¹ One urumba esu ijuro imu, Ijesu kpọ yọ Ijerusalemu. ² Ukpolonmebi ọbẹn wo Ijerusalẹmu ududo eji owo nẹnẹ be e ye Ebẹtẹsaida iniburu ẹ ẹlarẹ na nẹnẹ su ọlọrẹ upi na. ³ Ero ọyọyọ nẹnẹ biwu emesie na openayẹn, ofuọsẹ aka enanẹ ediye jenjen na bi buwe wije akarẹ ebi ayẹ ọbọrọ. ⁴ Ubaka, Osibina yọ ọ Angẹli ẹde holo fọnada bọwọ ebi ayẹ. Efẹnẹfẹna a tai ṣuwa wọ ebi ayẹ na, yọ iwu da gan fura igunkigun nẹnẹ ẹ e yan na. ⁵ Oforo ọbẹn wo ẹfẹnẹ nẹnẹ e e nyan nẹ ẹnyẹn ogbọlọkạfọrọfọketunọkọnọkọnọ na. ⁶ Ako Ijesu sie gbe ka ayọre bwe wije na, edin ka efo ako nẹne ewe wo ọ ẹfebẹna, agan nẹya ka "Uwe e nika wọ iwu a gan hon?" ⁷ Oforo nenẹ e e nyan na guna yo owu ka, E'daro, íma gba oro nẹnẹ, ébana a fọ mọ wo ukpolonmebi ayẹ ibe, ọgbọna nẹnẹ ba bọwọ ebi ayẹ ma: ogba nẹnẹ ma a ke kọ ẹsa wuje na, oro ọbẹn da yọ mẹ ẹrẹn fon ya. ⁸ Ijesu ga nẹya ka, kpan fura, kpan wọ ọlọrẹ, u mi ki jejen. ⁹ Iganigan a fọ oforo ayẹ iìwu gan, e mi kpan yọ ọlọrẹ e e jenjen. Isubu ọ̀ọ́rọ́ọrẹ ayẹ a wa ẹye-ofile iisubu ne. ¹⁰ Ọnẹbẹ uùba Ijuro abẹ ga nẹ oforo nẹnẹ bẹ fọ yi iwu gan na ka, Ẹyẹ-ofile iisubu a wa ọnẹ: ububuru ama fọ uba wamọ ka ọ kpan wọ ọlọrẹ. ¹¹ E gana bo owo ka, Ẹfẹna fọ mi iwu gan na, aye óóróorẹ a ga ne mọ ka, kpan wọ dọrẹ, u mi ki jejen. ¹² Bi ṣin ya ka, oforo ọ ọna a ga nẹ ọ ka "kpen wọ ọlọrẹ u mi jejen a? ¹³ Ẹfẹna nene be fọ yi iwu gan na eme din ẹfena nene awa na ubaka Ijesu fura ẹfa ọnẹtẹ ke, ubaka ero ọyọyọ wọ ẹfa ọnẹbẹ ¹⁴ Íyu urumba Ijesu gba ẹ Etempili ibe emi ga ne ya ka "Ọgbẹ, bẹ fọ wi iwu gan, ume pile luwe, kadakada ka ẹpen na wa odudu fọrẹ ọnẹ na e me di to wu. ¹⁵ Oforo ayẹ yọ e mi ga nẹ Ijuro abẹ ka, Ijesu abwa ẹfẹna nenẹ fọ yayẹ iwu gan na. ¹⁶ Ẹga ọnẹ uùba a wọrẹ nẹnẹ ijuro abe mina a a kọ eto Ijesu nẹ, bie ni orẹ nene bà áka a nwan ya na, ubaka esie ẹpẹn ẹnanẹ ẹyẹ-ofile iisubu. ¹⁷ Ama Ijesu guna bo owo ka, "Te Eda e e sie utuu ṣa re akana, ka ame e e sie utun. ¹⁸ Ọnẹ uùba aye Ijuro abe mina e ni ọre nẹnẹ bà áka a nwan ya na, e me gbe ka ubaka e be eye-ofile iisubu fuwa ayẹ arẹ, ama ubaka a ga ẹ bile amọ ka, yẹ Ẹdẹda a wa Osibina ṣina ọpa. ¹⁹ Ọgba ọnẹbẹ ayẹ Ijesu guna bowo, a ga neba ka, Ẹgaba, Ẹgaba ayẹ ẹga nẹ nọ, Ogben e edie sie kẹnakide nẹ yi iwu, a ma da ẹkẹna nẹnẹ a a gba ka Ẹdẹda e e sie na: ubaka ẹpẹnkẹpẹnẹ ka ẹnabẹ ayẹ Ogben de sie nạ. ²⁰ Ubaka Ẹdeda ni Ogben ẹga, a da fo ẹpen fenyan nẹnẹ ayẹ ebeba e e ki sie na nyẹn ya: à àka da fọ utun nẹne gbodi f̣ora ọnẹ na nyẹn ya, e din jin no owo fuwa. ²¹ Kpẹnẹkpẹnẹ akọ Ẹdẹda de sie soma eekporo palẹṣa na, nẹnẹ e de mi sẹ ba ṣina erọro na: ka ẹgan Ogben de sie sẹ ero nẹnẹ e e ni na ṣina erọro nẹ. ²² Ubaka Ẹdeda ama ṣẹn kórò ọ̀ọ́rẹ ekarẹ, ama