¹ Yeesho in ri tarang mina me ti Jeeriko ti ku kooni. ² Gee, ka manni shwijii ye ya Jakka, shii an-toom me an yiu kine-buk kan shii mo an birma. ³ Shii leka penani Yeeshoi nong, pene a ti dum we shikim ka longku gbe jimai, longku shii mon dwakra. ⁴ Kaa te shii in juwa yoba ti toom memme in wa ammani ta biro kpakal kulang ka we we shiknii, longku Yeesho ta kowani ti po teere. ⁵ Koddi ye Yeesho foonna po teere, shii in deero dooni in tewon ti shii ya, "Jakka, shaaru peeb, longku booi yikka ti gbare-do nen diina ti ta minako." ⁶ Kaa te in dauluru shaaru in kaa shii ka beere. ⁷ Koddi koo nong weyaa kaa we te, shinui in yiu ya nyitti in ti tewi ya, "Ai! Duraani ti mina mo an shasshalau ye!" ⁸ Jakka in illo shikni ti po sheri in tewi ya, "Gee, Fo-mina, bwaari palau birmano, ne ta minani ti me an-kenni, kan ne maa naka dokkaa weeno mondok, ne ta maan ka foki sho peereu." ⁹ Yeesho in tewon ti shii ya, "Booi marku wanna ta mina te, longku shi sheenii laano Ibiraayi. ¹⁰ Longku La Niyo wannai gassho-bi kan kauro memme me sheka." ¹¹ Bara ye shinui yaaraa ween shurme te, shii in sha toom ka sheero paaro ka temo, longku shii nennga Urshaliima, kan shinui in nyimmina ya Gubno Yamma nemna warito kpantidi. ¹² Longkuuno te, shii in tewi ya, "Ka manni mon gba niyo ti ta mina an-gub yuwaa meere war manni buki tali ka we yiru ti kuuni po ya-gub kan in shiru. ¹³ Shii in ye me ti yuuni shuran shin kpumu in minin kine ti shinui ya mo piime yiu yuun shuran ka kine me war koddi ye shii ta meerin." ¹⁴ "Pene me shooknii in kura shii kan in shurin la an-shuran ti biinii ya, 'Minui lewo la mooye in ya gub ti kuumum.' ¹⁵ In yooro koddi ye shii meenan birang, ye fuuna po weeru po ya-gubi, shii in tewi ti me shookni me shii minaan kine mo shinui waru shikni, kulang shii in peni shinui weenan tiyaa ti ku wee ti po shiwa shikii. ¹⁶ "Mo doki in waru toomnii in tewi ya, "Fo-mina, ne yuwaa shuran ka kineko, nen weerin we ti kwi kpumu.' ¹⁷ "Fo-mina in lignon ti shii ya, "Wee, shook yen kpang. 'Lonhku ke yuuna we yen kpang ti ku la-wiiu, ke ta ya gub ti ku gok-mina kpumu.' ¹⁸ "An-palawi in waru in tewi ya, 'Ne yuuna shuran ka kineko, nen weerin kine shin fuwat ti kwi.' ¹⁹ "Fo-minai in tewon ti shii ya, 'Yu gub ti ku gok-mina fuwat.' ²⁰ "Manni in waru in ti tewi ya, 'Fo-mina, gee kineko wono, ye ne wa liyaa kpang ti ta bangruk lanna nen lattina, ²¹ longku ne shiyaako, longku kei niyo ye po yaani shilib. Ke ti shar wee kei lim, kan ken kassho wee kei tobbom.' ²² 'Fo-minai in tewon ti shii ya, 'Ti bi paaro dakko ne ta shiiron ken, ke mo piire shook. Ke penaa nei niyo ye po yaani shilib, ti shar wee a lim, kan in ti kassho wee a tobbom. ²³ Nang longku wen kei li kineno ti po liyani, longku koddi ye ne maa meena nen wa ganglo-do weeno kan we ti kwim