¹ Darang nan dok ti ku Darang Nessho Yawudaawa, koddi ye shii riyaa ta mina dok ti shakki me an-toom Parishaawa longku sha weshiina, ye shnui in ti dira shii ka nimmi. ² Kpantidi, ti toomnii ka manni niyoi ye ti ku bau ossho ti kirani kan shooni. ³ Yeesho in tel me an-shubet shiire kan Parishaawa ya, "Nennaa in niina ka niyo ti ku Darang Nessho Yawudaawa ya, koo onngoo?" ⁴ Pene shinui in yooju yititi. Kaa te Yeesho in shokro shiknii, in tassho shii, kan in li biinii. ⁵ Yeeso in tewon ti shinui ya, "Wo nong ti shakki ma ye kan tangka koo girbi ye maa shuga ti ta gida-doo ti ku Darang Nessho Yawudaawa a ta kpantidi illani in wa forum mi?" ⁶ Shinui a dum ligno ween shurne tem. ⁷ Koddi ye Yeesho weyaa bino ti ku shakko ta we po diyo men kpattirin ti jele dangla sha weshiina, shii in sheero temyan in sheeron ti shinui ya, ⁸ "Ma koddi ye mondok mwinnyaako ka we sha weshiina temre, mo ko shak we po diyoko ka shikkom, longku kergum ka mo mwinnyina mo yekako. ⁹ Ma mo mwinnyaa ma ding maa foonna, shii ta teuko ya, 'Min we po diyokoi ti la-mooye,' nang ka duulan shik ke ta illo sha kuuno ye ti ta gunno ye ka toomi. ¹⁰ Pene koddi ye maa mwinnyaako, wa deeko ti piree kattani, kulang koddi ye mo mwinnyaakoi maa wanna, shii kergum ta teuko ya, 'Jeereno, ammoko dang.' Nang ta minko gba ti toom memme ding me dii ti ku dangla ka shaayi kan ke. ¹¹ Longku mo shokraa kuuni Yamma ta bek shii, pene mo beka kuuni Yamma ta shokro shii." ¹² Yeesho birang in tewi ti mo mwinnyaanii ya, "Koddi ye ke maa ta mwinnyo memme ka weshiina darang koo weshiina temre kiryippa, moko mwinnyo me an-jeereko koo ma molonko, koo ta-monako, koo me an birma me an ganglangkom, kaa ye donge shinui ta mwinnyoko po jani, kan in anngoko wee ke yuwaaju. ¹³ Pene ke maa ta ya weshiina temre kiryippa, mwinnyo me an kenni, me kuulei, me kungai kan me fuumani, ¹⁴ kan ke ta we kpang, longku shinui a ta dum anngoko fokim. Longku ta anngokoi koddi ilit ta duwa me mereju dob." ¹⁵ Koddi ye dok ti shakkiju mo dii ti ku danglai ka shaayi Yeesho yaaraa we ween shurme te, shii in tewon ti shii ya, "Kpangii sheeno mo ta sha we-ta-kele ti ta Gubno Yamma!" ¹⁶ Pene Yeesho in lignon ti shii ya, "Manni niyoi yuwaa weshiina darang, kan in mwinnyo memme gbe. ¹⁷ Koddi ye fuwaa po ya weshiina darangi, shii in shur la an-shuranni mo wa tewo ti me mwinnyaai, 'Mo waru, longku fuwaa po ya koo wen.' ¹⁸ "Shin ding peenju dok in yiu kungroju. Mondok in tewi ya, "Ne baa pillu buk, kan yikka ti gbare-do nen wa geena. Diijikujum yaaro kwiino. ¹⁹ "Mondok in tewi ya, 'Ne baa pillu tangka shirau shin fuwat, kan ne leka waraa nau shinui. Diijikujum yaaro kwiino. ²⁰ "Nang manni shwijii in tewi ya, "Ne baa digru paamun, kan ka longku kaa te ne ta dum warum.' ²¹ "Shooki in meeru in wa sheerra ti fo-minani ween shurme te. Nang fo-mina an-ku minai ta aanii in gbanoro kan in tewi ti shookni ya, 'Koo peeb-peeb ken per ku gbong koko kan jele-koko tarang minai ken wa yeeru me an kenni, me kuulei, me an fugum, kan me kungai.' ²² "Nang shooki in lignon ya, 'Fo-mina, wee ke tennai yuyaaro, kan ar wende bambiri po diyo gbe.' ²³ "Nang fo-minai in tewon ti la an-shurani ya, 'Koo ke peru ku gbong koko kan ku koko sho ken dimmuru shinui mo waru, longku ta minano in kemero. ²⁴ Longku ne taka ma, adoo mo dok ti shakki shwiji shurme me mwinnyina ka toom ta nau weshiina darangnom.' " ²⁵ Wende jima gbe ti ku yiu biino Yeesho, nang shii in shiwa dooni in tewon ti shinui ya, ²⁶ "Maa mo wanna shikno kan shii a kura foni, nonni, mannani, shibani, ma molonni shwiji kan shereb, kan koo kerangnim, shii a ta dum shiwa an yiu-shubetnom. ²⁷ Maa moi shar biro loo-kuuni kan in yiru biinom, a ta dum shiwa an yiu-shubetnom. ²⁸ Longku wo nong ti shakki ma ye shii leu dig joori ganglang a ta shaani po diyo tida in kpal-ku wee shii ta tuka koo wee shi kan te ta dum fooro wiilo shurani ya? ²⁹ Maa kaa tem, koddi ye shii teraa keli kan a dum wiilanim, me ding me ta we shiki ta yiu shwaalo shii, ³⁰ kan in ti tewi ya, 'La-mooye liyaa gun diye kan shii a dum wiilanim.' ³¹ Koo wo gub nong ye ta waraa ya gei kan manni gubi, a ta deeni dii tida in deppina kan me an pekroni koo niyoni shig dok sho kpumu ta dum nai manni gubi ye ta waru kuuni ka shwiji shig kpumu sho naa-palau ya? ³² Maa kaa tem, kaa ye tida me an geyi tali, shii ta shurin me an-shuran ti shikjui ka we deppo paaro tomon-fok. ³³ Longkuuno te, koo nong mai maa ta dum min ding wee shi kan tem, a ta dum shiwa mo an yiu-shubetnom. ³⁴ Anjaa kpang, pene maa daklaaro ta kpangi, ta meerin ka bi kpangroi ka yee? ³⁵ Birang adoo shuran kwi ti piree kan buk koo omman-shwejilakum. Ta ukkani won. Shi mo kan kumo yaarani, shero mo shii yaaro."