¹ Ti ta koddi teere, peddi memmei ti po teere in sheeron ti shii pi wee yuwaaro ti shik memme Galiili ye Bilaatush deraa domju in longngoro shaayi kan dom she ding-ta-kiraju. ² Yeesho in lignon ti shinui ya, "Ma ti nyimmina maa peddi Galiili me yeka dogi memme Galiilii shasshalau ye shinui taaka shilibi kaa te ya? ³ Ne ta teuma, Onngoo. Pene mam maa for-fok mam, ma ding sheema ma ta muttani. ⁴ Koo memme me kpumu gee-pididou me muttaa ye joori ganglang buuran ti kuujui ti Shiluwam, ma ti nyimmina maa shinui yeka peddi yuyyo shasshalau ti ku me ding dii ti Urshaliima ya? ⁵ Na onngoo. Pene mam maa for-fok mam, ma ding ma ta muttani sheema. ⁶ Yeesho in sheero temo te ya, "Manni niyoi kan biro dugni ye sheewaa ti ta doongni kan shii in warui geyani koo shi ta leen shiilii ti tai pene a wam. ⁷ Niyoi in tewon ti mo an deron doo ti biroi ya, 'Gee, yuwaa sheno tat ye ne ti waru nen ti gassho shiili ti ta biro dugni te ne ti wem. Peero ti buk. Wo longku wen deero ta sha tomon buki waanii?' ⁸ "Mo an gee doongi in lignon ti shii ya, 'Wessho po sheno te ne kpomlo jelei ka oppani nen ukyon tubbo birang. ⁹ Maa sheelaa shiili ti ta sheno ye ta waru, kpang; pene maa sheelom, in ke ti buk!' " ¹⁰ Wende Yeesho ti ku shuppani ti ta dok ti shakki ta mina fur-fok Darang Nessho Yawudaawa. ¹¹ Kpantidi, manni paamuni ti po teere ye shaabug kuuloo tei po sheno kpumu gee-pididou. Tei a ti shuppo shikro ti po sheri foki dokum. ¹² Koddi ye Yeesho weyaa shiroi, shii in ye tei ya, "Paamun, shi tasshaaji ti piree kan kuulanji." ¹³ Yeesho in liin kirani ti kuuroi, kan kpantidi tei in shuppo shikro dob kan tei in kum pinno Yamma. ¹⁴ Pene mo an-toom ti ta mina fur-foki in daklo ta aani longku Yeesho niyaan ka pira Darang Nessho Yawudawwa. Longku kaa te mo an-toomi in tewi ti jimai ya, "Ka shaklo paragbanang ye ma po waru in niyan ka ma, a Darang Nessho Yawudaawam." ¹⁵ Fo-mina in lignon ti shii ya, "Ma me an wawo ado! A kulli ye koo nong ma ti piddo fwaala sho tangkani yee girbini ti po towani Darang Nessho Yawudaawa man pero peewe longku in wa we doo ka we sheyani maa? ¹⁶ Kaa te lai tei po peenno Ibiraayi, ye shuuro kpakkaa tei po joori shene kpumu gee-pididou, a nenno in piddo tei ti kira wee kpakkaa tei Darang Nessho Yawudaawa maa?" ¹⁷ Kaa ye shii tebraa ween shurme te, me ding kuraa shii shikjui in shukroro, pene jimai ding in ti ya beere ka ding we kum pi shokran shurme me shii yuwaa. ¹⁸ Nang Yeesho in tewi ya, "Gubno Yammai ka yee, kan ne ta temyanii ka wen? ¹⁹ Kaa ar-tinnyak ye manni shwijii sharaa in wa tobbina ti ta doongni, kan in kpiri in yooro gbong biro, kan adeewe ku-dang in wangittu in liyyon luwaju ti ku funga-fungai." ²⁰ Birang shii in tewi ya, "Ka wenee ye ne ta temon Gubno Yammai? ²¹ Kaa yiij ye paamun sharaa in kpisshon shaayi kan kengran lummo temme tat ye ta wiilo shik lummoi." ²² Nang Yeesho in merko tarang gok-mina kan meno-mina, in ti shuppina kan in kpaarani war Urshaliima. ²³ Manni niyoi in tewon ti shii ya, "Fo-mina, Bara memme la-wiiu me ta we mar-ku ya?" Kaa te shii in lignon ti shinui ya, ²⁴ "Ma lishik bang ka we riyani ti kattan do koko, longku, Ne ta teuma, memme gbe ta leu riyani, pene a ta dum riyanim. ²⁵ Ma an-ku minai maa illaa in nummo po dangni, nang ma ta sherani ti peewe. Ma ta ya gbaaraa kan bengo maa, "Fo-mina, au mu po dangi.' "Pene shii ta lignani in teuma ya, 'Nei pen mam koo piree ma wannanum.' ²⁶ "Nang ma ta tewani maa, 'Min shuwaa kan sheyani ti toomko kan ken shuppomu.' ²⁷ "Pene shii ta lignani ya, 'Ne teka ma na, nei pen mam. Koo ma won ti jeleno, ma me an yuyyo shek!' ²⁸ Ti po teere ma ta ya kwii kan pikro wuro ye mam maa weyaa shikno Ibiraayi, Ishaako kan Yaakubu, kan me an-pigra ding ti ta Gubno Yamma, birang ma po kuuma ta ving ma ti peewe. ²⁹ Memme ta wangittu ti booli, kan ta-vuro laddi kan dang, kan ta deeju ti ku dangla ti ta Gubno Yamma. ³⁰ Ma peno te, me katirani me shuran kuujui gbem ta yooju me an-toom, kan me shuran kuuju gbe ta yooju me an gbattokro." ³¹ Kpantidi ka biino teerei, peddi Parishaawai in waru in tewon ti shii ya, "Koo ke wa deeko won longku Iriidush leka tukko." ³² Yeesho in liginna ya koo ma wa tewo ti waak shennyi, 'Gee, Ne foraa shaabug kan nen tajiyo shik memmeno booi gbe kan dwei, kan ti ku shaklo an tat ne ta wiilo shuranno.' ³³ Ti taano koo shire, yikka ti gbare-do ti piree kan ne nen shuun toom ka tajiyo pirai booi, dwei, kan tuwa kaa ye a kumu in tuk an-pigra ti manni pirii ye maa ti Urshaliimam. ³⁴ Urshaliima, wuu Urshaliima, shi ye shi tukyaa me an-pigra kan shin kpailo ku peddi me shunna ti shikji ka shiila. Koddi gbe ye leka nen gal-doo ma ti ta baakno kaa ye non-fwee ti galin do shibaro ti ta baakro, pene man kuroma! ³⁵ Ma gee, ta minama yuwaaro gangrungi. Ne ta teuma, ma ta we shiknom we war koddi ye ma ta tewani maa, "Kpangii sheeno mo ta waru ti ta shommono Fo-mina.' "