¹ Ti ta koddi teerei, koddi ye memme shig sho kpumu galaan gbe in tabyo shaayi, Yeesho in yiu ya paaro ti me an shubetni ya, "Ma shero bang ti ku shoo ma man ti jooro yiij Parishaawa, yei wawo ado. ² Pene adoo wee lattii-lattii yei ta peru peewem, kan ye kwi kawani yei ta eenanim. ³ Longku kaa te, wee ma teka ti ta dil ta yaaroro ka darang, kan wee ma sheeraa ka jiri ta kumo birang ta gume, ta shoppo foki ti ku we ku mina. ⁴ Ne teka ma me an jeereno, mo ma shi me ta tuk lo-shiki, kan ka biino teerei shinui a ta dum ya manni weiim. ⁵ Pene ne ta pekro ma ti ku mo ma ta shiyani. Ma shi mo ye, ka bi ye shii tuka, shii kan kumen ye ta vingani ti ta deet-shwal. Oo, ne teka ma, ma shi shii. ⁶ A waalang fuwat ye pilaan-we ti ku bumlum palawum ya? Ar wende a doo ye dok ti shakkiju ye jiyeei sheka Yammai. ⁷ Pene koo shok ye ti kuuma shin ding fuwaa po maarani. Mo ma yu shewom. Ma yeka waalang kpang gbe. ⁸ Ne ta teuma, koo nong ye sheeraa pinno ti toom memme, La Niyo ta sheero pinnii ti toom me an-shuranno Yamma, ⁹ pene maa mo teka ya shii pennom ti toom memmem, ta ya jiram a peno shiim ti toom me an-shuranno Yamma. ¹⁰ Koo nong ye yuwaa ding-paaro ti shik La Niyo, ta dum fuddo shii, pene ti mo yuwaa shwaal ti piree kan Shoom Yen Shaana, a ta fuddo shiim. ¹¹ Koddi ye shinui waraan man ta mina fur-fok, me an-gub, kan me an kumen, mo ma turmoma ti ku ye ma po yuun paaroka we kauro kuumam, koo wee ma ta tewani, ¹² longku Shoom Yen Shaana ta shuppoma ti ta koddi teere wee ma ta tewani." ¹³ Nang manni niyoi ti shakki jimai in terun ti shii ya, "An-shubet, tewo ti mollo mo bwaattu birma kaji kan ne. ¹⁴ Yeesho in lignon ti shii ya, "Shwiji, liyaano an gub shiire koo an bwaari ti kuumai nong? ¹⁵ Shii in tewon ti shinui ya, "Ma jooro kping! Mo ma li poshaari ma ka leu we gbem, longku kerang a ti ker dwei ka galan we gbem." ¹⁶ Nang Yeesho in sheeron temo ti shinui ya, "Ka manni niyoi mo an birma ye doongni minaa weshiina doong kpang. ¹⁷ Shii in tewi ti kuuni ya 'Ne ta yaanii wen? Ne kan po gal weshiina nom ¹⁸ Birang shii in tewi ya, "Gee wee ne ta yaani wono, ne ta vubro kangno nen dig yen gba, teerei piree ne ta galin shauno kan we kirano ding. ¹⁹ Ne ta tewani ti kerangno na, "Ke kan we gbe ye ta shenirani gbe, kutton ka poshaariko, ke ta ya shuran birangum, shu kan ken she ken sha tomonko.' " ²⁰ Pene Yamma in tewon ti shii ya, 'Dil niyo waanii, ti shakki yippo te leka kerangko, kan wee ke galaan, ta yoojui weeno nong?' ²¹ Tenei wee ta yooro kan mo galaa we ding ti kuuni, pene ta yooni mo an kenni ti toomno Yamma." ²² Yeesho in tewi ti me an yiu-shubetni ya, "Longkuuno te, Ne ta teuma, mo ma turmoma ka longku kerang ma, wee ma ta shaani koo ti ku lo-shik ma, wee ma ta shoppani. ²³ Longku kerang yeka gwaang, kan lo-shik yeka lanna. ²⁴ Ma gee ka gaak ku-dang, a ti tobbinam yee kasshanim, shinui akan mina li wem yee kangum, pene Yamma in ti kan shinui. Oo pene dogii ma ye ma yeka adeewe kpang! ²⁵ Wo nong ti shakki ma ye turmooni ta tokko shaari shakloni in yooro joorii? ²⁶ Mam maa ta dum tokko shaari shakloma la-wiiwum, longku wen ma ta turmoma ti ku dogi wei? ²⁷ Ma nyimmo kan ye bilit ti kpirin. Shinui a ti ya shuran taa shilib koo bee lelleu lannam. Kan ye kaa teerei, Ne ta teuma, koo modaa an birma Sholmonii, akan lanna men kpattirin kaa dok ti shakki bilit mem. ²⁸ Ma Yamma maa ti limma shik shwee buk kaa te me booi ka shinui, kan dwei in ter shinui ti ta riwit, kaa te Yamma ta shoppoma lanna ti shik ma, ma me an kattan lishaari! ²⁹ Ma wessho lishaarima ti ku we po shaani koo sheyanii, ma wessho liin nyimmo ti kwii. ³⁰ Longku memme ding mei peno Yammam ti gasshinai bi ween shurme te, nang Foma Yamma penaa ma leka shinui. ³¹ Pene ma gassho bi Gubno Yamma, kan dogi wei