¹ Ye tida Yeesho ti ta mina Yamma, shii in deero dooni in we me an birma ti ku mibno ding-ta-kira ti ta gurang gal kine ta mina Yamma. ² Shii in we shik manni paamun kolo an-kenni wanna in galin kinero palau ti ta gurangi. ³ Nang shii in tewi ya, "Yen kulli ne ta teuma, paamun kolo an-kenni te minaa wee gbe yeka sheejui ding. ⁴ Shin ding mibnaai ti ta birmaju. Pene paamun kolo te, ti ta kenniro, tei minaai ding wiilan-do kinero." ⁵ Kaa ye peddi ti sheerra ti ku mina Yamma, dangan pi ye nyisshaan shiki ka shiila men kwattirin kan ding-ta-kira, shii in tewi ya, ⁶ "Kaa ween shurme ye ma ti we shiki te, darang ta waru koddi ye koo shiila dok a ta wesshani ti kuuno shatto ye a ta shiwa shikim." ⁷ Nang shinui in tel shii, in tewi ta shinui ya, "An-shubet, koddi dimin ye ween shurme te ta yooroi? Teman-piri ta yooroi ka yee ye we te maa ti ku yooroi?" ⁸ Yeesho in liginna ya, "Ma jooro kpang yoo dokko ma. Longku memme gbe ta waru ti ta shommono, in ti tewi ya, 'Nei shii, ' kan, 'Koddii yuuna nimmi.' Mo ma yiu biijuim. ⁹ Koddi ye mam maa yaara pi gei kan kon-kon, mo ma yu shewom, longku ween shurme te yikka ti gbare-do in yooro ka toom, pene wiilani a ta waru kpantidim." ¹⁰ Nang shii in tewon ti shinui ya, "Buk ta illo kon kan buk, kan po ya-gub kon kan manni po ya-gubi. ¹¹ Ta yuyyo gbidina midiro shik-buk, kan ti piri peeni-peeni ta ya Kpiyam kan shwa-peewe. Ta yuyyo gbidina we shewo kan gbidina we temo ti ku-dang. ¹² Pene we te maa ta yooro, memme gbe ta yippoma in wangron man ta mina fur-fok, in min ma shilibi kping, shinui ta liima ka bang warin man toom me an gub shiire birang in shiu ma ti ta mina-muruk. Birang ta warin man toom me an gib kan me an gub Rooma, pene we te ding ka longku mai me an yiu biino. ¹³ Tene ta liyani man sheero pi paarono yen fo ye ma weyaa shiki ka adoo ma. ¹⁴ Longkuuno te, pene ma kemo shik ma, mo ma shokro poshaari mam, longku wee ma ta yaani man forin kuumai. ¹⁵ Longku ne ta min ma paaro kan shen yei adoo me an gei ma kan me an jeere paaroma ta ya jiram ya paaromai shabai. ¹⁶ Ti shakkima ka me an pariju dok, molon shaayi, me shinui ti ta aa shiiju kan me an jeereju ta shuk biijui ti me an geiju, peddi ma ta waan kaara muro. ¹⁷ Memme gbe ta kurama ka longku shommono. ¹⁸ Pene koo shok kuuma dok adoo ye ta shekanim. ¹⁹ Mam maa sheraama bang, ma ta we kerangma. ²⁰ Koddi ye ma weyaa me an bee-deet maa kpomlaa jele Urshaliima, nang ma peno koddi vubroro yuuna nimmi. ²¹ Nang shero mo me shinui ti Yawuudiya juwaju yoba in ammaju ku sheela yen joori, mo me ti tarang mina mo shinui pereju kan me ti shakki buk mo shinui wessho ri ta gok-minai. ²² Longku tei koddi nawit ye Yamma ta yaani ti Urshaliima ka longku in kemro wee me an-pigra balilaa yau. ²³ Dek-dek me kan uu kan me ti ku min wiri ti ta shaklo shurme! Longku ka taa shilibi kping, memme ta tappo ku Urshaliima. Nang Yamma ti shakki denni ta natto memme te. ²⁴ Ta tukyo shinui ka agarum, birang in pal shinui kaa me ta mina-muruk wo war bino buk. Mei Yawudaawam ta tappo ku Urshaliima we war koddi mei Yawudaawam ta kemon. ²⁵ "Nang bino-we ta yooro ti shik darang, kan tere kan ar-shal. Birang memme ku-buk te poshaariju ta illo ka longku shewo wulut shiiruk kan shanngau gbidina shiiruk. ²⁶ Memme gbe shikjui ta shukroro, birang shewo ta yiu shinui ka weyan shik wee ta yooro ti ku-buk. Longku kumen, shik ku-dang ta tarani. ²⁷ Nang ti ta koddi teere shinui ta we shik La Niyo ti ku waru ti ta shungu kan bang kumen shokrani. ²⁸ Pene ween shurme te maa yikka yuuru, ma illo po sheri man sheroma dob man deero dooma, longku mar-kuuma yuuna nimmi. ²⁹ Nang Yeesho in sheeron temyan ti shinui ya, "Ma gee ka biro dukni kan dogi biroi. ³⁰ Ma alauju maa moonna, ma ta we shiki ka shik ma man peni koddi sha-buk yuwaaro. ³¹ Birang kaa te, mam maa weyaa shik we te yikka yooro, ma peno Gubno Yamma yuuna nimmi. ³² Shero ne teuma ar paaroi, ku-kira memme te a ta muttoju ding tida wei in tang yoorom. ³³ Ku-dang kan buk ta waru in wiilaju, pene paaro a ta wiilanim. ³⁴ "Pene ma jooro kping ye poshaarima a ta kpalorom, ma wessho she men kan wee me an she men ti yai, kan mo ma turmoma ka longku wee ma leka ti ku-buk tem, birang darang te ta waru a koddi ye ma ti nyimminam, kaa ye jangra ti nummo fokro ti bi lo-ta-shwee ye shinui nyimmom. ³⁵ Kaa te ta waru ti ku me ding dii ti ku-buk te. ³⁶ Pene ma yu diyo geren koo dimin, man ti fur-fok ye ma po yooma kan bang vurum ti ta wee ta waru, birang man dum sherani ti toom La Niyo." ³⁷ Kaa te maa ka darang shii in ti shuppina ti ta mina Yamma, kan ma yippa maa yuwaa shii in pereni in wa ammoni ku Sheela Jaitun. ³⁸ Memme shin ding in ti waru shiknii kan vubnai ka longku yaaro shii ti ta mina Yamma.