¹ In yooro darang nan dok Yeesho ti ku fur-fok ti manni pirii. Koddi ye shii fuwaa, dok ti shakki me an yiu-shubetnii in tel ya, "Fo-mina shuppo mu koko ye min po furan-fok kaa ye Yuwaana shuppaan me an yiu-shubetni." ² Yeesho in tewon ti shinui ya, "Mam maa ta fur-fok maa, 'Fowi, shero mo min gba ti shommoko ka shaana. Gubko in waru. ³ Minmu we-shiina darang ding. ⁴ Teklomu shasshalaumu, kaa ye min ti tekilla ti koo nong me min ta yiu bi jan. wessho warin mun po nawoi.' " ⁵ Yeesho in tewi ti me an yiu shubetni, "Pelle dok ma kan an jeere, ye waraa shiki ka shakki yippo in tewi ya, "Minno jan we-ta-kele shin tat. ⁶ Gee ka jeereno yuuna mere yippo, duraa wendei a doo wee ne ta minin in sham." ⁷ Nang pelle mo ta gumei in liginnu ti an jeereniI ye waraai gassho jan ti kirai, ya, "Wessho turmonoi! Ne fuwaa pi nummo podangno ne kan shibono mun shaamu po shaklo, a doo wee ne po yuukom." ⁸ Ne ta teuma, maa ta illani in minin wem, longku ye jeerenim, ta illani in minin, longku ye jeerei yu duulan shik ti po gengoim. ⁹ "Ne birang ta teuma, ma yiu ya gengo ta minma. man ti gasshina, ma ta weyani. Man ti ya gbaaraa, ta auma podangi in shauma. ¹⁰ Gee mo ding gennga, ta minin, ding mo gassha ta weyani, birang ding mo yuwaa gbaaraa, ta awin podangi. ¹¹ "Wo nong ti shakki ma me fowi, ye laani ma gennga shii ka we-ta- kele, in minin shiilai, yee shirim in minin kuretii? ¹² Nang lai gennga gun we in minin adengrei? ¹³ Ma me an-shek, ma penaa koko ye ma ta minin we ti shiboma yen kpang, dogii foma Yamma ti ku-dang ta min shoomno Yamma ti me an geng shii ya?" ¹⁴ Darang nan dok, Yeesho ti ku for shaabug ti shik manni niyoi, yei ti ya paarom. Bara ye shaa-bugi pereju ele niyoi in shiruro shiki kan jimai in ya maam. ¹⁵ Pene peddiju in tewi ya, "A waani ti for shaabug ta shiim. Weena bangnii ti kirano shuuro, gub shaabug." ¹⁶ Nang peddi memmei longku in nau shii, shinui in gasshina ya mo shii shukju we temo ti ku-dang. ¹⁷ Pene Yeesho penaa nyimmoju nang in tewon ti shinui ya, ''Po ya-gub ye bwaaraa taaro ti ku kenne ta dakloro, kan me ta mina dok maa ti ya Kenne kan shaayi ta shuwani. ¹⁸ Pene ma shuuro maa bwaaraa taani ti ya nee ka shaayi, ta yaani ka yee gubnii in sheerii? Ne teka te longkuuno ye ¹⁹ Ma nei ti for shaabugii shuuro, me an yiu bii ma ti for sheejui ka nong? Kaa te ta yooju me an shiiroma. ²⁰ Pene ma nei ti for shaabugii ka fo kirano yamma, nang gubno Yamma foonna shik ma. ²¹ "Ma niyo maa bang, shiki limmani kan jede, in ti gee ku minani, we kiranii a ta ya pira kum. ²² Pene maa wanna kuuni mo yeka shii bang in yek bangnii, shii in shar jedei ye liyaan shaari kan tei, in bwairo we kirai ti me an jeereni. ²³ "Mei kan nem, teerei me an geino, birang maa moi shauno ta gal doim, ti wakiiyai tai." ²⁴ Yeesho in tewi ya, "Ma piire shoom ma peraa ti shik niyo, ta wanni ta shwee, in gassho po nessho, pene maa wam, ta tewani ya, 'Ne ta meeno ta mina ye bo ne pennan ti tai.' ²⁵ Nang shaabugi in shiru in we ta kooro minai temmani kpang. ²⁶ Pene ta gasshuru manni piire shoom shin parilau me yeka shii shek, nang shinui in reeju shik niyoi in deenjun. Ta wiilani niyo teere ta dakloni in yek ye ka toom." ²⁷ Yeesho ti ku ya paaro, manni paamun ti shakki galoi in shokro elero in tewi ya, "Kpang ti ku paamun ye pattaako, in mooloko." ²⁸ Pene Yeesho in liginna ya, "Kpangi ti ku me yaaraa paarono Yamma in li ta kumoju in ti yuun