¹ Wende koddi Temre We-ta-kele yei a doo yiijum yuuna nimmi, yeti tewi yaa Temre Teelani. ² Nang mongba me ankpaa kan me an shubet shoro me ti ku jooro ku koko po tuk Yeesho, pene shinui in ti shi memme. ³ Nang shuuro in ri poshaarino Yawuda Iskarooti, dok ti shakki me an yiu shubet kpumu gee palawi. ⁴ Nang Yawuda in war shik men gbidina ankpaa kan me an-toom me ti gee ku mina Yamma, nang in jimirra kan shinui koko ye ta yiwin Yeesho in minin ti shinui. ⁵ Shinui in beero kwi, kan shinui in kumi shin ta minin kine ti shii. ⁶ Yawuda in kumi, in yiu gassho koko po yiwin Yeesho kawe minin ti shinuiye jimai maa doo shinum. ⁷ Nang darang sha jong we-ta-kele in yooro, ti ku darang Temre Teelani ye ta deron dom la-galma. ⁸ Nang Yeesho in shur Biiturush kan Yuwaana ya, "Koo ma wa limmamu kama wepo shaani ti ta Temre Teelani, longku kaman wa sha." ⁹ Shinui in tel shii ya, "Ke leka minun wa limminai ti tong?" ¹⁰ Yeesho in lignon ti shinui ya, "Mam maa riyaa tarang gok-minai, ma ta kpomani kan shwiji shanna la diye doo. Ma yiu biinii we war ta mina ye shii ta riyani. ¹¹ Nang man tewon ti an ku minai maa 'An-shubet tenna ya mo min telko ya, "Mina po dur binoi ti tong, ye ne ta shuun Temre Teelani kan me an yiu- shubetnoi?' " ¹² Shii ta shuk ma shik gume ku-dang kan gbai tai limmani kpang, nang man limmirin ti po teere." ¹³ Kaa te shinui in koona, in wa we wei ding kaa ye Yeesho tekan ti shinui. Nang shinui in limmirin weshiina Temre Teelanii. ¹⁴ Bara ye koddii yuwaa, shii in deeni dii ka shaayi kan me an kaawii. ¹⁵ Nang shii in tewon ti shinui ya, "Ne leka kping nen sha Temre Teelani kan ma nen tang waraa taa shilibi. ¹⁶ Longku ne teka ma, ne ta waraa shaani birangum we war koddi ye wei ta kemon ti ta Gubno Yamma." ¹⁷ Nang Yeesho in shar la temme, nang bara ye shii pammaa, in tewi ya, "Ma yiu lee, ma bwaaro ti kuuma. ¹⁸ Longku ne teka ma, ne ta she doo shiili biro yen tomon birangum we war koddi ye Gubno Yamma ta warin." ¹⁹ Nang shii in shar we-ta-kele, nang bara ye shii pammaa, shii in beblo tai, kan in minin ti shinui ya, "Tenei lo-shikno ye minaa ka longkuuma. Ma yiu yaani kaa te ka we nyimmani kan ne." ²⁰ Kaa teerei, shii in shar la temmei ka bi washiinai, in tewi ya, "La temme tei deewaku yen fo ti ta domno, ye deraa ka longkuuma. ²¹ Pene ma ka kumama. Mo ta waraa pilin ka ne kiramu kaju ta kpomin ti ta gurangi ti ku danglai. ²² Longku La Niyo yikka ti gbare-do in kooni kaa ye deppaan. Pene dek-dekii sheeno muyei ye shii ta waraa pilin ka ne!" ²³ Shinui in yiu deppani ti shakkiju wo nong kergum ti shakkiju ye shii ta ya we te. ²⁴ Nang ti shakki me an yiu shubeti, jiram in illon ti shakkijui ti ku wo nong ye shii mon gbai. ²⁵ Yeesho in tewon ti shinui ya, "Me an gub ti ta dil ti ya gub ti ku