¹ Yeesho in tewi me an yiu-shubetni ya, "Kulli ka wee ta sum lii ma ya shasshalau, Pene dogii sheeno shinui ta warinti shiknii! ² Ta ya kpang ti piree kan muyei in dawin vin issho-we ti ta bongi kan in ving shii ti ta paali kan ye shii in li dok ti shakki nyititi shibo shurme in ya kulnya. ³ Ma jooro kpang. Ma molko maa yuwaa shasshalau, pekro shii, kan ma shii maa minaa kelaa, fuddo shii. ⁴ Ma shii maa yuwaako shasshalau sho parilau, kan sho parilau in meeru shikko, in ti tewi ya, 'Ne kelaa,' yikka ti gbare-do ken fuddo shii!" ⁵ Me an kaawii in tewi ti Fo-mina ta shinui ya, "Pee-shik mu shaari mu." ⁶ Fo-mina in tewon ti shinui ya, "Mam maa kan li shaari kaa ar-tinnyak, ma ta dum tewani ti gba biro ye maa, 'Uguttu shi, kan shin sheeweji ti ta paali,' kan tei ta mur ma ku. ⁷ Pene wo nong ti shakki ma, mo kan shook ye ti ya tii kan ber-do dinnyi, ye ta tewon ti shii ye maa meena ti doong ya, 'Waru peeb ken wa deeko dii ken shai'? ⁸ Shii a ta tewon ti shooki ya, 'Yuuno we ne po shaani, kan in dau ta kumani in yuuno shuran we war koddi ye ne ta wiilo shaani kan sheyani. Nang ka bi shii in tang shaani kan ken she maa'? ⁹ Duma shii ta pammani ti shooknii longku ye shii yuwaa wee shii teka ya mo yu ya? ¹⁰ Ma sheema kaa te, mam maa yuwaa wee ding Yamma teka ya yu, ma ta tewani maa minui shookko waani. Bara min yuwaai wee nennaa minun ya.' " ¹¹ Wende Yeesho ti ku koko war Urshaliima, shii in yiwani ku-karak Shamaariya kan Galiili. ¹² Bara ye shii riyaa tarang manni meno-minai, ti po teerei shii in kpomi kan shwiji shin kpumu me shinui me an baluk. Shinui in shereju tali kan shii ¹³ kan shinui in shokro eleju ka bang in ti tewi ya, "Yeesho, Fo-mina, kunngomu." ¹⁴ Koddi ye shii weyaa shikjui, shii in tewon ti shinui ya, "Ma koo man wa shuk shik ma ti me ankpaa." Kaa ye shinui kookoju, shinui in tasshaju. ¹⁵ Koddi ye dok ti shakkiju weyaa shii tasshaani, ka ele yen bang in shiru in ti kum pinno Yamma. ¹⁶ Shii in juunani ti toomno Yeesho, in ti pammina. Shii niyo Shamaariya. ¹⁷ Nang Yeesho in ya telyo ti me ka shaayi kan shii ya, ¹⁸ "A niyo kpumu me tasshaa shinui maa? Duma me fejerewii tong? A wa niyo dok ye meena in wau Yammam bara bino ye ya? ¹⁹ Yeesho in tewon ti shii ya, "Illo, ken kooko. Li shaariko kan Yamma minaako bang shik." ²⁰ Manni darangi memme Parishaawai in tel Yeesho ya, "Duma Gubno Yamma ta warui dimin? Yeesho in lignon ti shinui ya, "Gubno Yamma a ta warui ti bi jooro warui kpingum. ²¹ A doo me ta tewani ya, 'Gee, ti wono!' koo, 'Ti wonum!' Longku gee, Gubno Yamma ti nang-shakki ma." ²² Yeesho in tewon ti shinui ya, "Manni darangi ta waru koddi ye ma ta leu we shik dok darang ti shakki La Niyo, pene ma ta weyanim. ²³ Nang shinui ta teuma ya, 'Geeru an-marku won! koo Geeru an-marku wono!' Pene mo ma pero koo juwa yoba ti biijuim, ²⁴ longku kaa ye maljo ti maljuru ti ku-dang ti kpakan-fok ku-dangno lee we war kpakan-fok ku-dangno lennyi, kaa te ye La Niyo ta yooni ti ta darangni. ²⁵ Pene ka toom shii ta taa shilibi we gbe kan ta kura shii ta ku-kira te. ²⁶ Kaa ye yuwaan ten ti ta koddino Nubu, kaa tei ta yooro ti ta darang La Niyo. ²⁷ Shinui in ti sha kan sheyani, in ti ya diyaa kan in ti mibno diyaa we war ta darang ye Nubu riyaan ta jirgi (gbong gong) kan paali in waru in tukyo shinui ding. ²⁸ Kaa ye yuuna ti ta koddino Luttu. Memme Shoodom ti ku shaani kan sheyani, pilani kan pilin, tobbani kan digyani. ²⁹ Pene ti ta darang ye Luttu peraan ti Shoodom, in reru deet kan kpiyan deet sheule ye gijii yen diwa ti ku-dang in kur shinui shin ding. ³⁰ Ka bi, tere peenno tei ta yooro ti ta darang ye La Niyo ta perin. ³¹ Ti ta darang teere shero mo ti ku daalan ku mina tewo ya shi ta shaarui pal sharni ti ta minai, kan mo mondok ye ti doong tewo ya shi ta meeru minai shar wei. ³² Nyimmo ka wee yuunaro kan manna Luttu. ³³ Maa mo leka jooro bi kerangni, a ta weyanim, pene maa moi jooro bi sheenim, ta weyani. ³⁴ Ne ta teuma, ka yippa teere ka niyo palau ti gburam dok. Ta shar ye dok, in wessho ye dok. ³⁵ Ka shereb palau ti ku issho-we ka shaayi. Ta shar ye dok, in wessho ye dok." ³⁶ Shwiji palau ti ku ya shirau ti doong, ta shar ye dok in wessho ye dok. ³⁷ Shinui in tel shii ya, "Fo-mina, wo ti tong?" Shii in lignon ti shinui ya, Piree kan nyaaran kuma, ti po teerei shelle ta gallu shaayi."