¹ Wende mean gal kine-buk shin ding kan peddi me an shasshalau in ti waru jeleno Yeesho ka we yaaro shii. ² Parishaawa kan me an-shubet shorono Muuja shin ding in yiu ya nyitti ya, "La-moo ye ti yiu me an shasshalau kan in me in ti sha-we kan shinui." ³ Yeesho in sheeron temo te ti shinui ya, ⁴ "Wo nong ti shakki ma, ye shii maa kan dinnyi shin shig dok sho kpumu nang dok ti shakkijui maa shekaro, a ta wessho me naa-fejereu kan fejereu ti dan-doong, in koo waraa gassho biino ye dok shekaroi ka we weeru maa? ⁵ Nang koddi ye shii weena, shii ta sharu ti ku temelli kan beere-beere. ⁶ Koddi ye shii foonna mina, shii in yeeru me an jeereni ka shaayi kan me an ganglangni, in tewon ti shinui ya, 'Ma yu beere gale kan ne, longku ne weena dinnyino ye milam shekaroi.' ⁷ Ne ta teuma kaa tei, ka beere ti ku-dang ka longku mo an shasshalau dok ye foraa-fokni in meeru shikno Yamma, ti ku memme naa-fejereu kan fejereu kaa ma me ti nyimmina ya mereju dob-dob shinui a lewo for-fokjum. ⁸ Koo manni paamuni ye kan kine-belaro shin kpumu, ma tei maa vinnga dok, oo tei a ta wul ogro, in temyo ta minai, kan in ti gasshobi ka karang we war koddi ye tei ta waan maa? ⁹ Ma tei maa weeya, tei ta ye me an jeerero kan me an ganglangro in tewon ti shinui ya, 'Ma yu beere gale kan ne, longku ne weena kineno ye milam shekaroi. ¹⁰ Kaa tei ka beere ti ku-dang ti toom me an shuranno Yamma ti ku mo an shasshalau dok ye foraa-fokni." ¹¹ Nang Yeeshoin tewi ya, "Ka manno niyoi ye kan shibani palau, ¹² kan mon-tobjui in tewi ti foni ya, 'Fono, minno po aa ti ta birma ye yuwaa sheeno.' Kaa te shii in bwaaron ta birmani ti shinui. ¹³ Bi a diyo bakum, mon-tob lai in gangl-do sharini ye shi kan te ding kan in wanni ta manni buki ye tali won, kan ti po teerei in wiilon birmani ding ti bi diyo kenni nyimmo. ¹⁴ Wende koddi ye shii tuka koo wen, gbong kpiyam in wiilo ta buk teere, nang shii in yiu gassho-we kee shik. ¹⁵ Shii in wanna in min kuuni ka we ya shuran ti manni niyoi ye ti ta buk teere, mo shuraa shii ti ta doongni ka we kang annyanshaari-mina. ¹⁶ Shii ka longku kpiyam, in yiu sha kolak ye annyanshaari-mina ti sha ka beere longku adoo niyo ti minin we ti shii ka we shaanim. ¹⁷ Pene koddi ye la-iliti meena ta nyimmoni dob, shii in tewi ya, 'Tiyee ti shakki me shookno fono me kan weshiina gbei, kan ne ti po te kpiyam ta tukno waani! ¹⁸ Ne ta wessho po te nen war shikno fono na, "Fono, ne yuwaa shasshalau ti Yamma birang kan ti ke. ¹⁹ Milam ke ti yeenoi ka laako, wende nei fooro in yeeno ka laakom; diijikujum, shiwan nen kaa dok ti shakki me shookko.' " ²⁰ Kaa te la-iliti in wessho po teere in kooru meeru shikno foni. Tidang kan talii, fonii in weeru shiknii, nang in kunngo shii, nang fowii in juuro in wa taamo shii kan shummo jaklumnii. ²¹ Nang lai in tewon ti shii ya, 'Fono, Ne yuwaa shasshalau ti Yamma kan ti ke. Wende nei fooro in yeeno ka laakom.' ²² "Fowii in tewi ti me shookni ya, 'Ma waru peeb ka lanna yen kpang, man showin ti shiknii, kan man showin ginding-po kira ti po kiranii, kan taa ti ta shoonii. ²³ Nang man yiru milmil kangan la-tangkai man kari. Shero mo kama yu temre! ²⁴ Longku milam laano murooni, kan wende shii kan dooni. Milam shekeni, kan wende weena shii.' Nang shinui in yiu ya beere. ²⁵ "Koddii laani mongbai ti doong. Kaa ye shii nemna mina, shii in yaaro ele bijiya-we kan yuyyo shor. ²⁶ Shii in ye dok ti shakki me shooki in teli ka wee ti ku yooro. ²⁷ Shooki in tewon ti shii ya, 'Molko meena mina kan foko in kar milmil kangan la-tangka ka longku ye shii meena bang.' ²⁸ "Lai mongbai in daklo ta aani kan in kuroni ri ta minai, nang fowii in peru in beng shii. ²⁹ Pene lai mongbai in liginna ti foni ya, 'Gee, gbe sheno shurme te me ne diyoo ta yuuko shuran, kan nei nau kura fokkom, kan kei nau minno la-wii ye ne po yuun temre nen yoon me an jeerenom, ³⁰ pene koddi ye laako meena, shi mo tukna birmako shin kama shereb me an piplo-we ka shikju, ken karin milmil kangan la-tangka ti shii.' ³¹ "Nang fowii in tewon ti shii ya, 'Laano, kpaaliyo ding ka ke ka shaayi, kan wee ne kan te dingii weeko. ³² Pene nennaa ka ken ya temre kan beere, longku molko te milam murooni, wende kan dooni; milam shii shekeni, kan wemde weena shii.' "