shuran." ²⁹ Ma jimai maa ti tokko shaariju, Yeesho in yiu tewani ya, "Ku-kira tei piire ku-kira. Shinui ti gasshinai we temo, pene a doo we temo ye ta shukinum bara temono Yunaana. ³⁰ Kaa ye Yunaana shigani we teman ti me ti Ninnibe. Kaa te, La Niyo ta shiwani we teman ti ku-kira te. ³¹ Darang shiire, La-paamun ye yuwaa gub ti Dang ta illani ta duwo ka shaayi kan memme ku-kira te in shwaalo shinui ta tei, longku ye wanna ta tei ti po ajikaru longku shenno Gub Sholmon, kan ma gee, mo gba yeka Sholmon wono. ³² Darang shiire, me ti Ninnibe sheeju, ta illani ta duwo ka shaayi kan memme ku-kira te, in shwaalo shinui, longku foraa fokju ka bi kaawan paarono Yunaana, pene gee mo gba yeka Yunaana wono. ³³ "A doo mo ta wul deet ta kele in latto doim, birang yei in assho kwi ka paawim, pene ta dayani ti ku dangla, longku me riina, ta we shik eyani. ³⁴ Adookoi deet shikko, ma adooko ma kpang, shikko ding ta yooro aarani. pene maa kpangum, shikko ding ta yooro dil. ³⁵ Longkuuno te, jooro mo aaro ye ti shikko shiwaro dilum. ³⁶ Kaa te, ma shikko ding ma kemani ka aaro, a doo jele ne ye dilum, ta yooro foki dok eyani, kaa ye aaran deet ta kele ti ee kuuko." ³⁷ Ma Yeesho maa ti wiilo sheero paaroi, manni Parishaawai in munyo shii ka we sha weshiina kan shi, nang in ri in deeni ti ku gburmi sha weshiinai. ³⁸ Pene Parishaawai a wa Yeesho fudaa kirani ka we sha weshiinaim, in ya maam. ³⁹ Pene Fo-mina in tewon ti shii ya, "Ma Parishaawa, ma ti fuddinai ta bi kuuro kan gurangi, pene ta aama ku jal keman ding kan shek. ⁴⁰ Ma me dili! A mo yuwaa peewei teerei mo yuwaa tai maa? ⁴¹ Ma min wee ti ta gurangi kunngu ti mo an kenni, nang we ding in fuddoro ti piree kan ma. ⁴² "Ma riyaa tat ta Parishaawa, longku ma me ti min ti Yamma dok ti shakki kpumu wee ma shuraa ding kan alau ta doong ma, pene man kuroma shiire yen kpang kan lewanno Yamma. Ma daa ti ya ye ka bi, ado wessho ye ka toomim. ⁴³ "Ma riyaa tat ta Parishaawa, longku ye ma leka mai po diyo yei kpang ti ta mina fur-fok, kan ya kaa ti po piplo-we. ⁴⁴ "Ma riyaa tat, longku ye ma kaa ku-duwo yei diganim, ye memme in ti koon ti kwi a ti penim." ⁴⁵ Dok ti shakki me penaa we ti ta shoro, in tewi ta shii ya, "An shubet, ma kei ti teu we te ken ti yollonmu sheemu." ⁴⁶ Yeesho in liginna ya, "Ma me penaa we ta shoro, ma riyaa tat, longku ye ma ti li shari yen tira ti ku memme ye a ta dum sharanim, pene ma ti koo shou fo kirama dok man shawin shinuim. ⁴⁷ "Ma riyaa tat, longku ye ma digyaa duwa ti me an pigra, ye ma fowon ma tukyaa shinui. ⁴⁸ Ma po kuuma, ma penaa man kumi kan wee ma fowon ma yuyyaa, ye tukyaa me an-pigra ta shinui, nang man sha toom ka digyo duwai ka sheema. ⁴⁹ Longku kaa te, Yamma ta penanni in tewi ya, 'Ne ta shurin an-pigra kan an kaawi ti shikjui, ta tuk peddi, in kura peddi ta shinui.' ⁵⁰ Kaa te niyo ku-kira te, ta shar ku deran dom an-pigra ye deraa ta liyan gun der dom, ⁵¹ wee tangna ti domno Abiila we war domno Shakaariya, ye tuka shii ti shakki po li-dungo kan mina yowo Yamma. Oo, Ne ta teuma, niyo ku-kira te ding ta shar kwi ta shinui. ⁵² "Ma riyaa tat, ma me penaa we ta shoro, longku ye ma sharaa we au podang penan ma po kuuma. Mai rim, birang man beelo me leka riyaani." ⁵³ Ka bi ye Yeesho wesshaa po teere, Parishaawa kan me an shubet-shoro in yiu ya jiram kan shwaalo wee Yeesho ti ku wee shii sheeraa gbe, ⁵⁴ shinui in ti jooro yiu shii ti ku pa-paaroni.