¹ Nang Yeesho in yeeru kpumu gee-palawi ti do shaayi kan in minin kumen kan fooran ka we for shaabug ding kan in niina ka pira-pira. ² Shii in shur shinui mo wa yu kaawi paaro gubno Yamma kan in niina ka me shikjui a bangum. ³ Nang shii in tewon ti shinui ya, "Mo ma shar we ti kirama ka longku mere mam koo la-biro, luru, we-shiina, kine kan koo manni lannai. ⁴ Koo mina shire ye ma riyaa tai, ma deema ti po teere we war koddi ye ma ta wesshon tarang gok-minai. ⁵ Ma shinui maa kurooju yiu ma, mam maa ta wessho tarang gok-minai, ma tudira kpisshi shik shoo ma longku yen deero we jimro ti kuujui." ⁶ Nang shinui in koona in wangro meno-mina meno-mina, in ti kpaalo po shinnyi yen tomon kan tasshani ti koo tong. ⁷ Wende Iriidush gub Galiili yaaraa pi we maam ye ti ku yooro ding, nang kuunii in shiwaro kping, longku peddi memmei ti tewi ya Yeeshoi Yuwaana an yulma ye illaa ti ta duwa, ⁸ kan peddi te tewi yaa an-pigra Ilya ye penna. Peddi yaa dok ti shakki me an-pigra me fiji ye shinnani kan dwei. ⁹ Pene Iriidush in tewi ya, "Ne foraa kuuno Yuwaana. Wo nong, ye ne ti yaaron peen paaro te ti kwii?" Nang Iriidush in li shikni ka we we shikno Yessho. ¹⁰ Koddi ye me an-kaawii meena, shiui in tewon ti shii koo wen ye shinui yuyyina. Nang shii in ye shinui in kooju in warju manni pirii ku jalju ti manni gok-minai ye ti ye yaa Basheeda. ¹¹ Pene koddi ye jimai yaaraa piri we te, shinui in yiu biinii. Shii in yuun wanniya ti shinui kan in sheeron paaro gubno Yamma, kan shii in tassho me leka tasshaju. ¹² Wende darang nennga shuwaro, me kpumu gee-palawi in wari shiknii kan shinui in ti tewi ya, "Li bi jimai mo shinui wangro tarang meno-mina kan gok-mina me nimmi kulang shinui in wa gasshon po kuut kan we-shiina, longku kama ti po tei ti dan-doong." ¹³ Pene shii in tewon ti shinui ya, "Ma minin we po shaani." Shinui in liginna ya. "Minui kan wee kookaro ti fok appan we-ta-kele fuwat kan shirim palawum, maa yaau minun wa pillu we-shiina ka longku jima memme te ding." ¹⁴ (Ti po teere ka memme me shinui fooraa shig-dok sho naa-fuwat.) Shii in tewi ti me an yiu-shubetni ya, "Ma li memmei ti po diyo mina pitto-mina pitto ye fooraa naa-fuwat koo shire." ¹⁵ Yeesho in tewi ti me an yiu-shubetni mo shinui li memmei mo dijiyaju dijiyii. ¹⁶ Shii in shar appan we-ta-kele shin fuwat kan shirim palawi, in beblo taajui, shii in deero dooni ti ku-dang, in pammina ti Yamma in liin kpang ti kwi in yooju buk-buki, nang shii in shari in mini ti me an yiu-shubetni mo dajiyon ti toom jimai. ¹⁷ Shinui shin ding in shuyyina ar in kemreju, kan dogi beblan ta buk-buki ye pablaa dwei in diina ganga kpumu gee-palau. ¹⁸ Manni darangi, Yeesho ti ku fur-fok po kuuni, me an yiu-shubetnii ti jelenii. Shii in tel shinui ya, "Jimai ti tewi ta shinui ya nei nongee?" ¹⁹ Shinui in liginna