¹ Wende ka bi ween shurme te, shii in shakko peddi me naa-parilau kan palawi, kan in shur shinui palau-palau ti toomni we war gok-mina ka koo tong piree shi po kuuni leka warani. ² Shii in tewon ti shinui ya, "Kasshani gbe, pene me an shurani a gbem. Longkuuno te ma bengo Fo-mina an ku doong in shuru ma me an shuran ti po kasshoni. ³ Ma koo! Ne ta shur ma kaa shiba galma ti shakki angurateelu. ⁴ Mo ma shar laaliita kine, koo vooro mere, koo taa, kan mo ma yu kaa kan niyo ti kokom. ⁵ Maa mina ye ma riyaa tai, wee ma po tewani dok, maa, "Duulan-shaari mo deero ti ku minai te!' ⁶ Maa ka niyo ye kan twaalan-shaari ti po teere, twaalan-shaarima ta deero ti kuunii, pene maa adoo wem, ta meeriro shik ma. ⁷ Ma deema ti ta mina teere, man ti sha kan she wee shinui minaama, longku la an-shuran nennaa in we we shik shuranni. Mo ma yippo bi minam. ⁸ Koo gok-mina shire ye ma riyaa, ma shu koo wen ye dayaa ma ti toom ma ⁹ kan man tassho shik me kan pira ti po teere. Man ti tewon ti shinui maa, 'Gubno Yamma wanna nimmi kan ma.' ¹⁰ Mam maa riyaa tarang gok-mina, ma shinui maa yiu mam, ma pero ma ku gbong-koko man tewi maa, ¹¹ 'Koo kpisshi tarang gok-mina ma ye tannaa shik shoomu, min tudiraa ma ti kuuma! Pene ma peno te: Gubno Yamma wanna nimmi.' ¹² Ne ta teuma, ti ku darang shiire, ta yooro maj-maj ti ku Shodom kan ye ti ku gok-mina teere. ¹³ Dang-piri, ta Karajiin! Dang-piri ta Basheeda! Mo da gbidina wee yuyyaa ti taa ma mo daa ti taa ma Taaya kan Shiidon, shinui foraa fokju yau, daa diyaajuti ta vuro shoppii kan lanna bau-kenni. ¹⁴ Pene ta yooro maj-maj ti ku Taaya kan Shiidon ti ta darang shiire kan ye ti kuuma. ¹⁵ Shi sheeji, ta Kapanaawum, shi ti nyimmina ta dang shokroji we ammoku-dang ya? Onngoo, ta shaan shin ta duwa shwal. ¹⁶ Mo shii yaaraa ma yaaraano, kan mo shii kuraa ma kuraai ne, kan mo shii kuraano kuraai mo shunnano." ¹⁷ Naa-parilawi in meeru ka beere,in ti tewiya, "Fo-mina, koo modaa piire shoomii in timinmu gba ti ta shommoko." ¹⁸ Yeesho in lignon ti shinui ya, "Ne ti ku gee shuuro ye ti ku shugru ti ku-dang kaa malaj. ¹⁹ Gee, ne minaama bang-vurum tabyo ku kuret kan adengre, kan ti ku kumen me an gei ma, kan ado manni kokoi ye ta liima piram. ²⁰ Birang mo ma yu beere waani ti kuuno te, ye maa shoom muraa ma kui, pene ma yu beere gbe ye shommo ma ballii ti ku-dang." ²¹ Ti ta dob-dob koddi teere Yeesho kemii kan beere ti ta Shoomno Yamma, kan in ti tewi ya, "Ne pammaako ta, Fowi, Fo-mina ku-dang kan ku-buk, longku ke numaa do ween shurme te ti me ti nyimmina ya shinui me an shen kan penani kan ken au-dwei ti me kaa nyitti shiba me kan kattan penani. Oo, ta Fowi, longku ke gee tene yuwaa kpang ti geyanko. ²² "We ding minnano ta Fono, kan adoo mo penaa Laim bara Fowii, kan adoo mo penaa Fowiim bara Lai kan shinui me Lai shaka