a fọ ẹkarẹ ọṣẹṣẹn fenyan, dọn Ogben uùba ke. ²³ Ero fẹnyan edi ki kuru no Ogben kpẹnẹkpẹnẹ akọ bi de sie kẹ nẹ Ẹdeda na. Ẹfẹna nẹnẹ eme kuru no Ogben na eme kuru nọ Ededa nẹnẹ file ya na. ²⁴ Egaba Ẹgaba ayẹ ẹ ga nẹ nọ ẹfẹnẹfẹna wọ mẹga ediya nọ ọ Efene nẹnẹ file mu ṣa na eke su ẹrọ ne me su ọta na, a àka ṣen fọn ẹkarẹ ọṣẹnṣẹn ibe; ama a gbala fura ufo fọn ẹrọ ibe ke. ²⁵ Ẹgaba, Egaba ayẹ ẹga, ogba aṣa ogba ayẹ edina wọnẹ, nẹnẹ eekporo abẹ áka wo Osibina Oògben oóhunna: ero abẹ nẹnẹ a a wo ya na éke wo ẹrọ. ²⁶ Ubaka kpẹnẹkpẹn akọ Ẹdẹda sie su ẹro áyẹ̀ ẹbẹba ibe na,kpẹnẹkpẹnẹ ka egan e sie tebi no Ogben ka e su ẹrọ áyè ẹbẹba ibe nẹ. ²⁷ E di a va e iburu ka a kẹ ṣẹn ẹkarẹ, ubaka a wa òfòkòrò oògben. ²⁸ Ni me ya ka Ọnẹ e jin nọ owo fuwa,ubaka ogba ayẹ a a sa, ọnẹ nẹnẹ ero fẹnyan nẹnẹ e wo ọ́sọ ibe na áka wo yo ohun. ²⁹ Bè éke mi ve ṣa: abẹ nẹnẹ sie oboro na, wo ọsọmapalẹsa ẹkarẹ ọsenṣen ẹka. ³⁰ Me edi e sie kenakide ne mi iwu: ako i sie a wo na, ayẹ i da ṣẹn ẹkarẹ nẹ: ikua a wa me ẹkare oṣẹsẹn nẹ; ubaka i me ni amẹ ẹbẹba ibe-opin, a ma da ka Ẹdẹda nẹnẹ file mu na ẹka. ³¹ Me e ki sie ubedin nẹ mi iwu, mu ubedin a ma wa inua eka. ³² Oro ọbẹn a wa ẹfẹna nẹnẹ e e sie ubedin nemọ; ide din ka, ikua a wa mu ubedin nẹnẹ esie na. ³³ Ni file yọ Ẹjọọna ẹfa ke, e sie ubedin ni ikua ke. ³⁴ Ama i ma na ubedin fura òròkòro uùba: ama ẹkẹnẹnanẹ ma a ga nẹ, kadakada ka ni di fan. ³⁵ Ẹjọọna aya wa ọyẹyẹ nẹnẹ a a na na, nẹnẹ di a ba na: ni e ni ka nẹ bẹn i yọ ọsọ ibe nọ ọgba keke. ³⁶ I su ubedin nẹnẹ fọrẹ Ẹjọọnu ẹka na: ubaka utun nẹnẹ Ẹdẹda a a nẹ mọ kai sie ve ẹpan na, utun ọ̀ọ́rọ́ọrẹ nẹnẹ me e sie na, sie mu ubedin ka, Ẹdẹda e file mu. ³⁷ Aka Ẹdẹda ẹbẹba nẹnẹ file mu na sie ubedin nẹmọ. Ne e mi wọ yọ ohun ki isi kọ́ọrọ́ọrẹ gba,sa yu ukpe. ³⁸ Ni me su yẹ ẹga ka a kẹ ma wo ni ibe, ubaka ẹfẹna nẹnẹ e filẹ na ayẹ ni i ma nawọ nẹ. ³⁹ Ne e pila emumu ọwọnwọn balẹ ubaka ni roro ka i yi ibe ayẹ ni we su ẹrọ nẹnẹ eme su ọta na; abẹ e kpoto e e sie ubedin nẹ mọ nẹ. ⁴⁰ Ni me de ni ka ne ṣa mẹ ẹfa, ka ni di su ẹrọ. ⁴¹ Ima na ugbigbodi fura òrókòró uùba. ⁴² Ama i din nu ka, ano ebẹba e me su Osibina uùnibi wo ibe ⁴³ Ẹṣa i tẹ Ẹdẹda iiwuru, ni ma na mọ: a a da ka oro ọbẹnṣa àyẹ̀ ẹbẹba iiwuru, aye nà áka na nẹ. ⁴⁴ Gana ébana ni sie nawọ a, anọ nẹnẹ da na ugbugbodi fura aben uùba na, nẹnẹ e e me ni ugbugbodi nẹnẹ ṣa kada Osibina ayẹ ayẹrẹ efa na? ⁴⁵ Ni me roro ka, mà àka fo nọ ta Édẹda ẹfa: ẹfena nẹnẹ fọ a a ta na wamọ, ẹka Imosisi, ẹfẹna nẹnẹ fọ anyẹn yẹrẹ na. ⁴⁶ A a da ka i nẹ na Inosisi wọ, è èbana nẹ na mọ wọ: ubaka a wọrẹ emumu yẹrẹ mẹ ẹpan. ⁴⁷ Ama a a da ka ni ma na ye mumu wọ gana né éke sie na mẹ ega wọ a ?