¹ Nang Yeesho in sheeron temo te ti shinui ti ku ye shinui ta diyani kpaaliya ding shinui ta yiu for-fok a doo beran taim, ² in tewi ya, "Ti ta manni gok-minai ka manni an-gub shiire ye a ti shi Yammam birang a taani ta min gba ti memmem. ³ Wende ka paamun kolo ti ta gok-mina teere, kan tei in ti waru shiknii ti kwi ti kwi ka bengo, in ti tewi ya, 'Shauno ken bwaaro ya shiire yen kpang kan an geino.' ⁴ Langku diyoo bak an gub shiirei in lewo in shau teim, pene ti ka bi shii in tewi ya, 'Kaa ye ne ti min gba ti Yammam, birang a doo wee taakano kan niyom. ⁵ Longku paamun kolo ye ti turmoma, ti ta lewanno ne ta yuun wee dob-dob ye tei a ta yiu waru shikno ti kwi ti kwim.' " ⁶ Nang Fo-mina in tewi ya, "Ma yaaro wee an-gub shiire te teka. ⁷ Pene wende Yamma a ta ya shiire ti me shii shakkaa me shinui ti ya kwii ti piree kan darang kan yippa maa? ⁸ Ne ta teima shii ta waru ka shiire yen kpang ti shinui peeb. Koo kaa tei, koddi ye La Niyo ta waru, ta waraa we lishaari ti ku-buk te ya?" ⁹ Nang birang shii in sheeron temo ti peddi me dokkaa kuuju ya shinui me an shaana kan me kuraa peddi memmei, in sheeron ya ¹⁰ "Shwiji shin palau ammaa ta mina fur-foki ka we for-fok, mo dok niyoi Parishaawa kan mo dokii an yiu kine-buk. ¹¹ Niyo Parishaawai in shereni sherii in fur-fok kaa te ti kuuni ya, 'Yamma, ne pammaako ye ne kpang a kaa dogi memmei- me an shek, me an shomak, yei kaa an yiu kine-buk yem. ¹² Ne ti yiu fokno sho palau ta shaklo parilau, nen ti minko dok ti shakki kpumu ding wee ne weyaa. ¹³ Pene mo an yiu kine-buki, in shereni won tali kan niyo Parishaawai, a dum deere dooni ti ku-dang ti piree kan Yammam, pene in yiu tudira biilini longku in shuki yaa shii mo an shasshalau, in tewi ya, 'Ai Yamma, nei an shasshalau, kunngono ken nyimmina kan ne ken fuddono.' ¹⁴ Ne ta teuma, mo an yiu kine-buk ye, meyaa shaani minani ti ta dob-dob ye Yamma fuddaan shasshalauni, ti ku niyo Parishaawa ye. Kaa te, Yamma ta bek mo shokraa kuuni, mo beka kuuni Yamma ta shokro shii." ¹⁵ Memme in ti wangittin ti shii ka nyitti shibaju longku shii in ti tau shikjui kan liin kpang ti kuujui, pene koddi ye me an yiu shubetni weyaa shiki, shinui in pekro memmei. ¹⁶ Pene Yeesho in ye shinui in tewon ya, "Ma wessho nyitti shiba mo waru shikno, mo ma foddon fokim. Longku Gubno Yammai we peenju. ¹⁷ Kulli ne ta teuma, maa mo leka ri ta Gubno Yamma, yikka shii ti gbare-do in yiwi ka kuman kan bek-ku kaa we la la-wiiu." ¹⁸ Manni mo an-toom in tel Yeesho ya, "An-shubet, kei niyo yen kpang, ne ta ya wen nen waan kerang po-ding ti jeleno Yammai?" ¹⁹ Yeesho in lignon ti shii ya, "Longku wen ke ti yeeno kaa mon kpangii? A doo mon kpangum bara Yamma shi dokni. ²⁰ Ke penaa shoroi- wessho ya shamaki, wessho tuk niyo, wessho ya jirii, wessho ya jimro shabai, min gba ti foko kan nonko." ²¹ Mo an-toomi in liginna ya, "Ween shurme te ding, ne jooraa ye ti tida ne ta ilitno." ²² Koddi ye Yeesho yaaraa teere, shii in tewon ti shii ya, "We dok waani ye ke kan tem. Yikka ti gbare-do ken pilin ka wee ke kan te ding ken bwattina ti me an-kenni, ke ta we birma ti ku-dang- kan ken waru, ken yiru biino." ²³ Pene bara ye an-toomi yaaraa ween shurme te, poshaarinii in dakloro kping, lonku shii mo an birma kping. ²⁴ Nang Yeesho in gee shik shwijii ye daklaa ta aani, in tewi ya, "Ta yooro shilib ti shil me an birma in we ri ta gubno Yamma! ²⁵ Yen kulli, ta yooro maj-maj ti penwe in ri ti ta jwal yiri, kan ye mo an birma in ri ta Gubno Yamma." ²⁶ Me yaaraa wee Yeesho teka in tewi ya, "Nang wo nong ye ta we markui?" ²⁷ Yeesho in lignon ti shinui ya, "Wee a ta dum yooro ti piree kan memmem, ta dum yooro ti piree kan Yamma. ²⁸ Biiturush in tewi ti Yeesho ya, "Oo, min wesshina koo wen mei weemu minun yiru biiko." ²⁹ Nang Yeesho in tewon ti shinui ya, "Kulli, Ne ta teuma na adoo mo wesshina mina, koo paamun, koo ma molon men shwiji, koo me an pari, koo shibo, ka longku we Gubno Yamma, ³⁰ ye shii a ta we wei gbe ye mattaa ku wee kan te ti ta kerangni ti ku peewe piri te, birang ti ku-dang ta minin kerang po-ding." ³¹ Ka bi ye Yeesho in galaa me an yiu-shubetni shin kpumu gee-palawi ding ti jeleni, shii in tewon ti shinui ya, "Ma gee, kama ammo Urshaliima, kan wee ding balilaa ti ta fok me an-pigra ti ku La Niyo ta waraa kemroro. ³² Longku ta waraa min shii ti kira mei Yawudaawam, kan shinui ta yuun we wunglo-wungloju, ta minin duulan-shik ti shii, kan in fisshon ele ti shiknii. ³³ Ka bi bibran shii, shinui ta tuk shii, kan ti ku shaklo an-tat shii ta illoni birang." ³⁴ Me an yiu-shubetnii a peno ku wee Yeesho tekam, kan paaro te lattaan tei ti shinui, kan shinui a peno wee sheeraam. ³⁵ Yeesho maa ti meeru Jeeriko, ka manni niyoi an-fugum dii ti jele koko in ti ya bengo. ³⁶ Bara ye an-fugumi yaaraa ele jimai ti ku kowani, shii in ya telyo ya, "Ti ku yooroi wen?" ³⁷ Shinui in lignon ti shii ya, "Yeesho niyo Naajeret ti ku kowani." ³⁸ Nang an-fugumi in showin ka yee ya, "Yeesho, po peenno Gub Dauda, yuuno kpang kan ken kunngono." ³⁹ Me ti ku mere ka shaayi kan Yeeshoi in pekro an-fugumi, ya mo shii yu yititi. Pene shii in yallina birang ka ele yen bang ya, "Po peenno Dauda, kunngono." ⁴⁰ Yeesho in shemo shereni in tewi ya mo warini ka shwiji teere wono. Nang koddi ye an-fugumi nemna, Yeesho in tel shii ya, ⁴¹ "Wo wen ye ke leka nen yuukoi?" Shii in liginna ya, "Fo-mina, ne leka adoono in yiu weyani." ⁴² Yeesho in tewon ti shii ya, "Yiu weyani. Lishaariko niyaan ka ke." ⁴³ Kpantidi an-fugumi in yiu we ta piri kan nang shii in yiwani biino Yeesho, in ti kum pinno Yamma. Memme ding, koddi ye shinui weyaa shik we te, shinui in kum pinno Yamma.