¹ Egaba, Egaba ayẹ ẹ ha nẹ nọ, Ẹfena a a ma yẹrẹ opolowo fọn udude ijin, ama nẹnẹ yẹrẹ ọrẹ oben kpọ na, ayẹ ọ̀ọ́rọ́ọrẹa wa oyiri aka ẹjagudane. ² Ẹfẹna nẹnẹ a a yẹrẹ opolowo fọn na, ayẹ a wa ọṣẹlẹ ududo nẹ. ³ Ayẹ ọfọrẹro de jinujun nọ nẹ. Ududo abẹ da wọ yo ohun ede mi ye yu ududo abẹ ẹnanẹ wa yẹ ẹka na iwuru,emi yọ bẹ ẹrẹn ve. ⁴ Ọgba nẹnẹ e e mi ko yu ududo abẹ ve ke na a yọ bẹ ẹrẹn, ududo abẹ de mi yẹrẹ ya: ubaka bidin yo ohun ⁵ Be èke yẹrẹ ọga, ama ibè éke ki fura yẹ efa, ubaka bi me din ọga oòhun. ⁶ Ijesu tu utite onẹ nė ba ẹpẹn enane e kue ga na ẹba na eme ye ba. ⁷ Ijesu ganẹ ba ka, ẹgaba, ẹgaba ayẹ ẹ ga nẹ nọ, Ama a wa ududo abẹ uùjun nẹ. ⁸ Ero fenyan nẹnẹ yọ mẹ ẹrẹn ṣa na, eyiri aka ejaguda abẹ a wa, ama ududo abẹ a am wọ ba. ⁹ Amẹ a wa ujin nẹ, e e su oro nẹnẹ yẹrẹ mẹ ẹfa fọn na, ayẹ bà áka na fon nẹ, è éke mi ve, è éke mi gba ẹmẹ. ¹⁰ Oyiri a a ṣa a a ma daka a ṣa yire oyiri, aka ka a nwan: aka ka efu, ẹ ṣa ka bi di su ẹrọ, ẹka ka bi di su ya ọ́yọyọ nẹnẹ ṣunmowo na. ¹¹ Amẹ a wa ọṣesẹ ududo oboro, osele ududo oboro da fọ yẹ ẹrọ wuje ubaka yọ ududo abẹ. ¹² Okanron, nẹnẹ a a ma wa ọṣẹlẹ ududo na, ẹfẹna nẹnẹ ududo abẹ a a ma wa yẹ ẹka na, a a gba ka omina a a sa, e minẹ tẹbi ududo abẹ wuje, e mi mune. Omina e mi sẹ ududo abẹ ẹdẹmi pan ba wara. ¹³ Ẹkẹ bọra eso, ubaka ọkanran a wa, a ma balẹ ududo abẹ. ¹⁴ Amẹ a wa ọsẹlẹ ududo oboro nẹ, i din mu ududo abẹ ka mẹ ka bi dinmu. ¹⁵ Ẹdẹda din mu, ako nẹnẹ i sie din ẹdẹda na, imi fọ mẹ ẹro wuje ubaka ududo abẹ. ¹⁶ I sisi su ududo ẹbẹn nẹnẹ a a ma wa ijin ọnẹ ẹka na: ka abẹ mà áka fọ ṣa nẹ, bà áka wọ mo ohun: bè éke ṣina ijin ọọre, ọṣẹlẹ ududo ọọrẹ. ¹⁷ Ọnẹbẹ uùba ayẹ tẹ Ẹda e e ni mẹ ẹga nẹ, ubaka ẹfọ mẹ ẹrọ wuje, ka idi die tie ẹ pila. ¹⁸ Kórò ọ̀ọ́rẹ a ma na ẹ fura mu uba, ama i e wuje nẹ mi iwu. I su iwogbigben ka i e wuje, idi e su iwogbigben ka i die tie ẹ pila. Iburu ọnẹ ẹ na furu tẹ ẹda ẹfa nẹ. ¹⁹ Ọnẹbẹ uùba orurowa mi di e wo ijuro abẹ eètin ubaka ẹga ẹnanẹ ²⁰ Ọyọyọ ibi