ya, "Peddi ti tewi ya kei Yuwaana an yulma. Pene peddi in tewi yaa Ilya, kan peddi yaa dok ti shakki me an-pigra ye fiji ye illaa." ²⁰ Nang shii in telshinui ya, "Pene ma ti tewi sheema maa nei nong?" Biiturush in liginna ya, "Kiriti laano Yamma." ²¹ Pene shii in tol kumojui mo shinui wessho teu we te ti koo niyo doki, ²² kan in sheero ya, "La Niyo ta taa shilib we gbe kan ta kura shii ta men gbidina kan mongba me ankpaa kan me an shubet shiire, kan shinui ta waraa tuk shii, kan ti ku darang an-tat shii ta illani." ²³ Nang in tewon ti shinui shin ding ya, "Ma mo leka waru in yiu biino, shii yikka ti gbare-do in kura kuuni kan in shar biro loo-kuuni kpaaliya ding in waru in yiru biino. ²⁴ Maa mo leka kauro kerangni ta shekon ka te, pene mo shekan ka kerangni ka longkuuno ta kaurani. ²⁵ Kpangii shire ti piree kan niyo in we we ku-buk ding, in shekon ka kerangnii? ²⁶ Maa mo ti yaaro duulan-shik ka longkuuno kan paarono, shi sheeni La Niyo ta yaaro duulan-shik koddi ye shii maa meena ti ta shokranni kan shokranno Foni kan she me shaana me an-shuran ku-dang. ²⁷ Pene ne ta teuma yen kulli, ka me shengrii ti po te me shinui a ta muranim ye shinui in tang we shik gubno Yamma." ²⁸ Wende pelle ka bi shaklo pididau ye Yeesho teka paaro te, shii in ye Biiturush, Yuwaana kan Yaakubu in ammaju ku sheela ka we fur-fok. ²⁹ Kaa ye shii ti ku fur-foki, adooni in paao-kuuro, kan lanna shiknii in yooro yen pe shak-shak. ³⁰ Kpantidi, shwiji shin palau ti ya paaro kan shii, maMuuja kan Ilya, ³¹ me penna ti ta shokran, in ti ya paaro kan Yeesho ti ku muroni, ye shii nennga yooro ti Urshaliima. ³² Wende Biiturush kan me ka shaayi kan shii shinui ti ku ya shaklo kping, pene koddi ye shinui pigroo, shinui in we shik shokranni kan men shwiji me palawi me sherii ka shaayi kan shii. ³³ Kaa ye shinui ti ku kooju ti piree kan Yeesho, Biiturush in tewon ti shii ya, "Fo-mina, yuwaa kpang ye kama ti po te. Shero mo min limma tam tat, dok sheeko, dok sheeno Muuja kan dok sheeno Ilya." (Shii a peno wee shi ti ku tewanim.) ³⁴ Kaa ye shii ti ku sheero we te, shunngu in shaaru in kau kuujui, kan shewo in yiu shinui kaa ye shinui riyaaju ta shunngui. ³⁵ Ele in perin ti ta shunngui ya, "Tenei Laano, ye dok ye ne shaka; ma yaaro shii." ³⁶ Koddi ye elei yuwaa paaroi, Yeesho pinbirim shi dokni. Shinui in yooju yititi kan a tewo we ti koo niyo dok ti ta shaklo ti ku wee shinui weyaa shikii. ³⁷ Pirbang, koddi ye shinui shaanan ti ku sheelai, tappan jima memme in waru shiknii. ³⁸ Kpantidi, manni shwijii ti shakki jimai in yallina in ti tewi ya, "An-shubet, ne benngako ken gee bang shik laano, longku shii dok laano. ³⁹ Ke ti we ya, piire shoom tappaa kuuni kan shii ti shugna fubul maa yuwaa in ti perin ti foki. A ti kumi in wessho shiim kan ti liyyo pira kping ti shiknii. ⁴⁰ Ne bennga me