¹ Ẹpẹn ẹnanẹ uruuba, Ijesu sun wo Egalili oòkun ọòṣun, nẹnẹ wa Itiberiasi oòkun na. ² Ẹròkòrò marii mi yere ya ùrun, ubaka be gba yu utun ojinorowofuwa, nene e sie igunro abẹ iiwu na. ³ Ijesu mi kpọ ọrẹ osi yọ, efa ọnẹbẹ ayẹ a ma bile ye egbenurunmẹka abe ne. ⁴ (Ofuruṣun eèjeme, ijuro abe iimu, mi turu a a ṣa. ⁵ Ọgbọna nẹnẹ Ijesu mi kpan ya anyẹn kpọ na, nẹnẹ a gba èròkòrò marii nenẹ sa ẹfa na, a ga nẹ Ifilipi ka, "Eta tidi e we nyin ẹkara a, ero enanẹ e di jijen? ⁶ A ga ọnẹ ka ayi ya mọ Ifilipi balẹ, ubaka ayẹ ẹbẹba din ẹkẹna nẹnẹ aye éke sie na. ⁷ Ifilipi guna yo owo ka, Ẹkara nẹnẹ re ẹpẹni ẹparẹ ėka na e me go ba, ororo e sisi tie ẹ tenyintenyi. ⁸ Ọọrẹ i ye egbenurunmẹka abe iiwu, Anduru, Isimoni, Ipita ọọ̀da ga ne ya ka, ⁹ Ogbenoforo ọbẹn wo ekọ nẹnẹ su ebali ẹkara ọbọwọ upi na, aka ayẹrẹ ikeke ẹbọrẹ: ama ẹna be wa èròkòrò marii ẹnane eétin a? ¹⁰ Ijesu mi ga ka, "Ni tebi ka ero abẹ ama." Ẹmẹn ọyọyọ wo ẹfa onẹbẹ. Egan iforo abẹ sie ma ne ero aka ẹsẹn ọrẹ upi na. ¹¹ Ijesu mi tie ėkara ọbọwọ abẹ; ogbona nẹnẹ a gan ẹba ke na e ruwa ba nọ ye egbenurunmeka abi mi ruwe ba ne ero abẹ nẹnẹ ma na; kpẹnẹkpẹnẹ ka egan a wa na. ¹² Ọgbọna nẹnẹ bi fe ke na, a ga nẹ ye egbenurunmẹka abẹ ka, "Ne kọ ọnẹ nẹnẹ ku jese, eme su ọnẹnẹ ya na. ¹³ Ẹgan bi sie ko ka jese nẹ, iwuruwuru nẹnẹ be gba fura ebali ẹkara ọbọwọ upi aye na fe ugi ẹfọkẹbọre nẹnẹ ero abẹ nẹnẹ je na bwa wuje. ¹⁴ Ọnẹbe uuba ọgbọna nẹne abẹ utun ojinorowofuwa nẹnẹ Ijesu sie ke na, be ga ka, Ẹgaba ọnẹ a wa ẹsẹro aye nẹnẹ a a ṣa ẹ́rọ na. ¹⁵ Ọgbọna nẹnẹ Ijesu mi fọ́ íroro balẹ ya ka, bà áka ṣa fọ iwogbigben ṣe áyẹ̀ je obin na, e mi de pila yọ ọrẹ osi ayẹ arẹ. ¹⁶ Ọgbọna iyi bẹrẹ na, ye egbenurunmẹka abẹ wale yọ òkun. ¹⁷ Bi mi fọn ọkọ̀ ibe, bi mi yẹrẹ òkun san ya a a yọ Ẹkapanaumu. Esiri ta ke, Ijesu e e mi kẹ ṣa bẹ ẹfa. ¹⁸ Okun mina a a fa ubaka eperi nẹnẹ gbe nẹda e e wura. ¹⁹ Ọgba nẹnẹ bi turu re ẹpẹn ako ẹfọlọngi ọgbọlọketupi sa ọgbọlọkakọrọfọ,be