¹ Darang nan dok Yeesho ti ku shuppo memme ti ta mina mina Yamma kan in kpaalo pi paaro shinnyi yen tomon kan ye mongba me ankpaa kan me an shubet shiire in waru shiknii kan me an-toom. ² Shinui in yuun paaro ya, "Teumu ka kumenno nong ye ke ti yuun ween shurme tei, koo minnako kumen ya we tei nong?" ³ Shii in lignon ti shinui ya, "Ne sheeno ne ta yuuma telyo, kan man teuno. ⁴ Yulmano Yunaana: Shaanai ti ku-dang ya nangii ti kira memme ya?" ⁵ Shinui in deppina ti shakkiju, in tewi ta shinui ya, "Kama maa teka kama ya, 'Shaana ti ku-dang,' shii ta tewani ya, 'Nang longku wen ye mai kumu kan shiim mi?' ⁶ Pene kama maa teka kama ya, 'Ti kira memme, memme ding ta kpadilo mu kama, longku shinui kunnga Yuwaanai an-pigra yen kulli." ⁷ Kaa te shinui in liginna ya shinui peno piree wannanum. ⁸ Yeesho in tewon ti shinui ya, "Ne sheeno ne ta teuma ka kumenno nong ye ne ti yuun ween shurme tem." ⁹ Yeesho in sheeron ti memmei temo te ya, "Manni niyoi tobbaa we ti ta doongni in bwattina ti me an kaakindo in ti jooro-kwi, nang in wanni tarang manni in wa diiru bak. ¹⁰ Koddi kassho weshiia doongi in shur shookni ti shik me doongi ti ta kirai mo minnini wee sheelaan ti ku doongi, pene me an gee doongi in yuurin tuwa ti shiknii, nang kairu bi kira waani. ¹¹ Nang shii in shur manni me shooki kan shinui in yuun tuwa ti shiknii, liin duulan-shik ti shiknii, birang shinui in li biinii kira waani. ¹² Birang shii in shur an tat shooki, birang shinui in liyyon pira ti shiknii, kan in ving shii won. ¹³ Kaa te, fo-mina an ku doongi in tewi ya, 'Ne ta ya wen wendei? Ne ta shur gun dok laano. Kergum shinui ti minin gba ti shii.' ¹⁴ Pene koddi ye me an gee doongi weena shiknii, shinui in jimro shik paaroi ti shakkiju ya, 'Sheyynei la po-ganglang. Shero kama tuk shii, kulang birmai in shiworo weemu kama.' ¹⁵ Shinui in ving won tali kan doongi kan shinui in tuk shii. Nang an ku doongi ta yuun wen ei shinui? ¹⁶ Shii ta waru in tukyo me an gee doong shurme, kan ta min doongi ti peddi." Koddi ye shinui yaaraa we te, shinui in tewi ya, "Mo wessho yooro kaa tei!" ¹⁷ Pene Yessho in diro shinui, in teli ya, "Wee ballii tei ta shuklo yaa wen: 'Shiila ye me an diye kuraa tei shigoro shiila ku-shugloi ya'? ¹⁸ Koo nong ye shugo ti ku shiila teere ta beblo shikni dwit-dwit, kan mo shiilai shugon ti kuunii ta isshoni buk-buk." ¹⁹ Me an shubet shiire kan men gbidina me ankpaa shinui in gassho koko po yiu shii ti ta koddi teere, longku shinui penaa shii yuwaa paaroi ti shikju. Pene shinui in shi memme. ²⁰ Shinui in ti jooro shii kping, shinui in shur me an emo me shinui shigan kuuju me dob, kulang shinui in wa we shii kan kelnyo ti ta paaroni, kulang shinui in wa min shii ti ta kira me an gub kan kumen gub Rooma. ²¹ Shinui in