an yiu-shubetko mo foru, pene shinui a dumum." ⁴¹ Yeesho in liginna kan in tewi ya, "Ai me ti ta dil kan me an bang-ku ku-kira te, we war dimin ye ne ta diyani kan ma ye ar wende mai kumu kan nem mi? Warin ka laakoi wono." ⁴² Koddi ye lai ti ku waru, nang piire shoomi in pelon lai buk kan shiki in yiu tarani. Pene Yeesho in pekro piire shoomi kan shii in niyan ka lai, nang Yeesho in minin shii ti fonii. ⁴³ Nang shinui shin ding in ya maam fooranno Yamma. Koddi ye tida shinui ti ku yuyyo maam koo wen me Yeesho ti ku yuyyani, shii in tewi ti me an yiu-shubetni ya, ⁴⁴ "Shero mo paaro te ri ta kuma kping: Ta min La Niyo ti ta kira memme." ⁴⁵ Pene shinui a peno ku paaro tem. Yamma lattaan shinui ka wee ta shiklani, longku kaa te shinui a dum pen wee ta shuklanim, kan ar wende shinui in ti ya shewo ya telyo ti ku paaro te. ⁴⁶ Nang jiram in illina ti shakkijui ti ku wo nong ye ta yooni mon gbai. ⁴⁷ Pene Yeesho, fuwaa po pen wee shinui ti ku nyimyani ti po shaariju, in ye kattan la in li shii ti jeleni, ⁴⁸ kan in tewon ti shinui ya, "Maa mo yikka la te ti ta shommono, yikkai ne, kan mo yikkano, yikkai Yamma mo shunnano. Longku mo kattani ding ti shakki ma teerei mo kan gbai." ⁴⁹ Yuwaana in tewon ti shii ya, "Fo-mina min weena mondok tiku for piire shoom ti ta shommoko nang minun foddon foki ti shii, longku shii a ka shaayi kan kamam." ⁵⁰ "Yeesho in liginna ya mo ma foddon foki ti shiim, Longku mo ding yei ti ya gei kan mam shii sheema." ⁵¹ Bara ye koddi ye ta ammon Yeesho ku-dang yuuna nimmi, shii in li shikni ka we war Urshaliima. ⁵² Nang shii in shur me an-shuran mo yooju toom kan shinui in wanna in wa ri tarang meno-mina Shamaariya, longku shinui in limyon koo wen ti shii. ⁵³ Pene memme me ti po teerei in kuroju yiu shii longku ye shii ti ku mere war Urshaliima. ⁵⁴ Koddi ye me an yiu-shubet ma Yaakubu kan Yuwaana weyaa kaa te, shinui in tewi ya, "Fo-mina, ke leka minun yeeru deet ti ku-dang in shaaru in kur shinui ya?" ⁵⁵ Pene Yeesho in shiwa dooni in pekro shinui, ⁵⁶ nang shinui in warju manni meno-minai. ⁵⁷ Kaa ye shinui ti ku mere ti ku kokoi, manni niyoi in tewi ti Yeesho ya, "Ne ta yiu biiko we war piree ke ta warani ding." ⁵⁸ Yeesho in lignon ti shii ya, "Waak kan jwalju, adeewe ku-dang kan luwoju, pene La Niyo a kan piree ta kannon kuunim." ⁵⁹ Nanh shii in tewi ti mondok ya, "Yiru biino." Pene shii in liginna ya, "Fo-mina, shero tida mo ne wa nannu fono." ⁶⁰ Pene Yeesho in lignon ti shii ya, "Wessho me kuma mo nan me kumaju. Pene kaa sheema, koo ma wa kpaalo pi gubno Yamma." ⁶¹ Nang manni niyoi dokro in tewi ya, "Ne ta yiu biiko ta Fo-mina, pene shero tida mo ne wa minnu menne ti me ti minano." ⁶² Nang Yeesho in lignon ti shii ya, "Adoo mo ta yiu shik dummo shirau tangka in ti shiwa dooni ti ta biini ye nennaa in ri ta gubno Yammam."