gba Ijesu ka e e jenjen okun okun osi, e turu e e to ọkọ̀; ọrọrẹ mi sọn ba. ²⁰ Ama a ga ne ba, "Ame ya, ni ma sọnmọrọrẹ. ²¹ Onebe uùba bẹ fọ ẹbẹbẹn nẹ ẹ wo ọkọ̀ ibe: Iganigan ọkọ aye re ije nẹnẹ ba a yo na. ²² Isubu ọọboro ọgbọna nẹnẹ ero abẹ nenẹ wo òkun oòsun gba ka, e me su ọkọ ọbẹn ẹ́fẹnẹbẹ na, a a ma da ọnẹ nẹnẹ ye egbenurunmẹka abayẹrẹ ayọ. ²³ (Ama ọkọ̀ ẹbẹn wo kaba Itiberiasi, ẹfa nẹnẹ idu gan ẹba ke na uurunba). ²⁴ Ọnẹbe uùba ọgbọna nẹnẹ ero abe gbaka, Ijesu e me wo efa ọnẹbẹ, sa ye egbenurunmẹka abẹ, ka abẹ ẹbẹba fọn ọkọ̀ yọ Ekapanaumu, bi e ni Ijesu. ²⁵ Ọgbọna nẹnẹ bẹ gba e òkun oòṣun na bẹ ga ne ya ka, "Erabi, ọgba ọọna u a sa ẹkọnẹ a?" ²⁶ Ijesu guna bo owo a ga ka, "Egaba, egaba, ayẹ e ga nẹ nọ Ne eni mu, a ma wa ubaka nẹ gba utun ejinorowofuwa abe, ama ubaka nẹ tan ẹkara ọbọwọ ẹnanẹ, emi fiye nu. ²⁷ Ni me sie okoto ni ijen nẹnẹ de funa, ama ni ijen nẹnẹ de wamọ jen ere ẹro nẹnẹ eme su ọta na, nẹnẹ òròkòrò oògben áka a nẹ no na: ubaka ayẹ a wa ayẹ nẹ ẹka nẹnẹ Ẹdẹda do iduru na. ²⁸ Ọgba ọnẹba ayẹ bẹ ga nẹ ya ka, "Ẹna tè éke sie a, ti di sie Osibina uùtun?" ²⁹ Ijesu gunowo a ga nẹ ba ka, "Ọnẹ a wa Osibina uùtun ne ka nẹ na ẹfẹna nẹnẹ e file na wọ. ³⁰ Ogba ọnẹbẹ ayẹ be ga nẹ ya ka, "Okpikpeli oọna wà áka a a nyẹn tọ a, nẹnẹ ti di abẹ na, tẹ na o wọ? Utun ọọna we e siea? ³¹ Tẹ ẹdẹda abe tan ẹmana ọ́dan kpẹnẹkpẹnẹ ako bi sie wore ya na ka, 'A fo ijen ne ba je kaba ososi." ³² Ogba ọnọbẹ ayẹ Ijesu ga ne ba ka, "Egaba, egaba aye e ga ne nọ, A ma wa Imosisi a va nẹ ẹkara kaba ososi nẹ, ama te Ẹda a va nẹ ekara ikua ẹka kaba ososi nẹ. ³³ Ubaka Osibina ijen a wa ẹfẹna nẹnẹ holo sa kaba ososi na, nẹnẹ mi fọ ẹrọ nẹnẹ mi fọ ẹrọ nẹ ẹrọro. ³⁴ Ogba ọnọbe ayẹ be ga ne ya ka, "Idu, ke va to ijen ọnẹ ọgba feyan. ³⁵ Ijesu mi ga nẹ ba ka, "Amẹ a wa ẹkaro ero eka nẹ: efẹnẹfẹna e e ni mu ṣa na anwọn àka ṣe ya; efena nẹnẹ e e mi na mọ wọ na, ebi ọkọrẹ èke pila se ya. ³⁶ Ama ẹ ga ne nọ ka, Ne gba mọ ke, ni