memmejui ka bang, kan me kan kumen ti kuujui ti ye kuujui ka me an shau memme. ²⁶ Pene a ta yooro kaa te ti piree kan mam. Kan ye kaa teere, shero mo ye shii mon gbai ti shakki ma mo yooni la la-wiiu, kan mon dok ye shii an-toom, ta yooni kaa mo an shuran. ²⁷ Longku mon gbai, teerei mo deeni ti ku dangla ya, nangii mo an shuran ya? A mo deeni ti ku dangla maa? Kan ye kaa tei, ne ti shakki ma kaa mo an shuran. ²⁸ Pene mai me sheraa ka shaayi kan ne ti ta koddi nawo. ²⁹ Nang ne liyaa ma gub ti kuuma, kaa ye Fono liyaano ti kuuno, ³⁰ longku ma shaani kan sheyani ti ku danglano ti ta Gubno, kan man deema ti ku juk, man ti shiiro po-peen Ishereila kpumu gee-palau. ³¹ Biiturush, Biiturush, shuuro telaa Yamma mo minni koko ye shii ta shuuron man kaa ye ti shuuron tinnyak. ³² Pene ne fuwaa po fur-fok ka longkuuko, Shimon ye bang poshaariko a ta shuworom. Kan ke maa meena, ken kem-shik ma molonko." ³³ Shimon Biiturush in lignon ti shii ya, "Fo-mina, shikno limmani nen koona kan ke we war tamina muruk kan mina muro." ³⁴ Yeesho in liginna ya, "Ne ta teuko, ta Biiturush, gok a ta ya kwii booyum, ke ta ya jiram sho tat ka kei pennom." ³⁵ Nang Yeesho in tewon ti shinui ya, "Koddi ye ne shuraa ma a doo luru, vooro nangii taam, ma nakai ya kenni wen?" Shinui in liginna ya, "A doo wem." ³⁶ Nang shii in tewon ti shinui ya, "Pene wende, maa mo kan luru, shero mo shii sharu, birang kan mo kan vooro gal-we. Maa ka mo akan agarumum, shero mo shii pilin kan lannani yen joorii in pilin dok. ³⁷ Longku ne ta teuma, wee ballii ti kuuno yikka ti gbare-do in kemero ye ya, 'Maaraa shii ti shakki me an shasshalau.' Longku wee ballaa ti kuuno foonnai kemero." ³⁸ Nang shinui in tewi ya, "Fo-mina, gee! Ti wono ka agarum palau." Shii in lignon ti shinui ya, "Teere keraa." ³⁹ Yeesho in pereni kaa ye shii ti ya, we war ku Sheela Biro Jaitun, kan me an yiu shubeti in koon ti biinii. ⁴⁰ Koddi ye shinui fooraa, shii in tewon ti shinui ya, "Ma fur-fok kulang ma ta shuwani ti ta nawom." ⁴¹ Shii in giyoni la tali kan shinui pelle vingan shiila, nang in juunani ka po vurumi in furin-fok, ⁴² ya, "Fono, ke maa leka, shar la temme taa shilibi ye ti toomno, pene a lewan sheenom, shero mo sheeko yooro." ⁴³ Nang me an shuran ku-dang in peru ta shinui in shau shii, in pee shiknii. ⁴⁴ Yeesho ti ta taa shilibi kping, shii in fur-fok kping, nang shuwo shiknii kaa diko dom ta dikkani ti buk. ⁴⁵ Koddi ye shii illaa ti po fur-foki, shii in waru jele me an yiu shubetni in wa we shinui bablaaju ka bau kenni nang shaklo shaddina ⁴⁶ nang shii in pigra shinui in teli ya, "Weyaa ma ti ku ya shakloi? Ma illo man fur-fok yoo ma shugna ti ta nawo." ⁴⁷ Koddi ye tida shii ti ya paaro, kpantidi, jima in peru, ka shaayi kan Yawuda, dok ti kpumu