ding ta tokkon man shaarii. ³² Mo ma yu shewom, kattan an-pali dinnyi, longku Foma shii kan twaalan shaari min ma Gubni. ³³ Pelin ka wee ke kan te kan ken mini ti an kenni. Ma limma ti kuuma vooro yee ta kooranim, po gal-we ti ku-dang yee ta wiilanim. Ma gal ti ku-dang ti piree a doo an-jiri ta war jeleim, yee kayuk ta shaanim. ³⁴ Longku piree kan galan birmako, teerei piree kan nyimmo poshaariko ³⁵ "Shero mo ke yu diyo geren, birang ken wul ogroko in ti aarra, ³⁶ kan kaa memme me dii ti ku gee kuuno fo-minaju ye ta meeru ti po temre diyoo, longku koddi ye shii maa wanna in ya gbaaraa, shinui kpantidi ta awin po-dangi ti shii. ³⁷ Kpangi ti ku shook shurme me fo-minaju ta meeru in we shinui ti ku geren, yen kulli ne ta teuma, shii ta limma shikni ka we wau shinui shii ta yeeru shinui ding ka we sha weshiina ye shii ta bwaaro. ³⁸ Ma fo-minaju maa meena ka non-ku-yippa, koo ka koddi fuwan-ta-piri, in wa we me shookni shinui ti ku geren, kpangi ta yooroi we shook shurme. ³⁹ Pene ma peno we te, moda fo-mina an ku-mina modaa penaa koddi ye an-jiri ta warin, shii daa wessho in ri ta minanim. ⁴⁰ Ma sheema ma yu diyo geren, longku ye mai peno koddi ye La Niyo ta warinum." ⁴¹ Biiturush in tel shii ya, "Fo-mina, ke ti ku sheero temo tei ti minu ya nangii ti koo nong ya?" ⁴² Fo-mina in lignon ya, "Nang wo shook mo an-toom nong an lishaari kan shen, ye Fo-mina ta li shii ti ku dogi shooki ye ti minin weshiina po aaju ti ta dob-dok koddiroi? ⁴³ Ta yooro kpang ti ku shook teere ye fo-minanii maa meena ta waraa we shii ti ku yaani kaa te. ⁴⁴ Kulli ne ta teuma ta li shii an-toom ti ku we kirani ding. ⁴⁵ Pene ma shook teere maa nyimmaa ti poshaarini ya, 'Fo-minano ta dii bak in tang meeru,' kan shii in yiu yuyyo tuwa ti men shwiji kan men shereb shooki, birang in ti sha kan sheyani kan kennye in tuk shii, ⁴⁶ fo-mina shook teere shii ta meeru ti ta darang ye shii a nyimmom kan ti ta koddi ye shii a penom, kan fo-mina ta yiu shii in nyitto taani nyit-nyit, kan in minin po diyo ti shii ka shaayi kan mei ka lishaarim. ⁴⁷ Shook teere ye penaa nyimmono fo-minani kan a limma shikni ka ya wee shii lekam, ta yuun tuwa ti shii kping. ⁴⁸ Pene moi penom kan shii in ya wee nennaa tuwa, ta yuun tuwa ti shii geb. Pene koo nong ye minaan we gbe, lekan we gbe ti kirajui, kan me yikka we gbe, koo we gbe ta telon ti kirajui. ⁴⁹ "Ne wanna longku nen ving deet ti ku-buk, kan modaa lewan sheeno daa yikkaro wendei. ⁵⁰ Pene yikka ti gbare-do in yuuno yulma taa shilibi, kan ne turmaano daa fuwaa po yooro! ⁵¹ Ma nyimmaa maa ne wannai ka kuttan shaari ti ku-buk ya? Onngoo, Ne teka ma, pene ne wanna bwaaro ta memme. ⁵² Longku wee yikka booi, niyo fuwat ti ta mina dok, ta bwaaro shaayi, me shin tat ta kuraa me shin palau, me shin palau ta kuraa me shin tat. ⁵³ Shinui ta bwaaro taaju, fowi ta kura laani kan la ta kura foni, noni ta kura laaro kan lai ta kura nonto, gbaru yen paamun ta kura gbarumro kan an-gbarumi ta kura gbarumto." ⁵⁴ Yeesho ti ku sheeron paaro ti jimai ya, "Mam maa weyaa shunngu illina ti booli, kpantidi ma ti tewi maa, 'Ta ya doo,' kan in ya. ⁵⁵ Koddi ye pirit dang maa ti ku yaani, ma ti tewi maa, Ta ya shuwa kping,' kan in ya. ⁵⁶ Ma me an-wawo ado, ma penaa teu wee ti ku yooro ti ku-buk kan ku-dang. Ma yuwaai ka yaa ye ma ta teu wee ta yooro ti ta koddi tem mi? ⁵⁷ Longku wen ma ti ya shiire yen kpangu ti kuumam mi? ⁵⁸ Longku mam maa ta war jele an-gub kan an-jeere shabbiko, koddi ye maan kaji ti ku koko, li shikkoka we limma shakki ma maan kaji, longku shii a ta warin ken toom an-shiirem, kan an-shiire a ta minko ti me an-dau-ta-gongom, an-dau-ta-gongo in vingko ti ta mina murukum. ⁵⁹ Kulli ne ta teuko, ke peru ti po teerem ye ke maa ango dogi keni ye an-jeere shabbiko tekam."