¹ Ọgba ọnẹbẹ oforo ọbẹn nẹ beye Elasarosi na e e yan. Ẹbetanire ya, Ẹmariya aka yọ da Ẹmata iiken. ² Emariya ayẹ a fọ afọmọ ọpọriwu pọra Idu iiwu, emi fọ yẹ ẹpẹn ẹpan mu yẹ ẹsẹn, yọ ọda Ẹlasarosi eyan. ³ Yo ẹda iyaro abẹ mi file no Ijesu, ka, "Idu, balẹ, ẹfẹna uni na eeyan." ⁴ Ọgbọna Ijesu wọ ya na, agẹ ka, "Igun ọnẹ ama wa ufa ẹka, ama no Osibina iigirima,bi di ya a fo Osibina ogben okpo. ⁵ Ijesu ke ni Ẹmata ẹga aka yọ da, aka Ẹlasarọsi. ⁶ Ọ́nėbẹ uùba ọgbọna awọ ka Ẹlasarọsi è é yan na, Ijesu ma isubu ẹbọre bilamo, efena ama na. ⁷ Ọnẹ urunba a ga nẹ ye egbenurunmẹka, ka, "Nẹ ṣa ti pila yọ Ijudiya. ⁸ Te egbenrunmẹka abẹ gẹ ka, "Ẹrabi, eyibonẹ ne ijuro abẹ e e ni ka bẹ gban ọ ọtarẹ na, ú di e pila ya efenebe hon?" ⁹ Ijesu gunowo ka, "Ámá ẹwakati efookẹbọrẹ e kpoto wọ erun ọọre e? Oro e e jenjen erunmeka, e e diye pilido, ubaka afo ẹrọ ọọ̀so a gba yen. ¹⁰ Ama e e jenjen ujoguwa ka, e ke pilido ubaka ọsẹ eme wo yi iwu. ¹¹ Ẹkẹnẹnanẹ ayẹ a ga nẹ, ọnẹ urunba a ga nẹ ba ka, "Tọ ọre Ẹlasarọsi buwe ama ma yọ ka i di sọma ẹ fura uba. ¹² Ye egbenurunmeka mi ga ne ya ka, "Idu, a a da ka e bwe, á áka kẹsẹ." ¹³ Ama Ijesu a a ga yu ufo ẹka, ama bi roro ka, a a ga uba ofileye eka. ¹⁴ Ijesu me peyan ne ba ka, "Ẹlasarọsi fo. ¹⁵ I ke bẹn ubaka anọ, ka i me wo ẹfa ọnẹbẹ ni di nawo. Ne ṣa tẹ yọ yẹ fa." ¹⁶ Ẹtọmasi, nẹ be ye Ididimusi na, ga nẹ ye egbenurunmẹka ọpa abẹ ka, "Nẹ ṣa ka tẹ yọ, ti di bile Ijesu iwu fo." ¹⁷ Ọgbọna Ijesu re na, a gba ka bi re Ẹlasarọsi wo ọ́so ne isubu ẹna ke. ¹⁸ Ebetani turu to Ijerusalẹmu re ẹpẹn akọ ẹfolonyi ẹfọkupi iiwu na. ¹⁹ Ijuro ọyọyọ a ṣa Emata aka Emariya ẹfa, ka bi fun bi ibe nẹ bọ ọda ega. ²⁰ Ọgbọna Emata wọ ka Ijesu a a ṣa na, e ve jen e gure ẹ, ama Emariya ma wo ubu. ²¹ Emata mi ga ne, Ijesu ka, Idu, a a da ka u wo ẹkọnẹ e èbana mọ ọda e fo. ²² Ama ka akana, i din ka ẹkẹnẹkẹna we e ṣin Osibina na, a aka nẹ ọ. ²³ Ijesu ga nẹ ya ka, 'wọ ọda áka ṣomapalẹṣa ²⁴ Ẹmata ga nẹ ya ka, "I din ka à aka sọmapalẹṣa ọ́sọmapalẹṣa omunurun iisubu." ²⁵ Ijesu ga nẹ ya ka, "Ama a wa ọsọmapalẹṣa, aka ẹrọ ne; efena ne a a na mọ wọ na, e e si fo, eke wo ẹrọ; ²⁶ ẹfẹnẹfẹna e wo ẹrọ na, nẹ na mọ wọ na, e èke fo otutunm otutun. Ọ́ na ọnẹ wọ họn?" ²⁷ A ga nẹ ya ka, "Egan ya nẹ, Idu, ẹ nawọ ka, awọ a wa ọnorofan aye nẹ, Osibina Oògben, Ẹfẹna ne a a ṣa ẹrọ na." ²⁸ Ọgbọna ne a ga ọnẹ ke na, e ve yọ ye yọ ọdạ Emariya bẹbẹ. Agẹ ka, "Otero ṣa ke, e e ye u. ²⁹ Ogbona a wọ ọnẹ na, a kpan fura iganigan, a yọ yẹ fa. ³⁰ Ijesu emi ki fọn iken ayẹ, e ki wo efena Emata we gure ẹ na. ³¹ Ọnẹbẹ uùba ọgbọna ijuro, ẹnanẹ wọ ubu ne be fun yi ibe na, gba ka Emariya kpan fura ẹ́lakata ve yọ na, bẹ yẹrẹ ya, bi sei ka a yọ ọ́sọ awo jen e yi iwo. ³² Ọgbọna Ẹmariya mi re efa nẹ Ijesu ma na nẹ a gba ėo na, a falẹ wo yọ ẹṣẹn a ge