ka we awin-dwei ti shii." ²³ Nang shii in shiwa dooni ti shik me an yiu-shubetni kan in tewon ku-jwalju ya, "Kpangi ti me shinui ti we shik wee ma ti weyani. ²⁴ Ne ta teuma, me an-pigra kan me an-gub gbe leka shinui in we shik wee ma ti we shiki, kan shinui a wa shikjuim, kan in yaaro wee ma yaaraa, kan shinui a yaaro shinuim." ²⁵ Kpantidi, mo penaa-we ti ta shorono Muuja in illo shikni ka longku shii in nau Yeesho, in tewi ya, "An-shubet, Ne ta ya wen nen waan kerang po-dingii?" ²⁶ Yeesho in lignon ti shii ya, "Ballii wenee ti ta shoroi? Duma ke ti maarrai ka yee?" ²⁷ Shii in liginna ya, "Ke ta leu Fo-mina Yammako ka poshaariko ding kan kerangko ding kan nyimmoko ding, birang, ken leu an-ganglangko kaa kuuko.' " ²⁸ Yeesho in tewon ti shii ya, "Ke lignaa dob-dob. Yu kaa te, kan ke ta we kerang. ²⁹ Pene shii, leka in shiiro Yeesho sheeni, nang in tewi ti Yeesho ya, "An-ganglangnoi nong?" ³⁰ Yeesho in lignon ya, "Ka manni niyoi ti ku shaani ti Urshaliima we sha Jeeriko. Shii in shugna ti ta kira me an-jiri, ye shinui in lauyo wee shii kan te ding, in yuun tuwa ti shii, kan in wessho shii pelle kuma muro. ³¹ In yooro ye manni ankpaai in ti shaana ti ku koko teere, nang bara ye shii weyaa shik niyoi kannii, shii in pereni ti jele in kooni. ³² Kaa teerei niyo Leewi sheeni, bara ye shii foonna po teere kan in we shiknii, in pereni ti jele in kooni. ³³ Pene manni niyo Shamaariyai, mere in kerin shii bi koo teere, in fuuttu piree kan shii, niyo Shamaariyai in kunngo shii. ³⁴ Shii in war shik niyoi in dediron mor kan doo inaabi ti do pirai kan in dabyo do pirai ka janjiruk lanna. Shii in li niyoi ti ku girbini, in warin shii ta mina po dur bino, kan in geen bang shiknii. ³⁵ Pirbang shii in shari kine dinaari palau, kan in min shinui ti an ku-minai kan in tewon ya, "Geeno bang-shiknii, kan wee ke tuka ti kuuno te, koddi ye ne meena, ne ta maan ken ka foki.' ³⁶ Ti shakki me shin tat me ti ta nyimmoko wo nong ye shii an-ganglangno mo shuga ti ta kira me an-jirii?" ³⁷ Shii in liginna ya, "Mo dok ye kunngaa shii." Yeesho in tewon ti shii ya, "Koo ke wa yu kaa teere." ³⁸ Wende kaa ye Yeesho kan me an yiu-shubetni ti ku mere war Urshaliima, shii in fooro manni meno-minai ye kan manni paamuni ye shommoi Matta, tei in yiu shii ti ta minaro. ³⁹ Tei kan mola ye shommoroi Maryamu, in deero ti jeleno Fo-mina kan in ti yaaron paaronii. ⁴⁰ Pene Marta in turmoro ka we-shiina kiryippa ye ti ku yaani, Tei in war shikno Yeesho in tewi ta tei ya, "Fo-mina, kei turmo ye molano wesshaano nen ti ya shurani ne dokno maa? Longkuuno te, tewon ti tei mo shauno ta tei." ⁴¹ Pene Fo-mina in lignna in tewon ti tei ya, "Matta, Matta, kuuji shigaro kan shin turmoji ti ku we gbe, ⁴² pene bara we dok yen kpang. Maryamu shakaro yen kpangi, ye a ta dum lauwon ti kiraroim."