me sisi nawọ. ³⁷ Ẹpẹn fenyan nẹnẹ Ededa a a ne mọ na, è éke ni mu sa; ẹfẹna nẹnẹ e e mi ni mu ṣa na, mà áka ta ẹ ve, aka akọ eke sie da na. ³⁸ Ubaka i holo ṣa kaba ososi, ama wa ka i ki sìe ame ẹbẹba ibe-opin. ³⁹ Ọnẹ e kpoto wa Ẹdẹda nene file mu na iibe-opin ne ka ẹpẹn fenyan nẹnẹ a a ne mọ na, i ma nẹ kọ́ọrọ́ọre fuwa amọ, ama ka idi soma ba paleṣa isubu omunurun. ⁴⁰ Ọnẹ wa Teda yọ iibe-opin ka ẹfẹna agba ogben, nene mi na ẹ wo na, e di su ẹrọ nẹnẹ e e me su ota na: mè éke mi soma ẹ palẹsa isubu omunurun. ⁴¹ Ogba ọnẹbẹ ayẹ ijuro abẹ e huhunu e to ẹ, ubaka a ga ka, "Ame a wa ijen nẹnẹ holo ṣa kaba ososi nẹ." ⁴² Bi mi ga ka, "Ámá Ijesu e kpoto wa ọnẹ ẹ, Ijosẹfu oògben, ẹfẹna nẹnẹ ti din wẹ ẹda aka wi iya na? Gana e mi sie di ga ka, "I holo ṣa kaba ososi a?" ⁴³ Ọ́nẹbẹ uùba Ijesu mi gunowo, aga ne ba ka, "Ni me huhunu ábẹn eètin. ⁴⁴ E me su ẹfẹnẹfẹna di a ṣa mẹ ẹfa na, a a ma da ka tẹ Ẹdẹda nẹnẹ file mu na e uuna ẹ mè éke mi soma ẹ paleṣa isubu omunurun. ⁴⁵ Be wore wo ẹsẹro abẹ ibe ka, Bè éke te ba fenyan kaba Osibina ẹfa ṣa. Ọnẹbẹ uùba ẹfẹna a a wọ ke na, nẹnẹ bi̇ di e te kaba Ẹdẹda efa ṣa na, ayẹ e ni mu a a ṣa nẹ. ⁴⁶ E me gbe ka e su oro nẹnẹ gba Ẹdẹda gba na, a a ma da ka ẹfẹna nẹnẹ sa kaba Ẹdẹda ẹfa na - ayẹ a gba Ẹdẹda gba. ⁴⁷ Ẹgaba, ẹgaba ayẹ ẹ ga nẹ nọ, Ẹfẹna nẹnẹ a a na mọ wọ na, e su ẹrọ nẹnẹ e mé su ọta na. ⁴⁸ Amẹ a wa ẹrọ ekara nẹ. ⁴⁹ Nẹ ẹdẹda abẹ tan ẹmana ọ́dan, ama bi ke fo. ⁵⁰ Ọnẹ a wa ẹkara nẹnẹ holo ṣa kaba ososi nẹ, nẹnẹ oro di a tan amọ nẹnẹ èke di fo na. ⁵¹ Amẹ a wo ẹrọ ẹkara ọnẹbẹ nẹnẹ holo ṣa kaba osisi nẹ, e e su ẹfẹna a a tan ẹ́kara ọnẹ iiwu na, è èke wo ẹrọ otutunmotutun: ijen ayẹ nẹnẹ mà àka a nẹ ya na wa mi iwu,nẹ ẹ̀rọro ẹ̀ẹ̀rọ. ⁵² Ọ́nẹba uùba ayẹ ijuro bẹ kan niwu e eto abẹn, bi di e su ọsakata ábẹn eétin nẹ, ka, "Gana oforo ọnẹ éke sie va tọ yi iwu tan a?" ⁵³ Ọgba ọnẹbẹ ayẹ Ijesu ga nẹ ba ka, "Ẹgaba, ẹgaba ayẹ ẹ ga nẹ nọ, A a ma da ka i nẹ tan òròkòrò Oògben iiwu,aka