba. ⁴⁷ Ọnẹba uùba Efarisiro abẹ guna bo wo ka, "Í bẹ wọrẹ ka anọ je họn? ⁴⁸ É su oro ọọre ẹ́kẹkaro abẹ iiwu, sa Ẹfarisiro abẹ nẹnẹ na ẹ wọ na hoṇ? ⁴⁹ Ama ero ọyọyọ enanẹ, nẹnẹ e e me din ububuru na, ṣina adanro ke. ⁵⁰ Inikodemosi (ọọ́re Eparisiro abe na, nẹnẹ nene to yi nọ Ijesu ṣa na) ga nẹ ba ka, ⁵¹ Í tọ ububuru da kẹ ṣen noro ẹkanẹ ṣana e di kẹ din ẹkẹna nẹnẹ e sie na họn? ⁵² Bi gunowo bẹ ga nẹ ya ka, Egalatiyaro ka awọ wa họn? Pila ẹ ẹ balẹ ka eme su ẹsẹro kọ́ọrọ́ọrẹ nẹnẹ nẹnẹ wo Egalili kpan fura na. ⁵³ Ororo mi fura a yọ yu ubowo.