ka, "Idu, a a da ka u wo ẹkọ e èbana mọ ọda e fo." ³³ Ako Ijesu sie gba ẹ ka e e yi iwo, aka ijuro abẹ ne yere ya yọ bile e e yi iwo na, e gbun ya re yẹ efuenfuen, yi ibe ṣa ebe fuwa; ³⁴ A ga ka, ẹta ni re ẹ wo a? Be ga nẹ ya ka, Idu ṣa, ọ gba ẹ. ³⁵ Ijesu yi iwo. ³⁶ Ọnẹbẹ uùba ijuro abẹ gẹ ka, ungbẹẹ akọ nẹ e sie ni yẹ ẹga ta na. ³⁷ Amá à ero ero ẹbẹn í bi iwu mi ga ka, "Ama ḅọ́ọ̀ ka oforo ọnẹ, ne jin openanyen anyen na, e e di e sie ka oforo ọnẹ e me fo họn?" ³⁸ Bilamọ e die ki gbun Ijesu iwu, a yọ ọ́sọ. Oba ọ ya nẹ, bi mi fọ otarẹ ju yo owo. ³⁹ Ijesu ge ka, Ne fọ otarẹ ayẹ fura Emata, ẹfẹna nẹ fo ayẹ na ọòdu ga nẹ Ijesu ka, "Idu, a a nyẹn akana, ubaka e ṣina isubu ẹ na aka nẹ e we fo na. ⁴⁰ Ijesu ga nẹ ya ka, "Í ma ga nẹ ọ ka, a a da ka ọ na wọ, wá à ka gba Osibina iigirima họn?" ⁴¹ Ọnẹbẹ uùba bi mi fọ ọtare ayẹ fura. Ijesu mi kpan yo anyen, a ge ka, "Ededu, e gan wọ ẹba ka u piya ọtọn nẹ mọ. ⁴² I din ka u de piya ọtọn kẹ nẹ mọ, ubaka ero ȯkẹrẹkẹtẹ ne jọmọ ẹnanẹ na abẹ a wore ka e ga ọnẹ, bi di nawọ ka awọ e file mu." ⁴³ Ọgbọna a ga ọnẹ ke na, e yi ọga de elee ka, "Ẹlasarosi, ve ṣa!" ⁴⁴ Oforo ayẹ nẹ fo na mi ve ṣa; bẹ́ fo ọ́sọ ẹẹ̀sa pare yẹ ẹsẹn aka yẹ ẹba, bi mi fa ate gbe parẹ ya anyẹn. Ijesu ga nẹ ba ka, "Nẹ tọra ẹ ni tei ya ake yọ." ⁴⁵ Ọnẹbẹ uùba ijuro ọyọyọ ne ṣa Emariya ẹfa, nẹ gba ẹkẹna nẹ Ijesu sie na, na ẹ wọ. ⁴⁶ Ama ero ẹbẹn í bi iwu ni Efarisiro abẹ yọ, bẹ ga nẹ ba ẹkẹna nẹ Ijesu sie na. ⁴⁷ Ọgna ọnẹba aye alufaa ẹpan abẹ aka Efarisiro abẹ ye ọ̀pá jese, bi ṣin ka, "Ẹna te ke sie a? ubaka oforo ọnẹ e e sie ojinorowofuwa ọyọyọ. ⁴⁸ Te e tebi ya egan, ero fenyan áka na ẹ wo; Iromura abẹ éke mi ṣa na ti ije aka tọ uwuru bile amọ." ⁴⁹ Ama Ẹkaifasi, ọọre í be iwu, efena ne wa alufaa ọkẹka ényen ayẹ na, ga nẹ ba ka, "Ni me sisi din kenakide. ⁵⁰ Ni me si balẹ ya ọrẹ ọbẹn ka, a kese ka oro ọọre e fo ne ero fenyan, kadakada ka uwuru fenyan e me fu." ⁵¹ Ama wa yo ibe opin a a ga ọnẹ, Ámà, aka alufaa ọkeka ẹnyẹn ayẹ na, a ga ẹsẹ ka, Ijesu éke fo ne uwun ayẹ; ⁵² e me sisi wa nu uwun ayẹ arẉ ama bile amọ e di kọ Osibina eègbẹn abẹ nẹnẹ ke pan wara na bile sie ọọrẹ ọgbọgbọ. ⁵³ Ọnẹbẹ uùba we munu bẹ yọ ayẹ bi we bile fọ ọkpẹ ṣe ka bẹ nwan Ijesu ne. ⁵⁴ Ijesu e me pile jenjen ọ́gbandala ijuro abẹ eètin, ama e fura kaba, efa ọnẹbẹ yọ uwuru ọbẹn nẹnẹ kẹ ọdan na, a fọn iken ọbẹn nẹnẹ be e ye Efureimu na. Efa ọnẹbẹ ayẹ e mi ma kẹ ye egbenurunmẹka abẹ nẹ. ⁵⁵ Ijuro abẹ ofurusuṇ eèjeme turu a a ṣa, ero ọyọyọ fura ọhọ kpọ yọ Ijerusalẹmu kabẹ sẹ biwu ṣina onwonwon ṣana ofuruṣun e di ki re. ⁵⁶ Bi e ni Ijesu, bẹ ma abẹn a gẹ, akọ bi sie jọmọ wo Ẹtẹmpili na, ka, "Ená ni roro a? ka a àka ṣa ejemẹ ayẹ hon?" ⁵⁷ Alufaa ẹpan abẹ Ẹfarisiro abẹ buru ke ka e e su ẹfẹna e e din ẹfa nẹnẹ Ijesu ma na a a nyẹn, bi di sẹ ya.