tel shii ya, "An-shubet, min penaa ke ti tewi kan shuppo wee dob-dob, kan ke ti shuk kaalim, pene ke ti shuppinai ka kokono Yamma ye dob kan kulli. ²² Yuwaa kpang minin anngo kine buk ti Keeshar ya koo onngoo?" ²³ Pene Yeesho penaa shenjui, kan nang shii in tewon ti shinui ya, ²⁴ "Ma shikinno shi dinaari. Wo jirimno nong kan shommono nong ti kwii?" Shinui in liginna ya, "Weeno Keeshar." ²⁵ Shii in tewon ti shinui ya, "Nang ma min ti Keeshar wee weeno Keeshar, kan ti Yamma wee weeno Yamma." ²⁶ Shinui a dum we shii kan kelnyo ti ta wee shii sheeraa ti toom memmem, pene shinui in ya maam lignoi, shinui in ya yititi. ²⁷ Koddi ye peddi Shadukiyaawa wanna shiknii, me ti tewi yaa adoo ilit ta duwom, ²⁸ shinui in tel shii ya, "An-shubet, Muuja ballina mu ya ma mollo mondok maa murooni, kan paamun, kan a patto lam, molii ta dig paamun kolono mollii, kan shii in paaton la ti molli. ²⁹ Ka manni ma moloni shin parilau, kan ye ka toomi in dig paamun, ³⁰ kan shii in muroni a kan lam, an palawi kaa teere. ³¹ An tati in dig tei, kan kaa teerei an parilawi a wessho lam, kan shii in shemo muroni. ³² Ka bi paamuni sheero in muroro. ³³ Nang darang ilit ta duwo, tei ta yooroi manna nongee? Longku shin ding parilawi digyoo tei." ³⁴ Yeesho in lignon ti shinui ya, "Ma shibo ku peewe-piri te ma ti ya diyoo kan man ti min diyoo. ³⁵ Pene me shinui fooraa posheri ilit ta duwa a ta ya diyoo ta shinuim birang shinui a ta min diyoom. ³⁶ Koo shinui in muri birang, longku shinui yuwaaju kaa me an-shuran ku-dang kan shinui shibano Yamma, me shokraa ti ta kerang yen fo. ³⁷ Pene ye ya shokraa me kumai, Muuja shuklaa, ye shii ballaan-we ti ku la duk-duk ye deet ti ku kurani, ti piree shii yeyaa Fo-mina yaa Yammano Ibiraayi kan Yammano Ishaaku kan Yammano Yaakubu. ³⁸ Wende shii a Yamma me muttaajum, pene shii Yamma me kan dooju, longku shoomjui ding dii ti toomno Yamma." ³⁹ Peddi mean shubet shoro in lignon ti shii ya, "An-shubet, ke lignoo kpang." ⁴⁰ Longku shinui a yuun telyo ti shii birangum. ⁴¹ Yeesho in tewon ti shinui ya, "Ka yee ye shinui teka ya Kiritii laano Daudai? ⁴² Longku Dauda ka shikni tenna ti ta Lakarda Jabuura ya, Fo-mina tenna ti Fo-minano ya, Deeko ti ku kira temmeno, ⁴³ we war koddi ne ta shiwan me an-geiko po tabyo shooko.' ⁴⁴ Longkuuno te Dauda in ye Kiriti yaa 'Fo-mina,' nang shii ta yooni laano Daudai ka yee?" ⁴⁵ Ti ta kumo memme ding shii in tewi ti mean yiu shubetni ya, ⁴⁶ "Ma jooro me an shubet shiire, me leka shalani ti ta lanna men jodiri kan in ti lewi in yuuju kaa ti po-piplo-we kan diyani ti ku po diyo an-gub ti ta mina fur-fok kan po diyo an-gub ti po sha temre. ⁴⁷ Shinui birang ti wiilo we-ta-mina shereb kolo, kan fur-fok kan joorii ti kudam. Longkuuno te, Yamma ta natto shinui kping."