ka nẹ wa yẹ ẹnyọn, ni me su ẹrọ wo ni ibe. ⁵⁴ Ẹfẹnẹfẹna a a tan mi iwu pe, nẹnẹ di a wa mẹ ẹnyọn na, e su ẹrọ nẹnẹ e e me su ọta na; mà áka sọmẹ palẹsa isubu omunurun. ⁵⁵ Ubaka mi iwu wa ijen ẹgaba, aka mẹ ẹnyọn ẹpẹn ọwẹwa ẹgaba. ⁵⁶ Ẹfẹna nẹnẹ a a tan mi iwu, nẹnẹ di a wa mẹ ẹnyọn na, a a ma wo mi ibe, ka amẹ a a ma wo yi ibe. ⁵⁷ Kpẹnẹkpẹnẹ akọ ẹrọ Ẹdẹda sie file mu na, nẹnẹ ẹ wa ẹrọro Ẹdeda ọọrẹ na; ka ẹgan a wa ẹfẹna nẹnẹ a a tan mọ na, ka ayẹ áka wa ẹrọro i mọ ọọrẹ. ⁵⁸ Ọnẹ a wa ẹkara ayẹ nẹnẹ holo ṣa kaba ososi nẹ: a ma wa akọ nẹ ẹdẹda abẹ sie tan enana, nene bi fo na. Ẹfẹna nẹnẹ a a tan ẹkara ayẹ na, è èke wo ẹrọ otuntunmotuntun. ⁵⁹ Ijesu a ga ẹga ẹnanẹ isinagogu ọgbọna e ete Ẹ́kapanaumu na. ⁶⁰ Ọ gba ọnẹbẹ yọ igbenurunmeka ọyọyọ nẹnẹ wọ na ka a, "Ẹga nẹnẹ numa na a wa ọnẹ ẹra e di a wọ ya a?" ⁶¹ Ọgbona nẹnẹ Ijesu din i yi ibe ka, ye egbenurunmẹka abẹ e e huhunu ẹga ayẹ na, a ga nẹ ba ka, "ọnẹ sẹ ni wu họn? ⁶² A a da ka nẹ gba òròkòrò Oogben ka a a kpo yọ ẹfẹna nẹnẹ a tayẹ ma na? ⁶³ Ẹfuẹnfuẹn a da sẹ oro ṣina ẹrọ nẹ; iwupe e me su ẹkẹrẹ kọ ọro yẹrẹ; ẹga nẹnẹ ẹ ga nẹ nọ na, ẹfuẹnfuen bẹ wa, ẹrọ bi di ya wa. ⁶⁴ "Ama ero ẹbẹn wo ine e tin nẹnẹ a a ma nawọ na." Ubaka Ijesu din kaba ọtọtọmẹ sa ero abẹ nẹnẹ ama nẹ yayẹ wọ na, aka ẹfẹna nẹnẹ áka fọ áyẹ̀ nyẹn na. ⁶⁵ A gẹ ẹ ka "Ọnẹ a wọrẹ ẹ ganẹ nọ ka, e me su ẹfẹna nẹnẹ di e ni mu a ṣa na, a a ma da ka i bi ya ibe ya nẹ ya kaba yẹ Ẹda ẹfa ṣa." ⁶⁶ Ọnẹ uba ye egbenurunmẹka ọyọyọ yọ, be me pila mẹ jenjen. ⁶⁷ Ijesu a ga nọ abẹ ẹfọkẹbọrẹ ka, "I ka anọ e e nika ni pila họn?" ⁶⁸ Isimoni Ipita gun nẹ yowo "Idu, ẹra ẹfa tà áka yọ a? Awọ e su ẹga abẹ nẹnẹ wa ẹrọ nẹnẹ e e me su ọta ẹka na, ⁶⁹ Tẹ nawọ, ti di e din ka, awo a wa onọrofan ayẹ nẹ, Osibina ẹroro Oogben. ⁷⁰ Ijesu a gana ba "Ama anọ ẹfọkebọrẹ ite ẹ ọyẹrẹ i ni iwu e e me ṣina eṣe ke e?" ⁷¹ A a ga Ijudasi Isikariot, Isimoni oògben ẹka, ubaka ayẹ awa ọyẹrẹ ábẹ̀ ẹfọkẹbọrẹ iiwu nẹnẹ áka fọ ọ Ijesu yẹn na.