gee-palawi, ti toomjui. Shii in waru nimmi kan Yeesho in taamo shii, ⁴⁸ pene Yeesho in tel shii ya, "Yawuda, ke ti ku min La Niyo ka taamo ya?" ⁴⁹ Bara ye me an biino Yeesho weyaa wee ti ku yooro, shinui in tewi ya, "Fo-mina, mo min keyyo shinui ka agarum ya?" ⁵⁰ Nang dok ti shakkijui in shemo ke shook mon gba ankpaai ka agarum, kan in peero kumo ku-kira temmenii. ⁵¹ Yeesho in tewon ya, "Teere keraa!" Shii in tau shik kumonii, nang in niyaro. ⁵² Nang Yeesho in tewi ti men gbidina me ankpaa, me an-toom me ti jooro ku Mina Yamma kan an-toom me wannai yiu shii ya, "Nei piire niyo ya ye ma ta peru ka agarum kan biroi? ⁵³ Kpaaliya ta piri ne dii ka shaayi kan ma ti ta Mina Yamma, nang mai yiunom. Pene tenei dob-dob koddi ma, koddi ye kumen dil tappaan ku-buk." ⁵⁴ Shinui in tollo shii, shinui in peren shii peewe, birang in shar shii wo war mina mongba ankpaa. Pene Biiturush in yiu bi, shakkiju la tali. ⁵⁵ Pene bara ye shinui piiroo deet ti kudam ta minai kan shinui in deeju ka shaayi, Biiturush in deennin ti shakkijui. ⁵⁶ La paamun an shuran ta minai in we shikniideeni ti jele aaran-deet, tei in diro shii kpang ka nimmi nang in tewi ta tei ya, "Niyo ka shaayi kan shii." ⁵⁷ Pene Biiturush in yooni jiram, in tewiya, "Paamun, nei peno shiim." ⁵⁸ Bi in nesshina la-wiiu manni niyoi birang in we shiknii, kan in tewi ya, "Ke sheeko kei dok ti shakki me ka shaayi kan Yeesho." Pene Biiturush in tewi ya, "Niyo, minui ka shaayum." ⁵⁹ Pelle ka bi koddi dok kooka manni shwijii in tinnoni ya, "Kulli la mooyei ka shaayi kan shii, longku shii niyo Galiili." ⁶⁰ Biiturush in lignon ya, "Shwiji, nei peno wee ke ti ku yuun paaro ti kwim." Kpantidi, koddi ye shii ti ku ya paaroi, gok in ya kwii. ⁶¹ Fo-mina in shiru dooni in geerin Biiturush. Nang Biiturush in nyimmina ka paaro ye Fo-mina tennani ya, "Booi gok maa ta ya kwii, ke ta ya jiramno sho tat." ⁶² Nang Biiturush in pereni peewe in yiu ya kwii wirit-wirit. ⁶³ Nang memme me an jooro kuuno Yeesho in parilo shii kan nwinnyo foknii. ⁶⁴ Shinui in dau adooni in paalo shii in teli ta shinui ya,"Yu pigra! Wo nong ye paalaa kei?" ⁶⁵ Birang shinui in yuyyo paaro bek ti shikno Yeesho ti shwaalon shii. ⁶⁶ Ta piri maa ti kpaalla, me an-toom in gallu dooju, men gbidina ankpa, kan me an shubet shoro in gallu ti piri dok. Nang in warin Yeesho toom galoi ⁶⁷ kan in tel shii ya, "Teumu, ke maa Kiriti." Pene Yeesho in liginna ya, "Ma nei teka ma, ma ta kumani kan nem, ⁶⁸ kan ma nei telaama, ma ta lignanim. ⁶⁹ Pene we yikka wende, La Niyo ta deeni ti ku kira temmeno mongba Fowi Yamma." ⁷⁰ Shin ding in ya telyo ya, "Kei Laano Yamma ya?" Yeesho in liginna ya, "Ma teka dob-dob ye maa nei." ⁷¹ Nang shinui in tewi ya, "Wo jimro wenee birang ye kama lakai? Weena kama yaaraan ti foknii."