mi?' ²⁴ Nang Fo-mina in tewi ti me shengrii ti po teere ya, 'Ma lawwo kine ye ti kiranii, man mini ti mo kan kine kpumui.' ²⁵ "Shinui in tewon ti shii ya, 'Fo-mina, shii kan kine shin kpumu.' ²⁶ " 'Ne ta teuma, na koo nong ye kan tei ta tokkon shaarii, pene ti kira mo yei kan tem, koo ye shii kan tei ta lawwon ti kiranii. ²⁷ Pene me an geino me, shinui mei lewo nen ya gub ti kuujum, warin shinui wono in tukyo shinui ti toomno.' " ²⁸ Bara ye shii tebraa ween shurme te, shii in kooni toom we ammo Urshaliima. ²⁹ Kaa ye shii nemna meno-mina ye ti ye yaa Betapaaji kan Betani ti ku sheela ye yaa sheela jaitun, shii in shur palau ti shakki me an yiu-shubetni ya, ³⁰ "Ma war tarang meno-mina ye ti toom. Mam maa waraa, ma ta we la-girbi yei nau ammo kwim. Man piddiru man warin nen. ³¹ Ma mondok maa telaa ma ya, 'Longku wen ma ti ku piddanii?' man tewon maa, 'Fo-mina leka tei.' " ³² Me shuraa in wanna in wa we la-girbii kaa ye Yeesho tekan ti shinui. ³³ Kaa ye shinui ti ku piddo la-girbii, me an-kwi in tel shinui ya, "Longku wen ma t ku piddo la-girbii?" ³⁴ Shinui in liginna ya, "Fo-mina leka tei." ³⁵ Shinui in warin ti Yeesho, kan shinui in lippan lanna-kawoju ti ku la-girbii kan in liirin Yeesho ti kwi. ³⁶ Kaa ye shii ti ku kowani, shinui in wejiyon lanna-kawoju ti ku kokoi ³⁷ Kaa ye shii wende foonna koko po gbalani ti ku sheela Jaitun, jima galoi ding in yiu ya beere ka kum-pinno Yamma ka ele yen bang ka longku gbidina shuran-shuran me shinui weyyaa shiki, ³⁸ in ti tewi ya, "Kpangi ti ku gub ye ta waru ti ta shommono Fo-mina! Kuttan-shaari ti ku-dang kan shokrani ti Yamma mo ti ku-dang bak!" ³⁹ Peddi me Parishaawa ti ta jimai in tewon ti shii ya, "An-shubet, pekro me an yiu-shubetko." ⁴⁰ Yeesho in lignon ti shinui ya, "Ne ta teuma, ma shinui maa yuwaaju yititi, shiila me ta yallo beere-beere." ⁴¹ Koddi ye Yeesho nennga gok-minai, shii in ukko muru ka longkuuroi, ⁴² in tewi ya, "Modaa ma daa penaa ti ta darang te, koo ma, wee ta waru ma ka kuttan-shaari! Pene wende lattaan adoo ma ka shinui. ⁴³ Longku darang ta waru ti kuuma ye me an gei ma ta dig ganglang on kpomlon-fokma in ter ma ti shakki kan ti pesshojele gongoma ding. ⁴⁴ Shinui ta vutto minai in tukyo ma ding, kan shibo ma. Shinui a ta wessho shiila dok ti kuuno shattom ka longku ye mai jemlo tei koddi ye Yamma ti ku li shikni ka we kauro mam." ⁴⁵ Yeesho in ri ta Mina Yamma in yiu kajiyo bi me an piplani ka we, ⁴⁶ in ti tewi ya, "Ballii ya, 'Minano ta yooro mina po fur-fok,' pene man shiwon vuluk me an-jiri." ⁴⁷ Kaa te Yeesho in ti shuppina kpaaliya ding ti ta minano Yamma. Mongba ankpaa kan me shubet shiire, kan me an-toom memme in leu ruk shii ta shinui, ⁴⁸ pene shinui a dum we koko po yaanim, longku memmei ding keyaa kumoju ti ku yaaro paaronii kping.