iwu mi ge ka, Ẹṣu ẹfuẹnfuẹn a a yọ ire, ẹna a wọrẹ nẹnẹ ni a wọyẹ ega na a? ²¹ Ẹbẹn ga ka, Ẹga ẹnanẹ a ma wa ẹfẹna nẹnẹ su eṣu ėfuẹnfuẹn ẹka. Eṣu ẹfuenfuen die jin openanyẹn abẹ anyẹn họn? ²² Ọgba onẹ bẹ wo imu ọsẹsinọnwon e èjeme Ijerusalemu. ²³ Ifu ọgba ye Ijesu e e jejen Ẹ́tempili ibe, isolomọnu ọọ̀lorẹ. ²⁴ Ọnẹbẹ uùba ijuro abẹ sa kọọ ya, bẹ ga nẹ ya ka, Nẹ ẹmọọna wà áka a wọrẹ tọ sie ibe ẹbọre a? A a da awọ a wa ọnorofan ayẹ, ga ẹ nẹ tọ ọ́gbandala. ²⁵ Ijẹsu gu na bo wo ka ẹga nẹnọ ama ni ma na wo, utun nẹnẹ me siyẹ itẹda iwuruna wa ubẹdi nẹ mo. ²⁶ Kẹ gan kẹ gan uma nawo ubaka umawu mu ududo. ²⁷ Mu ududo abẹ da wọ mo ohun idin ba, bida kẹ yẹrẹ mo. ²⁸ Ẹ va ba ẹro nẹnẹ e e me su ọta na, bẹ̀ éka fo, ba ka na ba fura muuba. ²⁹ Tẹ Ẹda, ẹfẹna nẹnẹ fọ ba ne mọna, fọrẹ ero fẹnyan, eme su oro nẹnẹ éke di ṣẹn ba fura tẹ ẹda uùba na. ³⁰ Amẹ aka ẹdẹda ọọrẹ tẹ wa. ³¹ Ijuro abẹ bẹ ko ọtarẹ ka bẹ gban ya. ³² Ijesu guna bo owo ka, utun obore ọyọyọ ayẹ yen nẹ iyẹ wi tẹ dẹ fa ṣa na ọọna ibiwu ne ni ka nẹ gban mo otarẹ na.? ³³ Ijuro abẹ mi guna yo owo, ka, Ti ma gban ọ ọtarẹ ubaka utun oboro, ama ubaka ẹlabọ, aka ubuka awọ nẹnẹ ọ wa òròkòrò na ṣe wi iwu ṣina Osibina. ³⁴ Ijesu guna bo owo ka, bi ma wọrẹ ẹ we nu ububuru ka, Ẹga ẹka Osibina ikeke nẹ wa hon? ³⁵ Ada ka e ye ba Osibina ekee abẹ, abẹ nẹ nẹnẹ bẹ fọ Osibina ẹ ẹga nọ na, Osibina ẹga ẹdiriẹ fuwa. ³⁶ Uwa ka ga kẹ ya ka ẹfẹna ẹdẹna tiyẹ wo obo ẹ file ṣẹ ẹrona nika agẹlabo ubaka ẹ gẹ ka ama wo Osibina gben? ³⁷ A a da ka ime sie tẹ ẹda uùtun ni ma na mọ wo. ³⁸ Ama me ki siẹ ba, wẹ me si na mo wo nọ utun ma bẹ wọ e riga udin ẹdirẹ gben wa yen ka ẹdẹda wo mi iwu ka mi dinẹ wo ẹdẹda iwu. ³⁹ Bi mi dẹ no rẹ nẹ bẹkẹ wẹ siẹ na, ama afan buba. ⁴⁰ Ẹpila yo Ijordani ẹfẹna Ejoon we tai wẹ ri imomo na, ẹfa ọnẹbẹ e mi ma nẹ. ⁴¹ Ero ọyọyọ ṣa yẹ ẹfa, bi mi ga ka, Ejọọnu eme sie utun ojinorowofuwa kọ̀ ọrọ́ọrẹ, ama ikua a wa ẹpẹn fẹnyan nẹnẹ a ga yẹrẹ oforo ọnẹ ẹpan na. ⁴² Ero ọyọyọ na ẹ wọ ẹ́fa ọnẹbe.