¹ Yeesho birang in tewi ti me an yiu-shubetni ya, "Ka manni niyoi kan birma ye ka an-geeku burmani, kan foki in war shiknii ya an gee-ku birmanii ti ya kalang ka we-kiranii. ² Kaa te mo an birmai in ye shii in tewon ti shii ya, 'Wo wen ye ne ti yaarra ti kuukoi? Nang shero ballo-ballii wee ke yuwaa ka birmano kan dogi wee ti kurako, longku ne ta kumani birang ken ti jooroku we kiranom. ³ "An-jooroku birmai in tewi ti kuuni ya, 'Ne ta ya wen, kaa ye fo-minano teka ya shii ta kaino ti po shuranno, ne kan bang oppo ta bukum, kan ne ta yaaro duulan-shik ka beng kine ti kira memme. ⁴ Ne penaa wee ne ta yaani, longku ye maa kayaano ti po shuran jooro ku birmai, memme ta kumani kan ne in yiuno ti ta minaju.' ⁵ Nang mo an-jooro ku birmai in yeeru koo nong me kan janno fo-minani, nang shii in tel mo ka toomi ya, ' Fo-minano ta yiu biiko jan tiyaa?' ⁶ "Shii in liginna ya, 'Digre mor wono bwatte shig pididou.' An-jooro ku birmai in tewon ti shii ya, 'Gee, kooro ballan wee ke ballaa wono. Deeko dii peeb ken ballo bwatte mor wono shig peereu.' ⁷ Nang an-jooro birmai in tel an palau an jani ya, 'Ta yiu biikoi tiyaa?' Shii in liginna ya, 'Luru shau shig paragbanang.' Shii in tewon ti shii ya, 'Gee kooro ballan wee ke ballaa wono. Shar we balla ken ballon luru shau shig peereu kan naa-pididou.' ⁸ Kaa ye an jooro ku birmai a yu dobum, pen fo-minanii kunnga pinii longku shii kan shen po gal we po kee shikni. Memme ku-buk te shinui kan ye ti ta yuun diyo ti ku-buk te kookaro ti fok memme me ti ta aaro." ⁹ Ne ta teuma, ma yu shuran ka kine yei po aa mam ka we ya jeere, longku ma birmai ma wiilaaro, shinui kergum ta dum yiu ma ti ta mina ku-dang. ¹⁰ Shi mo ye yikka poshaari ti ku wee kattani shii ta yooni an yiiu poshaari ti kuuno yen gbe. ¹¹ Ke maa an yiu poshaari ti ku wee kattanim, a ta yiu poshaari ti ku wee gbem. ¹² Nang mam maa yiu poshaarima ti ku ya shuran ka kine kan we ku-buk kpangum, wo niyo nong ye ta min ma kine po kuumai? ¹³ A doo shook ye kan fo-mina palawum, koo shi ta kuroni ye dok in leweni ye dok, dang ta min bangni ti shikno mo dok, in fulin bi ka ye doki. Ta ya shilib ken mai yiu bi Yamma kan kine." ¹⁴ Wende Parishaawa, me shinui leka kine, in yaaro ween shurme te ding, nang shinui in nwinnyo foknii. ¹⁵ Shii in tewon ti shinui ya, "Ma shiiroo kuuma ti toom memme, pene Yamma penaa poshaari ma. Wee memme ti geena kpang ding, teerei wee Yammai lewom. ¹⁶ Shorono Muuja kan balila me an-pigra kpaalaa piri we war koddi ye Yuwaana an yulma wannan. We yinna ti ta koddi teere, ti ku kaawi pi shinnyi yen tomon gubno Yamma, kan koo nong in li shikni ka we riyani. ¹⁷ Pene ta yooro maj-maj ka ku-dang kan ku-buk in wiilaju kan dok ti shakki ding ti ta shoro Muuja in shuworo. ¹⁸ Koo nong ye tuka diyoono mannani kan in digani manni yuwaa shomak, kan shi mo diga paamun ye tuka diyooro kan sheijiro yuwaa shomak. ¹⁹ "Wende ka manni mo an birma shwijii ye kpaaliyo ding ti shoppinai lanna men kpattirin kan yelek-yelek n ti sha tomon birmani kping. ²⁰ Kan manni an-bengoi ye shommoi Liyaajaru ye kannii ti po dangnii shiknii ku jal wuruk, ²¹ kan in ti dang ku sha nyittan weshiina me ti shugiyya ti jele dangla mo an birmai. Koo bai shinui ti waru in ti demlo wuruk shiknii. ²² Koddi in ya ye mo an bengoi in muroni, me an shuranno Yamma in shar shii in ammo jeleno Ibiraayi. An birmai sheeni in muroni kan in nan shii, ²³ kan ti ta deet, shwiji mo an birmai in deero dooni in we shikno Ibiraayi tali kan Laajarosh ti jeleni. ²⁴ Nang shii in yallina in tewi ya, "Fono Ibiraayi, kunnguno ken shuru Laajarosh, ye shii ta shou po kirani ti ta doo in duulon nen shik dakno, longku ne ti ku taa shilibi ti ta yiba deet.' ²⁵ "Pene Ibiraayi in lignon ya, 'Laano, nyimmo ka koddi ye ke ti ta diyoko ti ku-buk ke shuwaa tomonko, Laajoro in taa shilibi kping. Pene wende shii ti ku kem shaarinii wono, kan ke ti ta yaaya. ²⁶ Koo a kaa teerem mii, ka gbong jwal ye liina ti shakkimu kan ma, yuuna kaa tei longku mo leka teelani ti wono a ta dumanim, kan a doo mo ta dum teellu shikmu ti wonom.' ²⁷ "Shwiji mo an birmai in tewi ya, "Ne benngako ta, Fono Ibiraayi, ye ke ta shur shii ti ta minano fono, ²⁸ longku ka me ma molonno shin fuwat, ye shii ta pekro shinui yoo shinui waru wono po taa shilib te.' ²⁹ "Pene Ibiraayi in lignon ti shii ya, "Shinui kan ma Muuja kan me an-pigra; mo shinui kaan kumo ti shikjui.' ³⁰ " Shwiji mo an birmai in liginna ya, 'Onngoo, Fono Ibiraayi, pene maa mo ta illani ti ta duwa in war shikjuim, shinui a ta for fokjum. ³¹ "Pene Ibiraayi in tewon ti shii ya, 'Ma shinui maa ka kumoju ti shik ma Muuja kan me an-pigram, a doo mo ta dum dimmo shinuim koo muyen shurme illaai ti ta duwa.' "